İMİŞLİ: SABAHA DOĞRU SÜRƏTLİ ADDIMLAR

Ölkəmizin gözəl guşələrindən olan İmişli Aran bölgəsinin aparıcı rayonlarından biridir. Buranın bərəkətli torpaqlarında əmək bulaq kimi qaynayır, böyük ruh yüksəkliyi hökm sürür, rayon əhalisinin quruculuq səyləri hər yerdə özünü nümayiş etdirir.

Qısa müddət ərzində rayonun yaşayış məntəqələrinin siması büsbütün dəyişmişdir. 2012–ci ilin oktyabr ayında Prezident İlham Əliyevin İmişli rayonunda olması və burada inşa edilən obyektlərin açılışında iştirak etməsi imişlilərin böyük ruh yüksəkliyinə səbəb olmuşdur. İmişliyə son vaxtlar yolu düşən hər kəs əyani şəkildə görür ki, quruculuq tədbirləri nə qədər genişlənmişdir. Küçə və meydanlarda Heydər Əliyev adına parkda və onlarca digər sahələrdə görülən işləri saymaqla qurtaran deyil.

2013–cü ilin birinci rübündə uğurlar daha da artmışdır. Birinci rübün yekunlarına və qarşıda duran vəzifələrə həsr olunmuş geniş iclasda da görülmüş işlər ətraflı təhlil edildi, qeyd olundu ki, bu dövr imişlilər üçün uğurlu olmuşdur. İqtisadiyyatın əsas sahələri üzrə 70 milyon manatlıq məhsul istehsal olunmuş və ya xidmət göstərilmiş, ümumdaxili məhsul ötən ilin müvafiq dövrü ilə müqayisədə 2,1 faiz artmışdır. Bu artım ticarətdə 42,4 faiz, kənd təsərrüfatında 28 faiz, rabitədə 6,9 faiz, nəqliyyatda 4,1 faiz təşkil etmişdir. Rüb ərzində ümumdaxili məhsul istehsalı struktur tərkibinə görə sənaye üzrə 37 faiz, kənd təsərrüfatı üzrə 23,9 faiz, tikinti üzrə 18,6 faiz, ticarət üzrə 18 faiz, nəqliyyat üzrə 2,3 faiz, rabitə üzrə 0,2 faiz olmuşdur. Ümumiyyətlə götürdükdə, rayonun iqtisadiyyatında sənaye və aqrar bölmələr üzrə məhsul istehsalı aparıcı yer tutmuşdur.

İmişli rayonunun torpaqları olduqca bərəkətlidir, bütün ərazidə məhsuldarlığı artırmaqdan ötrü münbit şərait mövcuddur. Pambıqçılıq, taxılçılıq və heyvandarlıq rayon əməkçilərinin əsas məşğuliyyət sahələridir. Onlar torpaqların qədrini bilir, onun nemətlərindən yetərincə faydalanırlar, bütün torpaq mülkiyyətçiləri, adlı–sanlı fermerlər çox əməksevər insanlardır.

Rayonda cari ilin məhsulu üçün 10757 hektar sahədə buğda, 520 hektarda arpa, 191 hektarda kartof, 420 hektarda şəkər çuğunduru, 139 hektarda tərəvəz, 11 hektarda bostan məhsulları əkilmişdir. Hazırda əkinlərə aqrotexniki qaydada qulluq edilir.

Heyvandarlıq və quşçuluq sahələrinin inkişaf etdirilməsinə xüsusi diqqət yetirilmişdir. Rayon üzrə mal–qaranın sayı 89500 başa, qoyunların sayı 240470 başa, quşların sayı 1304660 başa çatmış, əvvəlki ilin müvafiq dövrünə nisbətən iribuynuzlu mal–qara 1712 baş, qoyunlar 5575 baş, quşlar 32700 baş çoxalmışdır. Bütün heyvandarlıq sahələri üzrə istehsal artmışdır. İmişli rayon Aqroservis filialı tərəfindən fermerlerə kifayət qədər xidmət göstərilmişdir.

İlin birinci rübündə emal sənayesinin inkişafı üçün görülən işlər də davam etdirilmiş, gün ərzində 200 ton kəllə qənd istehsal etmək gücündə olan İmişli Şəkər Zavodunun nəzdində kəllə qənd zavodu, qarışıq yem, bitki yağları, spirt emalı, çuğundur, yemqurutma sexləri, Qaragüvəndikli kəndinin ərazisində damazlıq yumurta istehsalat edən “Araz damazlıq quşçuluq” MMC–nin yeni sexləri, Bəhramtəpə qəsəbəsində 50 min tonluq taxıl anbarı və Xəlfəli kəndi ərazisində yeni asfalt zavodu tikilib istifadəyə verilmişdir.

İmişli şəhəri əsl tikinti meydançasına çevrilmişdir. Görülən işlər nəticəsində İmişli şəhərinin siması tamamilə dəyişmiş, şəhər son dərəcə müasirləşmişdir. Ötən müddət ərzində şəhərin Bayraq meydanında, Heydər Əliyev prospekti, Həsənoğlu, Aşıq Ələsgər, M.Əsədov, 20 Yanvar, M.Əzizbəyov, H.Aslanov və S.Ağamalıoğlu küçələrində yenidənqurma işləri davam etdirilmişdir. Heydər Əliyev prospektindəki səkilərə plitələr döşənmiş, fərdi evlərin həyətə giriş qapıları eyni formalı darvazalarla əvəz olunmuşdur. 6 hektar ərazidə yerləşən Heydər Əliyev parkında da abadlıq və yenidənqurma işləri davam etdirilmiş, parkın ərazisindəki ictimai və inzibati binaların ağlay üzlük daşlarla üzlənməsi, binaların dam örtüklərinin dəyişdirilməsi başa çatdırılmış, parkda müasir işıqlandırma sistemi, fəvvarələr quraşdırılmış, yaşıllıqlar salınmışdır. Heydər Əliyev Mərkəzi üçün yeni bina istifadəyə verilmişdir. Sahəsi 2000 kv.m olan Mərkəzdə konfrans zalı, elektron kitabxana, dərnəklər, internet klublar, xarici dil kursları fəaliyyətə başlamışdır. İmişli Regional Ədliyyə Şöbəsi üçün dördmərtəbəli inzibati binanın inşası davam etdirilmiş, bu işin avqust ayına kimi başa çatdırılması nəzərdə tutulmuşdur. Şəhərin mərkəzində “Gənclər mərkəzi”nin tikintisi qurtarmışdır. Bundan başqa, rayon tarix–diyarşünaslıq muzeyi əsaslı təmir olunmuş, muzeyin daxili tərtibatı, baxış zalları yenidən qurulmuş, buradakı eksponatların sayı 4000–ə çatdırılmışdır. Dəmiryolu vağzalının inzibat binası və vağzal meydanında hasarlar ağlay üzlük daşları ilə üzlənmiş, işıqlandırma sistemi quraşdırılmışdır. Hazırda şəhər ərazisindəki M.Sabir və Nizami adına parklarda da yenidənqurma və abadlıq işləri aparılır, istismara yararsız binalar sökülərək müasir tələblərə cavab verən yeni obyektlər tikilir.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrası ilə bağlı 2013– cü ilin birinci rübündə şəhər 5 saylı, Hacıbabalı kənd ümumi orta məktəbləri üçün yeni binaların tikintisi davam etdirilmiş, Cavadxanlı, Buludlu, Cəfərli, Sarıxanlı kənd məktəblərində bərpa işlərinə və yeni sinif otaqlarının tikintisinə başlanılmışdır.

Qarabağ müharibəsi əlilləri və şəhid ailələrinin mənzil şəraitinin yaxşılaşdırılması məqsədilə Əmək və Əhalinin Sosial Müdafiəsi Nazirliyi tərəfindən tikiləcək 6 mərtəbəli 54 mənzilli ictimai yaşayış binasının tikintisi üçün torpaq sahəsi ayrılmışdır. Rayonda məskunlaşmış məcburi köçkünlərin mənzil şəraitini yaxşılaşdırmaq məqsədilə Bəhramtəpə qəsəbəsi ərazisində 550 məcburi köçkün ailəsi üçün yeni evlərin tikintisi nəzərdə tutulmuş, bunun üçün 100 hektar torpaq sahəsi ayrılmışdır. Hazırda 325 məcburi köçkün ailəsi üçün fərdi yaşayış evlərinin tikintisi başa çatmış, qəsəbədə 360 şagird yerlik 2 yeni məktəb binası tikilmiş, 50 yerlik uşaq bağçası, inzibati bina, klub, feldşer–mama məntəqələrində inşaat işləri davam etdirilir. Qəsəbəyə elektrik və su xətləri çəkilmiş, hazırda təbii qaz xəttinin çəkilişi aparılır.

İmişli şəhərinin su təchizatının yenidən qurulması və kanalizasiya sisteminin yaradılması ilə əlaqədar “Milli su təchizatı və kanalizasiya xidmətləri üzrə ikinci layihə” çərçivəsində tikinti işləri davam etdirilir. Hazırda Beyləqan rayonunun Aşıqlı kəndi ərazisində qazılması nəzərdə tutulmuş 5 ədəd artezian quyusundan 2 ədəd kəşfiyyat quyusu qazılıb istismara tam hazır vəziyyətdədir, 4 ədəd quyuda isə qazma işləri aparılır. 29,5 kilometrlik Beyləqan–İmişli magistral su xəttinin, 1500 kubmetrlik və 2 ədəd 2500 kubmetrlik su anbarının tikintisi başa çatdırılmış, bu xətt üzərində yerləşən Şahverdili, Göbəktala, Məhəmmədli və Rəsullu kəndlərini içməli su ilə təmin etmək məqsədilə çıxışlar qoyulmuşdur. Şəhərdaxili kanalizasiya xəttinin tikinti işləri başa çatmış, kanalizasiya xətti çəkilərkən 230 ədəd dəmir–beton quyu, su kameraları inşa olunmuş, 2690 evə su xətti çəkilmişdir. Kəndlərin su təchizatını yaxşılaşdırmaq, əhalini ekoloji cəhətdən təmiz içməli su ilə təmin etmək məqsədilə indiyədək rayonun 13 yaşayış məntəqəsində modul tipli sutəmizləyici qurğular quraşdırılıb əhalinin istifadəsinə verilmişdir.

2013–cü ilin birinci rübü ərzində Ağsu–Kürdəmir–Bəhramtəpə, İmişliyə giriş və Hacıqabul–Bəhrəmtəpə–Mincivan avtomobil yolunun bəzi yerlərində təmir işləri aparılmış, 36 saylı Yol İstismarı idarəsi tərəfindən 110 min manatlıq yol tikintisi işləri yerinə yetirilmişdir. Xəlfəli–Hacımuradlı yolu hamarlanmışdır. Hacıqabul–Bəhramtəpə və İmişli–Biləsuvar avtomobil yolu da müvafiq olaraq Türkiyənin “Kolin” və Azərbaycan “AzərStar” şirkətləri tərəfindən əsaslı təmir olunur. Hacıqabul–Bəhramtəpə avtomobil yolunda torpaq yatağının və yol əsasının tikintisi davam etdirilir.

Rayon ərazisində 2715 metr məsafəyə SİP kabeli, 12110 metr məsafəyə isə naqil xətləri çəkilmiş, 956 ədəd elektron tipli sayğaclar quraşdırılmışdır. Rüb ərzində 22 ədəd müxtəlif gücdə olan transformator təmin edilmiş, 28 ədəd istismara yararsız ağac dayaqlar yeniləri ilə əvəz olunmuş, 35 ədəd dəmir–beton dayaqlar qoyulmuşdur. Rayon qaz istismar sahəsi tərəfindən İmişli şəhərinin qazlaşdırılması işi davam etdirilmiş, xeyli abonentin evinə təbii qaz xətti çəkilmişdir. Hazırda 6 mindən çox abonent təbii qazdan istifadə edir. Təhsil sahəsində mühüm işlər həyata keçirilir. Mədəniyyət müəssisələrinin işi müasir tələblərə cavab verir.

Rayonda təhsilin səviyyəsinin və keyfiyyətinin yüksəldilməsi məqsədilə mühüm tədbirlər görülür. Hazırda 63 ümumtəhsil məktəbində 15,5 minə qədər şagird təhsil alır, onların təlim–tərbiyəsi ilə 1545 müəllim məşğul olur. Rüb ərzində bir sıra məktəb binaları təmir olunmuşdur. Məktəblərin texniki təchizatına diqqət artırılmış, ümumtəhsil ocaqlarına kifayət qədər şagird partası, stol və stul, kompyuter avadanqlıqları, digər müasir tədris vasitələri verilmişdir.

Mədəniyyət və turizm sahəsində görülən tədbirlərin miqyası da getdikcə genişləndirilir. 1 mədəniyyət sarayı, 7 mədəniyyət evi, mərkəzi kitabxana, 46 kitabxana filialı, 27 klub müəssisəsi, muzey, 2 musiqi məktəbi, mədəniyyət və istirahət parkları, rəsm qalereyası sakinlərə nümunəvi xidmət göstərir. Gənclərin hərbi–vətənpərvərlik tərbiyəsi, asudə vaxtlarının təşkili, onların idmana cəlb edilməsi sahəsində ardıcıl və məqsədyönlü iş aparılır. 121 idman qurğusu, 3 bədən tərbiyəsi və sağlamlıq mərkəzi, 8500 yerlik stadion, olimpiya idman kompleksi uşaqların və yeniyetmələrin, cavanların ixtiyarındadır.

Prezident İlham Əliyevin həyata keçirdiyi tədbirlər sırasında səhiyyə ocaqlarının fəaliyyəti, onların müasir avadanlıqlarla təchizatı, yeni müalicə–profilaktika və diaqnostika müəssisələrinin istifadəyə verilməsi, tibb kadrlarının hazırlanması və yerləşdirilməsi, vətəndaşlara xidmətin yaxşılaşdırılması və sair problemlərin həlli ən öncül vəzifələrdən hesab edilir. Prezident İlham Əliyevin şəxsi təşəbbüsü ilə uzun illərdən bəri bərbad hala düşmüş mərkəzi xəstəxanaya təzə elektron müayinə cihazları və müasir avadanlıqlar alınmış, yeni şöbələr yaradılmış, istilik və elektrik enerjisi ilə fasiləsiz təminat üçün lazımi tədbirlər həyata keçirilmişdir. Hazırda burada 11 şöbə fəaliyyət göstərir, bunların arasında cərrahiyyə, terapiya, yoluxucu xəstəliklər, uşaq, doğum, təcili və təxirəsalınmaz yardım şöbələrinin xüsusi yeri vardır. Bu yaxınlarda xəstəxanada yeni Dializ şöbəsi yaradılmışdır ki, burada üçnövbəli iş sistemi tətbiq olunur, hər növbədə 5 xəstəyə yüksək keyfiyyətli xidmət göstərilir. Bəhramtəpə qəsəbə, Sarxanlı, Qızılkənd, Aranlı, Muradxanlı kəndlərində fəaliyyət göstərən tibb ocaqlarının işləri xüsusilə yaxşı təşkil olunmuşdur.

Əldə olunmuş nailiyyətlərlə kifayətlənmək İmişlidə yaşayıb yaradan insanların xarakterinə yaddır, həyata keçiriləsi və yerinə yetirilməsi nəzərdə tutulmuş işlər hələ çoxdur. Regionların inkişaf etdirilməsinə dair Dövlət Proqramının müddəalarını uğurla yerinə yetirmək üçün cari ildə rekord göstəricilərə nail olmaq rayon sakinlərinin əsas vəzifəsidir.

Sabir MUSTAFAYEV

Respublika.- 2013.- 28 aprel.- S. 10.