Dövlət gənclər siyasəti və idmanın inkişafı prioritet sahədir

Bakı Şəhər Gənclər və İdman Baş İdarəsi bu sahədə qazanılan uğurlara öz töhfəsini verməyə çalışır

2013-cü ilin başa çatmasına cəmi bir ay qalır. Hər ötən gün isə bizi yeni ilə yaxınlaşdırır. Həmişə ilin bu dövründə ictimai həyatımızın bütün sahələrini əhatə edən icra strukturları, idarə, müəssisə və təşkilatlar, ayrı-ayrı qurumlar ötən müddətdə görülən işlərə bir daha nəzər salır, artıq nəyə nail olduqlarını indidən bilirlər. Həmişə olduğu kimi, bu ildə də ölkəmizdə idman və gənclər sahələrində böyük qələbələr qazanılıb. Respublikamızda dövlət gənclər siyasəti müvəffəqiyyətlə həyata keçirilir, Azərbaycan idmanın şöhrəti ildən-ilə artır, ölkəmiz idman dövləti kimi tanınır. Bu sahədə fəaliyyət göstərən bütün qurumlar kimi, Bakı Şəhər Gənclər və İdman Baş İdarəsi də böyük uğurlara öz töhfəsini verməyə çalışır. Müsahibimiz sözügedən idarənin rəisi, Milli Olimpiya Komitəsinin üzvü Raqif Abbasovdur.

2013-cü il Azərbaycan istər dövlət gənclər siyasətində, istərsə idman və bədən tərbiyəsi sahəsində bir çox zəngin beynəlxalq turnirlərdə uğurlu çıxışlarla və ölkəmizin ev sahibliyi etdiyi tədbirlərlə yadda qalacaq. Məlumdur ki, həyatda hər bir şey müqayisə ilə ölçülür. Bu baxımdan əgər biz 2012-ci ildə gənclər və idman sahəsində əldə olunmuş nailiyyətlərlə cari ilin 10 ayı ərzində görülmüş işləri müqayisə etsək, inkişaf dinamikasının şahidi olarıq. Belə ki, dövlət gənclər siyasətilə əlaqədar bir çox “dəyirmi masa”lar, beynəlxalq simpoziumlar, konfranslar, ikitərəfli əməkdaşlığın gücləndirilməsi ilə bağlı imzalanmış sazişlər və ondan irəli gələn müddəaların icrası, bu sektoru əhatə edən normativ-hüquqi aktlar, mövcud qanunvericilik sahəsindəki yeni-yeni uğurlar göz önündə canlanır.

Xüsusi vurğulamaq lazımdır ki, Gənclər və İdman Nazirliyinin, Gənclər Təşkilatları Milli Şurasının, “İrəli” İctimai Gənclər Birliyinin, Tələbə Gənclər Təşkilatları İctimai Birliyinin və gənclər sahəsində öz fəaliyyətini qurmuş digər bir çox qeyri-hökumət təşkilatlarının müştərək gördükləri işlərdə əhali kütləsinin böyük hissəsini gənclər əhatə etmişdir. Sevindirici haldır ki, birmənalı olaraq Azərbaycanda gənclər artıq təşkilatlanıb. Bu gün ali təhsil sahəsində oxuyan gənclər tələbə hərəkatında və birilklərdə, texniki-peşə ixtisasını özlərinin gələcək yolu kimi seçənlər ayrı-ayrı qeyri-hökumət təşkilatlarında, ordudan tərxis olunmuş və həqiqi hərbi xidmətdə bu gün öz vətəndaşlıq borcunu yerinə yetirənlər isə ordu quruculuğunda çox fəaldırlar.

Azərbaycan gəncliyi hazırda əhalinin 60 faizini təşkil edir. Yaşı 35-ə qədər olan bu insanlar böyük bir kütlədir və həm də onun göstəricisidir ki, biz gənc, demoqrafik problemi olmayan bir dövlətik və əsas aparıcı qüvvəmiz, əldə olunan nailiyyətlər və görülən işlər məhz gənclər sahəsini əhatə edir. Hazırda ölkəmizdə yaşı 29-a qədər olanlar əhalinin 30 faizini təşkil edir. Bu da onu göstərir ki, Azərbaycanda gənclər siyasəti dövlətin prioritet istiqamətidir və ölkəmizdə elə bir dövlət müəssisəsi, qeyri-hökumət təşkilatı yoxdur ki, orada gənc çalışmasın.

Bakı Şəhər Gənclər və İdman Baş İdarəsi də Gənclər və İdman Nazirliyinin, Bakı Şəhər İcra Hakimiyyətinin dəstəyi ilə həyata keçirdiyi müxtəlif layihələr məhz bu məqsədi güdür ki, hər bir gənc cəmiyyətdə özünü təsdiq etsin, Vətənin, dövlətin inkişafı naminə cəmiyyətdə baş verən proseslərdən kənarda qalmasın. Belə olan halda həm təhsildə, səhiyyədə, idmanda, həm də informasiya-kommunikasiya texnologiyaları sahəsində, ixtiralarda yeni-yeni gənclərin üzə çıxması qaçılmazdır.

İdmanda əldə olunmuş nailiyyətlərdən danışanda mütləq Azərbaycanda bu sahənin maddi-texniki bazası haqqında fikir söyləmək lazımdır. Bu gün Bakı və bölgələrdə 40-dan çox Olimpiya İdman kompleksləri fəaliyyət göstərir. Burada yüzlərlə müəllim, məşqçi, hakim çalışır. Olimpiya komplekslərində müxtəlif yaş qruplarında minlərlə yeniyetmə və gənc məşğul olur. Azərbaycanda idman növlərinin coğrafiyası getdikcə genişlənir. Müxtəlif paytaxt yarışlarında, respublika birincilik və çempionatlarında, açıq turnirlərdə biz ildən-ilə artan rəqabəti görürük. Ölkə və paytaxt çempionatlarındakı rekordların sayı bunu deməyə əsas verir. Sevindirici haldır ki, kütləviliyin sayı da artır. Bu artım isə müstəqil respublikamızda idmana olan qayğının nəticəsidir. Sağlam həyat tərzinin və gələcəyin genefondunun qorunması, sağlam ordunun olması üçün məhz idmanın və bədən tərbiyəsinin təbliğində məqsəd güclü, sağlam Azərbaycan vətəndaşı yetişdirməkdir.

Bu gün Azərbaycan ulu öndər Heydər Əliyevin gənclər və idman siyasətinin davamı olaraq istənilən səviyyəli dünya miqyaslı beynəlxalq yarışlara ev sahibliyi edə bilir. Bunun üçün ölkəmiz ayrı-ayrı beynəlxalq federasiyalar, Olimpiya komitələri, Avropa Olimpiya Komitəsi ilə çox sıx əməkdaşılq edir. Bunun məntiqi nəticəsidir ki, Azərbaycan 2015-ci il şahmat üzrə dünya çempionatına, 2016-cı il şahmat üzrə Olimpiya oyunlarına, 2015-ci il Birinci Avropa İdman Oyunlarına, 2017-ci il İslam Həmrəyliyi oyunlarına ev sahibliyi edəcək. Bunlar hamısı ölkə Prezidentinin, Milli Olimpiya Komitəsinin prezidenti cənab İlham Əliyevin daim idmana olan qayğısının nəticəsidir.

İnfrastrukturu güclü, insan potensialı zəngin olan, maliyyə resursları daim artan, maddi-texniki bazası beynəlxalq standartlara cavab verən, hakim, məşqçi və idmançı kateqoriyasını yetişdirən dövlət yalnız bunu edə bilər. Respublikamızda keçiriləcək Birinci Avropa İdman Oyunlarına hazırlığın gedişinə baxış üçün gələn beynəlxalq ekspertlərin və mütəxəssislərin verdikləri rəy bir daha onu göstərir ki, qısa zaman kəsiyində ölkəmizdə idman sahəsində əldə olunmuş nailiyyətlər onilliklərə bərabərdir. İdmanda hər zaman uğurlar qazanılıb. Amma bugünkü nəticələr həm kəmiyyət, keyfiyyət, həm də idman növlərinin coğrafiyası baxımından əvvəlkilərdən köklü surətdə fərqlənir. Ona nail olmuşuq ki, Azərbaycan medalların sayına və əyarına görə dünyanın aparıcı idman dövlətləri sırasında rəqabət aparır. Nailiyyət əldə etmək asan olmadığı qədər də onu daim yüksək səviyyədə saxlamaq da çətindir. Bunun üçün mütləq əvəzedici heyət yetişməli, onların təlim-məşq toplantıları təmin olunmalı, istifadə etdikləri idman qurğuları beynəlxalq səviyyəyə cavab verməlidir. Bu istiqamətdə dövlətimizin ardıcıl, düşünülmüş, məqsədyönlü siyasəti mövcuddur. Biz əminik ki, Azərbaycanın üçrəngli bayrağı bundan sonra da dünyanın hələ bir çox ölkələrində keçirilən idman bayramlarında dalğalanacaq, himnimiz səslənəcək. Bunun üçün həm Gənclər və İdman Nazirliyi, həm də Bakı Şəhər Gənclər və İdman Baş İdarəsi və onun rayon qurumları gündəlik təsdiq olunmuş tədbirlər planından irəli gələn məsələlərin icrası ilə davamlı şəkildə məşğuldur. Möhtərəm Prezidentimiz, MOK-un rəhbəri cənab İlham Əliyev hər il idmançılarla görüşündə bu sahədə çalışanlara yeni hədəflərə çatmaq, inkişaf dinamikasını qoruyub saxlamaq və daha yüksək zirvələri fəth etmək tapşırığını verir. Buna nail olmaq üçün isə bütün idman ictimaiyyəti birgə çalışır. Əldə olunan nəticələr onu deməyə əsas verir ki, 2013-cü il gənclər və idman sahəsində müstəqillik dövrünün ən yaddaqalan və rekordlar ili olacaqdır.

Ramiz YUSİFLİ,

Respublika. - 2013.- 3 dekabr.- S.8.