Ölkəmiz beynəlxalq yarışa ev sahibliyi edir

Müstəqillik illərindən başlayaraq ümummilli liderimiz hər sahədə olduğu kimi, idmana da xüsusi diqqət yetirir, millətin gələcəyini sağlam həyat tərzində, xüsusən də gəncliyin fiziki-mənəvi sağlamlığında görürdü.

Ölkəmizin müxtəlif bölgələrində müasir tələblərə cavab verən çoxsaylı idman qurğularının inşası, idman-sağlamlıq mərkəzlərinin yaradılması, bədən tərbiyəsi və idmanın kütləviləşdirilməsi istiqamətində ardıcıl addımların atılması deyilənlərin bariz nümunəsidir. Bu gün ölkə Prezidenti cənab İlham Əliyev tərəfindən bu siyasət uğurla davam etdirilir, idmana dövlət qayğısı ildən-ilə artır, onun maddi-texniki bazası möhkəmləndirilir. İdmançılarımızın beynəlxalq yarışlarda iştirakına geniş imkanlar yaradılır, onları yeni-yeni qələbələrə ruhlandırmaq üçün bir sıra tədbirlər görülür. Bütün bunlar öz bəhrəsini verir, müxtəlif idman növlərində nailiyyətlərin sayı çoxalır, Azərbaycanın idman şöhrəti ildən-ilə artır. Ev sahibliyi hüququ qazandığımız 2015-ci ildəki şahmat üzrə Dünya kuboku, 2016-cı ildə Şahmat üzrə Olimpiya oyunları, 2015-ci ildə Birinci Avropa Oyunları Azərbaycanın idman ölkəsi olduğuna əyani bir sübutdur.

Dekabrın 5-dən 8-dək Beynəlxalq Ağır Atletika Federasiyasının İWF-Prix-II Beynəlxalq Bakı Kuboku yarışlarına ölkəmiz ev sahibliyi edəcəkdir. Yarışda 24 ölkədən 70-dək atlet qüvvəsini sınayacaq.

Azərbaycan Ağır Atletika Federasiyasının icraçı direktoru İsgəndər Əsgərovdan aldığımız məlumata görə, Azərbaycan Ağır Atletika tarixində ilk dəfədir ki, Çin, ABŞ və İtaliyadan olan ağır atletlər paytaxtımızda keçirilən yarışda iştirak edəcəklər. Ümumilikdə isə ABŞ, İtaliya və Çin ağır atletləri ilə yanaşı, Azərbaycan, Rusiya, Türkiyə, Macarıstan, Polşa, Bolqarıstan, Albaniya, İsrail, Almaniya, Avstriya, Slovakiya, Serbiya, Rumıniya, Moldova, Latviya, Litva, Ukrayna, Özbəkistan, Qazaxıstan, Qırğızıstan, və Tacikistandan olan ağır atletlər Bakı Kuboku uğrunda mübarizə aparacaq.

Ağır Atletika Federasiyasının İdman Mərkəzində keçiriləcək bu mötəbər yarışda 62 kiloqram və 69 kiloqram çəki dərəcəsində kişilər, 53 və 58 kiloqram çəki dərəcəsində isə qadınlar mübarizə aparacaq. Xatırladaq ki, iştirakçı ölkələr hər çəki dərəcəsində bir atletlə, Azərbaycan isə ev sahibi olduğu üçün hər çəki dərəcəsində 2 atletlə təmsil olunacaqdır. Ölkəmizi Bakı Kubokunda kişilərdən Valentin Xristov (62 kq), Yuri Dudoqlo (62 kq), Firudin Quliyev (69 kq) və Zülfüqar Süleymanov (69 kq), qadınlardan isə Yuliya Derkaç (53 kq), Silviya Angelova (53 kq), Kristina Yovu (58 kq) və Mərziyyə Məhərrəmova (58 kq) təmsil edəcək.

İdmançılarımıza uğurlar arzulayırıq!

M.MİRZƏ

Respublika. - 2013.- 4 dekabr.- S.7.