Poçt rabitəsi inkişafdadır

Bu gün Azərbaycanın dinamik inkişafına və iqtisadi yüksəlişinə görə dünyada öncül mövqedə dayandığı bir zamanda ölkə rabitəsinin müasir dünya tələbləri səviyyəsinə çatdırılması, son texnologiyaların yerlərdə geniş tətbiqi ən mühüm məsələ kimi dövlətimizin, Azərbaycan Prezidenti cənab İlham Əliyevin daim diqqət mərkəzində olmuş, informasiya-kommunikasiya texnologiyalarının dünya standartlarına uyğunlaşdırılması, sürətli inteqrasiyası üçün zəruri islahatlar aparılmışdır. XXI əsrdə İKT-nin inkişafı baxımından ölkəmizin yüksək irəliləyişinə nail olacağını qeyd edən ölkə başçısı, bu sahənin inkişafını respublikamızın iqtisadiyyatında əsas prioritet sahə elan etmişdir. Cənab Prezident bu barədə danışarkən vurğulamışdır: “Mən növbəti illərdə prioritet arasında, ilk növbədə informasiya-kommunikasiya texnologiyalarını görürəm, çünki, ümumiyyətlə dünyanın inkişafı bu istiqamətdə gedir. Ona görə də bu sahəyə xüsusi diqqət göstərilməlidir.” Rabitə sektorunda inkişaf və tərəqqi 2013-cü ildə özünü daha bariz şəkildə göstərir. Bu ilin fevralında ilk süni peykimiz— “Azərspace-1”in orbitə buraxılması bu inkişafın bariz nümunəsidir. Təsadüfi deyil ki, bütün bu uğurları nəzərə alan cənab İlham Əliyev 2013-cü ili “İnformasiya-kommunikasiya texnologiyaları ili” elan etmişdir.

Son illərdə, qeyd etdiyimiz kimi, Azərbaycan sürətlə inkişaf edir, bütün sahələrdə analoqu olmayan uğurlara imza atılır. Bu tərəqqi ölkə poçt rabitəsi sektorundan da yan ötməyib. Bütün sahələrlə bərabər bu mühüm sektorda da böyük nailiyyətlər əldə olunub. Bu inkişafın təməlində isə son 10 il ərzində aparılan siyasi kurs, poçt sahəsinin yüksəlişini təmin edən islahatlar, qəbul olunmuş Dövlət proqramları dayanır. Dövlət Proqramından irəli gələn vəzifələrin yerlərdə geniş tətbiqi rabitə və informasiya texnologiyaları naziri, akademik Əli Abbasov tərəfindən uğurla aparılır, onun rəhbərliyi ilə həyata keçirilən işlər öz müsbət nəticələrini verir, bütün sahələrlə bərabər ölkə poçt rabitəsi də yeni texnologiyalar əsasında modernləşir, maddi-texniki təchizat genişlənir. 1993-cü ildən Ümumdünya Poçt İttifaqının üzvü olan “Azərpoçt” MMC-nin beynəlxalq aləmdə nüfuzu getdikcə artır. Təsadüfi deyil ki, “Azərpoçt” MMC və “Azərekspresspoçt” PM-də 2012-ci ilin yekunlarına görə ÇPİ-nin qızıl səviyyəli sertifikatına layiq görülmüşlər.

“Azərpoçt” MMC-nin tabeçiliyində fəaliyyət göstərən 4 saylı poçt filialının əmək kollektivi 6 Dekabr rabitə işçilərinin peşə bayramını yüksək göstəricilərlə qarşılayır. Filialın bütün şöbə və agentliklərində poçt xidmətinin keyfiyyətinin nəticəsidir ki, kollektiv qarşısına qoyulmuş illik plan tapşırıqlarına vaxtından xeyli qabaq əməl etmişdir. Xəzər və Sabunçu rayonlarını əhatə edən 27 poçt şöbəsi, 4 agentlikdə hər cür şərait yaradılmış, şöbələr müasir texniki avadanlıqlarla təchiz olunmuşdur. Ötən dövr ərzində MXŞ, 128,151 saylı poçt şöbələri də əsaslı şəkildə təmir olunmuşdur ki, bu işlər də rabitə və informasiya texnologiyaları naziri, akademik Əli Abbasovun və “Azərpoçt” MMC-nin baş direktoru Qəmbər Bəybalayevin bizə göstərdikləri qayğının nəticəsində reallaşmışdır.

4 saylı poçt filialının bütün poçt şöbələrində bank-maliyyə xidmətləri, “Western Union”, Contact-MDB, CASPİAN MONEY TRANFEP, (UNİ Bank, Asessbank, Yapı Kredi) kredit vəsaitlərinin yığılması, valyuta mübadiləsi, Dövlət Yol Polisinin cərimələrinin yığılması və digər yeni xidmətlər də uğurla həyata keçirilir. Zamanın tələbindən irəli gələn yeni xidmətlərin göstərilməsinin nəticəsidir ki, kollektivimiz “Azərpoçt” MMC tərəfindən 2013-cü il üçün verilmiş 942800 manat tarif gəliri proqnozunu faktiki olaraq 11 ayda 954161 manat olmaqla 101,2 faiz icra etmişdir. Beləliklə proqnozla müqayisədə 11361 manat əlavə gəlirlər əldə olunmuşdur. Ötən ilin müvafiq dövrü ilə müqayisədə gəlirlər 123590 manat artmışdır. Filialın illik tarif gəliri proqnozu 11 ayda vaxtından əvvəl 6 Dekabr rabitə işçilərinin peşə bayramı ərəfəsində yerinə yetirilmişdir.

Keçən ilin müvafiq dövrü ilə müqayisədə PÖN satışı üzrə 55360 manat, pul köçürmələri üzrə 30140 manat, bağlama qəbulu üzrə 1080 manat, telefon abunə haqlarının yığımından gələn gəlirlər üzrə 9660 manat, kart satışından daxilolmalar üzrə 67420 manat, digər ticarət mallarının satışı üzrə 7050 manat, xarici valyutanın alışı və satışından gəlirlər üzrə 2960 manat, teleqramların göndərilməsindən 1960 manat gəlir artımı əldə olunmuşdur.

“Azərpoçt” MMC-nin 4 saylı Poçt filialının kollektivi bundan sonra da əzmlə çalışacaq, əhaliyə göstərilən poçt xidməti keyfiyytini daha da yüksəldəcək, iqtisadi göstəricilərinin yüksəldilməsi istiqamətində qüvvələrini səfərbər edəcəkdir.

Yaşar SEYİDOV,

Respublika. - 2013.- 6 dekabr.- S.5.