Qabaqcıl təhsil müəssisəsi

Azərbaycanda təhsilin dünyanın inkişaf tendensiyalarına və beynəlxalq stantarlara cavab verən hazırkı səviyyəyə çatması və inkişafında ümummilli liderimiz Heydər Əliyevin müstəsna xidmətlərinin olması tarixi həqiqətdir. Bu gün sürətlə dünya birliyinə inteqrasiya edən müstəqil Azərbaycan dövləti, onun çağdaş milli tarixinin son bir qərinəsi Heydər Əliyevin fəaliyyəti ilə bağlıdır və bu dövr Azərbaycan Respublikasında sosial-iqtisadi və mədəni sahələrin, xüsusilə də təhsilin inkişafında önəmli mərhələ təşkil edir.

Ulu öndərin siyasi kursunun layiqli davamçısı, Azərbaycan Respublikasının Prezidenti cənab İlham Əliyevin rəhbərliyi altında ölkəmizdə bütün sahələrdə olduğu kimi, təhsil sahəsində də həyata keçirilən çoxşaxəli, ardıcıl siyasət məhz Heydər Əliyev ideyalarının təntənəsidir.

Son on ildə möhtərəm Prezidentimizin diqqət və qayğısı sayəsində Azərbaycanda təhsil sisteminin yenidən qurulmasına nail olunmuş, təhsil ocaqlarının maddi-texniki bazasının möhkəmləndirilməsi, dünya standartlarına uyğunlaşdırılması istiqamətində ölçüyəgəlməz uğurlara imza atılmışdır.

Bu gün ölkəmizdə uğurla həyata keçirilən təhsil islahatının öncüllərindən olan qabaqcıl təlim-tərbiyə müəssisəsimiz çoxdur.

Bu müəssisələr arasında Mingəçevir şəhərindəki 10 saylı tam orta məktəbin xüsusi payı vardır desək, yanılmarıq.

1963-cü ildən fəaliyyət göstərən bu təhsil ocağında oxumuş, elmin sirlərinə bələd olaraq ölkənin və onun hüdudlarından kənarda ad-san sahibi olmuş məzunların sayı yetərincədir.

Bu qabaqcıl təhsil müəssisəsinə təcrübəli pedaqoq, respublikamızın sayılıb-seçilən müəllimlərindən olan, ölkə başçısının sərəncamı ilə bu il “Tərəqqi” medalına layiq görülmüş Xumarə xanım Mikayılova rəhbərlik edir.

Məlumat üçün qeyd edək ki, Mingəçevirin başqa təhsil müəssisələrində olduğu kimi, 10 saylı tam orta məktəbdə də uzun müddət öz yurd-yuvasından didərgin düşmüş soydaşlarımız məskunlaşmışdır.

Cari ildə ölkə rəhbərinin qayğısı sayəsində onların böyük əksəriyyəti yeni tikilmiş mənzillərə köçürülmüş, məktəbdə sinif otaqları, fənn kabinələri yenidən şagirdlərin istifadəsinə verilmişdir. Mingəçevir Şəhər Təhsil Şöbəsinin təşəbbüsü və Şəhər İcra Hakimiyyəti rəhbərliyinin müraciəti əsasında 10 saylı tam orta məktəbin yenidən və əsaslı təmiri dövlət proqramına salınmş və hazırda məktəbdə bu yönümdə qızğın iş getməkdədir.

Söhbətimiz zamanı Xumarə xanım əvvəlki illərdə olduğu kimi, 2012-2013-cü tədris ilində də pedaqoji kollektivin ürəkaçan uğurlara imza atdığını vurğulayaraq bildirdi ki, bu il məktəbi bitirmiş və ali məktəblərə sənəd verən 46 şagirdin 36 nəfəri ölkəmizin müxtəlif ali məktəblərinə qəbul olunmuşdur ki, bu da 86 faiz təşkil edir.

Fərəhli haldır ki, məktəbin iki şagirdi – Mehdiyev Pənah Dərgah oğlu və Əsgərova Ülkər Rafiq qızı təhsildə ən yüksək nəticəyə “Qızıl medal”a layiq görülmüşlər. Yeri gəlmişkən, qeyd olunmalıdır ki, 2012-2013-cu tədris ilində Mingəçevir Şəhər Təhsil Şöbəsinin tabeliyində olan 20 məktəb və 2 liseyin şagirdləri 18 “Qızıl medal”a sahib olmuşlar ki, bu da şəhərin təhsil tarixində fəxr olunası yeganə hadisədir.

Söhbət zamanı o da bəlli oldu ki, cari tədris ilində məktəbi bitirən məzunlardan 4 nəfəri 600 baldan, 8 nəfəri isə 500 baldan yuxarı göstəricilərə nail olmuşlar. Bu tədris ocağında şagirdlərin vətənpərvərlik ruhunda tərbiyəsinin düzgün qurulmasının nəticəsidir ki, idmanın müxtəlif növləri üzrə yarışlarda iki şagird respublika çempionu olmuşdur.

Texniki və humanitar fənlərə maraq qocaman təhsil müəssisəsində ilbəil yüksəlir. Aparılan düzgün elmi-metodiki işlərin nəticəsidir ki, 2012-2013-cü tədris ilində məktəbin müxtəlif siniflərində oxuyan şagirdlər respublika yarışlarında layiqli yerləri tutmaqla öz müəllimlərinə, valideynlərinə və nəhayət, yaşadıqları şəhərə başucalığı gətirmişlər.

Respublika yarışlarında qalib olmuş Zərifə Kazımova, Zeynəb Quliyeva, Şəbnəm Sərdarlı, Cəmilə Rüstəmova, Bahar Rzayeva, Atəş Məmmədov, Famil Mehdizadə və daha neçələri ilə bu gün onların müəllimləri haqlı olaraq fəxr edirlər.

Pedaqoji prosesdə istifadə olunan müasir yanaşma metodlarından səmərəli bəhrələnən müəllimlərin səyi nəticəsində beynəlxalq səviyyəli tədbirlərdə də uğurlu nəticələrə nail olunur.

Ümumdünya Poçt İttifaqının xətti ilə “Azərpoçt” MMC-nin təşkil etdiyi 42-ci epistolyar inşa müsabiqəsində 2-ci yeri tutmuş Famil Əli oğlu Mehdizadə xüsusi mükafata layiq görülmüşdür.

“Fövqalədə hallar uşaqların gözü ilə” rəsm müsabiqəsində isə I yerə layiq görülmüş Kamal Mahmudov və II yerin sahibi Fatimə Nağıyeva da məktəbə şan-şöhrət gətirmişlər.

Bu gün Mingəçevir Şəhər Təhsil Şöbəsinin rəhbərliyi altında şəhərin pedaqoji ictimaiyyəti böyük əhval-ruhiyyə və xüsusi can yanğınsı ilə çalışır. Çünki ölkə başçısı cənab İlham Əliyevin təhsilə, pedaqoji işçilərə göstərdiyi diqqət və qayğı, həmçinin Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın təhsil müəssisələrinin tikintisi və yenidən qurulması yönümündə apardığı məqsədyönlü işlər hər yerdə olduğu kimi, Mingəçevirdə də rəğbətlə qarşılanır, hamı bu qayğıya əməli işi ilə cavab vermək istəyir. İstək olan yerdə isə uğur da var, qələbə də.

İlham PƏNAHOV

Respublika. - 2013.- 6 dekabr.- S. 5.