“Dədə Qorqud” mükafatı təqdim edilmişdir

Bu günlərdə Bakının “İrşad” otelində xeyriyyəçi, psixoloq, iş adamı Gülnarə Əhmədovanın “Dədə Qorqud” mükafatı ilə təltif olunması ilə əlaqədar tədbir keçirilmişdir.

Müharibə və Əmək veteranlarının, dövlət adamlarının, ayrı-ayrı ictimai birliklərin və KİV nümayəndələrinin iştirakı ilə keçirilmiş tədbiri “Dədə Qorqud” Milli Fondunun prezidenti, “Azərbaycan dünyası” beynəlxalq jurnalının baş redaktoru Eldar İsmayılov açmış və mərasimdə iştirak edən qonaqları salamlayaraq demişdir:

—Gülnarə Əhmədova 1995-ci ildə İmişli rayonunun Telişli kəndində öz şəxsi vəsaiti hesabına “Fatimeyi-Zəhra” Məscidini tikdirmişdir.

Biz Gülnarə xanımın təşkilatçılığı ilə Əlillər evində, internat məktəblərində dəfələrlə olmuşuq. Təsərrüfatla, heyvandarlıqla məşğul olan bu nəcib xanımın bu cür xeyirxahlığı gənclərə əsl nümunədir.

Eldar müəllim “Dədə Qorqud” mükafatını Gülnarə Əhmədovaya təqdim etdi.

Sonra iştirakçılar tanınmış jurnalist-rejissor Bəxtiyar Qaracanın “Həyat hekayələri” filminə maraqla tamaşa etmişlər. Filmdə Gülnarə Əhmədovanın internat evlərində, cəzaçəkmə müəssisələrində, “SOS” uşaq kəndlərində keçirdiyi xeyriyyəçilik tədbirləri ilə yanaşı, doğma kəndində ucaltdığı əzəmətli məsciddə insanların keçirdiyi dini mərasimlərdən hissələr göstərilmişdir.

Tədbirin aparıcısı Dünya Azərbaycanlıları Mədəniyyət Mərkəzinin vitse-prezidenti, sabitlik və inkişaf mərkəzinin sədri Rasim Məmmədov Gülnarə Əhmədovanın fəaliyyətini, xeyriyyəçilik missiyasını yüksək qiymətləndirmiş və demişdir:

—Bu gün Azərbaycanda elə bir münbit şərait yaradılmışdır ki, bu cür xeyriyyəçiliklə hər bir imkanlı iş adamı, vətəndaş məşğul olmalıdır. Ümummilli lider Heydər Əliev siyasətinin bu gün uğurla davam etdirilməsi və bu siyasət kursunun layiqli davamçısı ölkə Prezidenti İlham Əliyev cənablarının gördüyü böyük işlər, ölkədə gedən sürətli inkişaf insanlarda da mərhəmət hissini daha da artırmışdır.

Heydər Əliyev Fondunun Prezidenti, UNESCO və İSESCO-nun xoşməramlı səfiri, millət vəkili Mehriban xanım Əliyevanın istər muğam sənətinin təbliğində, istərsə də səhiyyə, elm, mədəniyyət sahəsində gördüyü əvəzsiz xidmətləri, kimsəsiz ailələrə, uşaqlara göstərdiyi diqqət və qayğı hər birimizi ruhlandırır.

Gülnarə xanımın xeyriyyəçilik fəaliyyəti, həqiqətən, alqışlara layiqdir.

Tanınmış ictimai-siyasi dövlət xadimi, sabiq baş nazir Rəhim Hüseynov, ADPU-nun filologiya fakültəsinin dekanı, dilçi alim-professor Buludxan Xəlilov azərbaycanlı bir xanımın gördüyü bu xeyirxah işlərdən məmnunluq bildirmiş və Gülnarə Əhmədovanı təbrik etmişlər.

Qarabağ müharibəsi veteranı, polis mayoru, şairə Aida Şirin demişdir ki, tanınmış muğam ustası, Azərbaycanın əməkdar artisti Könül Xasiyevanın məlahətlə oxuduğu mahnılar, xüsusilə “Gecələr” klipinin çəkilişində, eləcə də ümummilli lider Heydər Əliyevin 90 illik xatirəsinə həsr olunmuş klipin (ifaçı Azərbaycanın əməkdar artisti Aygün Zeynalovadır) ərsəyə gəlməsində Gülnar Əhmədovanın fəaliyyəti xüsusilə təqdirəlayiqdir.

Sosialist Əməyi Qəhrəman, əmək və müharibə veteranı Ömər Ağayev, BDU-nun professoru Əsədulla Qurbanov, “Əsrin ziyalıları” Xeyriyyə İctimai birliyinin sədri, şairə Məleykə Göyçəli, həkim-şairə Sədaqət Zeynalova, Bakı milyonçusu Ağa Musa Nağıyevin varisi, Prezident təqaüdçüsü Dilarə Nağıyeva, “Dədə Qorqud” Fondunun Ağsaqqalar Şurasının üzvü Hacı Əvəz Sərraf, BDU-nun dosenti, satirik şairimiz Mirzə Ələkbər Sabirin nəvəsi Sevda Tahirli, Respublika Veteranlar Şurasının məsul işçisi Rasim Muxtarov, jurnalistlərdən Lalə Hüseynova, Rauf Allahverdiyev və başqaları bu nəcib, xeyirxah işdə xeyriyyəçi Gülnarə Əhmədovaya uğurlar arzulamışlar. Sonda Gülnarə Əhmədova ölkədə iş adamları, fermerlər üçün sağlam bir şəraitin yaradıldığını vurğulayaraq ölkə Prezidenti İlham Əliyevə minnətdarlığını bildirmişdir.

Rauf İLYASOĞLU

Respublika. - 2013.- 6 dekabr.- S.5.