Aqrar
sahibkarlığın inkişafı və ərzaq təhlükəsizliyi
Respublikamız müstəqillik əldə etdikdən sonra, digər keçmiş ittifaq respublikalarında olduğu kimi, Azərbaycanın da iqtisadiyyatında tənəzzül və iqtisadi böhran yaranmağa başladı. O vaxtlar kənd təsərrüfatında əsas təsərrüfat formaları olan kolxoz və sovxozlar artıq lazımi səviyyədə fəaliyyət göstərə bilmir və iqtisadi böhran getdikcə dərinləşirdi. Bununla yanaşı, istehsal vasitələri, maşın və avadanlıqlar fiziki və mənəvi cəhətdən köhnəlir, maliyyə çətinliyi ilə əlaqədar yenisini almaq praktiki cəhətdən mümkün olmurdu. Eyni zamanda Ermənistanın Azərbaycan Respublikasına qarşı torpaq iddiası və hərbi təcavüzü nəticəsində respublika ərazisinin 20 faizinin işğal edilməsi, bir milyondan artıq insanın öz doğma yurd-yuvasından qaçqın və məcbruri köçkün düşməsi vəziyyəti daha da ağırlaşdırırdı. Belə bir vəziyyətdə xalqın tələbilə yenidən respublikanın rəhbərliyinə gələn ümummilli lider Heydər Əliyev iqtisadiyyatın tənəzzüldən xilas edilib inkişafına nail olmağın yeganə yolunun islahatlar olduğunu bildirdi.
Ölkədə
iqtisadi islahatların aparılmasının zəruriliyi qərarına
gəldikdən sonra Heydər Əliyevin rəhbərliyi ilə
sovxoz, kolxoz və digər kənd təsərrüfatı
istehsalı müəssisələrində aqrar islahatların
aparılması üçün hüquqi baza
yaradıldı. Belə ki, 1995-ci ildə
“Aqrar islahatının əsasları haqqında”, “Sovxoz
və kolxozların islahatı haqqında” və 1996-cı ildə
“Torpaq islahatı haqqında” Azərbaycan Respublikası
qanunları və digər normativ-hüquqi sənədlər
qəbul edildi. Bununla yanaşı, kənd təsərrüfatında
fəaliyyət göstərən xidmət və emal sənayesi
müəssisələrinin özəlləşdirilməsı
qəbul olunmuş I və II Dövlət Proqramları əsasında
həyata keçirildi.
Aqrar
islahatların birinci mərhələsində sovxoz, kolxoz və
digər kənd təsərrüfatı istehsalı müəssisələrinə
məxsus torpaq və əmlakın özəlləşdirilməsi
başa çatmışdır. Aqrar islahatlar nəticəsində
1970 kolxoz və sovxoz ləğv edilmiş, onların 280,7
milyon manat məbləğində dövlət borcu
silinmişdir. Ləğv edilən təsərrüfatların
torpaqları özəlləşdirilərək 871 minə
yaxın ailə torpaq payı almış, mülkiyyətçilər
yaranmışdır. Aqrar sahədə
yaradılmış əlverişli şərait nəticəsində
842 minə qədər xırda (ailə-kəndli) təsərrüfatı,
36 dövlət təsərrüfatı (məhdud məsuliyyətli
cəmiyyət), 79-dan çox kənd təsərrüfatı
istehsal kooperativi, 2409 kənd təsərrüfatı müəssisəsi
(birgə təsərrüfatlar), 2571 fərdi sahibkarlar və
220 sair kənd təsərrüfatı müəssisəsi
(elmi-tədqiqat, tədris, təcrübə və s.) təsərrüfat
formaları yaradılmışdır.
Aqrar
islahatların birinci mərhələsinin əsas nəticələrini
aşağıdakı kimi səciyyələndirmək olar:
respublikanın kənd ərazisində torpaq və əmlaka
sahiblik hissi artmışdır, əhalidə mülkiyyətçilik
psixologiyası formalaşmağa başlamış,
insanların sərbəst fəaliyyətə,
yaradıcılığa meyli güclənmiş, kənd təsərrüfatında
torpaq və əmlak üzərində xüsusi mülkiyyətçilik
bərqərar olunmuşdur. Kənddə kiçik və
orta sahibkarlığın inkişafına şərait
yaxşılaşmışdır. Aqrar sahədə
müasir texnika və texnologiyalar, yeni bilik və informasiyalar
şəbəkəsi genişlənir, kənd təsərrüfatında
torpaq və əmlakdan səmərəli istifadəyə
imkanlar artmışdır.
Kənd təsərrüfatı məhsullarının istehsalı, emalı və xidmət sahələri ilə məşğul olan təsərrüfatların gələcək inkişafı, onların rentabelli işləmələri, dünyada və ölkəmizdə mövcud olan elmi nailiyyətləri, qabaqcıl təcrübə, məhsuldar bitki sortları və heyvan cinsləri, texnika və texnoloji avadanlıqların daha səmərəli tətbiqi, onların ortaq problemlərinin həllinin asanlaşması, səmərəli fəaliyyət göstərmələri üçün pay torpaqları əsasında formalaşmış kiçik ölçülü təsərrüfatların könüllülük əsasında kooperasiyalarda birləşməsi istiqamətində maarifləndirmə işləri aparılır. “Azərbaycan Respublikası regionlarının sosial-iqtisadi inkişafı Dövlət Proqramı” (2004-2008-ci illər) 11 fevral 2004-cü il, “Aqrar bölmədə idarəetmənin təkmilləşdirilməsi tədbirləri haqqında” 23 oktyabr 2004-cü il, “Aqrar bölmədə lizinqin genişləndirilməsi sahəsində əlavə tədbirlər haqqında” 23 oktyabr 2004-cü il, “Kənd təsərrüfatı məhsulları istehsalçılarına dövlət dəstəyi haqqında” 23 yanvar 2007-ci il, “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” 21 avqust 2008-ci il, “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı” 25 avqust 2008-ci il, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” 14 aprel 2009-cu il tarixli sərəncam, fərman və digər sənədlər qəbul olunmuşdur. Həyata keçirilən bu tədbirlərin əsas məqsədi ölkədə qeyri-neft sektorunun inkişafının sürətləndirilməsinə, makroiqtisadi sabitliyin qorunub saxlanmasına, davamlı sosial-iqtisadi inkişafa və əhalinin gəlirlərinin artırılmasına nail olmaqdan ibarət olmuşdur.
Təhlil
göstərir ki, ölkəmiz müstəqillik əldə
etdikdən sonrakı illərdə iqtisadi və təşkilati
tədbirlərin həyata keçirilməsi davam
etdirilmişdir:
—sahibkarların
fəaliyyətlərinə müdaxilələr ləğv
edilmişdir;
—kəndli
sahibkarlar torpaq vergisi istisna olmaqla 2019-cu ilin yanvar ayınadək
bütün vergilərdən azad olunmuşlar;
—ölkəyə
gətirilən bir sıra maddi vasitələr və toxumlar
gömrük rüsumlarından azad olunmuşdur;
—kənd
təsərrüfatı məhsullarının
istehsalçılarının texnika və avadanlıq əldə
etmələri üçün lizinq tətbiq edilmiş, onun
şərtləri sadələşdirilmişdir;
—beynəlxalq
təcrübənin ölkəmizdə yayılması
üçün aqrar sahəyə dair layihələrin tətbiqi
genişləndirilmişdir;
—regionların
inkişafı və diversifikasiyası məqsədilə emal
müəssisələri və xidmətlər
yaradılmış, özəl toxumçuluq, damazlıq və
baytarlıq xidmətləri dəstəklənmişdir;
—sahibkarların
tələbatını ödəmək üçün
kreditləşmə mexanizmi sadələşdirilmiş, tələbatın
ödənilməsində prioritet istiqamətlərə
önəm verilmişdir;
—sahibkarların
tələbatı nəzərə alınaraq bölgələrdə
informasiya—məsləhət xidmətinin genişləndirilməsinə
diqqət artırılmışdır;
—kənd
təsərrüfatı məhsullarının
sığortalanmasına maliyyə yardımının
ayrılmasına nail olunmuşdur.
2012-ci il
fevralın 28-də “Baku Expo” Mərkəzində “Azərbaycan Respublikası
regionlarının 2009-2013-cü illərdə sosial-iqtisadi
inkişafı Dövlət Proqramı”nın icrasının
üçüncü ilinin yükunlarına həsr
olunmuş konfransda cənab Prezident İlham Əliyev
özünün giriş nitqində “Ölkəmizin
inkişafı sahibkarlığın inkişafından
asılıdır” söyləməklə, ölkə rəhbərliyinin
sahibkarlığa yüksək önəm verdiyini bir daha bəyan
etmişdir.
Məlum olduğu kimi, ölkəmizdə sahibkarlıq fəaliyyəti
dövlət tərəfindən qanunvericilik, büdcə,
vergi, pul-kredit və digər stimullaşdırma sistemləri
ilə tənzimlənir. Aqrar sahədə sahibkarlıq fəaliyyətinin
inkişaf etdirilməsi məqsədilə
aşağıdakı istiqamətlərdə ardıcıl tədbirlər
həyata keçirilmişdir. Qanunvericilik
bazası yaradılmışdır. Aqrar
sahədə sahibkarlıq fəaliyyətinin inkişaf etdirilməsi
üçün çoxsaylı qanunlar, dövlət
proqramları, Azərbaycan Respublikası Prezidentinin fərman və
sərəncamları, Nazirlər Kabinetinin qərarları və
digər normativ-hüquqi aktlar qəbul edilmişdir.
İstehsalçılara vergi güzəştləri
verilmişdir.
“Kənd təsərrüfatı məhsulları
istehsalçılarına müddətli vergi güzəştlərinin
verilməsi haqqında” Azərbaycan Respublikasının 2001-ci
il 27 noyabr tarixli Qanunu ilə kənd təsərrüfatı
məhsulları istehsalçıları 2001-ci il yanvarın
1-dən başlayaraq 3 il müddətinə torpaq vergisi istisna
olmaqla, qalan bütün növ vergilərdən azad
edilmişdir. Qanunun qüvvədə olma
müddəti 1 yanvar 2019-cu ilədək
artırılmışdır.
Bundan əlavə, ölkədə
sahibkarlığın inkişaf etdirilməsi məqsədi ilə
Nazirlər Kabinetinin müvafiq qərarları ilə
Respublikamıza gətirilən bir sıra mallar, o cümlədən
kənd təsərrüfatı təyinatlı mallar əlavə
dəyər vergisindən azad olunmuşdur.
Subsidiyaların verilməsi təmin edilmişdir. Hazırda kənd
təsərrüfatı məhsulları istehsalçılarına
bir neçə istiqamətdə subsidiyalar verilir. Bunlar yanacaq və
motor yağlarına; buğda və çəltik səpininə,
mineral gübrələrə, yüksək keyfiyyətli 1-ci və
2-ci reproduksiyalı toxumlara (tinglərə) və Elmi-Tədqiqat
təşkilatlarına orijinal, superelit və elit toxumlara
çəkilən xərclərin ödənilməsinə
görə verilən subsidiyalardır.
“Kənd
təsərrüfatı məhsulları
istehsalçılarının toxum, gübrə və
damazlıq heyvanları ilə təmin edilməsinə əlavə
dəstək verilməsi barədə” Azərbaycan
Respublikası Prezidentinin 2008-ci il 21 avqust tarixli Sərəncamına
əsasən, heyvanların məhsuldarlığının
yüksəldilməsi, onların cinslərinin
yaxşılaşdırıması və damazlıq
heyvanların sayının artırılması məqsədi
ilə 2008-2009-cu illərdə xaricdən damazlıq
heyvanların idxal olunması və bu işlə məşğul
olan kənd təsərrüfatı məhsulları
istehsalçılarına 50 faiz güzəştli lizinq yolu
ilə satılması nəzərdə tutulmuşdur. Bu tədbirin
həyata keçirilməsi üçün 2008-ci ildə 3,5 milyon manat, 2009-cu ildə 3,0 milyon manat
büdcə vəsaiti sərf olunmuşdur. Xaricdən
damazlıq heyvanların alınması üçün Azərbaycan
Respublikası Prezidentinin müvafiq sərəncamları ilə
2010-cı ildə 3 milyon, 2011-ci ildə 5 milyon manat vəsait
ayrılmışdır.
2007-2012-ci
illər ərzində ümumilikdə yanacaq və motor
yağlarına, həmçinin buğda və çəltik
səpininə görə cəmi 467,1 milyon manat, mineral
gübrələrin güzəştlə satılmasına
görə 72,2 milyon manat, 1-ci və 2-ci reproduksiyalı
toxumların və tinglərin satılmasına görə
28,4 milyon manat, Elmi-Tədqiqat təşkilatlarına orijinal,
superelit və elit toxumlara çəkilən xərclərin
ödənilməsinə görə 5,0 milyon manat subsidiya
verilmişdir. Ümumilikdə həmin illərdə kənd təsərrüfatı
məhsulları istehsalçılarına cəmi 572,7 milyon manat məbləğində subsidiya
verilmişdir.
İnkişaf etmiş ölkələrdə dövlət
tərəfindən birbaşa və ya dolayısı ilə
ayrılan subsidiyalarla yanaşı, bu sahədə
sahibkarlıq fəaliyyəti ilə məşğul olan
hüquqi və fiziki şəxslərin maliyyə
çatışmazlığı probleminin aradan
qaldırılması üçün güzəştli
şərtlərlə kreditlər verilməsi, verilən
kreditlərə görə istehsalçının ödəməli
olduğu faiz məbləğinin müəyyən hissəsinin
dövlətin büdcə vəsaiti və ya xüsusi
fondların vəsaitləri hesabına ödənilməsi təcrübəsi
vardır. Təhlil göstərir ki, bütün inkişaf
etmiş ölkələrdə kənd təsərrüfatı
məhsulları istehsalçıları müxtəlif
formalarda dövlət tərəfindən dəstəklənir
və onlara dövlət büdcəsindən yardım olunur.
Öz ölkələrinin ərzaq təhlükəsizliyini
təmin etmək və kənd əhalisinin şəhərə
ifrat axınının (miqrasiyasının)
qarşısın almaq məqsədilə əksər
dövlətlər aqrar sektoru subsidiyalaşdırmaq məcburiyyətində
qalırlar. Məhsul istehsalının
artırılması və dövlət dəstəyinin əsas
istiqamətlərindən biri olan subsidiya əsas etibarilə kənd
təsərrüfatı infrastrukturunun inkişafına,
istehsalın kreditləşməsinə, kənd təsərrüfatında
elmi-texniki işlərin həyata keçirilməsinə, əhalinin
ərzaqla təmin edilməsinə, ərzaq məhsulları
istehsalının təhlükəsizliyinə yönəldilir.
Bir sıra ölkələrdə isə
bazarı tənzimləmək üçün tələbatdan
artıq istehsal edilən məhsul istehsalını nizamlamaq
üçün əmtəə istehsalçılarına
subsidiya verilir.
Avropa
İttifaqının büdcəsində kənd təsərrüfatına
verilən subsidiyaların məbləği son dövr hər il üçün orta hesabla Aİ büdcəsinin
təqribən 40 faizini təşkil edir. Bu məbləğin
50 fazi qiymətlərin dəstəklənməsinə, 10
faizi kənddə infrastrukturun inkişafına, 25 faizi 1 hektar
torpağa və 1 baş mal-qaraya hesablanmaqla ödənilir. Subsidiyalar hər bir
sahibkarlıq təsərrüfatına onu istehsal etdiyi məhsulun
həcmindən asılı olaraq müəyyənləşdirilir.
Kənd təsərrüfatının inkişafına dəstək
kimi subsidiyalaşdırma mexanizmi, demək olar ki, Müstəqil
Dövlətlər Birliyinə daxil olan bütün ölkələr
tərəfindən tətbiq edilir. Bu ölkələrdə
subsidiyalaşdırılan məhsullar strateji maraqlardan
asılı olaraq müxtəlifdir və subsidiyalar məqsədli
proqramın icrasına yönəldilir və müntəzəm
olaraq təkmilləşdirilir.
Ayrı-ayrı bitkilərin bioloji xüsusiyyətləri
və respublikamızın iqlim şəraiti eyni sahədən
ildə iki dəfə məhsul götürməyə imkan
verir. Bu, o deməkdir
ki, həmin sahəyə bir təsərrüfat ilində
yalnız bir dəfə məhsul götürülən sahələrə
nisbətən iki dəfə artıq yanacaq və motor
yağları işlədilir. Lakin yardım bir
dəfə üçün verilir. Yaxşı
olar ki, istehsalçının marağını artırmaq məqsədilə
ikinci məhsul üçün əkinlərə də
yardım verilsin. Həm də bu sahələrə
yanacağın dəyərinin 60-65 faizi dövlət tərəfindən
ödənilsin.
Türkiyədə kənd təsərrüfatına
müxtəlif dəstəklər verilir. Bunlar alternativ
məhsul, torpaq analizi, yanacaq, gübrə, fərq ödəmə,
heyvandarlıq dəstəkləri və s-dən ibarətdir.
Ümumiyyətlə, Türkiyənin kənd təsərrüfatında
50-dək sahəyə, 100-dək fəaliyyət növünə
dəstək verilir. Təkcə 2010-cu ildə
bitkiçilikdə və heyvandarlıqda çalışan
istehsalçılara 3,8 milyard dollar məbləğində
subsidiya ödənilmişdir. Qardaş ölkənin
təcrübəsindən bəhrələnərək, kənd
təsərrüfatı istehsalçılarının Azərbaycanda
da elektron qeydiyyat sistemi yaradılmalı, lazımi sahə, məhsul
və işlərə dəstək həddi müəyyən
edilməli, normativ-hüquqi baza yaradılmaqla konkret tədbirlər
həyata keçirilməlidir.
Güzəştli kreditlərin verilməsi sistemli
xarakter almışdır. “2008-2015-ci illərdə Azərbaycan
Respublikasında əhalinin ərzaq məhsulları ilə
etibarlı təminatına dair Dövlət Proqramı”nda
Sahibkarlığa Kömək Milli Fondunun və Kənd Təsərrüfatı
Nazirliyi yanında Kənd Təsərrüfatı Kreditləri
üzrə Dövlət Agentliyinin və digər təşkilatların
vəsaitləri hesabına sahibkarlarla, o cümlədən kənd
təsərrüfatı və ərzaq məhsullarının
istehsalı ilə məşğul olan iş adamlarına
güzəştli kreditlərin verilməsi siyasətinin davam
etdirilməsi nəzərdə tutulmuşdur.
Aidiyyəti
qurumların məlumatlarına görə, 2009-2011-ci illər
ərzində kənd təsərrüfatı məhsullarının
istehsalı və emalı ilə məşğul olan
sahibkarlara Fond tərəfindən 4793 layihə üzrə
195430,22 min manat, Dövlət Agentliyi tərəfindən 1099
layihə üzrə 40864 min manat güzəştli kredit
verilmişdir.
Qeyd etmək lazımdır ki, istehsalçıların
kreditə çıxış imkanlarında problemlər
mövcuddur.
Belə ki, kredit təşkilatları kiçik
ölçülü kənd təsərrüfatı
istehsalçılarına kredit verməkdə az
maraqlıdırlar. İstehsalçılardan borc məbləğindən
ən azı iki dəfə çox dəyərə malik və
likvid girov (əksər hallarda şəhərlərdə yerləşən
ev) və digər kəndlinin imkanı
xaricində olan zəmanətlər tələb olunur.
Qanunvericilikdə nəzərdə tutulmasına baxmayaraq, pay
torpaqları az likvidli olması bəhanəsi
ilə girov götürülmür. Güzəştli
kreditlərin əldə edilməsini çətinləşdirən
müxtəlif süni maneələr və subyektiv amillər
də mövcuddur. Yuxarıda qeyd olunan
Dövlət Proqramında aqrar sahədə fəaliyyət
göstərən sahibkarlara güzəştli kreditlərin
verilməsi siyasətinin davam etdirilməsi
tapşırılmasına baxmayaraq, kənd təsərrüfatı
məhsullarının istehsalına və emalına güzəştli
kredit verilməsinə dair layihələrə baxılarkən
müvafiq təşkilatların rəyi öyrənilmir və
faktiki olaraq tədbir birtərəfli qaydada həyata
keçirilir. Hesab edirik ki, aqrar sahəyə
verilən güzəştli kreditlərin daha vacib sahələrə
yönəldilməsinə və onlardan daha səmərəli
istifadənin təşkil edilməsinə kömək məqsədi
ilə bu sahə üzrə kredit layihələrinə
baxılarkən müvafiq təşkilatların rəyinin
öyrənilməsi təmin edilməlidir.
Kənd təsərrüfatında sığortanın
stimullaşdırılması tədbirləri həyata
keçirilir.
Kənd təsərrüfatı təbii amillərdən
asılı olan sahədir. Hər il
sel sularından, doludan, quraqlıqdan, şaxtadan, təhlükəli
ziyanvericilərin kütləvi yayılmasından və s. təbii
hadisələrdən kənd təsərrüfatına xeyli
ziyan dəyir. Kənd təsərrüfatı məhsulları
istehsalçılarının əmlakının (məhsulun,
torpağın, heyvanların, tikililərin və s.) təbii fəlakətdən
sığortasında dövlətin iştirakını təmin
etmək məqsədi ilə “Kənd təsərrüfatında
sığortanın stimullaşdırılması haqqında”
Azərbaycan Respubliaksının 2002-ci il
18 iyun tarixli Qanunu qəbul edilmişdir. Həmin Qanunun
icrası ilə əlaqədar Nazirlər Kabinetinin 2004-cü
il 4 mart tarixli qərarı ilə (sonradan olunan əlavələrlə
birlikdə) buğda, arpa, qarğıdalı, dən
üçün günəbaxan, kartof, şəkər
çuğunduru, tərəvəz (göyərti istisna
olmaqla), meyvə, sitrus və üzüm bağlarının məhsullarının
yanğın, dolu, sel, daşqın və şaxta vurması
hallarına görə müqavilə üzrə
hesablanmış sığorta haqqının 50 faizi həcmində
dövlət büdcəsinin vəsaiti hesabına ödənilməsi
nəzərdə tutulmuşdur.
Sahibkarların
torpaqdan və sudan istifadəsi ərzaq təminatında
mühüm rola malikdir. Respublikanın Torpaq Fondunun 54,9 faizi və ya 4756 min hektarı kənd təsərrüfatına
yararlı torpaqlar təşkil edir. Kənd təsərrüfatına
yararlı torpaqların 1864 min hektarı əkin və
çoxillik əkmələr altında istifadə olunur,
qalanı isə otlaqlar və biçənəklər təşkil
edir. Kənd təsərrüfatı təyinatlı
torpaqların təsərrüfat subyektləri üzrə
istifadə vəziyyətinin təhlilindən aydın olur ki,
1,8 min hektar yararlı torpaq sahəsi 726,8
min təsərrüfat subyektinin istifadəsindədir. Həmin
təsərrüfat subyektlərindən 688,4 mini 5 hektara qədər
torpaq sahəsinə malikdir, yəni təsərrüfat
subyektlərinin 94,7 faizinin əkin sahəsi 5 hektara qədərdir.
Onların 0,72 faizinin torpaq sahəsi 20
hektar və daha çox sahəni əhatə edir. Bu onu göstərir ki, təsərrüfat subyektlərinin
əksəriyyəti xırda həcmli sahələrdə
çalışır. İstehsalçıların
əksər hissəsinin istifadəsində olan torpaq sahələrinin
həcminin kiçik olması onları bir sıra problemlərlə
üzlədirir. Bunlar əsasən
aşağıdakılardır:
- növbəli əkin sisteminin tətbiqi çətinləşir;
- rəqabətqabiliyyətli məhsul
istehsalına mane olur;
- istehsal xərcləri artır;
- iqtisadi səmərəlilik təmin edilmir;
- məhsulun tədarükü və
satışında çətinliklər yaranır;
- müasir texnika və texnologiyaların tətbiqi
mümkün olmur və s.
Hazırda kənd təsərrüfatına yararlı
torpaqların 1432, 7 min hektarı suvarılan torpaqlardır ki,
onun da 126 min hektarı işğal altındadır. Azərbaycanın
su ehtiyatları məhduddur. Su ehtiyatlarının
yalnız 30 faizi respublikanın öz ərazisində, qalan 70
faizi isə qonşu ölkələrin ərazisində
formalaşır.
Suvarma
suyundan səmərəli istifadə etmək məqsədi ilə
yerlərdə sudan istifadəedənlər
cəmiyyətləri yaradılmışdır.
Araşdırmalar göstərir ki, belə qurumların
yaradılması sudan istifadə vəziyyətini
yaxşılaşdırmaqla yanaşı, həm də
sahibkarların vaxtına qənaət edir. Lakin
bu müsbət təcrübə hər yerdə tətbiq
olunmur. Sudan istifadəedənlər cəmiyyətlərinin
sayı artırılmalı və əhatə dairəsi
genişləndirilməlidir. Respublikanın əksər
suvarılan torpaqlarında hər il yay
aylarında su qıtlığı yaranır ki, bu da kənd
təsərrüfatı bitkilərinin məhsuldarlığının
bəzən kəskin azalması ilə nəticələnir. Vəziyyətdən çıxış yolu kimi
mümkün olan yerlərdə əlavə sututarların tikilməsinə
ehtiyac vardır.
Araşdırmalar göstərir ki, hazırda kənd təsərrüfatında
istifadə olunan torpaqların müəyyən hissəsinin
şorlaşması və eroziyaya uğraması məhsuldarlığın
kəskin azalmasına səbəb olur. Əvvəllər
respublikada hər il 100 min hektara yaxın
sahədə yuma aparıldığı halda bu işlərin
həcmi get-gedə azaldılmış, sonradan tamamilə
dayandırılmışdır. Şoran və
şorakət torpaqların yuyulması həm becərilən
torpaq sahəsinin, həm də sahibkarların gəlirlərinin
artmasında müsbət rol oynaya bilər.
İstehsalçıların
maliyyə imkanlarının məhdudluğu və digər səbəblərdən
hər il xüsusi mülkiyyətdə
olan torpaqların xeyli hissəsi əkin dövriyyəsindən
kənarda qalır. Əkilməmiş
torpaqların müəyyən hissəsi aqronomik qaydalara
uyğun dincə qoyulsa da, əksər hissəsindən
örüş və biçənək kimi istifadə olunur.
Azərbaycan Respublikasının Prezidenti tərəfındən
dövlət fondu torpaqlarının bir hissəsini icarəyə
verməklə ölkədə iri taxılçılıq təsərrüfatlarının
yaradılması barədə tapşırıq verildiyi vaxtda
əkin dövriyyəsində olan 10 min hektarlarla torpaqlarda əkin
aparılmır. Hesab edirik ki, istehsalçılara dövlət
tərəfindən subsidiyalar verməklə yanaşı həm
də əkinə yararlı torpaqlardan üzürsüz səbəblərə
görə ardıcıl olaraq iki ildən artıq əkin
üçün istifadə etməyən torpaq mülkiyyətçilərinə
qarşı torpaq vergisinin müəyyən misli miqdarında
cərimə tətbiq etmək müsbət nəticə verə
bilər.
Sahibkarların fəaliyyətində texniki xidmət
mühüm rol oynayır. Aqrar bölmənin müasir texnika
ilə təchizatı məsələlərinin tənzimlənməsini
təmin etmək məqsədi ilə Azərbaycan
Respublikası Prezidentinin 2004-cü il 23
oktyabr tarixli sərəncamına əsasən “Aqrolizinq”
Açıq Səhmdar Cəmiyyəti
yaradılmışdır. Hazırda “Aqrolizinq”
ASC tərəfindən mülkiyyət formasından
asılı olmayaraq bütün kənd təsərrüfatı
məhsulları istehsalçılarına, onların
sifarişi əsasında 20 addan çox aqrotexniki xidmət
işləri həyata keçirilir. Aqrotexniki
xidmətin keyfiyyətini yaxşılaşdırmaq məqsədi
ilə bölgələrdə yaradılmış 55 təsərrüfat
hesablı aqroservis filialı və onların tərkibində
fəaliyyət göstərən mexanikləşdirilmiş dəstələr
lazımi kənd təsərrüfatı texnikaları ilə
təchiz edilmişdir. Bunlardan əlavə,
bölgələrdə 450-dən çox özəl qurum və
ya fiziki şəxs aqroservis fəaliyyəti ilə məşğul
olur.
Respublikanın
kənd təsərrüfatında fiziki və hüquqi şəxslərə
məxsus 28578 ədəd traktor, 3791 ədəd
taxılyığan kombayn, 5053 ədəd kotan, 1714 ədəd
kultivator, 1969 ədəd taxılsəpən, 1230 ədəd
otbiçən, 2197 ədəd otpresləyən və digər
kənd təsərrüfatı texnikaları olmasına
baxmayaraq, onların yarısından çoxu 20-25 il istismar
olunduğundan hazırda nasaz vəziyyətdədir. Texniki
parkı müasir texnikalarla təzələmək məqsədi
ilə “Aqrolizinq” ASC tərəfindən 1998-2011-ci illər ərzində
Yaponiya hökumətinin qrantları, Tərəfdaşlıq
fondu, dövlət büdcəsi vəsaiti və digər mənbələr
hesabına 13790 ədəd, o cümlədən 3895 ədəd
traktor, 1298 ədəd taxılyığan kombayn, 160 ədəd
ekskavator və 8437 ədəd digər kənd təsərrüfatı
texnikaları alınaraq istehsalçılara lizinq yolu ilə
verilmiş və ya satılmışdır. Artıq
respublika daxilində Gəncə avtomobil zavodunda müxtəlif
at gücündə traktorlar, kotanlar və bəzi ehtiyat hissələri
istehsal edilməyə başlanmışdır.
İnformasiya məsləhət xidmətinin təşkili
əsas amillərdən biridir. Fermerlər informasiya və
məsləhət xidmətini Kənd Təsərrüfatı
Kreditləri üzrə Dövlət Agentliyinin “Kənd Təsərrüfatının
İnkişafı və Kreditləşməsi layihəsi”
çərçivəsində həyata keçirirlər.
Layihəyə əsasən respublikanın 58 rayonunu əhatə
edən 10 regional məsləhət mərkəzi və
onların nəzdində fəaliyyət göstərən 201
kənd təlim mərkəzi vasitəsi ilə ailə kəndli
təsərrüfatlarının üzvlərinə və
sahibkarlara aqrar sahədə bilik və bacarıqlarının
artırılması və yeni texnologiyaların tətbiqinə
dair təlimlər və sahə nümayişləri
keçirilmişdir.
İnformasiya
və məsləhət mərkəzinin fəaliyyəti layihənin
şərtlərinə müvafiq olaraq 31 may 2011-ci il tarixindən etibarən
dayandırılmışdır. Bu işin, yəni
informasiya məsləhət xidmətinin davam etdirilməsi
müvafiq Nazirlik tərəfındən həyata
keçirilməlidir. Müvafiq qurumlar tərəfindən
informasiya-məsləhət xidməti əsasən kütləvi
informasiya vasitələrində çıxışlar etməklə
həyata keçirilir. Lakin sahibkarların
problemlərinin dərindən öyrənilməsi, təhlil
edilməsi, həlli yollarının
araşdırılması və nəhayət, mütəxəssis
məsləhətlərinin verilməsi üçün
mütəxəssislərin bilavasitə sahibkarlarla birbaşa
ünsiyyətdə olması faydalı olardı.
Toxumçuluq ərzaq istehsalında mühüm əhəmiyyət
kəsb edir. Kənd təsərrüfatı bitkilərinin məhsuldarlığının
artırılmasında məhsuldar, yerli iqlim şəraitinə
və xəstəliklərə davamlı, yüksək
reproduksiyalı, rayonlaşdırılmış toxum və
tinglərdən istifadə edilməsi əsas şərtlərdən
sayılır. Sahənin vacibliyini nəzərə alaraq
“Toxumçuluq haqqında” və “Seleksiya” nailiyyətləri
haqqında Azərbaycan Respublikasının qanunları qəbul
edilmiş, Dövlət proqramlarında toxumçuluğun
inkilaf etdirilməsi üçün tədbirlər müəyyənləşdirilmişdir.
Son illər dövlət toxumçuluq təsərrüfatları
ilə yanaşı, özəl toxumçuluq təsərrüfatlarının
yaradılmasına da diqqət göstərilir. 2004-cü ildən
2012-ci ilə kimi cəmi 896 subyektə özəl
toxumçuluqla məşğul olmaq üçün şəhadətnamə
verilmişdir ki, onlardan faktiki 590 subyekt fəaliyyətini davam
etdirir.
Təhlil
göstərir ki, 2011-ci ildə respublikada daxili bazarın tələbatı
həcmində, başqa sözlə 173,9
min ton taxıl toxumu istehsal olunmuşdur ki, bu da 2006-cı illə
müqayisədə 54,4 min ton və ya 31 faiz çoxdur. 2011-ci ildə ümumilikdə kənd təsərrüfatı
bitkiləri toxumlarının, meyvə və üzüm tinglərinin
istehsalında özəl sektorun payı 90 faizdən çox
olmuşdur.
Damazlıq heyvandarlığın inkişafının əsas
şərtlərindəndir. Hazırda respublikada maldarlıq
üzrə 52, camışçılıq üzrə 7,
qoyunçuluq üzrə 28, arıçılıq üzrə
33, quşçuluq üzrə 1 olmaqla cəmi 121 özəl
damazlıq təsərrüfatı fəaliyyət göstərir.
“Aqrolizinq” ASC tərəfindən son 3 ildə xarici ölkələrdən
respublikamıza 4350 baş damazlıq düyə gətirilərək
sahibkarlara 50 faiz güzəştlə lizinq yolu ilə
satılmışdır. Həmin damazlıq
düyələr törəyib artaraq hazırda 7226 başa
çatmışdır.
Sahibkarlardakı iribuynuzlu heyvanların cins tərkibinin
yaxşılaşdırılması məqsədi ilə
süni mayalanma tədbiri həyata keçirilir. Təkcə
2011-ci ildə respublika üzrə 78216 baş inək və
düyələr yüksək məhsuldar törədicilərin
toxumları ilə süni yolla mayalandırılmış və
onlardan 46855 baş bala alınmışdır.
Yuxarıda
göstərilən və digər tədbirlərin həyata
keçirilməsi nəticəsində aqrar sahədə
sahibkarlar təbəqəsi ilə yanaşı, aqrar emal sahəsində
“Gilan Holdinq”, “Azərsun Holdinq”, “Miri Pak”, “Tovuz-Baltiya”və s.
şirkətlər, “Dəvəçi broyler”, Xaçmazda
“Qafqaz”konserv zavodu, Ağcabədidə “Atena” süd zavodu və
digər iri sahibkarlar da yaranmışdır.
İstehsal kooperativlərinin yaradılması. “2008-2015-ci illərdə Azərbaycan
Respublikasında əhalinin ərzaq məhsulları ilə
etibarlı təminatına dair Dövlət Proqramı”nda nəzərdə
tutulmuş pay torpaqları əsasında formalaşmış
xırda ailə və fermer təsərrüfatlarının
könüllülük əsasında kooperasiyalarda birləşməsinin
stimullaşdırılması tədbirinin icrası
tapşırılmışdır.
Kənd təsərrüfatı məhsullarının
istehsalı və satışı sahəsində
kooperasiyanın inkişafı istiqamətində müəyyən
tədbirlər həyata keçirilir. Belə ki, rayonlarda torpaq
mülkiyyətçiləri ilə keçirilən
görüşlərdə, jurnal və qəzetlərdə,
digər tədbirlərdə pay torpaqları əsasında
formalaşmış xırda təsərrüfatının
kooperasiyalarda birləşmələrinin üstünlükləri,
o cümlədən kənd təsərrüfatı
texnikalarından daha səmərəli istifadə etməklə,
istehsal xərclərini aşağı salmaqla daha çox mənfəət
qazanmağın üstünlükləri, onların ortaq
problemlərinin həllinin asanlaşması, ümumiyyətlə,
birləşmənin iqtisadi səmərəliliyi barədə
geniş maarifləndirmə işləri aparılır.
Azərbaycan Respublikasının Dövlət Statistika
Komitəsinin məlumatlarına əsasən ölkədə
252 kənd təsərrüfatı istehsal kooperativi qeydiyyatdan
keçmişdir. Həmin kooperativlərdən faktiki olaraq
79-u fəaliyyət göstərir. Belə ki, faktiki məlumatlara
əsasən, İmişli rayonunda 15, Abşeron rayonunda 8,
Balakən rayonunda 7, Zaqatala, Beyləqan, Yardımlı, Salyan,
Göygöl və Ağdaş rayonlarının hər birində
3, Ağdam, Sabirabad, Saatlı, Samux, Tovuz, Qazax, Gədəbəy
və Şəmkir rayonlarının hər birində 2,
Füzuli, Xaçmaz, Masallı, Biləsuvar, Yevlax,
Şamaxı, Ağsu, Oğuz və Neftçala
rayonlarının hər birində bir istehsal kooperativi fəaliyyət
göstərir. Bəzi rayonlarda isə bu vacib tədbirə
laqeyd yanaşılır.
Araşdırmalar
göstərir ki, kooperasiyanın tam formalaşmamasının
bir sıra səbəbləri vardır:
- keçən əsrin 80-ci illərinin
sonlarından etibarən ölkədə kooperativ hərəkatının
formal xarakter daşımasının insanların təfəkküründə
qalması, sonralar bu mənfi meylin aradan qaldırılması
üçün təşəbbüslərin zəif
olması;
- kooperativlərdə birləşmək istəyində
olan mülkiyyətçilərin torpaq sahələrinin
müxtəlif massivlərdə yerləşməsi;
- istehsal olunan kənd təsərrüfatı məhsullarının
tədarükü, saxlanması və satışı problemlərinin
olması;
- bölgələrin təbii-iqtisadi spesifik
xüsusiyyətlərinə uyğun nümayiş xarakterli
kooperativlərin yaradılmasının dəstəklənməməsi;
- pay torpaqları əsasında formalaşmış
xırda ailə-kəndli təsərrüfatlarının
kooperasiyalarda birləşmələri üçün
onların razılığa gələ bilməmələri
və bu sahədə hələ də iqtisadi təfəkkürün
və maarifləndirmə səviyyəsinin yetərincə
olmaması.
Qarşıda duran vəzifələr. 2012-ci il fevralın 28-də
“Baku Expo” Mərkəzində keçirilən”Azərbaycan
Respublikası Regionlarının 2009-2013-cü illərdə
sosial-iqtisadi inkişafı Dövlət Proqramı”nın
icrasının üçüncü ilinin yekunlarına həsr
olunmuş konfransda cənab Prezident aqrar sahədə
qazanılmış müsbət meyilləri qeyd etməklə
yanaşı, həm də taxılçılıq üzrə
iri özəl təsərrüfatların yaradılması,
üzümçülüyün inkişaf etdirilməsi,
bütövlükdə kənd təsərrüfatında
müasir texnologiyaların geniş şəkildə tətbiq
edilməsi, ixracyönümlü məhsullarla başqa ölkələrin
bazarlarına çıxmaq imkanlarının
araşdırılması barədə müvafiq icra
orqanlarına mühüm tapşırıqlar vermişdir.
Aqrar sahədə
sahibkarlıq üçün daha münbit şərait
yaradılması və Azərbaycan Respublikası Prezidenti
İlham Əliyevin konfransda verdiyi tapşırıqların
icrası ilə bağlı aşağıda göstərilən məsələlər üzrə təkliflərin nəzərə
alınmasını məqsədəuyğun hesab edirik:
- yeni üzümlüklərin, çay
plantasiyalarının və meyvə bağlarının
salınmasına və xırda torpaq mülkiyyətçilərinin
könüllülük prinsipi əsasında birləşərək
iri özəl kənd təsərrüfatı müəssisələrinin
yaradılmasına görə hər hektara müəyyən
məbləğdə birdəfəlik subsidiya verilməsini;
yaxud verilən subsidiyaların güzəştli kredit kimi
verilməsini;
- əkinəyararlı torpaqlarda
üzürsüz səbəblərə görə
ardıcıl olaraq iki ildən artıq müddətdə əkin
aparmayan mülkiyyətçilərin torpaq vergi ödəməsinin
artırılmasını;
- yeni yaradılan özəl təsərrüfatlara
lizinqə zəruri texnikalar verilməsini və onun dəyərinin
müəyyən hissəsinin dövlət tərəfindən
ödənilməsini;
-
“Aqrolizinq” ASC-nin bölgələrdəki aqroservis müəssisələri
tərəfindən həyata keçirilən aqrotexniki tədbirlərin
xidmət haqlarının diferensiallaşdırılmasına
baxılmasını və təkmilləşdirilməsini;
- yay aylarında daha çox su
qıtlığı yaranan suvarılan ərazilərdə su
təchizatının yaxşılaşdırılması
üçün əlavə tədbirlərin görülməsini;
-istehsal
kooperativlərinin yaradılması prosesini sürətləndirmək
məqsədi ilə pilot istehsal kooperativləri
yaratmağı; kənd təsərrüfatı mütəxəssislərinin
və ayrı-ayrı bölgələrdən olan xırda
torpaq mülkiyyətçilərinin iştirakı ilə
seminar-müşavirə keçirməklə yaranmış
təcrübənin təbliğ edilməsini;
- kənd
təsərrüfatı məhsulları
istehsalçılarının kredit almaq imkanlarını
yaxşılaşdırmaq məqsədi ilə onların
mülkiyyətində olan torpaq sahəsinin, mal-qaranın və
texnikanın girov qoyulmasında yaradılan süni maneələrin
aradan qaldırılması üçün əlavə tədbirlər
görülməsini və kredit müddətində istehsal
ediləcək məhsulun girov kimi qəbul edilməsinə
dair yeni mexanizmin hazırlanmasını;
-
bölgələrdə kənd təsərrüfatı məhsulları
üzrə tədarük və topdansatış məntəqələrinin,
saxlama anbarlarının, emal müəssisələrinin, meyvəqurutma
sexlərinin yaradılmasının dəstəklənməsini
və s.
İslam
İBRAHİMOV
Respublika. - 2013.- 6 dekabr.- S.6.