Böyük düha sahib

Ümummilli liderimiz, Heydər Əliyev XX əsrdə ulu Tanrının Azərbaycan xalqına bəxş etdiyi dühalardandır. O, öz xalqı və milləti qarşısında misilsiz fəaliyyət göstərən dahi şəxsiyyətlərdəndir.

Bu günlərdə “İnturavto” ASC-də müdrik insan, ürəklərdə əbədi yaşayan Heydər Əliyevə həsr olunmuş anım mərasimi keçirildi. Tədbirdə cəmiyyətin sədri Aydın Heydərov çıxış edərək vurğuladı ki, ulu öndərimiz milyonlarla insanı ülvi ideallar ətrafında səfərbər edən dövlət qurucusu, müasir tariximizin memarı idi. Heydər Əliyev parlaq zəkasının, sarsılmaz iradəsinin, tükənməz enerjisinin sayəsində ümummilli lider səviyyəsinə yüksəlmişdir.

XX əsrdə xalqımızın yetirdiyi fenomen şəxsiyyət Heydər Əliyev Azərbaycan dövlətinin ideoloji-siyasi əsaslarını milli irs və düşüncə əsasında yaradaraq praktik sürətdə gerçəkləşdirmiş strateq kimi hər zaman rəğbət və ehtiramla xatırlanır.

Heydər Əliyevin dahiyanə siyasəti, böyük cəsarət və qətiyyətlə gördüyü işlər həmişə xalqımıza mənəvi dayaq olmuş, respublikamıza beynəlxalq aləmdə böyük hörmət, nüfuz, şan-şöhrət gətirmiş, dünya xalqlarının rəğbətini qazandırmışdır.

1991-1993-cü illərdə Azərbaycanda iqtisadi tənəzzülün güclənməsi, siyasi böhranın dərinləşməsi, cəbhə bölgələrində hərbi uğursuzluqlar və vətəndaş qarşıdurması nəticəsində ölkə parçalanma həddinə çatmışdı. 1993-cü ilin iyununda xalq ölkəni bu vəziyyətdən çıxara biləcək yeganə liderini–Heydər Əliyevi təkidli xahişi ilə siyasi hakimiyyətə çağırdı. Ulu öndər Heydər Əliyev Azərbaycana qayıdaraq dövlətçiliyini iflasdan, fəlakətdən qurtardı, çevriliş cəhdlərinin qarşısını aldı, dövlətçiliyi möhkəmlətdi, dirçəliş və inkişafa doğru yönəltdi. Milli varlıq və idrakın, özünüdərkin ali təzahür forması olan müstəqil dövlət ideyasını uğurla gerçəkləşdirdi.

Görkəmli dövlət xadimi Heydər Əliyevin yorulmaz fəaliyyəti sayəsində Azərbaycan bir dövlət kimi zamanın sərt sınaqlarından uğurlu çıxıb. Dahi öndərin müəyyənləşdirdiyi inkişaf strategiyasına uyğun olaraq həyata keçirilən tədbirlər sayəsində bu gün Azərbaycan dünya dövlətləri birliyində öz layiqli yerini tutub.

Anım mərasimində Aydın Heydərov vurğuladı ki, Heydər Əliyev mənəvi -siyasi irsinin layiqli davamçısı, Prezident İlham Əliyevin müəllifliyi ilə bu gün Azərbaycanın çağdaş tarixinin şanlı səhifələri yazılır. Ölkəmizin inkişaf tempi uğurla davam etdirilir.

Qədir ASLAN

Respublika.-2013.- 11 dekabr.- S.8