DƏNİZ NEFTÇİLƏRİ CARİ İLDƏ UĞURLAR QAZANMAQ ƏZMİNDƏDİR

Neftçilərimiz ötən hər bir ili uğurla başa vurmaq üçün bütün ehtiyat mənbələrindən, xüsusən daxili imkanlardan səylə istifadə edir. 2012–ci ildə 339353 ton neft və kondensat, 309740 min kubmetr qaz hasil edən kollektivimiz iqtisadiyyatımızın gücləndirilməsi naminə qüvvələrini əsirgəmir. Ötən il istismara 3 yeni quyu daxil olunmuşdur. Onlardan 2722 ton neft hasil edilmişdir. NQÇİ–nin istifadəsində olan 157 quyudan 143–ü neft, 14–ü qaz–kondensat quyularıdır. 143 neft quyusundan 129–u qaz–lift, 4–ü isə fontan üsulu ilə istismar olunur. Həyata keçirilən 50 əsaslı təmirdən sonra 10519 ton əlavə neft hasil olunmuşdur. Yeraltı təmirdən sonra 49958 ton neft əldə edilmişdir.

NQÇİ–də hasilatın sabit saxlanılmasını təmin etmək üçün əsaslı və yeraltı təmirlərlə yanaşı texnoloji və geoloji tədbirlərin aparılması diqqət mərkəzində saxlanılmışdır. 158 texniki tədbir aparılması nəticəsində 14717 ton əlavə neft, 9 geoloji tədbirlərdən isə 4714 ton neft hasil olunması ehtiyatların tükənmədiyini bildirir.

Bunların nəticəsidir ki, NQÇİ üzrə bir işçiyə düşən orta əməkhaqqı 1037 manat təşkil edir ki, bu da əvvəlki ilin müvafiq dövrünə nisbətən 179 manat artıqdır.

Heç şübhəsiz ki, qazanılan bu uğurlar ölkəmizdə həyata keçirilən müasir neft strategiyasının bəhrəsidir. Əsası ulu öndər Heydər Əliyev tərəfindən qoyulan bu strategiya artıq neçə illərdir ki, xalqımıza, onun güzəranının yaxşılaşmasına, ölkəmizin iqtisadi qüdrətinin artmasına xidmət edir. Azərbaycan Respublikasının Prezidenti möhtərəm İlham Əliyevin fəaliyyətində də neft sənayesinə diqqət mühüm yer tutur. Neftdən gələn gəlir hesabına qeyri–neft sektorlarının daha da inkişaf etdirilməsi, müxtəlif infrastrukturların yaradılması, özəlləşməyə, biznes sahəsinə böyük diqqət yetirilməsi, xalqın sosial inkişafına qayğının artırılması göz önündədir. Biz neftçilər bu böyük işləri görür və yüksək qiymətləndiririk.

Ulu öndər Heydər Əliyev ənənələrini bu gün uğurla həyata keçirən Prezidentimiz istər yeni iş yerlərinin açılmasında, istər yeni istehsal sahələrinin yaradılmasında, istərsə də ölkənin daxili və xarici siyasət sahəsində əldə etdiyi qələbələrdə özünü Heydər Əliyev irsinin layiqli varisi kimi təsdiq etmişdir.

Bu gün uğurlarımızı görməyən, düşmən qüvvələrinin dəyirmanına su tökən elə qüvvələr mövcuddur ki, onlar şəxsi mənafeləri naminə hər şeyi qurban verməyə hazırdırlar. Biz belələrinə qətiyyətlə deyirik: çəkilin yolumuzdan, xalq öz seçimini etmişdir. O, İlham Əliyevi ölkə Prezidenti seçmişdir və gələcək Prezident seçkilərində də ona arxa–dayaq olacaqdır.

Məhz ölkədə həyata keçirilən düzgün iqtisadi siyasətin bəhrəsidir ki, xalqımızın güzəranı yaxşılaşır, sosial sahədə ciddi uğurlara nail olunur.

Mən fikirlərimi öz idarəmizin timsalında davam etdirmək istərdim. 2012–ci ildə sosial inkişaf proqramı əsasən yerinə yetirilmişdir. Qəbul olunmuş Sosial İnkişaf Proqramının I bəndinə əsasən NQÇİ–də çalışan fəhlə və qulluqçuların işə gətirilməsi üçün 6 yeni avtobus verilmişdir. Estakadada vaxt metodu ilə çalışan fəhlələrin iş yerinə gedib–gəlmələri üçün 4 ədəd yeni “İsuzi” markalı avtobus ayrılmışdır. NQÇİ–nin sex və sahələrində iş otaqları inventarlarla, mebel, paltar şkafı, kompyuterlə təmin olunmuşdur. NQÇİ–nin dəniz obyektləri üçün məişət əşyaları alınmışdır.

Ələt–Dəniz yatağında 715 saylı SDP–də məişət blokunun tikintisi başa çatdırılmış və komplektləşdirilmişdir. 2 saylı sexin ərazisində vaxt metodu ilə işləyən işçilər üçün yataqxana tipli bina inşa edilmiş və istifadəyə verilmişdir. Otaqlar lazımi məişət avadanlıqları ilə təmin olunmuşdur. Burada duşxana, sanitar qovşağı, soyunub–geyinmə otaqları və yeməkxana da var. Yeməkxana stol–stulla, soyuducu, elektrik peçi, isti–soyuq su ilə təmin edilmişdir. Yeməkxananın qarşısında yay mövsümü üçün şiferli kölgəlik düzəldilmişdir.

Neftin kompleks hazırlanması və nəqli sexində operatorlar üçün 3 otaqlı bina tikilmiş və avadanlıqla təchiz olunmuşdur. Qarşısında yay mövsümü üçün şiferli kölgəlik düzəldilmişdir. Burada çalışan operatorlar üçün soyunub–geyinmə yeri, sanitar qovşağı, duşxana tikilmişdir. İşçilərin iş yerində qidalanmasının vəziyyəti də qənaətbəxşdir. NQÇİ–də fəaliyyət göstərən 3 saylı yeməkxana əsaslı təmir olunmuş, tam şəkildə avadanlıq və inventarla təmin edilmişdir. Yeməkxanada 40 nəfər işçi müxtəlif cür isti yeməklərlə qidalanır. Xidmət “Xəzər–İaşə” MMC tərəfindən həyata keçirilir. 1 saylı neft–qazçıxarma sexinin ərazisində inşa edilmiş yataqxana tipli tikilidə qalan fəhlələr üçün mədəni evciklərdə yerləşən yeməkxana təmir olunmuş, yeməkxana stol–stulla, soyuducu, elektrik peçləri, daimi isti–soyuq su, kondinsionerlə təmin edilmişdir. Həmkarlar İttifaqı Komitəsi tərəfindən işçilərin istirahətlərinin təşkilinə dair məsələlər də öz həllini tapır. Ötən il 21 işçi sanatoriyada müalicə almış, 189 nəfər istirahət zonalarında dincəlmiş, 54 nəfər “Naftalan”da müalicə olunmuşdur.

Sosial İnkişaf İdarəsi tərəfindən “Qubek” istirahət mərkəzinə və “Nabran” istirahət zonasına verilmiş 5 yollayışla işçilər 12 ailə üzvü ilə birlikdə istirahət etmişlər. Müəssisəmizdə tibbi yardım PREMİUM ASSİSTTNCE MMC–nin tibbi personalı tərəfindən həyata keçirilir. Tibb məntəqələrinin vəziyyəti də normaldır. NQÇİ–də İnzibati binada, 1 saylı NQÇİ–də və Daşgil sahəsində tibb məntəqələri fəaliyyət göstərir. Bu otaqlar tam təmir olunmuş və tibbi ləvazimatlarla təmin edilmişdir.

İşçilərin məişət şəraitinə və istirahətlərinə dair məsələlər də öz həllini tapır. Belə ki, bu yerlərdə fəhlələrin soyunub–geyinmə otaqları təmir olunmuş, yeni duşxanalar tikilmiş, bəziləri isə təmir olunmuşdur. Sex və sahələrdə emalatxanaların dam örtükləri əsaslı təmir olunmuşdur. Vaxt metodu ilə işləyən işçilərin istirahət yerləri soyuducu və televizorla, kondisionerlə təmin olunmuşdur. Yaşadıqları yataqxanalar avadanlıqlarla təmin olunmuş, 3 ədəd duşxana tikilmişdir. İstehsalat Xidməti Bazasının ərazisində çalışan QƏ və YT sexinin işçiləri üçün 2 otaqlı bina tikilmişdir. Hazırda bu binaların kompleksləşməsi işləri aparılır.

Hazırda NQÇİ–də çalışan neftçilərin iş yerlərinə çatdırılması Qobustan Nəqliyyat İdarəsi tərəfindən həyata keçirilir. Burada xidmət göstərən avtobuslar və xüsusi maşınlar yenilənmişdir. Dəniz özüllərinə işçilər dəniz nəqliyyatı vasitəsi ilə çatdırılırlar.

NQÇİ–də 2012–ci il ərzində ətraf mühitin mühafizəsi sahəsində görülmüş işlər də ürəkaçandır. ARDNŞ–in prezidenti tərəfindən təsdiq edilmiş Tədbirlər Planına əsasən avqust ayının 18–dən sentyabr ayının 15–ə kimi hər şənbə günü NQÇİ–nin ərazisində abadlıq işlərinin aparılması üçün iməcilik keçirilmişdir. Abadlaşdırma və yaşıllıqların salınması tədbirləri yüksək səviyyədə keçirilərək, 600 ədəd ağac əkilmişdir. 5 iyun Ümumdünya Ətraf Mühitin mühafizəsi günü münasibəti ilə NQÇİ–də toplantı və iməcilik keçirilmişdir.

Ərazimizdəki neft quyuları və digər avadanlıqlar rənglənmişdir.

2000 kvadratmetrdən çox mədən ərazisinin tör–töküntülərdən təmizlənməsi təmin edilmişdir. Neft–qaz kollektorlarının, atqı xətlərinin hermetikliyi hər gün yoxlanılır.

ARDNŞ–in Ekologiya İdarəsi və “Ekol Mühəndislik Xidmətləri” QSC–nin nümayəndələri tərəfindən NQÇİ–nin ərazilərində ekoloji monitorinqlər aparılmışdır. Ekoloji monitorinq işlərinin hesabatı NQÇİ–yə təqdim olunmuşdur. NQÇİ–də ətraf mühit və təbii sərvətlərdən səmərəli istifadə tədbirləri davam edir.

Bu il N.Nərimanov adına NQÇİ–nin qarşısında böyük vəzifələr dayanır. Dəniz neftçiləri cari ildə fəaliyyətsiz fonddan alınacaq neft hasilatının artırılması üçün indidən qüvvələrini səfərbər ediblər. NQÇİ üzrə qazmadan alınacaq neft, kondensat və qaz hasilatı planına artıqlaması ilə əməl olunması texniki–təşkilati tədbirlər davam etdirilir. Digər tərəfdən isə geoloji tədbirlərdən alınacaq neft hasilatının planda nəzərdə tutulan səviyyəyə qaldırılması 2013–cü ildə neftçilərimizi daha məsuliyyətlə işləməyə səfərbər edir.

Qarşımızda dayanan məsul və şərəfli vəzifələrin ləyaqətlə yerinə yetirilməsi üçün qüvvə və bacarığımızı səfərbər edəcək, ili yüksək göstəricilərlə başa vuracağıq.

Xaliq ŞƏFİYEV,

“Azneft” İstehsalat Birliyi

N.Nərimanov adına

NQÇİ–nin rəisi.

Respublika.- 2013.- 19 fevral.- S. 6.