Şirvan: iqtisadi irəliləyişlər insan amilinə xidmət edir

Bu günlərdə Şirvan şəhərində 2012–ci ildə ictimai–siyasi və sosial–iqtisadi sahələrdə görülmüş işlər və qarşıda duran vəzifələr barədə şəhər icra hakimiyyətinin başçısı Mərdan Camalovun hesabat–məruzəsi dinlənildi. Məruzəçi ilk öncə yola saldığımız 2012–ci ildə ölkə başçımız cənab İlham Əliyevin məqsədyönlü daxili və xarici siyasəti sayəsində əldə olunmuş uğurlardan ətraflı danışdı. İcra başçısı göstərdi ki, Prezidentin bölgələrə müntəzəm səfərləri dövlət siyasətini yerlərdə həyata keçirilməsinə effektiv nəzarət mexanizmin tərkib hissəsi, şəxsi idarəçilik nümunəsidir. Cənab Prezident 2012–ci ildə onlarla yeni müəssisənin açılışı və təməlinin qoyulmasında iştirak etmişdir. Respublikamızda qazanılan və bütün sahələri əhatə edən uğurlarda Şirvan şəhər sakinlərinin də payı vardır.

Şirvan Şəhər İcra Hakimiyyəti 2012–ci ildə “Yerli icra hakimiyyətləri haqqında Əsasnamə”nin tələblərinə uyğun olaraq təşkilati, ictimai–siyasi və ideoloji sahədə öz fəaliyyətini Azərbaycan Respublikası qanunlarına, Prezident İlham Əliyevin fərman və sərəncamlarına, Nazirlər Kabinetinin qərarlarına və icra hakimiyyətinin iş planına əsasən qurmuşdur. İcra hakimiyyəti dövlət səviyyəsində vətəndaşların sosial rifah halının yüksəldilməsinə dair qəbul olunmuş normativ–hüquqi sənədlərlə bağlı tədbirlər planı hazırlamış, onların yerinə yetirilməsi istiqamətində ardıcıl tədbirlər görülmüş, əldə olunan uğurlar barədə əhalinin bütün zümrələrinə ətraflı məlumatlar verilmişdir.

Yola saldığımız 2012–ci ildə Şirvan şəhərinin sosial–iqtisadi inkişafında mühüm nəticələr əldə edilmiş, bir sıra məhsul növlərinin istehsalı sahəsində əsaslı dönüş yaradılmışdır. Nəticədə əhalinin sosial rifah halı daha da yaxşılaşmışdır. Hesabat ilində Şirvan şəhəri üzrə iqtisadiyyatın əsas sahələrində istehsal olunmuş məhsul və xidmətlərin həcmi 348 milyon manat təşkil etmişdir ki, bu da 2011–ci illə müqayisədə sabit qiymətlərlə 5,2 faiz çoxdur. Sənaye sahələrində istehsal olunmuş məhsulun 32,6 faizi dövlət, 67,4 faizi qeyri–dövlət müəssisə və təşkilatları tərəfindən istehsal edilmişdir. Hesabat dövründə şəhərdə 333 min ton neft, 10 milyon kubmetr qaz, 2,6 milyard kilovat–saat elektrik enerjisi istehsal edilmişdir. 2012–ci ildə tikinti müəssisələri tərəfindən yerinə yetirilmiş tikinti işlərinin həcmi 28,4 milyon manat olmuşdur ki, bu da 2011–ci illə müqayisədə 70,0 faiz çoxdur.

Bütün maliyyə mənbələri hesabına əsas kapitala yönəldilən investisiyalar 24,4 milyon manat həcmində olmuşdur ki, bu da 2011–ci illə müqayisədə 28,7 faiz çoxdur. Avtomobil nəqliyyatı sahəsində fəaliyyət göstərən hüquqi və fiziki şəxslər tərəfindən əvvəlki illə müqayisədə 8,9 faiz çox yük, 9,2 faiz çox sərnişin daşınmışdır.

Əhaliyə, müəssisə və təşkilatlara faktiki qiymətlərlə 820 min manat və ya 2011–ci illə müqayisədə 7,1 faiz çox rabitə xidməti göstərilmişdir. Poçt xidmətləri əvvəlki ilə nisbətən 3,9 faiz çox olmuşdur. Hesabat ilində pərakəndə əmtəə dövriyyəsi əvvəlki illə müqayisədə 12,4 faiz artaraq 140,0 milyon manat təşkil etmişdir.

Şəhərdə bir işçiyə hesablanmış orta aylıq əmək haqqı 348,3 manat olmaqla 2011–ci illə müqayisədə 3,6 faiz artmışdır. İl ərzində şəhər əhalisinə göstərilən iaşə xidmətlərinin həcmi 2011–ci ilə nisbətən 6,1 faiz artaraq 4,3 milyon manat təşkil etmişdir. Əhaliyə göstərilən pullu xidmətlərin həcmi xeyli artaraq əvvəlki illə müqayisədə 4,5 faiz çox olmuşdur.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrası istiqamətində həmişə olduğu kimi Şirvan şəhərində bir sıra əhəmiyyətli tədbirlərin həyata keçirilməsi təmin edilmişdir. Prezident İlham Əliyev tərəfindən 24 dekabr 2007–ci ildə təməli qoyulmuş 780 MVT gücündə “Cənub” ES–nin istifadəyə verilməsi üçün son sazlama və tamamlama işləri gedir.

Müdafiə Sənayesinin tabeliyində olan “Telemexanika” və “Araz” zavodlarında genişmiqyaslı tədbirlər həyata keçirilmiş, görülən işlər cənab Prezident İlham Əliyev tərəfindən yüksək qiymətləndirilmiş, bu işləri daha da sürətləndirmək üçün öz dəyərli tövsiyələrini vermişdir.

2012–ci ildə məhəllədaxili yollara 10 kilometrdən artıq asfalt örtük salınmışdır. Dövlət Proqramı çərçivəsində əhalinin təbii qazla təminatını yaxşılaşdırmaq məqsədi ilə çox böyük işlər görülmüşdür. Uzun illər qaz təminatı çox zəif olan bəzi yaşayış massivlərinə yeni qaz xətləri çəkilmiş, şəhər əhalisinin böyük əksəriyyəti normal qazla təmin olunmuşdur. Şəhər əhalisinin qazla təminatı sahəsində çox böyük işlər görülməsinə baxmayaraq təəssüflə qeyd etməliyəm ki, ötən ilin noyabr ayında bir mənzildə su qızdırıcısının işlək vəziyyətdə nəzarətsiz qalması və digər mənzildə qaz xəttinin açıq qalması səbəbindən partlayış baş vermiş, nəticədə 3 nəfər dünyasını dəyişmiş, 1 nəfər yaralanmışdır. Bu dəhşətli faciədir. Bütün aidiyyəti qurumlara bu barədə ciddi xəbərdarlıq edilmiş, əhalinin maarifləndirmə işi gücləndirilmişdir. Hazırda bu istiqamətdə işlər davam etdirilir.

Təhsilin keyfiyyətinin yüksəldilməsi, istedadlı şagirdlərin yetişdirilməsi diqqət mərkəzində saxlanılmışdır. 2012–ci ildə 481 nəfər şagird ali məktəblərə sənəd vermiş, onlardan 280 nəfər məzun ali məktəblərə qəbul olumuşdur. 7 nəfər məzun müxtəlif xarici dövlətlərin ali məktəblərinə qəbul olunmuşdur. Ali məktəblərə qəbul imtahanlarında 17 nəfər 600–dən artıq bal toplamışdır. 2011–2012–ci tədris ilinin yekununa görə şəhərin 2 və 4 saylı tam orta məktəbləri “İlin ən yaxşı ümumtəhsil məktəbi” müsabiqəsinin qalibi olmuşlar. 07 sentyabr 2012–ci il tarixdə şəhər İcra Hakimiyyətində 600–dən yuxarı bal toplayan məzunlarla, onların valideynləri və müəllim kollektivi ilə görüş keçirilmiş, tələbə adını qazanmış məzunlara pul mükafatı və qiymətli hədiyyələr təqdim edilmişdir.

Dövlət Proqramına uyğun 1 saylı körpələr evi–uşaq bağçasında və 12 saylı orta məktəbdə bərpa–gücləndirmə, əsaslı təmir işləri başa çatdırılmışdır. Dünya Bankının ayırdığı vəsait hesabına 16 saylı tam orta məktəbdə əsaslı təmir, Bayramlı qəsəbəsində isə 480 şagird yerlik yeni məktəb binasının tikintisi başa çatdırılmışdır.

Məruzəçi göstərdi ki, təhsildə qazanılan uğurlara baxmayaraq, hələ də bu sahədə nöqsanların tam aradan qaldırılmasına nail ola bilməmişik. Qeyd etməliyəm ki, yuxarı sinif şagirdlərinin dərsə davamiyyəti bu gün bizi qane etmir. Ümumtəhsil məktəblərində yuxarı sinif şagirdləri arasında dərsə davamiyyətin monitorinqi aparılan zaman müəyyən edilmişdir ki, şagirdlərin sonuncu dərslərə davamiyyəti aşağıdır. Əlbəttə, bu məsələ şəhər icra hakimiyyətində ciddi müzakirə olunmuş, aidiyyəti rəhbər işçilərə bu nöqsanın qısa müddətdə aradan qaldırılması üçün tapşırıqlar verilmişdir. Təhsil müəssisələrinin maddi–texniki bazasının yaxşılaşdırılması üçün hələ görüləsi işlər çoxdur. Şəhərin 13, 20, 21 saylı tam orta məktəblərinin əsaslı təmir olunmasına və “Bağ evləri” yaşayış massivində yaşayan əhalinin çoxluğunu və uşaqların magistral avtomobil yolundan keçərək məktəbə getmək üçün böyük məsafə qət etmələrini nəzərə alaraq həmin ərazidə yeni məktəb binasının tikintisinə kəskin ehtiyac vardır. Eyni zamanda şəhərdə ən azı 4 yeni uşaq bağçasının tikintisi vacib məsələlərdən biridir. Bu və digər problemlər barədə müvafiq instansiyalara şəhər İcra Hakimiyyəti tərəfindən dəfələrlə rəsmi müraciətlər edilmişdir.

Səhiyyə Nazirliyi tərəfindən Dövlət Proqramına uyğun şəhər poliklinikası, Uşaq Birləşmiş Xəstəxanasının anesteziologiya, reanimatologiya, urologiya, terapiya şöbələri, məhkəmə tibbi ekspertizasının binası əsaslı təmir edilmişdir. Şəhər Mərkəzi Xəstəxanasının vəsaiti hesabına Təxirəsalınmaz Təcili Tibbi Yardım Stansiyası, vərəm şöbəsi təmir edilmiş, xəstəxananın ərazisi abadlaşdırılmışdır. İl ərzində xəstəxanaya 18745 xəstə daxil olmuş, imtiyazlı xəstələrə 204 min manat dəyərində pulsuz dərmanlar verilmişdir. Görülmüş işlərə baxmayaraq hələ ki, bu sahədə nöqsanlar da az deyildir. Şəhər Doğum evində ana və uşaqlar arasında xəstələnmə, sağlam uşaqların doğulması üçün zəruri şəraitin yaradılmasına, maddi–texniki bazanın gücləndirilməsinə baxmayaraq doğuşa qədərki qulluq və doğuş zamanı ilkin tibbi yardımın vəziyyəti tələb olunan səviyyədə deyildir. 01 aprel 2010–cu ildə təməli cənab Prezident tərəfindən qoyulan Olimpiya İdman Kompleksində tikinti işləri davam etdirilir və bu ilin birinci yarısında kompleksin istifadəyə verilməsi nəzərdə tutulur.

Görülən işlərlə yanaşı Dövlət Proqramında nəzərdə tutulan bəzi həlli vacib tədbirlərin icrası gecikdirilir. Yüngül və yeyinti sənayesinin inkişaf etdirilməsi məsələsi 2009–2012–ci illərdə bilavasitə Sənaye və Energetika, Kənd Təsərrüfatı Nazirliklərinə həvalə edilmişdir. Şəhər İcra Hakimiyyəti öz növbəsində şəhərin Bayramlı qəsəbəsində kifayət qədər ixtisaslaşmış işçi qüvvəsi olduğunu əsas gətirərək qəsəbədə toxuculuq fabrikinin və ya hər hansı yüngül sənaye yönümlü bir müəssisənin yaradılması təklifi ilə dəfələrlə hər iki nazirliyə müraciət etmişdir. Eləcə də Dövlət Proqramında 2010–2013–cü illərdə Şirvan şəhərində sosial təyinatlı ictimai binaların istilik təchizatının yaxşılaşdırılması üçün mövcud olan qazanxanaların modernləşdirilməsi, qaz, su və elektrik xətlərinin çəkilişi, məhəllədaxili və binadaxili istilik sistemlərinin bərpası “Azəristiliktəchizat” ASC–yə həvalə edilmişdir. Şirvan Şəhər İcra Hakimiyyəti tərəfindən şəhərdə ilk növbədə istilik təchizatının bərpası zəruri olan sosial obyektlərin siyahısı təxminən iki il bundan əvvəl “Azəristiliktəchizat” ASC–yə göndərilmişdir. Təəssüf ki, hələ bir nəticə yoxdur.

Tikintisi ARDNŞ tərəfindən aparılan 7200 yerlik şəhər stadionunun tikintisi 2008–ci ildən naməlum səbəblərdən dayandırılmışdır. Şəhər icra hakimiyyəti ARDNŞ–in rəhbərliyinə dəfələrlə stadionun tikintisinin başa çatdırılması xahişi ilə müraciət ünvanlamış, lakin hələlik heç bir nəticə əldə edilməmişdir.

Aztəminatlı ailələrə 2,2 milyon manat həcmində vəsait ödənilmişdir ki, bunun da 1,5 milyon manatı ünvanlı sosial yardımın ödənilməsi ilə bağlı olmuşdur. 1229 ailənin 4704 üzvünə ünvanlı sosial yardım ödənilmişdir.

Əhalinin sosial vəziyyətinin yaxşılaşdırılması cənab Prezidentin daim diqqət mərkəzində olmuşdur. Hər il ənənəvi olaraq əmək haqlarının və pensiyaların bir neçə dəfə qaldırılması, bir neçə gün bundan əvvəl bütün növ əmək pensiyalarının sığorta hissəsinin artırılması barədə cənab Prezidentin imzaladığı fərman bunu bir daha sübut edir.

Son 4 ildə şəhərdə 4279 iş yeri açılmışdır ki, onlardan 2779–u daimi iş yerləridir.

2012–ci ildə Şirvan şəhərində qarşıya qoyulmuş məsələlərin həlli istiqamətində uğurlu addımlar atılmış, tikinti–quraşdırma, abadlıq və yenidənqurma işlərinin həcmi genişləndirilmişdir.

Heydər Əliyev prospektində Daxili İşlər Nazirliyinin sifarişi ilə Baş Pasport Qeydiyyat və Miqrasiya İdarəsinin Regional Mərkəzinin müasir memarlıq üslubunda 2 mərtəbəli inzibati binası, Regional Qeydiyyat İmtahan Texniki Baxış Bölməsinin maliyyə məntəqəsi istifadəyə verilmişdir. Şirvan memarlıq məktəbinin ənənələrini özündə əks etdirən “Xalq Bank” ASC–nin bank filialının tikintisi artıq tamamlanmaq üzrədir. Şirvan Regional Refleks və Toksikologiya və Karantin Ekspertiza laboratoriyasının tikintisi davam edir.

“Gənclər evi”nin tikintisi sürətlə davam etdirilir. Hazırda 2–ci mərtəbənin betonlama işləri aparılır. Bayramlı qəsəbəsinin Sabir küçəsində yerləşən fiziki aşınma nəticəsində yaşayış üçün yararsız vəziyyətə düşmüş və bu səbəbdən də müvəqqəti olaraq məktəblərdə yerləşdirilmiş 12 ailə üçün 2 mərtəbəli evin tikintisinə hazırlıq işi başa çatdırılmışdır.

Regional Vergi İdarəsi üçün binanın təməli qoyulmuş, hal–hazırda tikinti işləri davam etdirilir.

Şəhərin giriş hissəsində ümumi sahəsi 1,3 hektar, hündürlüyü 76 metr olan əzəmətli Bayraq Meydanının və istirahət parkının tikintisi başa çatdırılmışdır. Salyan dairəsi adlanan ərazidə Çin Xalq Respublikasından gətirilmiş gözoxşayan, ən müasir işıqlı fontan, ulu öndər Heydər Əliyevin abidəsi yerləşən meydanın davamı olan sahədə işıqlı və musiqili 2 ədəd fontan quraşdırılıb sakinlərin istifadəsinə verilmişdir. Ulu öndər Heydər Əliyev abidəsi önündəki 8000 kvadratmetr sahədə aşınmış tamet tavalar yeni, ən müasir dekorativ tamet tavalarla əvəz edilmişdir. F.Eynullayev küçəsində uzunluğu 530 metr və Leytenant İbrahimov küçəsində uzunluğu 280 metr olan piyada yolu tamet tavalarla yenidən qurulmuşdur.

Leytenant İbrahimov küçəsi ilə F.Eynullayev küçələri arasından keçən dəmir yolundan keçmək üçün 4 ədəd yeni keçid tikilib istifadəyə verilmiş, 1 keçidin tikintisi tamamlanmaq üzrədir.

Şəhərdə gedən geniş miqyaslı abadlıq–quruculuq işlərində şəhər Bələdiyyəsi də yaxından iştirak etmişdir.

Kür və Araz çaylarının daşması nəticəsində baş vermiş təbii fəlakətlə əlaqədar qəzalı vəziyyətə düşmüş, yaşayış üçün yararsız olan evlərin əvəzinə 23 bir mərtəbəli fərdi yaşayış evi tikilmiş, hal–hazırda FHN tərəfindən 6 ədəd fərdi yaşayış evinin inşasına başlanılmış və hazırda tikinti işləri davam etdirilir. Qəzalı vəziyyətdə olan barak tipli evlərin sakinləri üçün 1 ədəd 20 mənzilli yaşayış binasının tikilməsi nəzərdə tutulmuşdur. 2012–ci ildə 192 nəfər şəhər əhalisinə ümumilikdə 293700 manat məbləğində kompensasiya ödənilmişdir.

2012–ci il ərzində yaşıllıq sahələrinin artırılması, gül–çiçək kollarının, ağacların əkilməsi, suvarılması, aqrotexniki qaydada qulluq göstərilməsi yüksək səviyyədə yerinə yetirilmişdir. ümumilikdə ötən il 4 min ədədə yaxın ağac, 8 min ədəddən artıq müxtəlif gül kolları əkilmişdir. İl ərzində yaşayış massivlərində 3 nümunəvi məhəllə salınmış, uşaq əyləncə və idman qurğuları, monolit konstruksiyalı günlük və oturacaqlar quraşdırılmış, sakinlərin istirahəti üçün hər cür şərait yaradılmışdır. Xeyir–şər mərasimlərinin keçirilməsi üçün 3 bina tikilmiş və hər cür ləvazimatlarla təchiz edilmişdir. İctimai yaşayış binalarında 8100 kvadratmetr yararsız dam örtüyü əsaslı təmir edilmişdir.

Şəhərin inzibati ərazi vahidinə 2 qəsəbə daxildir. Hər iki qəsəbənin əhalisinin işıq, qaz, texniki su təminatı normaldır. Qəsəbələrdə tam orta məktəb, ATS, poçt, həkim ambulatoriyası, Bayramlı qəsəbəsində 1 uşaq bağçası, Hacıqəhrəmanlıda bu yaxınlarda quraşdırılmış bankomat sakinlərə xidmət göstərir.

2012–ci ildə şəhər icra hakimiyyətinə vətəndaşlardan ümumilikdə 958 müraciət daxil olmuşdur. Dövlət orqanlarından və digər qurumlardan baxılmaq üçün 543 müraciət daxil olmuşdur. İl ərzində keçirilən 41 səyyari qəbulda 1055 nəfər iştirak etmişdir. 2012–ci ildə İcra Hakimiyyəti Başçısı aparatında ümumilikdə 1257 nəfər, o cümlədən İcra Hakimiyyətinin Başçısı tərəfindən 482 nəfər vətəndaş qəbul edilmişdir.

İcra hakimiyyətinin başçısı 2013–cü ildə şəhərdə aparılacaq abadlıq–quruculuq miqyası, əhalinin məşğulluğunun təmin olunması, təhsil, səhiyyə, mədəniyyət sahəsində, gənclərin asudə vaxtının təşkili istiqamətində, dövlət idarəçiliyində ən yeni informasiya–kommunikasiya texnologiyalarının tətbiqi sahəsində görüləcək işlər barədə yığıncaq iştirakçılarına ətraflı məlumat verdi. Əminliklə vurğuladı ki, şirvanlılar qarşıdan gələn Prezident seçkilərində də öz sözlərini deyəcək, seçkilərdə həmişə olduğu kimi yüksək fəallıq nümayiş etdirəcəklər.

Yığıncaqda Prezident Administrasiyasının məsul işçisi Əlibaba Əliyev və Milli Məclisin deputatı Azay Quliyev çıxış edib 2012–ci ildə Şirvan şəhərində həyata keçirilmiş sosial–iqtisadi tədbirləri yüksək qiymətləndirməklə yanaşı, qarşıda duran mühüm vəzifələrdən danışdılar.

Tofiq Hüseyn

Respublika.- 2013.- 20 fevral.- S. 7.