Yasamal: müsbət dinamika davam edir

Paytaxtın mərkəzində yerləşən və geniş əraziyə malik olan Bakının Yasamal rayonunda son illər inkişaf tempi sürətləndirilmiş, sosial–iqtisadi sferada uğurlar qazanılmış, abadlıq və quruculuq işləri vüsət almış, insanların həyat tərzi maksimum səviyyəyə qaldırılmışdır. Bir sözlə, rayon coşqun inkişaf, sürətli yüksəliş yolundadır.

Ötən il Azərbaycanda geniş vüsət alan sosial–iqtisadi inkişaf, aparılan quruculuq və abadlıq işləri Yasamal rayonunda da yüksək templə davam etdirilmiş, rayon bu inkişaf prosesinə öz layiqli töhfələrini vermişdir. Qazanılan hər bir nailiyyətə dövlət başçısının göstərdiyi böyük diqqət və qayğı sayəsində nail olunub. Ölkə Prezidentinin birbaşa təşəbbüsü və himayəsi sayəsində son illər rayonda mühüm obyektlərin inşası uğurla başa çatdırılıb. Çoxsaylı səhiyyə və təhsil müəssisələri, yollar, yol ötürücüləri, piyada keçidləri, parklar, infrastruktur obyektləri, dünya standartlarına cavab verən otellər, yeni inzibati binalar istifadəyə verilmişdir. Görülmüş bütün işlər rayon sakinlərində dövlətə inamı, Prezidentimizə etimadı daha da artırmışdır. Ümummilli lider Heydər Əliyevin siyasi kursunun alternativi olmadığını bir daha təsdiq etmişdir.

Rayonun sosial–iqtisadi həyatında son illər əldə olunan sürətli inkişaf 2012–ci ildə də davam etdirilib. Həm sosial, həm də iqtisadi sahələrdə yeni nailiyyətlər qazanılıb. Belə ki, ötən ilin yekunlarına əsasən rayon üzrə sənaye məhsulunun ümumi həcmi 198,5 milyon manat, nəqliyyat sektorunda xidmətlərin həcmi 1 milyard 577 milyon manat olmuşdur. Rabitə xidmətlərinin həcmi 184 milyon manat, ümumi investisiyadan tikinti–quraşdırma işləri 570 milyon manat təşkil etmişdir. Bu da keçən ilin müvafiq dövrü ilə müqayisədə müvafiq olaraq 123,7 və 129,3 faiz deməkdir.

Pərakəndə əmtəə dövriyyəsi 792 milyon manat, əhaliyə göstərilən pullu xidmətlər 635 milyon manat olmuşdur ki, bu da 2011–ci illə müqayisədə 103,7 faiz və 121,8 faiz təşkil edir. Orta aylıq əmək haqqı 6,9 faiz artaraq, 488,5 manat olmuşdur.

2012–ci il ərzində rayonda 4179 yeni iş yeri açılmışdır ki, onlardan 421–i yeni yaradılmış müəssisə və təşkilatlarda, 1139–u mövcud və bərpa olunmuş müəssisələrdə, 2619–u isə fiziki şəxslərdən ibarət olmuşdur.

Yasamal rayonu Bakının mərkəzi rayonlarından biridir. Azərbaycan Respublikasının bir çox nazirlikləri, nüfuzlu ali təhsil ocaqları, başda təhsilimizin flaqmanı, son illər ölkəmizdə elm və təhsilin inkişafında çox böyük uğurlar əldə etmiş olan Bakı Dövlət Universiteti, Azərbaycan Milli Elmlər Akademiyasının bir çox aparıcı elmi–tədqiqat institutları, özünün dinamik inkişafı, nümunəvi nizam–intizamı ilə fərqlənən Bakı metropoliten idarəsi və sairə rayonda yerləşir. Bir çox istirahət və gəzinti parkları, tarixi şəxsiyyətlərin abidələri bu rayonun ərazisindədir. Rayon son illərdə çox inkişaf etmişdir.

Prezident İlham Əliyevin diqqət və qayğısı sayəsində son illərdə genişmiqyaslı abadlıq–quruculuq işləri rayonda da öz əksini tapıb.

Ölkə başçısı rayonda aparılan işlərə xüsusi əhəmiyyət verib, mütəmadi olaraq aparılan işlərin gedişi ilə maraqlanıb, açılış mərasimlərində şəxsən iştirak edib. Təkcə ötən il cənab İlham Əliyev 9 dəfə rayonda olmuşdur.

“2011–2013–cü illərdə Bakı şəhəri və onun qəsəbələrinin sosial–iqtisadi inkişafına dair Dövlət Proqramı”nın icra olunması rayonun yol təsərrüfatı, abadlıq və yaşıllaşdırma, təhsil, səhiyyə sahələrində öz müsbət nəticələrini göstərməkdədir.

Dövlət Proqramında rayonun problemləri ilə əlaqədar 53 bəndin 25–i tamamilə icra olunmuş, 14 bəndi icra olunmaqdadır. Qalan tədbirlərin icrası isə bu ilə nəzərdə tutulmuşdur.

Hesabat ili ərzində rayon icra hakimiyyəti tərəfindən İnşaatçılar prospektində sahəsi 3500 kvadratmetr olan ərazidə yeni park salınmışdır. Ulu öndər Heydər Əliyevin anadan olmasının 89–cu ildönümündə istifadəyə verilən bu parkın açılışını ölkə başçısı həyata keçirmişdir.

2012–ci ildə rayonun Mikayıl Müşfiq küçəsi boyunca Mətbuat prospektindən “Kempinski–Badamdar otelinə qədər olan ərazidə genişmiqyaslı abadlıq işləri görülmüşdür. Mətbuat prospekti 501–ci məhəllədə 3000 kvadratmetr sahədə yeni yaşıllıq zolağı və istirahət parkı salınmışdır.

Hesabat ilində 5 yaşayış məhəlləsində–Mətbuat prospekti 29, Şərifzadə küçəsi 75A, Talıblı küçəsi 32, H.Cavid prospekti 91 və Şəfahət Mehdiyev 97 və 94 saylı evlərin qarşısındakı məhəllələrdə genişmiqyaslı abadlıq işləri aparılaraq nümunəvi həyətlər yaradılmışdır. Sonuncu məhəllədə uşaqların asudə vaxtının səmərəli keçirilməsi məqsədilə mini futbol meydançası tikilib istifadəyə verilmişdir. Rayon ərazisində 6 yaşayış binasının fasadında yenidənqurma və bərpa işləri görülmüşdür.

Hesabat ilində 180 yaşayış binasında 16100 kvadratmetr müxtəlif örtüklü dam örtüyü, 57 yaşayış binasında 3510 poqonmetr aşağı paylayıcı istilik xətləri dəyişdirilmişdir. İl ərzində 432000 kubmetr məişət, 40320 kubmetr isə süpürüntü və digər tullantılar Balaxanı zibilxanasına daşınaraq zərərsizləşdirilmişdir. Ötən il ərzində magistral yollara 456000 kvadratmetr məhəllədaxili yollara isə 115000 kvadratmetr asfalt örtüyü salınmışdır. Rayonun Zərdabi, Şərifzadə küçələri tamamilə yenidən qurulmuş, müasir işıqlandırma sistemi tətbiq edilmişdir. 24 ədəd müxtəlif təyinatlı qeyri–qanuni tikili, 6 ünvanda zəbt olunmuş torpaq sahəsi ətrafına çəkilmiş hasarlar sökülmüşdür.

Rayon sakinlərinə göstərilən xidmət səviyyəsinin yaxşılaşdırılması və onların ucuz və keyfiyyətli kənd təsərrüfatı məhsulları ilə təmin edilməsi, yerli sahibkarlığın dəstəklənməsi və süni qiymət artımının qarşısının alınması məqsədilə təşkil edilən yarmarkanın fəaliyyət göstərdiyi sahədə rayon icra hakimiyyəti tərəfindən 8000 kvadratmetr sahəyə asfalt örtüyü salınmış, 500 kvadratmetr hörgü işi görülmüş, 1500 kvadratmetr sahədə rəngləmə işləri aparılmış, 100 ədəd satış piştaxtası quraşdırılaraq nümunəvi yarmarka yaradılmışdır. 5 kənd rayonlarının sahibkarlarının təhkim olunduğu bu satış yarmarkasına hər həftənin şənbə və bazar günləri 60–75 ton kənd təsərrüfatı məhsulları satışa çıxarılır ki, bu məhsulların satış qiymətləri bazar qiymətlərindən 20–25 faiz az olur.

Əvvəlki illərdə olduğu kimi, hesabat ilində də rayon əhalisinin sosial müdafiəyə ehtiyacı olan təbəqələrinə göstərilən xidmət daim diqqət mərkəzində olmuşdur. Sosial yardıma ehtiyacı olan insanların müəyyənləşdirilməsi, yoxsulluq həddində yaşayan ailələrə ünvanlı sosial yardımların tətbiqi sahəsində müəyyən işlər görülmüşdür. Ünvanlı dövlət sosial yardımı “Dövlət Proqramı” çərçivəsində rayon əhalisinə Sosial Müdafiə Mərkəzi tərəfindən 17290 nəfər ailə üzvü olmaqla 4673 ailəyə Ünvanlı sosial yardım verilmişdir. Sosial xidmətdə olan 320 tənha və kimsəsizin problemlərinin həlli, müxtəlif formada onlara maddi və mənəvi yardımların göstərilməsi təmin olunmuşdur. Mərkəz tərəfindən 16 nəfərə sanator–kurort müalicəsi üçün göndərişlər verilmiş, 48 nəfər əlil isə Nabran istirahət mərkəzinə göndərilmişdir. 19 nəfərə pulsuz avtomobillər verilmişdir. 325 nəfər Böyük Vətən müharibəsi, 20 Yanvar və Qarabağ müharibəsi əlilləri Prezident təqaüdü alır.

Hesabat dövründə rayon əhalisinin və müəssisələrin elektrik enerjisi, qaz, istilik, içməli su təminatının daha da yaxşılaşdırılması məqsədilə məqsədyönlü işlər görülmüşdür.

Qaz təchizatı sahəsində Cənubi Sovet meydanı, N.Nərimanov prospekti, Əbilov, M.Fətəli, B.Məcidov, Z.Əhmədbəyov, X.Mustafayev küçələrində qaz kəmərlərinin uzun müddət istismarda olması və yeni çoxmərtəbəli binaların inşası nəticəsində vətəndaşların qaza olan tələbatının tam ödənilməməsi səbəbindən qaz kəmərlərində əsaslı təmir işlərinə ehtiyac yaranmışdır.

İstilik təchizatı üzrə rayon ərazisində 174 yaşayış binası istiliklə təmin olunmur, onlardan 4 bina üçün hazırda qazanxananın əsaslı təmiri aparılır. 62 bina üçün istilik mənbəyi olmadığına görə qazanxanaların tikintisinə ehtiyac var. Digər binalarda isə yararsız vəziyyətə düşmüş aşağı paylayıcı, binadaxili və məhəllədaxili sistemlərdə əsaslı təmir işləri aparılmalıdır.

Azərbaycan Respublikası Prezidentinin sərəncamı ilə təsdiq edilmiş “2011–2013–cü illərdə Bakı şəhərinin və onun qəsəbələrinin sosial–iqtisadi inkişafının Dövlət Proqramı”na əsasən Yasamal rayonunda 11 məktəbin, 21 məktəbəqədər uşaq müəssisəsinin əsaslı təmiri, yenidən qurulması və Yeni Yasamal yaşayış massivində məktəbəqədər uşaq müəssisəsinin tikintisi nəzərdə tutulmuşdur.

Rayonun ümumtəhsil məktəblərinin pedaqoji kollektivləri təhsilin məzmununun yeniləşdirilməsi, keyfiyyətcə yaxşılaşdırılması, gənc nəslin bir şəxsiyyət kimi formalaşdırılması istiqamətində müəyyən işlər görmüşlər. Bu, özünü 2011/2012–ci il Tələbə Qəbulu üzrə Dövlət Komissiyasının yekunlarında göstərmişdir. Bakı şəhəri üzrə Təhsil İdarəsinin tabelyində olan 21 tam orta məktəbin şagirdlərinin ali təhsil müəssisələrinə qəbul göstəriciləri 49,2 faiz təşkil etmişdir. Rayonun 7 məktəbinin (60, 308, 52, 20, 175, 158, 167 N–li) qəbul göstəriciləri şəhər göstəricisindən yüksək olmuşdur. Şəhər üzrə göstərici 52 faiz təşkil etmişdir. Digər 14 məktəbin göstəriciləri 25 faizdən 46 faizədək olmuşdur. 600–dən çox bilik balı toplayanların sayı 20 nəfərdir.

Təhsilin keyfiyyətinə təsir göstərən əsas amillərdən biri şagirdlərin dərsə davamiyyət göstəricisidir. Rayonda yerləşən Bakı şəhəri üzrə Təhsil İdarəsinin 21 ümumtəhsil müəssisəsində 29 noyabr tarixdən 22 dekabr 2012–ci il tarixədək 9–10–11–ci sinif şagirdlərinin dərsə davamiyyəti yoxlanılmış və təhlil edilmişdir. Təhlil zamanı 9–cu siniflərdə dərsə davamiyyətin 82 faiz, 10–cu siniflərdə 72,6 faiz, 11–ci siniflərdə isə 67 faiz olması müəyyən edilmişdir. Bu rəqəmlərdən görünür ki, üzürsüz səbəbdən dərs buraxmış şagirdlər arasında 10–11–ci sinif şagirdlərinin xüsusi çəkisi yüksəkdir. Bu da bəzi məktəb rəhbərliyinin, onun müavinlərinin, xüsusən də ünsiyyətdə olduqları sinif rəhbərlərinin bu işə lazımi diqqət göstərməməsi nəticəsində əmələ gəlmişdir. Yoxlama göstərmişdir ki, müəllimlər dərsə davam etməyən, dərsdən yayınan şagirdlərin dərsdə olub–olmamaları barədə heç də hər zaman sinif jurnallarında qeydlər aparmırlar. Uzun müddət dərsə davam etməyənlərlə, onların valideynləri ilə izahat işi aparılmır. Onların dərsə qayıtmaları üçün görülən tədbirlər lazımi nəticəni verməmişdir.

Ümumtəhsil məktəblərinin rəhbərləri, pedaqoji kollektivləri səbəbləri araşdırmalı, təhsilin səviyyəsinin yüksəldilməsi istiqamətində təsirli tədbirlər görməlidirlər.

Rayon icra hakimiyyəti rayonun müalicə–profilaktika müəssisələri ilə birgə rayon əhalisinin sağlamlığını daim diqqət mərkəzində saxlamışdır. Güzəştli əhali qrupuna pulsuz dərman preparatlarının verilməsi istiqamətində rayonun müalicə–profilaktika müəssisələri tərəfindən müəyyən işlər görülmüşdür. Lakin aparılan təhlillər göstərmişdir ki, bəzi xəstəliklərin dinamikası əvvəlki illərlə müqayisədə artmışdır. Məsələn, rayon qeydiyyatında aktiv formalı vərəm xəstələrinin sayı 2011–ci ildə 258 nəfər olmuşdursa, bu rəqəm 2012–ci ildə 264–ə çatmışdır. 2011–ci illə müqayisədə 2012–ci ildə şəkərli diabet xəstələrinin sayı 550 nəfər, qan və qanyaradıcı orqan xəstələri isə 6 nəfər artmışdır. Bu və digər xəstəliklərin artma tendensiyası şura iclaslarında, yekun hesabatlarında müzakirə olunsa da, görülən işlər kifayət etməmişdir. Rayonun müalicə–profilaktika müəssisələri ilə birgə bir daha bu xəstəliklərin artmasını təhlil etməli və tibbi xidmətin yaxşılaşdırılması, xəstəliklərin profilaktikası məqsədilə yeni tədbirlər işlənib hazırlanmalıdır.

Səhiyyə müəssisələrinin maddi–texniki bazalarının möhkəmləndirilməsi istiqamətində də xeyli işlər görülür.

13 saylı uşaq poliklinikasında əsaslı təmir işləri isə başa çatdırılmışdır.

Təhsil və səhiyyə müəssisələrinin istiliklə təchizatı məsələləri də nəzarətdə olmuşdur. Bu məqsədlə istilik qazanxanalarının əsaslı təmiri, modernləşdirilməsi, yeni istilik mənbələrinin yaradılması kimi işlərin görülməsi də Dövlət Proqramında xüsusi yer tutmuşdur.

Hesabat ili ərzində Azərbaycan Respublikası Prezidentinin sərəncamı ilə 2012–ci ilin “İdman ili” elan edilməsi ilə bağlı rayonda bu işin yüksək səviyyədə təşkili məqsədilə rayon icra hakimiyyəti başçısının müvafiq sərəncamı imzalanmış və tədbirlər Planı təsdiq edilmişdir. Tədbirlər planına əsasən rayonda bir sıra idman yarışları keçirilmişdir. Bu sırada ulu öndər Heydər Əliyevin anadan olmasının 89–cu ildönümünə həsr olunmuş oğlanlar və qızlar arasında mini futbol, voleybol və basketbol yarışlarını göstərmək olar. Aidiyyəti idman təşkilatları ilə birgə yeniyetmə və gənclər arasında sambo turniri, “İdman və sağlamlıq mövzusunda” rəsm müsabiqəsi keçirilmişdir. “İdman ili”nin yekunu ilə əlaqədar 22 noyabr 2012–ci il tarixdə rayon icra hakimiyyətində ictimaiyyətin iştirakı ilə toplantı keçirilmiş, əldə olunan uğurlardan və qarşıda duran vəzifələrdən danışılmışdır. Bir qrup idmançıya fəxri fərmanlar, qiymətli hədiyyələr verilmişdir.

Avropa Olimpiya Komitəsinin Baş Məclisində birinci Avropa Olimpiya oyunlarının Bakıda keçirilməsi haqqında qərarı bütün Azərbaycan xalqı kimi Yasamal rayon əhalisinin, onun idman ictimaiyyətinin, böyük sevincinə səbəb olmuşdur.

Hesabat ilində gənclərin ordu sıralarına çağırışı ilə əlaqədar rayon Səfərbərlik və Hərbi Xidmətə Çağırış üzrə Dövlət Xidmətinin rayon İdarəsi yaxşı işləmiş, Azərbaycan Respublikası Prezidentinin sərəncamlarına və Nazirlər Kabinetinin qərarlarına müvafiq qaydada əməl edilmişdir. Bütün çağırışlarda müsbət nəticə əldə edilmişdir.

Hesabat dövründə rayon bələdiyyəsi də rayonun sosial–iqtisadi inkişafında, yerli məsələlərin həllində və abadlıq–quruculuq işlərində fəal iştirak etmişdir. Belə ki, rayon icra hakimiyyəti ilə Yasamal Bələdiyyəsinin fəaliyyətinin Koordinasiya Şurası və bələdiyyənin illik iş planına uyğun olaraq yerli məsələlərin həlli və abadlıq–quruculuq üzrə bir sıra işlər görülmüşdür.

Ümumilikdə 2012–ci il ərzində Yasamal Rayon İcra Hakimiyyətinə 2837 ərizə şikayət və təklif daxil olub (2011–ci ildə 3225 müraciət). Vətəndaşlardan daxil olmuş 2743 müraciətdən 2687 müraciətə baxılaraq 717 müraciət müsbət, 268–i qismən həll olunmuş, 920–nə müvafiq izahat verilmiş, 81 müraciət tabeli təşkilatlara göndərilmiş, 573 müraciət isə əsassız hesab edilmişdir. Vətəndaşlardan daxil olmuş müraciətlər əsasən mənzil, təmir–tikinti, sahibkarlığın inkişafı, təhsil sahəsi ilə əlaqədar olmuşdur. Ötən il ərzində vətəndaşların qəbulu və müraciətləri ilə iş məsələləri icra hakimiyyəti başçısı aparatında müxtəlif müşavirələrdə 21 dəfə müzakirə edilmişdir.

Vətəndaşların qəbulu əvvəlki illərdə olduğu kimi təsdiq olunmuş cədvələ əsasən aparılmışdır.

2012–ci ildə icra hakimiyyəti başçısının aparatında 3167 vətəndaş qəbul edilmişdir. İcra hakimiyyəti başçısının qəbulunda ötən il ərzində 410 nəfər olmuşdur. Qəbul zamanı vətəndaşların müraciətləri əsasən mənzil məsələsi, evlərin təmiri, abadlıq işlərinin aparılması, kommunal problemlərin həllinə köməklik göstərilməsi ilə əlaqədar olmuşdur.

Ümumiyyətlə, 2012–ci ildə Yasamal rayonunun sosial–iqtisadi inkişafı və genişmiqyaslı abadlıq–quruculuq işlərinin aparılması, əhaliyə göstərilən kommunal məişət xidmətlərinin səviyyəsinin daha da yaxşılaşdırılması istiqamətində əhəmiyyətli işlər görülmüşdür.

Görülmüş işlərlə yanaşı, qarşıda daha mühüm vəzifələr durur.

Azərbaycan Respublikasının Prezidentinin ümummilli lider Heydər Əliyevin 90 illik yubileyinin qeyd edilməsi haqqında sərəncamını əldə rəhbər tutaraq rayon icra hakimiyyəti silsilə tədbirlər planını təsdiq etmişdir. Tədbirlər planına əsasən Heydər Əliyevin 90 illik yubileyinin rayonda yüksək səviyyədə qeyd edilməsi təmin olunacaqdır. Belə ki, şəhərin şimal hissəsindən rayona girişdə 1,3 hektar ərazinin abadlıq, quruculuq işlərinin aparılması və yaşıllıq sahəsinin salınması, Akim Abbasov küçəsi ev 1, Yeni Yasamal yaşayış massivi ev 54, Zahid Xəlilov küçəsi 570–ci məhəllədə nümunəvi həyətlərin yaradılması və mövcud nümunəvi həyətlərin bərpası, “2011–2013–cü illərdə Bakı şəhərinin və onun qəsəbələrinin sosial–iqtisadi inkişafı Dövlət Proqramı”na əsasən rayonun 53, 153, 158, 167 N–li tam orta məktəblərin, 38, 68, 79, 93, 98 nömrəli məktəbəqədər uşaq müəssisələrinin əsaslı təmiri, 99 N–li körpələr evi–uşaq bağçası üçün əlavə korpusun tikintisi işlərinin gedişini nəzarətdə saxlamaq və vaxtında iştifadəyə verilməsinə nail olunacaqdır.

Yeni Yasamal yaşayış massivində yeni uşaq bağçasının tikintisi, şəhər, uşaq poliklinikalarının və təcili tibbi yardım xidmətlərinin köməkçi yardım stansiyasının tikintisi, idman kompleksinin tikintisi, istirahət parkının yenidənqurulması və bərpası, 19 saylı şəhər poliklinikasının əsaslı təmiri, rayon əhalisinin fasiləsiz içməli su ilə istiliklə təchiz olunmayan 174 yaşayış binasının istiliklə təmin olunmasına nail olunacaq və istilik mənbəyi olmayan 62 yaşayış binası üçün qazanxanaların tikintisi başa çatdırılacaqdır.

12 fevral 2013–cü il tarixdə Azərbaycan Respublikasının Prezidenti İlham Əliyevin sədrliyi ilə “Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrasının dördüncü ilinin yekunlarına həsr olunmuş konfrans keçirilmişdir. Konfransda həyatımızın bütün sahələrində olan inkişaf, əldə edilən uğurlar qeyd edilməklə yanaşı, dövlət məmurlarının, qulluqçularının vətəndaşlara qayğı göstərilməsi, onlarla təmasda olmaq, istəklərini dinləmək kimi vəzifələrini unutmaları qabarıq şəkildə qeyd olunmuşdur. Həmçinin möhtərəm Prezidentimiz tərəfindən kəskin şəkildə qeyd edildiyi kimi, bəzi vəzifəli şəxslər bundan nəticə çıxarmır, öz fəaliyyətlərində cəmiyyətin, vətəndaşların maraq və mənafelərini lazımi şəkildə nəzərə almırlar və insanları narazı salırlar.

Ayrı–ayrı hallarda məmurların övladlarının özlərini pis aparması, insanları alçaltması, təhqir etməsi, valideynlərinə arxalanması, qanunlara məhəl qoymamaları, ictimaiyyətə açıq hörmətsizlik etməsi, şübhəsiz ki, cəmiyyət arasında ciddi narazılığa səbəb olur. Sahibkarları rayon səviyyəli problemlərin həllinə cəlb etməklə, onların vəsaitlərinin istifadə edib sonradan onu qaytarmamaqla çox böyük haqsızlığa yol verilir. Sahibkarlar təbəqəsinə lazımi dəstək vermirlər, hətta bəzən onları incidirlər, maneçilik törədirlər, əlavə haqq tələb edirlər.

Azərbaycan Respublikasının Prezidenti öz çıxışı ilə hər bir vətəndaşın yanında olduğunu, bütün baş verən neqativ hallardan xəbərdar olduğunu və haqqı tapdalanan vətəndaşı məmur özbaşınalığından qoruyacağını bir daha xatırlatdı və bu cür hallara yol verən vəzifəli şəxslərə son xəbərdarlığını çatdırdı. Qoyduğu tələblər ən aşağı dövlət qulluqçusundan tutmuş ən yuxarı dövlət məmurunadək hamıya aiddir, ciddi göstərişdir, tələbdir.

Cənab Prezident konkret olaraq göstərdi ki, dövlət qulluqçusu ən nümunəvi davranışa malik olmalı, ən təvazökar insan olmalıdır. Vətəndaşlara diqqətsizlik, qayğısızlıq hallarına birdəfəlik son qoyulmalıdır.

Mərkəzi və yerli icra hakimiyyəti, hüquq–mühafizə orqanları tərəfindən əhalinin haqlı narazılığına səbəb olan, sahibkarlığın inkişafına süni əngəl yaradan, tikinti, nəqliyyat, ticarət, iaşə, təhsil, səhiyyə, sosial müdafiə və sair sahələrdə neqativ faktlar, rüşvətxorluq, korrupsiya halları vətəndaşların qəbulu, müraciətlərinə baxılması zamanı yol verilən nöqsanlar aradan qaldırılmalıdır.

Cənab İlham Əliyevin dəfələrlə vurğuladığı kimi, bizim hər birimizin başlıca vəzifəsi vətəndaşlarımıza layiqli və vicdanlı xidmət göstərməkdir. Yasamal rayonunda fəaliyyət məhz bu prinsip əsasında qurulacaqdır.

Əminliklə qeyd etmək olar ki, 2013–cü ildə Yasamal rayonunda uğurlar estafeti davam etdiriləcək, iqtisadi göstərişlər artacaq, rayon öz liderlik mövqeyini qoruyub saxlayacaq və Prezident İlham Əliyev tərəfindən qarşıya qoyulan vəzifələr uğurla icra olunacaqdır.

Qədir ASLAN

Respublika.- 2013.- 21 fevral.- S. 2.