SAMUX: ÖTƏN İLİN YEKUNLARI GƏLƏCƏK BÖYÜK PERSPEKTİVLƏRİN MÖHKƏM TƏMƏLİNƏ ÇEVRİLƏCƏKDİR

Samux rayonu ötən ili içtimai–siyasi və mədəni həyatın bir çox sahələrində böyük uğurlarla yola salmışdır. Rayonun kəndlərinin abadlaşdırılması, xüsusilə də rayon mərkəzinin simasının gözəlləşdirilməsi və şəhər statusuna layiq görkəm verilməsi məqsədilə geniş yenidənqurma və abadlaşdırma tədbirləri həyata keçirilmişdir.

Bu günlərdə rayon fəallarının 2012–ci ilin sosial–iqtrisadi inkişafının yekunlarına və cari ildə qarşıda duran vəzifələrə dair hesabat yığıncağında il ərzində rayonda həyata keçirilmiş işlər barədə ətraflı və prinsipial söhbət getmiş, qarşıda duran vəzifələrdən danışılmışdır.

Hesabat məruzəsi ilə çıxış edən rayon icra hakimiyyətinin başçısı Alı Qocayev son illər ölkə iqtisadiyyatında qazanılmış nailiyyətləri geniş şərh edərək demişdir ki, rayon sakinləri də ümumi nailiyyətlərə öz sanballı töhfələrini vermək məqsədilə yüksək işgüzarlıq nümunəsi göstərmiş və ili nailiyyətlərlə yola salmışlar.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrası istiqamətində geniş abadlıq və quruculuq işləri həyata keçirilmişdir. Rayonda sosial–iqtisadi inkişafın bütün sahələrində əsaslı dönüş yaradılmış və nəticədə yüksək nailiyyətlər əldə olunmuşdur. Azərbaycan Respublikası Prezidentinin Sərəncamı ilə ayrılmış vəsait hesabına rayonun 17 min əhalisinin yaşadığı, 6 yaşayış məntəqəsini birləşdirən Gəncə–Sərkar–Qarayeri–Qədili avtomobil yolunun tikintisinə başlanmış və qısa müddət ərzində başa çatdırılaraq sakinlərin istifadəsinə verilmişdir.

Yolun Sərkar, Ziyadlı, Qovlarsarı kəndlərindən və Qarayeri qəsəbəsindən keçən hissələrinin kənarlarında geniş abadlıq işləri aparılmışdır. Hesabat dövründə bu məqsədlə Sərkar kəndində 620 kvadratmetr hörgü və 6200 kvadratmetr suvaq, Ziyadlı kəndində 780 kvadratmetr hörgü, 2110 kvadratmetr suvaq, Qovlarsarı kəndində 1670 kvadratmetr suvaq, 2050 kvadratmetr rəngləmə, 140 poqonmetr bordür düzülməsi, ictimai yaşayış evlərinin qarşısında çiçək və bəzək kollarının əkilməsi işləri aparılmışdır.

Qarayeri qəsəbəsində yolun kənarında 800 metr səki salınmış, dairəvi hərəkətin təşkili üçün dairə tikilmiş və çilçıraq quraşdırılmışdır. Qəsəbənin mərkəzi hissəsində yolun sağ tərəfində istirahət parkı yaradılmış, bulaq tikilmiş və işıqlanma sistemi qurulmuşdur. Həmin ərazidə Qoşqar çayı üzərində olan körpünün kənarlarına yeni məhəccər çəkilərək rənglənmişdir.

Ümummilli liderin adını daşıyan mərkəzi istirahət parkında yenidənqurma işlərinə başlanmışdır. Parkda ümumi sahəsi 1400 kvadratmetr olan Heydər Əliyev mərkəzinin, kafenin, oyun zalının və çay evinin tikintisinə başlanmış, hazırda işlər davam etdirilir. Parkın su sistemi, elektrik təchizatı sistemi qurulur, meydanın və gəzinti yollarının kənarına mərmər bordürlər düzülür. Eyni zamanda parkın sahəsi genişləndirilmiş və giriş hissəsinin yenidən qurulması başa çatmış və qarşısına dekorativ hasar çəkilişinə başlanmış və hazırda davam etdirilir.

Şəhərin Heydər Əliyev prospektinin yenidənqurulması layihəsinə uyğun olaraq prospektin sağ tərəfində üç ədəd parkın salınması başa çatdırılmışdır.

28 May küçəsində yolun hərəkət hissəsi genişləndirilmiş, yararsız tikililər sökülmüş, yolun sağ tərəfində 450 metr uzunluğunda dekorativ hasar inşa edilmiş, sol tərəfində yararsız hasarlar yenidən hörülmüş, evlərin fasadlarında və hasarlarda 2 min kvadratmetr suvaq işləri aparılmış, haşiyələrə aqlay üzlüklər vurulmaqla, fasad və divarlar müasir üslubda rənglənmişdir. Səkilər yenidən qurulmuş və onlara asfalt örtüyü salınmışdır. Küçənin işıqlanma sisteminin qurulması üçün 12 ədəd müasir tipli işıq dirəkləri quraşdırılmışdır. Küçədə su arxı yenidən çəkilmiş, həyətlərdən axıdılan çirkab suların qarşısı alınmışdır. 250 kvadratmetr sahədə sakinlər üçün istirahət guşəsi yaradılmış və bulaq quraşdırılmışdır.

N. Nərimanov küçəsindən yeni yaşayış massivinə keçən hissədə olan su kanalına 1,5 metr diametrində, 11 metr uzunluğunda beton boru salınaraq körpü yaradılmışdır. Bu da həmin yaşayış massivində yaşayan əhalinin gediş–gəlişini asanlaşdırmışdır.

Hesabat ilində Alıuşağı–İnstitut–Gəncə yolunda təmir və abadlıq işləri aparılmış, yolun hər iki tərəfində yararsız tikililər və çəpərlər sökülmüş, divarlar təmir edilərək rənglənmişdir. Yola yeni asfalt örtüyü salınmış və kənarlarına şam və sərv ağacları əkilmişdir. Bütün istiqamətlərdə yolların çiyin hissələri qreyderlə plana salınmış, keçid boruların giriş–çıxış hissələri təmizlənmiş, qırılmış siqnal dirəkləri yenisi ilə əvəz edilmişdir. Rayonun respublika əhəmiyyətli Gəncə–Samux, yerli əhəmiyyətli Samux–İnstitut, Gəncə–Qarayeri, Samux–Hacıalılı, Samux–Lək, Samux–Yenikənd–Poylu avtomobil yollarında yolun çiyin hissələrinə 1030 kubmetr çınqıl materialı tökülərək saxlanma işləri görülmüşdür. Həmçinin rayonun Qırmızı Samux, Burunqovaq, Yenikənd–Poylu, Kəsəmən avtomobil yollarına 3580 kubmetr çınqıl materialı tökülərək qreyderlə yayılıb hamarlanmışdır.

Tikintisinə ötən il başlanmış Qarabağ müharibəsi əlilləri və şəhid ailələri üçün 36 mənzilli 4 mərtəbəli yaşayış binasında tikinti işləri tam başa çatdırılmış, hazırda binanın təhvil verilməsi ilə bağlı son tamamlama işləri görülür. Rayon prokurorluğunun yeni inzibati binası inşa edilərək istifadəyə verilmişdir. Yuxarı Ağasıbəyli kəndində yerli nümayəndəlik, bələdiyyə və icma üçün inşa edilmiş bina istifadəyə verilmişdir. Eyni zamanda ucqar Burunqovaq kəndində yerli nümayəndəlik və bələdiyyə üçün inzibati bina inşa edilmişdir.

Aşağı Ağasıbəyli kəndində yerləşən kənd stadionu yenidən qurulmuş, idmançılar üçün 3 otaqdan ibarət lazımi avadanlıqlarla təmin olunmuş soyunub–geyinmə otağı inşa edilmişdir. Stadionun ətrafı hasarlanmış və 100 ədəd müasir tipli oturacaqlar qoyulmuşdur.

Hesabat ilində rayonda yeni istehsal sahələrinin və iş yerlərinin açılması istiqamətində də müəyyən işlər görülmüşdür. Bu barədə danışan icra başçısı demişdir ki, rayonun İstixana kəndi ərazisində 3 hektar ərazidə faraş meyvə–tərəvəz istehsal edəcək “Aqrikola” MMC İstixana kombinatı fəaliyyətə başlamışdır. Hazırda kombinatda 30 nəfər daimi işlə təmin edilmişdir, müəssisənin tam fəaliyyətə başlaması ilə rayonun 100–dən çox vətəndaşı daimi işlə təmin olunacaqdır.

Həyata keçirilən tədbirlər nəticəsində 2012–ci il ərzində 747 iş yeri açılmışdır. Onlardan 486 iş yeri daimi, 261 iş yeri müvəqqətidir. Ümumilikdə 2004–2012–ci illər ərzində rayonda 4467–si daimi olmaqla 15403 yeni iş yeri yaradılmışdır.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nda Samux rayonu üzrə tədbirlərdən üçü — rayonun elektrik şəbəkələrinin yenidən qurulması və hava elektrik verilişi xətlərinin özüdaşıyan izolyasiyalı naqillərlə əvəz olunması, səhiyyə müəssisələrinin təmiri, avadanlıqlarla təchiz olunması və yenilərinin tikintisi, mədəniyyət obyektlərinin əsaslı təmiri istisna olmaqla digər sahələrdə işlər uğurla aparılır. Göstərilən üç sahədə də işlərin başlanması üçün müvafiq tədbirlər görülür.

Əldə olunmuş uğurlar statistik göstəricilərdə də öz əksini tapmışdır. Belə ki, rayonun inkişafını xarakterizə edən əsas makroiqtisadi göstərici — ümumi məhsul buraxılışının həcmi 98,1 milyon manata çatmışdır. Ötən illə müqayisədə onun həcmi 17,9 faiz artmışdır. ümumi məhsul buraxılışının adambaşına düşən həcmi 1762 manat olmuşdur. Ümumi məhsul buraxılışının 82,6 faizi qeyri–dövlət sektorunun payına düşür ki, bu da əvvəlki illə müqayisədə 5,8 faiz çoxdur.

Ümumi məhsul buraxılışının 6,04 milyon manatı və ya 6,2 faizi sənayenin, 54,4 milyon manatı və ya 55,5 faizi kənd təsərrüfatının, 14,1 milyon manatı və ya 14,4 faizi tikinti–quraşdırma işlərinin, 2,5 milyon manatı və ya 2,5 faizi nəqliyyatın, 0,5 milyon manatı və ya 0,5 faizi informasiya və rabitə sahələrinin, 20,6 milyon manatı və ya 21,0 faizi ticarət və xidmət sahələrinin payına düşür.

Ümumi daxili məhsulun həcmində məhsul istehsallarının xüsusi çəkisi 76,1 faiz, xidmətlərin istehsalı isə 23,9 faiz təşkil etmişdir.

2012–ci ildə rayon iqtisadiyyatında çalışan işçilərin orta aylıq əmək haqqı 232,9 manat təşkil etmişdir ki, bu da 2011–ci illə müqayisədə 3,9 faiz çoxdur.

Sonra məruzəçi diqqətini rayon iqtisadiyyatında xüsusi rol oynayan sahibkarlığın inkişaf etdirilməsi məsələsinə yönəltmişdir. Bu sahədəki uğurları xüsusi vurğulayan Alı Qocayev demişdir ki, ümumi məhsul buraxılışında qeyri–dövlət sektorunun xüsusi çəkisi ildən–ilə artmaqdadır. 2012–ci ildə ümumi məhsul buraxılışının həcmində qeyri–dövlət sektorunun payı 82,6 faiz təşkil etmişdir ki, bu da ötən illə müqayisədə 5,8 faiz yksəkdir. İl ərzində Sahibkarlığa Kömək Milli Fondunun xətti ilə rayon sahibkarlarına 48 layihə üzrə 3274 min manat güzəştli kredit verilmişdir. Bu kreditlər hesabına rayonda 174 yeni iş yeri yaranmışdır.

Samux rayonunun iqtisadiyyatının əsasını aqrar sahə təşkil edir. Məruzədə bu sahədə qazanılmış nailiyyətlərdən geniş söhbət açılmışdır.

Ötən il rayonda 54,4 milyon manatlıq və əvvəlki illə müqayisədə 27,4 dəfə çox kənd təsərrüfatı məhsulu istehsal edilmişdir. Ümumi kənd təsərrüfatı məhsulu istehsalının 99,6 faizi qeyri–dövlət sektorun payına düşür. Hesabat ilində rayonda 9494 hektar sahədə payızlıq, 4424 hektar sahədə isə yazlıq səpin aparılmışdır. Aparılmış səpinin 5491 hektarı buğda, 3617 hektarı dən üçün arpa, 386 hektarı isə xəsil, 594 hektarı çoxillik otlar, 319 hektarı kartof, 976 hektarı tərəvəz, 1614 hektarı günəbaxan, 397 hektarı bostan, 276 hektarı qarğıdalı, 29 hektarı pambıq, 40 hektarı şəkər çuğunduru, 24 hektarı paxlalılar, 100 hektarı isə tərəvəz toxumçuluğu olmuşdur.

İl ərzində sahələrdən 29843 ton taxıl məhsulu yığılmışdır. Məhsuldarlıq orta hesabla 33,0 sentner təşkil etmişdir. Ondan 18032 tonu buğda, 11811 tonu arpadır. Bundan başqa sahələrdən 2429 ton kartof, 10003 ton tərəvəz, 4694 ton bostan məhsulu, 14873 ton meyvə, 5793 ton üzüm, 2943 ton günəbaxan yığılmışdır. Ötən illə müqayisədə bütün növ məhsullar üzrə artım qeydə alınmışdır.

Növbəti ildə kənd təsərrüfatında daha yüksək nəticələr əldə etmək üçün geniş hazırlıq işləri aparılmışdır. 2013–cü ilin məhsulu üçün 01 yanvar tarixinə 10925 hektar sahədə şum qaldırılmış, 9540 hektar sahədə səpin aparılmışdır.

2013–ci ilin 1 yanvarına kimi iri buynuzlu mal–qaranın sayı 20675 baş olmuşdur. Bundan ana inək və camışların sayı 9989 baş, qoyun və keçilərin sayı 165721 baş təşkil edir. Müvafiq dövrdə 3421 ton diri çəkidə ət, 13714 ton süd, 5438 min ədəd yumurta istehsal olunmuşdur. Fiziki çəkidə yun 326 ton istehsal edilmişdir.

Kanallarda 45 ədəd hidrotexniki qurğu, 20 ədəd hidrotexniki postlar, 640 metr boru kəməri təmir edilmiş, kanalların kol–koslardan təmizləmə işləri aparılmışdır. Qırmızı Samux qəsəbəsində və Lüksemburq kəndində əkin sahələrinin suvarılmasının yaxşılaşdırılması üçün Yenikənd kəndində su sərfiyyatı 3200 kubmetr/saat olan, 315 kvt gücündə yeni nasos stansiyası qurulmuşdur ki, bu da əlavə olaraq 600 hektar əkin sahəsinin suvarılmasını təmin edəcəkdir.

Nazirlər Kabinetinin “Buğda istehsalçılarının maddi marağının artırılması və buğda istehsalının stimullaşdırılmasına dair” müvafiq qərarına əsasən mart ayında 2012–ci il üçün 1835 nəfər buğda istehsalçısına 199408 manat yardım verilmişdir.

Azərbaycan Respublikası Prezidentinin “Kənd təsərrüfatı məhsulları istehsalçılarına dövlət dəstəyi haqqında” Sərəncamı bu artımı daha da sürətləndirmişdir. 2012–ci ildə rayonun 23 ərazi komissiyası üzrə 7650 nəfər istehsalçıya 735066 manat yardım “Kapital Bank” ASC–nin Samux filialı tərəfindən plastik kartlarla ödənilmişdir. 2013–ci ilin məhsulu üçün 1636 nəfər buğda istehsalçısına 193083 manat yardım hesablanmışdır. Eyni zamanda Samux rayon “Aqroservis” filialı tərəfindən 2012–ci ildə 228 təsərrüfat sahibinə 248 ton gübrə güzəştlə satılmışdır.

2012–ci ildə rayon əhalisinin gəlirləri 98 milyon 649 min manat təşkil etmişdir. Adambaşına düşən gəlirlər 1771,1 manat olmuşdur. Rayon üzrə pensiyaçıların ümumi sayı 7 min 984 nəfər olmaqla Dövlət Sosial Müdafiə Fondunun Samux rayon şöbəsi tərəfindən ümumi sayı 5028 nəfər fiziki və hüquqi şəxs məcburi dövlət sosial sığortasına cəlb olunmuşlar. Rayon üzrə orta aylıq pensiyanın məbləği 135,48 manata yaxındır. Hesabat dövründə 2 409 nəfərə 1229,3 min manat məbləğində sosial müavinət, 244 nəfərə Azərbaycan Respublikasının qarşısında xidmətlərə görə 249, 3 min manat təqaüd verilmişdir.

2012–ci ildə 1059 ailə ünvanlı sosial yardımı almaq üçün Əhalinin Sosial Müdafiəsi Mərkəzinə müraciət etmişdir. Bunlardan 1059 ailəyə sosial yardım təyin olunmuşdur ki, bu da aztəminatlı ailələrin yaşayışına əhəmiyyətli dərəcədə kömək deməkdir. Hər ailəyə ödənilən yardımın orta aylıq məbləği isə 103,6 manat təşkil etmişdir. Bu, ünvanlı sosial yardımın tətbiqinin ilk ili 2006–cı illə müqayisədə 52,8 faiz artım deməkdir.

Rayon əhalisinə göstərilən rabitə və poçt xidmətinin yaxşılaşdırılması istiqamətində də müvafiq işlər aparılır. Samux rayon telekommunikasiya qovşağında elektron ATS–lərin ümumi montaj tutumu 8272 nömrə təşkil edir. İl ərzində əsas telefon aparatlarının sayı 138 ədəd artırılmış, abunəçilərin sayı 8189–ə, hər 100 ailəyə düşən telefonların sayı 68,7 ədədə çatdırılmışdır. Bu da respublika göstəricisindən (58,3) xeyli yüksəkdir. Burunqovaq kəndi istisna olmaqla bütün yaşayış məntəqələrində ADSL avadanlıqları quraşdırılmış və onların ümumi tutumu 1544 port təşkil edir. Hazırda rayon üzrə 1201 abonent yüksəksürətli internet xidmətindən istifadə edir və onların sayı günü–gündən artır. 2013–cü ilin “İnformasiya–kommunikasiya texnologiyaları” ili elan edilməsi cari ildə qovşaq qarşısında mühüm vəzifələr qoyur.

Poçt xidmətinin yaxşılaşdırılması məqsədilə Samux şəhəri 2 saylı və Ziyadlı kənd poçt şöbələri üçün yeni binalar inşa edilmişdir. Rayonun ən ucqar kəndi olan Burunqovaq kəndində yeni poçt binası inşa edilmiş və yeni poçt şöbəsi fəaliyyətə başlamışdır. Əhaliyə göstərilən poçt xidmətinin keyfiyyətinin yüksəldilməsi məqsədi ilə 11 poçt şöbəsində kompyuter quraşdırılmışdır. Bu istiqamətdə işlər davam etdirilir.

Sonra məruzəçi diqqəti əhalinin elektrik enerjisi, təbii qaz və içməli su ilə təchizatının yaxşılaşdırılması sahələrinə yönəltmişdir. Qeyd olunmuşdur ki, rayon əhalisini dayanıqlı elektrik enerjisi ilə təmin etmək üçün 21 ədəd müxtəlif güclü transformator əsaslı, 86 ədədi isə cari təmir edilərək istismara verilmiş, 10/0,4 kv–luq elektrik verici xətlərdə naqillər texniki istifadə qaydalarına uyğun qaydaya salınmış, istismar müddətini keçmiş naqillərin bir hissəsi yeni naqillə əvəz edilmişdir. 186 ədəd istismara yararsız ağac dayaqlar yeni dəmir beton dayaqlarla əvəz edilmişdir. 640 ədəd yeni sayğac dəsti quraşdırılmışdır.

Əhalinin təbii qazla təminatının yaxşılaşdırılması istiqamətində həyata keçirilən tədbirlərin nəticəsidir ki, hazırda rayonda 12 709 abonent təbii qazdan istifadə edir ki, bu da ötən illə müqayisədə 526 abonent, 2003–cü illə müqayisədə 3,4 dəfə çoxdur. Əhalini mavi yanacaqla dayanıqlı təmin etmək üçün Qarayeri qəsəbəsi, Əhmədbəyli, Qovlarsarı, Sərkar kəndlərində 4 ədəd QSQO və 6 ədəd müasir tələblərə cavab verən QTŞ tipli qaz tənzimləyici qurğu quraşdırılmışdır. Quruculuq–abadlıq işləri ilə əlaqədar olaraq Samux şəhəri 28 May küçəsi, Heydər Əliyev prospekti və Kolayır prospekti istiqamətində mövcud olan qaz xətlərinin layihə əsasında yenidən çəkilişi və təmir–bərpa işləri həyata keçirilmişdir. 2012–ci il ərzində ümumilikdə 1845 ədəd yeni qaz sayğacı abonentlərin mənzillərinə quraşdırılmışdır.

İçməli su təminatının yaxşılaşdırılması məqsədilə xətlərdə baş verən bütün yeraltı sızmaların qarşısı vaxtında alınmış, əhalinin içməli suya olan tələbatını tam təmin etmək üçün dərinlik nasosları cari təmir edilərək istehsal gücləri artırılmışdır. Şəhərin Elçin Məmmədov və Məmməd Əsədov küçələrinə 260 metr məsafədə yeni su xətti çəkilmiş, küçə sakinlərinin su problemi tamamilə həll edilmişdir. Bunun üçün 1 ədəd subartezian quyusunun qazıntısı başa çatdırılaraq istifadəyə verilmişdir.

Hesabat məruzəsində rayonun təhsil, səhiyyə və mədəniyyət sahələrinin inkişafı məsələlərinə də geniş yer ayrılmışdır.

Son illərdə rayonda inşa edilən məktəblər, onların maddi–texniki bazasının yaxşılaşdırılması və informasiya–kommunikasiya texnologiyaları ilə təmin olunması rayonun təhsil sisteminə müsbət təsir göstərmişdir. Son 9 ildə rayonda 15 yeni məktəb binası inşa edilmiş, 14 məktəbdə, 4 uşaq bağçasında əsaslı təmir işləri aparılmışdır. Bu baxımdan ötən il daha uğurlu olmuşdur. Belə ki, 2012–ci ildə rayonda rekord miqdarda yeni məktəb binası inşa edilmişdir. Şəhər 2 saylı tam orta məktəbi üçün 360 şagird yerlik, Lək kənd tam orta məktəbi üçün 220 şagird yerlik, Poylu və Salahlı kənd məktəbləri üçün isə 180 şagird yerlik, Qiyaslı məktəbi üçün 80 şagird yerlik yeni məktəb binalarının tikintisi başa çatdırılmış və istifadəyə verilmişdir. Tikintisinə hesabat ilində başlanmış 180 şagird yerlik Seyidlər kənd tam orta məktəbində işlər başa çatmışdır. Samux şəhər 1 saylı uşaq bağçası isə əsaslı təmirdən sonra istifadəyə verilmişdir.

Ötən il 346 nəfər məzun ali məktəbə sənəd vermiş, 117 nəfər ali məktəbə qəbul olmuşdur. Bu göstərici ötən illə müqayisədə 19 nəfər çoxdur. Yüksək balla ali təhsil ocaqlarına daxıl olan məzunların da sayı artmışdır. Yüksək bal toplayan gənclərlə rayon rəhbərliyinin görüşü keçirilmiş, onlara qiymətli hədiyyələr verilmişdir.

Hesabat ilində məktəblərin maddi–texniki bazasının yaxşılaşdırılması istiqamətində müəyyən işlər görülmüşdür. Hazırda rayon məktəblərində 266 ədəd kompyuterdən, 13 ədəd noutbukdan və 13 ədəd proyektordan istifadə edilir. 35 məktəbdən 19–da kompyuterlər internet şəbəkəsinə qoşulmuşdur. Ümumtəhsil məktəblərinin kadr təminatı ilə bağlı işlər aparılmış, Təhsil Nazirliyində müsabiqə və müsahibədən müvəffəqiyyətlə keçmiş 19 nəfər ixtisasları üzrə vakant yerlərə təyin olunmuşdur.

İl ərzində rayon xəstəxanalarında 1022 xəstə tərəfindən 21670 çarpayı günü keçirilmişdir. Həmin müddətdə diri doğulan körpələrin sayı 737 nəfər təşkil etmiş, 1 yaşa qədər uşaq və ana ölümü halları olmamışdır.

Rayon gənclərinin hərbi vətənpərvərlik ruhunda tərbiyə olunması istiqamətində də müəyyən tədbirlər həyata keçirilmişdir ki, bunun da nəticəsi olaraq son illərdə rayon gənclərinin hərbi çağırışdan yayınma hallarına yol verilməmişdir. İl ərzində Azərbaycan Respublikası Prezidentinin sərəncamlarına uyğun olaraq həqiqi hərbi xidmətə çağırışlar vaxtında yerinə yetirilmişdir.

2012–ci ildə şəhər, qəsəbə və kəndlərin sosial–iqtisadi inkişafında, abadlıq–quruculuq işlərində və yerli əhəmiyyətli məsələlərin həllində bələdiyyələr, inzibati ərazi dairələri üzrə nümayəndələrlə birgə yaxından iştirak etmişdir. İl ərzində bələdiyyələr tərəfindən “Bir bələdiyyə–azı bir layihə” çərçivəsində 23 layihə həyata keçirilmişdir. Bu layihələr əsasən ərazilərin abadlaşdırılması və yaşıllaşdırılması, suvarma suyu ilə təchizatı, su arxlarının saxlanması, küçə və yolların təmiri, məişət tullantılarının yığılması və daşınması sahələrini əhatə etmişdir. Layihələrin həyata keçirilməsinə 77,2 min manat vəsait sərf edilmişdir.

Hesabat ilində Samux Rayon İcra Hakimiyyəti başçısı aparatına ümumilikdə 881 ərizə, təklif və şikayət daxil olmuşdur ki, bu da ötən illə müqayisədə 519 ərizə və ya 37,1 faiz azdır. Müraciətlərdən 642 yerli sakinlərdən, 239 isə respublikanın yuxarı təşkilatlarından olmuşdur. Əvvəlki illə müqayisədə hesabat ilində şikayətlərin sayı xeyli azalmışdır. Bu da ərizə və şikayətlərə baxılması vəziyyətinin daim diqqət mərkəzində saxlanması sayəsində mümkün olmuşdur.

İl ərzində keçirilən 45 səyyar qəbul–görüşlərdə 5703 nəfər iştirak etmişdir. Səyyar qəbullar zamanı vətəndaşlar tərəfindən 180 şikayət və təklif daxil olmuşdur ki, onlardan da 141–i və ya 78,3 faizi həll edilmiş, 39–u və ya 21,7 faizi hazırda icradadır. Onlardan 20–nin həlli ilə bağlı müvafiq mərkəzi icra hakimiyyəti orqanları qarşısında məsələ qaldırılmışdır.

Məruzəçi çıxışının sonunda diqqəti 2013–cü ildə qarşıda duran vəzifələrə yönəldərək demişdir ki, Nazirlər Kabinetinin 2012–ci ilin sosial–iqtisadi inkişafının yekunlarına həsr olunmuş iclasında Azərbaycan Respublikasının Prezidenti cənab İlham Əliyevin proqram xarakterli nitqlərində qarşıya qoyduğu vəzifələri yerinə yetirmək üçün bütün imkanlar səfərbərliyə alınmalıdır.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın son ilində proqramda nəzərdə tutulan işlərin tam yerinə yetirilməsinə nail olunmalıdır. Ümumiyyətlə 2013–cü ildə rayonda daha böyük layihələrin həyata keçirilməsi gözlənilir.

Məruzə ətrafında çıxış edənlər ötənilki yekunları gələcək, daha böyük nailiyyətlərin təməli kimi dəyərləndirmiş, ölkə başçısının daxili və xarici siyasətini dəstəkləməklə respublikamızda cari ildə əldə ediləcək uğurlarda samuxluların da sanballı payı olacağını bildirmişlər.

Hesabat yığıncağında müzakirə olunan məs

ələlərlə bağlı geniş qərar və ölkə başçısına minnətdarlıq ifadə edən müraciət qəbul etmişlər.

Y.TANRIVERDİYEV

Respublika.- 2013.- 24 fevral.- S. 5.