| Yaradıcılıq gecəsi keçirilmişdir

İ.Əbilov adına Mədəniyyət Mərkəzində mahir qarmon ifaçısı, pedaqoq Nizami Əsgərovun səhnə fəaliyyətinin 35 illiyinə həsr olunmuş musiqili bədii gecə keçirilmişdir.

Tədbiri giriş sözü ilə açan Mədəniyyət Mərkəzinin bədii rəhbəri, əməkdar mədəniyyət işçisi Mirəhməd Əsgərov demişdir: “Vaxtı ilə SSRİ xalq artistləri Lütfiyar İmanov, Zeynəb Xanlarova, xalq artistləri Rübabə Muradova, Səkinə İsmayılova və başqa görkəmli incəsənət ustaları bu mədəniyyət mərkəzində çıxış etmişlər.

Onların davamçılarından biri də görkəmli qarmon ifaçısı Nizami Əsgərovdur. O, öz ifaçılıq dəst–xəttilə milyonlarla musiqisevərlərin sevgisini qazanmışdır”.

Tədbirdə çıxış edən respublikanın əməkdar müəllimi Sona Rzaquliyeva Nizami Əsgərovun gözəl musiqiçi, görkəmli pedaqoq olmasından danışdı. Milli Konservatoriyanın nəzdində olan İncəsənət gimnaziyasının musiqi şöbəsinin müdiri Məhərrəm Məmmədov Nizami Əsgərovun musiqi fəaliyyətindən, onun dünya şöhrətli müğənni, SSRİ xalq artisti Zeynəb Xanlarova kimi bir müğənni ilə çalışmasından iftixar hissi ilə söz açdı və sənətkara konservatoriyanın “Fəxri fərman”ını təqdim etdi.

Azərbaycan Kütləvi İnformasiya Vasitələri İşçiləri Həmkarlar İttifaqı tərəfindən Nizami Əsgərov “Mədəniyyət və incəsənət sahəsində xidmətlərinə görə “Ustad sənətkar” ali media mükafatına layiq görüldü. “Zirvə” ziyalılar təşkilatının sədri Minayə Dəyanət qızı yubilyara bu təşkilatın fəxri diplomunu təqdim edərək ona uğurlar arzuladı. Tədbirdə çıxış edən sənətşünaslıq elmləri namizədi Abasqulu Nəcəfzadə və digər natiqlər Nizami Əsgərovu təbrik edərək ona musiqimizin çiçəklənməsi yolunda müvəffəqiyyətlər arzuladılar. Sonra səhnəyə yubilyarın rəhbərlik etdiyi “Odlar yurdu” instrumental ansamblı dəvət olundu. Nizami Ələsgərovun qarmonda rəngarəng ifası, eləcə də əməkdar artistlər Əbülfət Oğuz, Ruhəngiz Musəvi, xanəndə Mirməmməd Mircavadov, müğənni Kəmalə Musayevanın çıxışları alqışlarla qarşılandı. Sonda Nizami Əsgərov tədbirin təşkilatçısı olan Mirəhməd müəllimə və iştirakçılara öz minnətdarlığını bildirdi.

Elşad DAĞLI,

Respublika.- 2013.- 3 mart.- S. 8.