“FÜYUZAT”ın YENİ SAYI ÇAPDAN ÇIXMIŞDIR

Dərin kökümüz, şərəf sözümüz, əmanət yükümüz,

qeyrət gücümüz — Milli Ruh…

Keçmişimizdən gələn varlıq harayımız, elm, qüvvət,

şücaət qalamız — Milli Ruh…

Var olan dünənimiz, bugünümüz, sabahımız — Milli Ruh…

Mütəfəkkir alim və publisist Əli bəy Hüseynzadənin 1906–1907–ci illərdə nəşr etdirdiyi “Füyuzat” jurnalı yüz ildən sonra — 2007–ci ildən başlayaraq “Milli İrsi Mədəni Tarixi Araşdırma Fondu” tərəfindən uğurla davam etdirilir. Bu yaxınlarda onun 2012–ci ildə son sayı işıq üzü görmüşdür.

“Baş redaktordan” rubrikası ilə açılan bu sayda kitabın mədəniyyət tarixində yeri və rolu ətraflı göstərilir, “şəxsiyyət və zaman” hüdudlarında Azərbaycan mənəviyyatını zənginləşdirən ziyalılarımızın məqalələri çap olunmuşdur. Şeyxülislam Allahşükür Paşazadə (“İslama və Vətənə xidmətdə keçən ömür”), Əli bəy Hüseynzadə (“Əli bəy Hüseynzadə və “Füyuzat”), Əvhədi Marağayi (“Şərqin incisi – Əvhədi Marağayi”) və b. haqqındakı elmi–publisistik yazılar bu qəbildəndir. Jurnalın maraqla qarşılanan rubrikalarından biri də “Xatirələrdəki tarix” adlanır. Bu bölmədə dərc olunmuş “Bir mücahidin ürək dağlayan həyatı”, “Hacı Mirzə Səlim Axund Axundzadənin xatirələri” adlı yazılar didaktik mahiyyətinə görə bu gün də diqqəti cəlb edə bilər.

Jurnalı davamlı izləyən oxuculara məlumdur ki, “Füyuzat” hər yeni sayında xoş nastalji hissi yaradan, ideya baxımından müasirliklə səsləşən yazıların dərcinə də xüsusi diqqət yetirir. Retro–məqalə həvəskarları bu sayda jurnalın 1906– cı (N–6) və 1907–ci illərdə (N–7) çap olunmuş “Füyuzat” məcmuəsinin müdiriyyətinə, “Hüzuri alilərinə” məqalələrini həvəslə oxuya bilərlər.

“Füyuzat”ın davamçılarının təqdirəlayiq yaradıcılıq üsullarından biri də odur ki, elmi və müəyyən mənada “ciddi” mövzularla yanaşı, lirik–psixoloji tablo yaradan ədəbi–bədii nümunələrin də çapına qayğı göstərilir. Məsələn, “Kəşfiyyat tarixindən” rubrikası ilə yazı oxuyana, bir qəzəl, yaxud “Payız gülləri” essesinin təqdim olunması xoş ovqata xidmət edir.

Jurnalın digər yaxşı ənənəsi geniş oxucu auditoriyasına məlum olmayan əsərlərin, ya da onlardan bir parçanın çap edilməsidir. İnanırıq ki, Məmməd Əmin Rəsulzadənin “Nagəhan bəla” pyesi, Əhməd bəy Ağaoğlunun “Qüvvəyi–milliyə ruhunun doğuşu” hekayəsindən bir hissə ədəbi irsə hörmət mənasında faydalı addımdır. Əhməd bəy Ağaoğlunun hekayəsindəki milli ruh və vətənpərvərlik duyğuları xüsusilə valehedicidir.

Dərginin bu sayının titul vərəqində Əli bəy Hüseynzadənin bir əsr əvvəl eyni ilə titul vərəqində dərc etdiyi sözləri yenidən oxuyarkən o möhtəşəm fikirlərdən qürur duymamaq olmur: “Dərin kökümüz, şərəf sözümüz, əmanət yükümüz, qeyrət gücümüz — Milli Ruh… Keçmişimizdən gələn varlıq harayımız, elm, qüvvət, şücaət qalamız — Milli Ruh… var olan dünənimiz, bugünümüz, sabahımız — Milli Ruh…

Elçin VƏLƏDOĞLU

Respublika.- 2013.- 3 mart.- S. 6.