Məqsədimiz biznes mühitinin formalaşmasına yardım etməkdir

Azərbaycanda Amerika Ticarət Palatası (AmCham) 1996–cı ildə yaradılıb. AmCham ölkəmizdə biznes maraqlarını dəstək və himayə edən aparıcı biznes assosiasiyasıdır. AmCham Azərbaycan iqtisadiyyatının müxtəlif sahələrini təmsil edən 250 tam üzvü və müxbir üzvü birləşdirir. Bu şirkətlərin 60 faizi xarici şirkətlərdir. Qurumun Direktorlar Şurası 10 üzvdən ibarətdir və onlar iki il müddətinə seçilir. AmCham–ın üzvləri Azərbaycan Milli Məclisində baxılan qanun layihələrinə və eləcə də, Azərbaycan hökuməti tərəfindən qəbul olunan qərarlara, proqram və normativ aktlara qeyd və təkliflər hazırlayır. Üzvlər vergilər və gömrük, bank işi, maliyyə, sığorta , insan resursları, informasiya və kommunikasiya texnologiyaları və digər sahələri əhatə edən komitələrdə, eləcə də müxtəlif məsələlər və problemlərə dair üzvlərin fikirləri əks olunan forumlarda öz şirkətlərini təmsil edir. Eyni zamanda, üzvlərimiz sahə komitələri vasitəsilə məlumat mübadiləsi aparır, ümumi maraq doğuran məsələləri qaldırır və mümkün təkliflər hazırlayıb lazımi qurumlara təqdim edir.

Bildiyiniz kimi, son 20 ildə Azərbaycan öz təhsil sistemini müasirləşdirmək üçün bir sıra uğurlu addımlar atmışdır. Lakin Azərbaycanın təhsil sistemində əmək bazarının tələblərini qarşılayacaq və “tələb və təklif’ prinsipinə cavab verəcək islahatlara ehtiyac duyulur. Ötən illər ərzində AmCham öz üzvləri vasitəsilə əmək bazarının ixtisaslı kadrlara tələbatı ilə təhsil sisteminin belə kadrları təmin etməsi arasındakı real boşluğu hiss etmişdir. Bunun üçün hazırladığımız mövqe sənədi vasitəsilə hökumətin diqqətini təhsildə islahatlar həyata keçirərkən işəgötürənlər baxımından nəzərə alınmalı olan əsas sahələrə cəkmək istəmişdir.

Azərbaycanda Amerika Ticarət Palatası iş adamları, hətta sadə işçiləri maraqlandıran Vergilər Məcəlləsinə dəyişikliklərlə bağlı təkliflər hazırlamış və böyük məmnunluqla bildirir ki, təkliflər ciddi nəzərə alınmış və 1 yanvar 2013–cü ildən qüvvəyə minmiş Vergi Məcəlləsinə dəyişikliklərin edilməsi haqqında qanuna əlavə edilmişdir.

Qeyd olunanlarla yanaşı, ekspertlərimiz sosial sığorta sistemi ilə də bağlı qanunvericiliyə dəyişikliklərin edilməsini təklif edirlər. Məsələn, sosial sığorta ödəmələri ilə gəlir vergisinin hesablanma bazasının eyniləşdirilməsi təklif olunur. Çünki hazırda gəlir vergisi əməkhaqqı və mükafatlara əsasən hesablandığı halda, sosial ödəmələrdə isə bu baza daha geniş və mürəkkəbdir (bura məzuniyyət və ezamiyyət xərcləri və s. daxildir).

Qurumun hazırladığı “Ağ Sənəd” kimi tanınan “Azərbaycanda İşgüzar Mühitin Təkmilləşdirilməsinə dair müşahidələr və tövsiyələr” adlı hər il dərc olunan sənədin son sayı 2011–ci ilin yayında dərc edilmiş və ölkə rəhbərliyinə təqdim edilmişdir. Qeyd edilmişdir ki, “Ağ Sənəd” Amerikanın Azərbaycandakı Ticarət Palatasının üzvü olduğu 250–dən çox şirkətin vergitutma, sığorta, maliyyə, bank işi və iqtisadiyyatın digər sahələri ilə bağlı rəy və təkliflərini özündə birləşdirir. AmCham və onun təmsil etdiyi biznes ictimaiyyəti sənəddə əksini tapmış bir çox təklifin ciddi şəkildə hökumət tərəfindən nəzərə alınmasından olduqca məmnundur. Təkliflər Azərbaycanda investisiya mühitinin təkmilləşdirilməsi istiqamətində hökumətin gördüyü tədbirlərə töhfə olmuş və onların nəzərə alınması biznes mühitinin daha da inkişafına təkan vermişdir.

Bu cəhətdən AmCham Azərbaycan hökumətinin investisiya mühitinin təkmilləşdirilməsi istiqamətində atdığı addımlara daim öz töhfəsini və əlindən gələn dəstəyi göstərməkdə davam edəcəkdir.

Həyata keçirdiyimiz layihələrdən biri də ABŞ–ın Beynəlxalq İnkişaf Agentliyi (USAİD), BP Azəri–Çıraq–Günəşli (AÇG), Bakı–Tbilisi–Ceyhan (BTC), Şah Dəniz, Cənubi Qafqaz Boru Kəməri (CQBK) layihələrindəki tərəfdaşları adından və Amerika Ticarət Palatasının Azərbaycandakı nümayəndəliyi (AmCham) ölkənin gələcək biznes liderlərinin peşəkar inkişafına dəstək olan “Gənclərin Biznes Liderlik Layihəsi”dir. İki il davam edəcək “Gənclərin Biznes Liderlik Layihəsi”nin əsas məqsədi tələbələr üçün müxtəlif özəl şirkətlərdə təcrübə əldə etmək imkanı yaradaraq, onların biznes və idarəetmə bacarıqlarını inkişaf etdirib, gələcəkdə çalışdıqları sahədə lider olmağa ruhlandırmaqdır. Layihə çərçivəsində Bakı və Gəncədəki ali məktəblərin 3–cü və 4–cü kurslarında təhsil alan 120 tələbə iş təcrübəsi əldə etmək imkanı qazanacaq. Layihənin iştirakçıları üçün iş təcrübəsi keçmək imkanlarının müəyyən edilməsinə Amerika Ticarət Palatasının Azərbaycandakı Nümayəndəliyi dəstək olacaq. Layihə vasitəsilə tələbələr ali məktəbdə öyrəndikləri bilikləri real iş mühitində tətbiq edəcək, təhsildə və karyerada daha da uğurlu olmaq üçün zəruri bilik və bacarıqlara yiyələnəcəklər.

Layihənin ümumi büdcəsi 200 min ABŞ dollarıdır. Vəsaitin 100 min ABŞ dollarını BP və onun AÇG, BTC, Şahdəniz və CQBK layihələrdəki tərəfdaşları, qalan 100 min ABŞ dollarını isə USAİD ödəyəcək. Layihə yerli qeyri–hökumət təşkilatı olan “Junior Achievement Azərbaycan” tərəfindən həyata keçiriləcək.

Həmçinin AmCham Milli Məclisə təqdim edilən Rəqabət Məcəlləsi layihəsinin bütün dünya üzrə qəbul edilmiş qabaqcıl təcrübədə tətbiq edilən prinsiplərdən istifadə etməklə və daxili bazarda rəqabətin təşviqinə şərait yaratmaqla təkmilləşdirilməsinə ehtiyac olduğunu bildirən Mövqe Sənədini müvafiq orqanların diqqətinə təqdim etmişdir. Ümid edirik ki, bu sahədə görüləcək işlər zamanı təkliflərimiz nəzərə alınacaqdır.

Ümummilli lider Heydər Əliyev 1996–cı il dekabrın 13–də “Hyatt–Regency–Naxçıvan” mehmanxanasının açılışında demişdir ki, Amerika Birləşmiş Ştatları Ticarət Palatasının Azərbaycanda mütəşəkkil işə başlaması Amerika–Azərbaycan əlaqələri tarixində əlamətdar bir hadisədir. Azərbaycan Respublikası dövlət müstəqilliyi əldə edəndən sonra dünyanın bütün ölkələri ilə iqtisadi əməkdaşlığa cəhd göstərir və Amerika Birləşmiş Ştatları bu sırada xüsusi yer tutur. Son illər Amerika Birləşmiş Ştatları ilə Azərbaycan arasında əməkdaşlıq müvəffəqiyyətlə inkişaf edir. Biz Azərbaycanda buna yüksək qiymət veririk və bu əlaqələrin bundan sonra da inkişafı üçün əlimizdən gələni etməyə çalışacağıq. Bu əməkdaşlıq müstəqil Azərbaycan Respublikasının iqtisadiyyat sahəsində strateji siyasətinə tam uyğun olan bir əməkdaşlıqdır.

Doğrudan da, həmin müddətdən 15 ildən artıq vaxt ötməsinə baxmayaraq, Azərbaycanda Amerika Ticarət Palatasının icraçı direktoru olaraq öz işimi hər iki ölkənin maraqları baxımından qurmağa və iş adamlarını narahat edən problemlərin həlli istiqamətində səmərəli fəaliyyət göstərməyə çalışmışam. Verdiyimiz təkliflərlə vaxtaşırı müxtəlif qurumların fəaliyyətini şəffaflaşdırmağa, əhaliyə göstərilən xidmətlərin səviyyəsini artırmağa, ümumilikdə Azərbaycanın gələcəkdə bölgədə daha güclü bir dövlət kimi təşəkkül tapmasına yardım göstərməyə səy göstərmişik. Bundan sonra da işimizi yuxarıda qeyd olunan istiqamətlərdə qurmaq, həlli vacib problemlərin həlli istiqamətində Azərbaycan hökumətinə yardım göstərmək niyyətindəyik.

Nərgiz Nəsrullayeva–

Müdüroğlu,

Azərbaycanda Amerika Ticarət

Palatasının icraçı direktoru.

Respublika.- 2013.- 3 mart.- S. 5.