Tovuz: inkişafın yeni mərhələsində

Tovuz Rayon İcra Hakimiyyəti başçısı yanında keçirilmiş şura iclasına rayonun idarə və müəssisə rəhbərləri, hüquq–mühafizə işçiləri, ziyalılar, sahibkarlar, bələdiyyə və icra nümayəndəlikləri dəvət edilmişdi. Tədbirdə rayonun 2012–ci ilin sosial–iqtisadi inkişafının yekunları və qarşıda duran vəzifələr müzakirə olunmuşdur. Gündəlikdə duran məsələ barəsində Tovuz Rayon İcra Hakimiyyətinin başçısı Tofiq Zeynalov məruzə ilə çıxış etmişdir.

Məruzəçi bildirmişdir ki, 2012–ci il tovuzlular üçün çox əlamətdar olmuşdur. Keşən il aprel ayının 12–də Azərbaycan Respublikasının Prezidenti İlham Əliyev qərb bölgəsinə səfəri çərçivəsində Tovuz rayonunda olmuş, bir sıra obyektlərin açılişında iştirak etmiş, rayonumuzun sosial–iqtisadi inkişafı və qarşıda duran vəzifələr barədə öz tapşırıq və tövsiyələrini vermişdir. Rayon ictimaiyyəti bu gün də Prezidentin rayona səfərinin xoş təəssüratı altında yaşayır. Vaxt ayırıb Tovuz rayonunun inkişafı və əhalinin həyat tərzi ilə maraqlandığına, qaldırdığımız məsələlərə çox böyük qayğı və həssaslıqla yanaşaraq rayon ilə bağlı mühüm əhəmiyyət kəsb edən tarixi sənədlər – “Tovuz rayonunun inzibati ərazi bölgüsündə qismən dəyişiklik edilməsi haqqında”, “Tovuz rayonun sosial–iqtisadi inkişafının sürətləndirilməsinə dair əlavə tədbirlər haqqında”, “Göytəpə Arxeoloji Parkının yaradılması ilə bağlı bəzi tədbirlər haqqında” və “Tovuz–Qovlar–Ağbaşlar avtomobil yolunun tikintisi barədə” Sərəncamlar qəbul etdiyinə, Tovuz şəhərində 85 mənzilli iki binanın tikintisinə vəsait ayrılması barədə tapşırıq verdiyinə görə cənab Prezidentimizə dərin minnətdarlığımızı bildiririk.

Cənab Prezidentin sərəncamlarına uyğun olaraq ötən il “Göytəpə” qədim yaşayış məskənində “Arxeopark” yaradılması işlərinin maliyyələşdirilməsi üçün Milli Elmlər Akademiyasına 300 min manat, Tovuz–Qovlar–Ağbaşlar avtomobil yolunun tikintisi məqsədi ilə ilkin olaraq 3 milyon manat, Tovuz rayonunda abadlıq–quruculuq işlərinin davam etdirilməsi məqsədi ilə 2 milyon manat vəsait ayrılmışdır. Yolun tikintisində ilkin olaraq ayrılmış vəsait həcmində iş görülmüşdür. Tikinti indi də davam etdirilir. Cənab Prezidentin tapşırığı ilə “Semzavod qəsəbəsi” adlanan ərazidə yerləşən baraklarda yaşayan ailələri yeni mənzillərlə təmin etmək məqsədi ilə 50 mənzilli və 35 mənzilli iki beşmərtəbəli binanın tikintisinə başlanmışdır

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrası istiqamətində işlər rayonda ardıcıl olaraq həyata keçirilir. Ötən il taxılçılıq, üzümçülük, şərabçılıq, kartofçuluq, heyvandarlıq və digər kənd təsərrüfatı məhsullarının istehsalının və emalının genişləndirilməsi ilə əlaqədar işlər davam etdirilmiş, sahibkarlığın inkişafına lazımi dəstək verilmişdir. Keçən il rayon üzrə 9105 hektar sahədə buğda əkilmiş və hər hektardan 28.5 sentner məhsul götürülmüşdür. Dövlət Proqramının icrasının dordüncü ildönümünün yekunlarına həsr olunmuş konfransda Prezident ölkə üzrə taxılın orta məhsuldarlığının indiki 27 sentnerdən 40–50 sentnerə çatdırılması vəzifəsini qarşıya qoymuşdur. Biz taxılçılığı intensiv inkişaf etdirməklə bu hədəflərə çatmaq üçün tədbirlər üzərində işləyirik. Bununla yanaşı ölkədə yaradılacaq böyük fermer–taxılçılıq təsərrüfatlarına bizim rayondan da 2000 hektar sahə ayrılması nəzərdə tutulmuşdur.

Ötən il rayonda 217 min 399 ton kartof, 27 min 536 ton tərəvəz, 1518 ton bostan məhsulları istehsal edilmişdir. Əkinçiliklə məşğul olanlara lizinq xidmətinin təşkilində, aqrotexniki tədbirlərin həyata keçirilməsində lazımi köməkliklər göstərilmişdir. Lizinq yolu ilə 2150 hektar şum aparılmış, fermerlərə lizinq yolu ilə 90 ton azot, 33 ton superfosfat kübrəsi satılmışdır.

Rayonda üzümçülüyün inkişafı ilə yaxından məşğul olunur. 2012–ci ildə 62 hektar sahədə yeni bağ salınaraq üzüm sahələri 600 hektara çatdırılmış, 7850 ton məhsul istehsal edilmişdir. Konfransdakı nitqində Prezident rayonlar arasında ixtisaslaşma aparılmasının zəruriliyini qeyd etmiş və bu sahədə təkliflər hazırlanması barədə tapşırıq vermişdir. Tarixi təcrübədən çıxış edərək qeyd edilməlidir ki, Tovuz rayonunun ixtisaslaşma istiqaməti məhz üzümçülük olmalıdır.

Heyvandarlığın inkişaf etdirilməsi və məhsul istehsalının artırılması istiqamətində tədbirlər davam etdirilir. 2012–ci ildə rayon üzrə ət istehsalı 14,2 faiz, süd istehsalı isə 4.6 faiz artmışdır. Eyni zamanda əvvəlki illə müqayisədə mal–qaranın sayı 446 baş, qoyun və keçilərin sayı isə 1916 baş artmışdır. Mal–qaranın cins tərkibini yaxşılaşdırmaq məqsədi ilə rayonda 227 baş yüksək məhsuldarlıqlı cins inək və düyə bəslənilir, onlardan cari ildə 104 baş bala alınmışdır. 2012–ci ildə 889 baş inək süni yolla mayalandırılmış və bunların 443 başından bala alınmışdır. Əhali arasında süni mayalanma məsələləri ilə əlaqədar lazımi marifləndirmə işləri aparılmışdır.

Dövlət Proqramı çərçivəsində keçən il ərzində yaşayış məntəqələrinin qaz təchizatının yaxşılaşdırılması istiqamətində müəyyən işlər görülmüş, ayrı–ayrı kəndlərə müxtəlif diametrli daşıyıcı və paylayıcı qaz xətti çəkilmiş, 2639 p/metr müxtəlif diametrli qaz xətləri dəyişdirilmişdir.

Artıq bir neçə ildir ki, rayon əhalisi elektrik enerjisi ilə fasiləsiz təmin olunur.

Cənab Prezidentin qarşıya qoyduğu əsas infrastruktur tapşırıqlarından biri də əhalinin içməli su ilə təminatının yaxşılaşdırılması məsələsidir. Bu məqsədlə 2011–ci ilin oktyabr ayından Tovuz şəhərinin içməli su təchizatı və kanalizasiya sisteminin yenidən qurulması layihəsi üzrə işlərə başlanmışdır. Artıq hər birinin tutumu 2500 kubmetr olan iki ədəd su anbarı, suqəbuledici qurğu, laboratoriya binası, xlorator binası, keçid məntəqəsi, nasos stansiyası tikilmiş, şəhərdaxili şəbəkələrə sağ və sol istiqamətlərdə su xəttinin çəkilməsi başa çatdırılmışdır. 2012–ci ildə şəhərdaxili şəbəkə üçün 103 km su xətti, 101 km kanalizasiya xətti çəkilmişdir.

Rayonda əkin sahələrinin su təminatının yaxşılaşdırılması istiqamətində işlər davam etdirilmişdir. Tovuzçay su anbarının tikintisində işlərin davamı üçün 17.46 milyon manat vəsait ayrılmış və həmin həcmdə iş görülmüşdür.

2003–2012–ci illərdə rayonda 6572 şagird yerlik 18 yeni məktəb binası tikilmişdir. Bu məktəblərin 15–i müvafiq dövlət proqramlarına əsasən, 3–ü isə Heydər Əliyev Fondunun təşəbbüsü ilə “Yeniləşən Azərbaycana yeni məktəb” devizi altında inşa olunmuşdur. 2012–ci ildə rayonda 2616 şagird yeri olan 6 məktəb – 80 şagird yerlik X.Cəfərov adına Qazıqulu kənd ümumi orta məktəbi, 640 şagird yerlik S.Kazımov adına Qovlar şəhər tam orta məktəbi, 1176 şagird yerlik N.Tusi adına Tovuz şəhər məktəb–liseyi, 360 şagird yerlik E.Məmmədov adına Tovuz şəhər tam orta məktəbi, 180 şagird yerlik M.Yusifov adına Məşədivəllər və 180 şagird yerlik Səfərli kənd orta məktəbləri tikilib istifadəyə verilmiş, 10 məktəbdə cari təmir işləri aparılmışdır. Həmçinin ötən il Tovuz şəhərindəki “Qərənfil” uşaq bağçası–körpələr evi müasir standartlara uyğun şəkildə əsaslı təmir edilmişdir. Yeni məktəb binaları yüksək zövqlə inşa olunmuş, təzə inventar və avadanlıqlarla təmin edilmiş, lokal istilik sistemi yaradılmış, informasiya–kommunikasiya texnologiyaları ilə təchiz olunmuşdur. Yeni tikilən təhsil müəssisələrinin hamısında lazımı səviyyədə kommunal xidmətlərdən istifadə olunur.

2012–ci ildə rayonda tikinti–quruculuq və abadlıq işləri davam etdirilmişdir. Tovuz və Qovlar şəhərlərinin bir sıra küçələrində orijinal dizaynla dekorativ divarlar inşa edilmiş, işıqlanma dirəkləri ucaldılmış, abadlıq işləri görülmüşdür. Küçələrə və yollara 615 min manatlıq asfalt–beton örtük qoyularaq nəzərdə tutulan illik proqram tam yerinə yetirilmişdir. Tovuz və Qovlar şəhərlərində 49 ədəd yöndəmsiz sahibkar obyekti götürülərək yerində müasir tələblərə cavab verən layihələr əsasında yeni obyektlər inşa edilmişdir, 35 sahibkar obyektinin fasadı yenidən qurularaq milli ornamentlərdən istifadə etməklə “aqlay ” tavalarla üzlənmişdir.

Rayonda sahibkarlığın inkişaf etdirilməsi, onlara lazımi şərait yaradılması ilə bağlı müxtəlif tədbirlər görülür, vaxtaşırı iş adamları ilə görüşlər keçirilir, qaldırdıqları yerli problemlər öyrənilir və həll edilir.

2011–ci ildə Sahibkarlığa Kömək Milli Fondu tərəfindən sahibkarlara 43 layihə üçün 1 milyon 340 min manat vəsait ayrılmasına və bu layihələrin icrası ilə 96 yeni iş yerinin açılmasına baxmayaraq 2012–ci ildə sahibkarlara 37 layihə üçün 645.5 min manat kredit ayrılmışdır ki, bu da 81 yeni iş yerinin yaradılmasına şərait yaratmışdır. 2012–ci ildə banklar və kredit təşkilatları tərəfindən sahibkarlığın inkişafı üçün 19 milyon 339 min manat kredit verilmişdir. Bu da 2011–ci ildə sahibkarlığın inkişafı üçün verilmiş kreditlərdən 4 milyon 204 min manat çoxdur.

Rayonda kənd təsərrüfatı məhsulları istehsalçılarına yanacaq və motor yağlarına, gübrələrin güzəştlə satılmasına, buğda əkininə və sairəyə görə 1 milyon 166 min manat kompensasiya verilmişdir. Bu 2011–ci ildə kənd təsərrüfatı məhsulları istehsalçılarına verilən kompensasiyadan 409 min manat çoxdur. Təbii ki, bu əkin sahələrinin genişləndirilməsi hesabına artmışdır.

Hesabat dövründə dövlətin ünvanlı sosial yardım proqramına uyğun olaraq 2220 nəfərə 3 milyon 993 min manat sosial yardım təyin edilmiş və ödənilmişdir. Bu əvvəlki ildə olduğundan 26 min manat çoxdur.Əhalinin aztəminatlı təbəqəsinin, əlillərin və şəhid ailələrinin pensiya və müavinətlərinin vaxtında çatdırılması, artımlarının hesablanması təmin olunmuşdur. Rayon üzrə imtiyazlı təbəqəyə aid şəxslərin mənzil növbəsinin uçotu aparılmış və 90 nəfər imtiyazlı şəxs mənzil növbəsinə götürülmüş, tikinti üçün torpaq sahəsi ayrılmışdır.

2012–ci il ərzində rayon üzrə 1216–si daimi olmaqla 1819 yeni iş yeri açılmışdır. Ənənəvi olaraq hər il keçirilən Əmək Yarmarkası 2012–ci ilin iyun ayında da keçirilmiş, yarmarkada 41 müəssisədən 260 boş iş yeri təqdim olunmuş, 87 nəfərə işə göndəriş verilmiş, 73 nəfər daimi işlə təmin olunmuşdur. Bu cür tədbirlərin 2013–cü ildə də davam etdirilməsi nəzərdə tutulur.

Son illərdə rayonda təhsilin səviyyəsinin yüksəldilməsi sahəsində aparılan işlər 2012–ci ildə də qətiyyətlə davam etdirilmişdir. Keçən il orta məktəbi bitirənlərin 88 faizi tam orta təhsil haqqında attestat almış, 7 nəfər şagird buraxılış imtahanları zamanı yüksək nəticələr göstərdiklərinə görə qızıl medalla təltif olunmuşlar. Ötən il 2010–2011–ci dərs ili ilə müqayisədə ali məktəblərə qəbul olunanların sayı 40 nəfər, 2006–2007–ci illərlə müqayisədə isə 215 nəfər artmışdır. Ali məktəblərə qəbul olunanlardan 18 nəfəri (2011–ci ildə 16 nəfər olmuşdur) 600–dən yuxarı bal toplamışlar. Y.Sadıqov adına Bozalqanlı kənd tam orta məktəbinin məzunu Əliyeva Səlmi Mehman qızı 687 bal toplayaraq rayon üzrə ən yüksək nəticə göstərmiş və Azərbaycan Respublikası Prezidentinin təqaüdünə layiq görülmüşdür.

Artıq bir neçə ildir ki, gənclərin ali hərbi məktəblərə və hərbi liseylərə hazırlanması sahəsində məqsədyönlü iş aparılır. 2012–ci ildə 79 nəfər məzunumuz hərbi məktəblərə daxil olmuşlar. Onlardan 46 nəfəri ali hərbi məktəblərə, 12 nəfəri hərbi tibb məktəbinə, 21 nəfər isə C.Naxçıvanski adına hərbi Liseyə qəbul olmuşdur. 2006–2007–cı dərs ilində rayonun ümumtəhsil məktəblərindən cəmi 2 nəfər hərbi məktəblərə qəbul olunduğu halda, son beş ildə bu nəticələr ilbəil artaraq cəmi 324 nəfər təşkil etmişdir. Biz bu işi müntəzəm şəkildə davam etdirməliyik. Bu dərs ilində də 209 nəfər məktəblinin hərbi məktəblərə hazırlanmaları üçün müvafiq tədbirlər həyata keçirilir.

Bunlarla yanaşı qeyd edilməlidir ki, rayon təhsil şöbəsinin fəaliyyətində müəyyən nöqsanlar vardır. Təhsil sisteminin fəaliyyətini istədiyimiz səviyyədə qurmaq üçün bizim kifayət qədər potensialımız vardır. Hesab edirik ki, bundan sonra təhsil sistemində əsaslı dəyişikliklər baş verəcək, qarşıya qoyduğumuz hədəflərə nail olacağıq. İlkin hədəfimiz isə növbəti tədris ilində 700 bal toplaya biləcək şagirdin yetişdirilməsidir.

Hesabat dövründə rayonda səhiyyənin maddi–texniki bazasının möhkəmləndirilməsi, əhaliyə göstərilən tibbi xidmətin yaxşılaşdırılması istiqamətində müəyyən işlər görülmüşdür. 80 çarpayılıq mərkəzi rayon xəstəxanasının yeni binasının istifadəyə verilməsi, xəstəxananın köhnə binasının birinci mərtəbəsinin təmir edilməsi, bütövlükdə binanın su–istilik sisteminin yenidənqurulması, poliklinika şöbəsinin həmin binaya köçürülməsi əhaliyə keyfiyyətli səhiyyə xidmətinin göstərilməsi üçün lazımi şərait yaratmışdır. Qovlar şəhər xəstəxanasının istilik sistemi yenidən qurulmuşdur. Səhiyyə müəssisələrinin texniki təminatı da xeyli yaxşılaşdırılmışdır.

Prezidentimizin qeyd etdiyi kimi hər bir Azərbaycan vətəndaşı ən azı ildə bir dəfə əhatəli tibbi müayinədən keçməlidir. Milli genefonumuzun qorunmasında və sağlam nəslin yetişdirilməsində bu məsələnin xüsusi önəmi vardır. Bu sahədə artıq müəyyən işlər görülmüşdür. Eyni zamanda görülən işlərin davamlılığı təmin olunmalıdır. Bununla belə rayonda əhaliyə göstərilən tibbi xidmətin lazımi səviyyədə qurulması üçün hələ çox işlər görülməlidir. Rayonda epidemioloji stabillik mövcuddur, yoluxucu xəstəliklərlə yoluxma halları baş verməmişdir.

Hesabat ilində Tovuz və Qovlar şəhərlərində kommunal müəssisələrinin maddi–texniki bazası xeyli möhkəmləndirilmiş və bu onların fəaliyyətlərində müsbət irəliləyişlərə səbəb olmuşdur. Kənd və qəsəbələrdə 22 təmizlik müəssisəsi yaradılmışdır. Əksər ərazilərdə bu müəssisələr müvəfəqqiyyətlə fəaliyyət göstərir. Bu sahədə işlərin nizamlanması üçün müvafiq qanunvericilik bazası yaradılmışdır. Bu əsasda ərazilərin təmizliyinin təmin olunması istiqamətində aparılan işlər daha da gücləndirilməlidir.

Ötən il Mərkəzi kitabxana və Tovuz şəhər Musiqi məktəbi yeni binaya köçürülmüş, Qovlar şəhər müsiqi məktəbi üçün yeni bina tikilib istifadəyə verilmişdir. Bununla belə mədəiyyət müəssisələrindən 25–i uyğunlaşdırılmış binalarda yerləşir. ümumilikdə 65 mədəniyyət obyektinin əsaslı təmir olunmasına və ya yenisinin tikintisinə ehtiyac vardır. Tarix diyarşunaslıq muzeyinin və rəsm qalareyasının fəaliyyəti nəzərə çarpsa da bina şəraiti indiki tələblər səviyyəsində deyildir.

Azərbaycan Respublikasında 2010–2014–cü illərdə turizmin inkişafına dair Dövlət Proqramının və 2011–ci ilin “Turizm ili” elan edilməsi ilə bağlı Tədbirlər Planının icrasının təmin olunması istiqamətində rayonda görülmüş işlər 2012–ci ildə də ardıcıllıqla davam etdirilmişdir. Bu sahədə görülən işləri daha da genişləndirməyi, mədəniyyətimizi, tarixi abidələrimizi, milli–mənəvi dəyərlərimizi təbliğ etməyi davamlı vəzifə hesab edilməlidir. Rayonda da müasir mədəniyyət və istirahət parkının salınması, Qala komplekslərinin, Bayraq Meydanının tikintisi, Tovuz – Böyük Qışlaq–Qaralar avtomobil yolunun tikintisi, beş ulduzlu “Ayan–Palace” otelinin istifadəyə verilməsi, Cənubi Qafqazın ən qədim yaşayış məskəni olan Göytəpədə arxeoparkın yaradılmasının qərara alınması, Tovuz–Qovlar–Ağbaşlar avtomobil yolunun tikintisinə başlanması və sair bu qəbildən görülən işlər turizmin inkişafı üçün böyük stimul yaratmışdır.

2015–ci ildə keçiriləcək birinci Avropa Olimpiya Oyunlarının Bakıda təşkil olunması haqqında qəbul edilmiş qərar rayon ictimaiyyəti tərəfindən sevinclə qarşılanmışdır. Bu, cənab Prezidentimizin rəhbərliyi altında ölkəmizin beynəlxalq nüfuzunun, mövcud siyasi sabitliyin və iqtisadi yüksəlişin nəticəsidir. Avropa Olimpiya Oyunlarında iştirak etmək üçün rayon idmançılarının yetişdirilməsi məqsədilə RİH başçısı yanında keçirilən Şura iclasında təşkilat komitəsi yaradılmış və tədbirlər planı təsdiq edilmişdir.

İdeoloji işin təşkilində müasir informasiya–kommunikasiya texnologiyaları ilə təchiz olunmuş Heydər Əliyev Mərkəzinin fəaliyyətindən maksimum səviyyədə bəhrələnməyə səy göstərilir. Ötən il Mərkəzdə fəaliyyət göstərən təbliğat qruplarının və dərnəklərin işi canlandırılmış, əhalinin bütün təbəqələri cəlb edilməklə keçirilən tədbirlərin sistemliliyi təmin edilmişdir. Yetişməkdə olan gənc nəslin vətənpərvərlik, dövlətçilik ruhunda formalaşması istiqamətində Mərkəzin imkanlarından səmərəli istifadə olunmuşdur.

Yığıncaqda qeyd edilmişdir ki, rayonun 39 inzibati ərazi dairəsinin hər birində yaşayan ziyalılar, ağsaqqalar və nüfuzlu şəxslərdən ibarət yaradılmış təşviqat qruplarının hər həftə əhalinin müxtəlif zümrələri qarşısında çıxışları təşkil olunmuş, möhtərəm Prezidentimiz cənab İlham Əliyevin həyata keçirdiyi daxili və xarici siyasət nəticəsində müstəqil Azərbaycan Respublikasının nailiyyətləri incəliklərinə qədər sakinlərə çatdırılmışdır. Bundan sonra da təşviqat qruplarının işinin daha da canlandırılması, vaxtında metodiki tövsiyyələrlə təmin olunması və müntəzəm olaraq əhali ilə görüşlərin keçirilməsi nəzərdə tutulur.

Hesabat dövründə şəhər və kəndlərin sosial–iqtisadi inkişafında, abadlıq–quruculuq işlərində və yerli əhəmiyyətli məsələlərin həllində bələdiyyələrin Əlaqələndirmə Şurasının yerli icra hakimiyyəti orqanları ilə qarşılıqlı fəaliyyətinin gücləndirilməsi ilə bağlı tədbirlər həyata keçirilmişdir, 66 birgə layihə icra olunmuşdur. 2013–cü ilin yanvar ayında ərazi nümayəndəliklərinin 2012–ci ilin yekunlarına dair hesabatları keçirilmişdir. Hesabat yığıncaqlarında 2177 nəfər iştirak etmiş, 209 nəfər tənqidi qeyd və təkliflərlə fikirlərini bildirmiş, ərazilərin sosial–iqtisadi inkişafı ilə əlaqədar 197 təklif səslənmişdir. Tənqid və özünütənqid şəraitində keçirilən hesabatlarda səslənən qeydlər və təkliflər, qaldırılan problemlər ümumiləşdirilərək təhlil edilir, nəticələri iş prosesində nəzərə alınır.

2012–ci ildə RİH başçısı aparatında vətəndaş müraciətlərinə baxılması sahəsində müəyyən irəliləyişlərə nail olunmuşdur. İl ərzində RİH başçısı aparatına 932 vətəndaş müraciəti daxil olmuşdur. Onlardan 432 ədədi rəhbər orqanlardan, o cümlədən 378 ədədi Prezident Administrasiyasından, 500 ədədi isə birbaşa rayon icra hakimiyyəti başçısına ünvanlanan müraciətlərdir. 2011–ci illə müqaisidə daxil olan müraciətlərin sayı 264 ədəd və ya 22 faiz azalmışdır.

Ötən il ərzində rayon icra hakimiyyəti başçısı tərəfindən yerlərdə 46 səyyar görüş–qəbul keçirilmişdir. Bu görüşlərdə sakinlər tərəfindən ümumilikdə 208 məsələ qaldırılmışdır ki, bunlardan da 151 faizi icra edilmiş, 34–ü faizi hazırda icra edilir, 23–ü faizi isə həlli rayonun imkanı xaricində olduğu üçün müvafiq orqanlar qarşısında məsələ qaldırılmışdır. Yerlərdə qaldırılan məsəllələrin əksəriyyəti ərazilərin sosial–iqtisadi inkişafı ilə bağlı məsələlərdir.

Bəli, vətəndaş müraciətlərinə diqqətlə yanaşılması, bu sahədə aparılan işlərin qanunvericiliyə uyğun qaydada təşkil olunması, süründürməçilik və bürokratizm hallarına yol verilməməsi, ərizə və şikayyəti doğuran səbəblərin ətraflı araşdırılması və aradan qaldırılması üçün tədbirlər görülməsi, vətəndaşlara vaxtında konkret cavab verilməsi hər bir rəhbər işçinin və vəzifəli şəxsin vəzifə borcudur. Cənab Prezidentin tapşırığı və tələbi budur ki, hər bir dövlət məmuru öz vəzifə borcunu şərəflə yerinə yetirməlidir, insanlara qulluq etməlidir və təvəzökar olmalıdır. Cəmiyyətdə rəhbər işçilər, məmurlar özləri nümunə olmalı, normal davranış qaydalarına riayət etməli, adət–ənənələrimizə hörmətlə yanaşmalı və onu qorumalıdırlar.

2012–ci ildə sosial–iqtisadi inkişaf sahəsində ölkəmizdə böyük uğurlar qazanılmışdır. Bu uğurlar onu göstərir ki, 2013–cü il də ölkə iqtisadiyyatı üçün uğurlu il olacaqdır. Prezident İlham Əliyevin rəhbərliyi ilə Azərbaycanın mövcud iqtisadi potensialından xalqımızın maraqlarına uyğun istifadə edilir və bu siyasətin mərkəzində Azərbaycan vətəndaşı dayanır. Qədirbilən tovuzlular birmənalı şəkildə ölkə başçısının daxili və xarici siyasət xəttini ürəkdən bəyənir və dəstəkləyirlər.

Məruzə ətrafında rayon maliyyə idarəsinin rəisi Mübariz Salmanov, sahibkar Zeynalabdın Zeynalov, səhiyyə şöbəsinin müdiri Paşa Muradov, telekominikassiya qovşağının müdiri Yaşar İbrahimov, Bayramlı kənd məktəbinin direktoru Ramiz Məmmədov, millət vəkilləri Rafiq Məmmədhəsənov, İlyas İsmayılov və Azərbaycan Respublikası Prezident Administrasiyasının məsul işçisi Habil Əzəmmədov çıxış etmişlər.

Yığıncaq iştirakçıları adından Prezdent İlham Əliyevə müraciət qəbul olunmuşdur.

Qəhrəman Qurbanov

Respublika.- 2013.- 3 mart.- S. 3.