Göygöl: İLİN YEKUNLARI UĞURLU İNKİŞAFDAN XƏBƏR VERİR

Göygöl rayonu daha bir ili yola saldı. Yekunlar ürəkaçandır. Həyata keçirilmiş işlərin təhlili göstərir ki, artıq tarixə çevrilən nailiyyətlər, sabaha istiqamətlənmiş tədbirlər cari ildə daha böyük uğurların sanballı təməlinə çevriləcəkdir.

Ötən ilin yekunları ilə bağlı rayon fəallarının yığıncağında Göygöl Rayon İcra Hakimiyyətinin başçısı Arif Seyidov hesabat məruzəsi ilə çıxış etdi. O, Azərbaycan Respublikasının Prezidenti İlham Əliyevin həyata keçirdiyi uğurlu sosial–iqtisadi siyasət nəticəsində əvvəlki illərdə olduğu kimi 2012–ci ildə də qlobal iqtisadi böhran şəraitində ölkə iqtisadiyyatının öz dinamik inkişafını qoruyub saxladığını, iqtisadi artımın davamlılığını xüsusi vurğulayaraq dedi ki, bu nailiyyətlərə rayon sakinləri də öz sanballı töhfələrini vermişlər.

İl ərzində rayonda istehsal və xidmət sahələrinin genişləndirilməsi, sosial obyektlərin tikintisi, abadlıq–quruculuq işlərinin aparılması istiqamətində həyata keçirilən tədbirlər davam etdirilmiş, iqtisadiyyatın dinamik inkişafı təmin olunmuşdur.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqrqmı”nda Göygöl rayonu üzrə 15, Gəncə–Qazax iqtisadi rayonu üzrə 2 tədbir nəzərdə tutulmuşdur. Onlardan icra vəziyyəti ilə bağlı Arif Seyidov demişdir ki, həmin tədbirlərdən ikisinin icrası yerinə yetirilmiş, on beşinin icrası davam etdirilir.

2012–ci ildə 58 milyon 20,7 min manat əsas kapitala investisiya qoyulmuş, bundan 56 milyon 556,3 min manatı tikinti–quraşdırma işlərinə yönəldilmişdir.

Azərbaycan Respublikasının Prezidenti cənab İlham Əliyevin ayırdığı vəsait hesabına səkkiz min nəfər əhalinin yaşadığı 6 yaşayış məntəqəsini birləşdirən 10,5 kilometr uzunluğunda Xaqani–Cümşüdlü–Haçaqaya avtomobil yoluna asfalt örtük salınmış, yolun mühafizə zolağına düşən elektrik və rabitə dayaqlarının yeri dəyişdirilmiş, yol kənarında olan görkəmsiz ticarət obyektləri əsaslı təmir olunmuşdur.

Ölkədə avtomobil yolları şəbəkəsinin yenidən qurulması və bərpası istiqamətində həyata keçirilən iri layihələr sırasında qoyulan investisiyalar hesabına hazırda tikintisi davam edən Bakı–Qazax avtomobil yolunun rayon ərazisindən keçən 36 kilometr hissəsində yenidənqurma və bərpa işləri davam etdirilir.

Dövlət Proqramında nəzərdə tutulmuş tədbirlərin icrası nəticəsində 2012–ci ildə 5 xidmət, 9 istehsal obyektləri istifadəyə verilmişdir.

Son doqquz il ərzində 7397 yeni iş yeri açılmış, onun da 5068–i daimidir. Ötən il isə 430–u daimi olmaqla 1672 iş yeri açılmışdır.

Rayon üzrə orta aylıq əməkhaqqı 2011–ci ilə nisbətən 20,7 manat (10,33%) artaraq 220,1 manata çatmış, adambaşına düşən pul gəliri 1478,5 manat təşkil etmişdir.

2012–ci ildə rayon büdcəsinin mədaxil və məxaric hissəsi üzrə proqnoz tapşırıqlarının icrası, vəsaitin təyinatına görə səmərəli istifadə olunması, maliyyə intizamına riayət edilməsi daim diqqət mərkəzində saxlanılmışdır.

Rayon büdcəsinin gəlirləri 3 milyon 560 min manata qarşı 3 milyon 768,0 min manat və ya 105,8 faiz, xərcləri 12 milyon 917,4 min manata qarşı 12 milyon 495,0 min manat və ya 96,7 faiz icra edilmişdir.

Cari ildə rayon büdcəsinin xərcləri 14 milyon 783,7 min manat nəzərdə tutulmuşdur, bu da 2012–ci illə müqayisədə 1 milyon 866,3 min manat çoxdur.

Sahibkarlığın inkişaf etdirilməsi Azərbaycan Respublikasının Prezidenti cənab İlham Əliyevin müəyyən etdiyi iqtisadi siyasətin əsas istiqamətlərindən birini təşkil etmiş, sahibkarlıq subyektlərinin yaradılmasına və fəaliyyət göstərməsinə, kiçik və orta sahibkarlığın inkişafına əlverişli şərait yaradılmış, nəticədə 2012–ci ilin yekunlarına görə rayonda sahibkarların sayı 414 subyekt artaraq 2467–yə çatmışdır.

Kiçik və orta sahibkarlığın inkişafına dövlət dəstəyinin nəticəsi olaraq Sahibkarlığa Kömək Milli Fondunun xətti ilə 68 hüquqi və fiziki şəxsə 1065 min manat güzəştli kredit verilmişdir.

2012–ci ildə iqtisadiyyatın əsas sahələrində istehsal olunmuş məhsul və xidmətlərin ümumi həcmi faktiki qiymətlərlə 143 milyon 191,5 min manata çatmış, ondan 110 milyon 147,5 min manatı istehsal sahələrini, 33 milyon 44,0 min manatı isə xidmət sahələrini təşkil etmişdir.

Ümumdaxili məhsul istehsalında

qeyri–dövlət sektorunun xüsusi çəkisi respublika üzrə 81,5 faiz olduğu halda, rayon üzrə bu göstərici 54,4 faiz təşkil etmişdir.

Rayonda fəaliyyət göstərən 25 sənaye müəssisəsi tərəfindən bütövlükdə 12 milyon 284,5 min manat dəyərində məhsul istehsal edilmiş, sənaye məhsulunun həcmində qeyri–dövlət sektorunun xüsusi çəkisi 54,6 faiz olmuşdur.

Azərbaycan Respublikasının Prezidenti İlham Əliyevin “Kənd təsərrüfatı məhsullarının istehsalçılarına dövlət dəstəyi haqqında” sərəncamından irəli gələn vəzifələrin icrası vəziyyətinə toxunan məruzəçi demişdir ki, 2012–ci ildə 2050 nəfər kənd təsərrüfatı məhsulları istehsalçılarına yanacaq və motor yağlarına, buğda əkininə, toxum istehsalına və mineral gübrələrə görə dövlət büdcəsindən 1 milyon 109,0 min manat yardım verilmişdir.

Kənd təsərrüfatı məhsulları istehsalçılarına dövlət dəstəyinin nəticəsi olaraq kənd təsərrüfatı məhsullarının istehsalı 7,6 faiz artmışdır.

Əvvəlki illə müqayisədə 1756,1 min manat çox olmaqla 41306,7 min manat dəyərində kənd təsərrüfatı məhsulları istehsal edilmişdir ki, bunun da 99,3 faizi qeyri–dövlət sektorunun payına düşür.

Cari ilin məhsulu üçün 9807 hektar sahədə payızlıq taxıl əkilmişdir, bunun da 7036 hektarı buğdadır.

Rayonda fəaliyyət göstərən Aqroservis filialında 75 adda kənd təsərrüfatı texnikası vardır. İstehsalçılar kənd təsərrüfatı texnikaları ilə təmin edilmişdir.

Əkin sahələrini suvarma suyu ilə təmin etmək məqsədilə 160 ədəd subartezian quyusu, qapalı boru şəbəkəsinin 6 kilometr hissəsi təmir edilmiş, çay məcrasında 261 min kubmetr həcmində təmizləmə işləri görülmüş, Gəncəçay baş qurğusunun qoruyucu bəndinin yenidən tikintisi başa çatdırılmışdır.

Balçılı kəndində və Hacıməlik qəsəbəsində 1 ədəd subartezian quyusu qazılmış, Göygöl şəhərində və Bəhrəmbağ kəndində mövcud olan 1 ədəd subartezian quyuları bərpa olunmuşdur.

Şəmkirçayı üzərində tikilən su anbarından çəkilmiş Şəmkirçay magistral kanalının Göygöl rayonu ərazisindən keçən 3 kilometr hissəsinin tikintisi başa çatdırılmışdır, bu da 2110 hektar torpaq sahəsinin suvarılmasını təmin edəcəkdir.

Heyvandarlıq inkişaf etmiş, iribuynuzlu mal–qaranın sayı 20 min 127 başa, xırdabuynuzlu mal–qaranın sayı 156 min 76 başa çatmışdır.

Heyvandarlıq sahəsində yüksək göstəricilərə nail olmaq məqsədi ilə heyvandarlıqla məşğul olan hüquqi və fiziki şəxslərə dəyərinin 50 faizini ödəmək şərti ilə 15 baş cins mal–qara satılaraq 52 başa çatdırılmışdır. Eyni zamanda 1302 baş mal–qara süni mayalandırılmış, süni mayalama yolu ilə 689 baş cins bala alınmışdır.

Ötən ilin müvafiq dövrü ilə müqayisədə süd istehsalı 18 ton, ət istehsalı 325 ton, yun istehsalı 3,1 ton, yumurta istehsalı 29 min ədəd artmışdır.

Heyvanlar arasında aparılan baytarlıq profilaktiki tədbirlər nəticəsində kütləvi yoluxucu xəstəliklər baş verməmiş, epizodik vəziyyət sabit olaraq qalmışdır. Baytarlıq xidmətini yaxşılaşdırmaq məqsədilə zona baytarlıq laboratoriyasının əsaslı təmiri başa çatdırılaraq avadanlıqlarla təchiz olunmuş, Pənahlılar kəndində sahə baytarlıq məntəqəsi tikilmişdir.

Bakı şəhərində keçirilən arıçılıq məhsullarının sərgi–satış yarmarkasında müntəzəm iştirak edən arıçılar ötən il də həmin tədbirə fəal qoşulmuş, 4 sahibkar satışa 1500 kiloqram bal çıxarmışdır.

Əhalinin aztəminatlı təbəqəsinin, əlil və şəhid ailələrinin sosial müdafiəsinin gücləndirilməsinə diqqət daha da artırılmış, “Ünvanlı dövlət sosial yardım haqqında” Azərbaycan Respublikası Qanununa uyğun olaraq 2012–ci ildə 912 ailəyə hər ay orta hesabla 98 manat məbləğində ünvanlı sosial yardım verilmişdir.

İl ərzində Qarabağ müharibəsi və Çernobıl əlillərinin 154 uşağına 1540 manat müavinət, 197 nəfər Qarabağ və Böyük Vətən müharibəsi əlillərinə, Böyük Vətən müharibəsi iştirakçılarına 173,3 min manat Prezident təqaüdü ödənilmiş, 76 nəfər tənha və əlillərə evində sosial məişət xidməti göstərilmişdir.

Qarabağ müharibəsi əlillərindən 1 nəfərə pulsuz avtomaşın verilmiş, mənzil şəraitinin yaxşılaşdırılmasına ehtiyacı olan 46 nəfər Qarabağ müharibəsi əlili və şəhid ailəsi mənzil uçotuna götürülmüş, onlardan 23 nəfəri mənzillə təmin olunmuşdur.

Əhalinin, xüsusilə də gənclərin məşğulluğunu təmin etmək məqsədilə rayon üzrə “Ərazi Məşğulluq Proqramı” hazırlanaraq icrası yerinə yetirilmişdir.

Rayonda əmək ehtiyatlarından düzgün və səmərəli istifadə olunması məqsədilə rayon məşğulluq mərkəzində vakant iş yerləri haqqında məlumatlar toplanılmış, 350 nəfər işləməyən vətəndaş qeydiyyata götürülmüş, onlardan 248 nəfəri işlə təmin olunmuş, 29 nəfərə işsizlik müavinəti verilmişdir.

Əhaliyə ticarət, nəqliyyat, rabitə və məişət xidmətlərinin göstərilməsi sahəsində müsbət nəticələr əldə olunmuşdur.

Hesabat ilində əhalinin elektrik enerjisi, qaz, içməli su təminatının daha da yaxşılaşdırılması ilə bağlı bir sıra mühüm tədbirlər həyata keçirilmişdir.

Elektrik təsərrüfatında 74,2 min manat dəyərində təmir–bərpa, quraşdırma işləri aparılmış, 222 ədəd müxtəlif güc transformatorları, 14,5 km elektrik veriliş xətti təmir edilmişdir. Əhali üzrə istehlak olunan elektrik enerjisinin həcmi 26 milyon 166,4 min kvt/saat təşkil etmiş, ödəniş 83,0 faiz yerinə yetirilmişdir.

Qaz təsərrüfatında 175,0 min manat dəyərində təmir–bərpa işləri aparılmış, əlavə 160 obyektdə qaz sayğacı quraşdırılaraq təbii qazla təmin edilmişdir.

Əhali üzrə istehlak olunan qazın həcmi 17 milyon 799,0 min kubmetr təşkil etmiş, ödəniş 96,1 faiz yerinə yetirilmişdir.

Hazırda rayonun 45 yaşayış məntəqəsindən 23–ü təbii qazla təmin edilmişdir. Cari ildə 14 yaşayış məntəqəsinə təbii qazın verilməsi nəzərdə tutulmuş, Topalhəsənli kəndinə qaz xəttinin çəkilişinə başlanılmışdır.

Göygöl şəhərinin su təchizatı və kanalizasiya sisteminin yenidən qurulması layihəsinin icrası ilə bağlı Göygöl şəhərinə Kürək çayından 25 km uzunluğunda yeni magistral su kəmərinin, Göygöl şəhərində su və kanalizasiya xətlərinin çəkilişi, sutəmizləyici qurğularının və anbarlarının tikintisi davam etdirilir.

Zurnabad və Gəncə kəndlərinə çəkilmiş içməli su xətti, Yeni Zod kəndində nasos stansiyası təmir edilmiş, Yeni Zod və Mixaylovka kəndlərinə içməli su xətti çəkilmişdir.

İstehlak olunan suyun həcmi 584,5 min kubmetr təşkil etmiş, ödəniş 85 faiz yerinə yetirilmişdir.

Əhalinin istehlak etdiyi elektrik enerjisinin, təbii qazın və içməli suyun ödəniş haqlarının tam yığılmasını təmin etmək məqsədilə rayon icra hakimiyyəti başçısı yanında yaradılmış qərargahda bu sahədə mövcud olan nöqsanlar müntəzəm olaraq təhlil edilərək aradan qaldırılması istiqamətində müvafiq tədbirlər görülmüş, nəticədə ödənişlərin artımına nail olunmuşdur.

Ümumtəhsil məktəblərinin tikintisinə və maddi–texniki bazasının müasir tələblərə uyğun möhkəmləndirilməsinə xüsusi diqqət yetirilmiş, müvafiq Dövlət Proqramına əsasən və Heydər Əliyev Fondunun təşəbbüsü ilə “Yeniləşən Azərbaycana yeni məktəb” devizi altında son dövrlərdə 16 məktəb binası, 5 məktəbdə isə 26 əlavə sinif otağı, 1 uşaq bağçası tikilmiş, 19 məktəb binası, 4 uşaq bağçası əsaslı təmir olunmuşdur.

Ümumtəhsil məktəblərini informasiya–kommunikasiya texnologiyaları ilə təmin etmək məqsədilə məktəblərə 301 kompyuter dəsti verilmişdir. Hazırda hər 29 şagirdə 1 kompyuter dəsti düşür, 11 məktəbdə kompyuter sinifləri təşkil olunmuşdur.

Ali məktəblərə sənəd verən 393 nəfər məzundan 156–sı qəbul olmuş, bu da 2011–ci ilə nisbətən 26 nəfər çoxdur. Onlardan 23 nəfəri 500–dən, 6 nəfəri 600–dən çox bal toplamış, yüksək nəticə göstərmiş abituriyentlərlə rayon icra hakimiyyətində görüş keçirilərək hədiyyələr verilmişdir.

Ümumtəhsil məktəblərində fənlər üzrə kadr çatışmazlığını aradan qaldırmaq məqsədilə 16 vakant yerlər barədə Təhsil Nazirliyinə məlumat verilmiş, nazirliyin keçirdiyi test imtahanlarının nəticəsinə görə 12 nəfər müəllim rayonun ümumtəhsil məktəblərinə göndərilmişdir.

Əhalinin sağlamlığının qorunub saxlanılması, onlara göstərilən tibbi xidmətin yaxşılaşdırması istiqamətində müəyyən işlər görülmüş, son illər 4 kənd tibb məntəqəsi üçün yeni binalar tikilmiş, 3 kənd tibb məntəqəsi, 2 kənd sahə xəstəxanası, 2012–ci ildə Aşıqlı kənd tibb məntəqəsi əsaslı təmir olunmuş və əlavə bir otaq tikilmiş, Toğanalı kənd həkim məntəqəsi cari təmir edilmişdir.

Səyyari həkim briqadaları yaradılaraq uşaqların müayinəsi təşkil olunmuş, 357 min manat dəyərində dərman preparatları alınaraq imtiyazlı xəstələrə pulsuz paylanılmış, yoluxucu xəstəliklərə qarşı 6 min 725 nəfər peyvənd edilmişdir.

Rayonda 31 yerli əhəmiyyətli tarixi və memarlıq incəsənət abidələri, kiçik göllər, zəngin meşə örtüyü olmaqla 5 istiqamətdə kənd və ekoturizmi inkişaf etdirmək üçün potensial imkan vardır. Rayon ərazisində 17 turist obyekti fəaliyyət göstərir, hazırda Göygöl şəhərində 5 ulduzlu otelin inşasına başlanılmışdır.

Rayonda 15 mədəniyyət evi, 15 klub, 42 kitabxana, 2 muzey fəaliyyət göstərir. İl ərzində 424 nüsxə kitab, 219 ədəd elektron kitab alınmış, kitab fondu 315 841 nüsxəyə çatdırılmışdır. Mərkəzi kitabxana sistemində elektron kataloq məlumat bazası yaradılaraq 1377 nüsxə kitab yerləşdirilmişdir.

Yeni Zod mədəniyyət evi təmir edilmişdir. Göygöl şəhərində yerləşən “Lüteran” alman kilsəsində tarix–diyarşünaslıq muzeyi təşkil olunmuşdur, orada 200–dən çox eksponat nümayiş etdirilir. Eyni zamanda rəssamların, sənətkarların əl işlərindən ibarət sərgilər təşkil olunmuş, Nizami Gəncəvinin anadan olmasının 870 illiyinə həsr olunmuş guşə yaradılmışdır. Tarix–diyarşünaslıq muzeyi üçün yeni binanın tikintisi ilə bağlı Mədəniyyət və Turizm Nazirliyi qarşısında məsələ qaldırılmışdır.

Azərbaycan Respublikasının Prezidenti İlham Əliyevin gənclərə göstərdiyi qayğının nəticəsi olaraq, ölkədə uşaq və gənclərin hərtərəfli inkişafı üçün lazımi şərait yaradılmışdır.

Yeniyetmə və gəncləri hərbi xidmətə həvəsləndirmək məqsədilə “Cəsurlar” hərbi idman və turizm oyunun zona yarışı Göygöl şəhərində keçirilmiş, həmin yarışda rayonun komandası 1–ci yeri, “Şahin” hərbi idman oyununun zona yarışında isə 5–ci yeri tutmuşdur.

Bakı şəhərində yeniyetmələr arasında sərbəst güləş üzrə Azərbaycan birinciliyində Göygöl rayon uşaq–gənclər idman məktəbinin yetirməsi Qurbanlı Aqil 46 kq çəki dərəcəsində 3–cü yerə layiq görülmüşdür.

Ümummilli lider Heydər Əliyevin siyasi irsinin öyrənilməsində, gənclərin dünyagörüşlərinin genişləndirilməsində, bilik və bacarıqlarının artırılmasında mühüm əhəmiyyət kəsb edən Heydər Əliyev Mərkəzində 20 nəfərdən ibarət tədqiqatçılar qrupu, ingilis dili və bədii qiraət dərnəyi, kompyuter kursu fəaliyyət göstərir. Mərkəzə vaxtaşırı rayon ictimaiyyətinin, məktəblilərin ekskursiyaları təşkil olunmuş, Heydər Əliyev irsi və Azərbaycanın inkişaf perspektivləri təbliğ edilmişdir.

Hazırda inşa edilən Heydər Əliyev Mərkəzi üçün bina istismara verildikdən sonra müasir informasiya–kommunikasiya texnologiyaları ilə təchiz olunacaq, orada əhalinin, xüsusilə də gənclərin maraq və istəklərinə cavab verən klub, kitabxana və dərnəklər fəaliyyət göstərəcək, mərkəz ideoloji işin daha da gücləndirilməsində əsas rol oynayacaqdır.

Azərbaycan Respublikasının Prezidenti İlham Əliyevin ölkənin ictimai–siyasi həyatında baş verən hadisələrlə bağlı fikirlərini, həyata keçirdiyi sosial–iqtisadi siyasət haqqında məlumatları dolğun işıqlandırmaq və təbliğ etmək üçün 17 nəfər ziyalıdan ibarət təbliğat qrupu yaradılaraq idarə, müəssisə və təşkilatlarda çıxışları təşkil olunmuşdur.

Rayonda cinayətkarlığa qarşı mübarizənin gücləndirilməsi, ictimai təhlükəsizliyin təmin edilməsi, qanunçuluq və hüquq qaydalarının möhkəmləndirilməsi istiqamətində məqsədyönlü tədbirlər həyata keçirilərək ictimai–siyasi sabitlik təmin edilmişdir.

İl ərzində rayon ərazisində 147 cinayət hadisəsi qeydə alınmış, onlardan 145–nin (96 faiz) açılması təmin edilmişdir.

Rayonda fəaliyyət göstərən 25 bələdiyyə rayonun şəhər, qəsəbə və kəndlərinin sosial–iqtisadi inkişafında, abadlıq–quruculuq işlərində, yerli əhəmiyyətli məsələlərin və əhalinin sosial problemlərinin həlli istiqamətində müəyyən işlər görmüş, yaşayış məntəqələrinin daxili yollarının təmiri, təmizlik–abadlıq işlərinin aparılması, yaşıllıqların salınması, su xətlərinin təmiri ilə bağlı layihələr həyata keçirmişlər.

İl ərzində rayon icra hakimiyyətində vətəndaşların qəbul edilməsinə, onların ərizə və şikayətlərinə baxılmasına xüsusi diqqət yetirilmiş, bütün müraciətlər hərtərəfli araşdırılaraq heç bir müraciət kənarda qalmamış, haqlı tələblər öz həllini tapmışdır.

Rayon icra hakimiyyəti başçısı aparatında vətəndaşların təsdiq edilmiş cədvəl əsasında elan edilmiş günlərdə və saatlarda qəbul edilməsi müntəzəm olaraq təşkil olunaraq 780, o cümlədən icra hakimiyyətinin başçısı tərəfindən 562 vətəndaş qəbul edilmişdir.

Əhalini narahat edən problemlərin vətəndaşlarla birbaşa ünsiyyətdə olaraq öyrənilib lazımi tədbirlər görülməsini təmin etmək məqsədilə 55 səyyar qəbul keçirmişdir.

Məruzəçi diqqəti cari ilin vəzifələrinə yönəltmişdir. Qeyd olunmuşdur ki, rayonun sosial–iqtisadi, mədəni, ictimai–siyasi və digər sahələrdə gedən inkişaf proseslərinin müəyyənləşdirilməsi və proqnozlaşdırılması, əhalini narahat edən problemlərin daha dərindən öyrənilməsi, sahibkarlığın inkişafının təmin edilməsi, siyasi partiyalarla və kütləvi informasiya vasitələrilə iş, gender bərabərliyi məsələlərinin həlli, vətəndaşların bütün müraciətlərinə həssaslıqla yanaşılması qarşıda duran əsas vəzifələrdən biridir. Qarşıda duran vəzifələrin icrası ilə bağlı görülmüş işlər və qarşıda duran vəzifələr rayon icra hakimiyyətinin başçısı yanında şura iclasında geniş müzakirə olunmuş və həyata keçiriləcək konkret tədbirlərin əsas istiqamətləri müəyyənləşdirilmişdir.

Rayon İH başçısı məruzəsinin sonunda iştirakçıları əmin etmişdir ki, sakinlərin rifah halının yaxşılaşdırılması, ictimai–siyasi fəallığının daha da yüksəldilməsi, rayonun sosial–iqtisadi cəhətdən yüksək inkişaf etmiş bir bölgəyə çevrilməsi istiqamətində tədbirlərin həyata keçirilməsi daha da sürətləndiriləcək, Azərbaycan Respublikasının Prezidenti cənab İlham Əliyevin dövlət orqanları qarşısında qoyduğu vəzifələrin icrasına məsuliyyətlə yanaşılaraq göstərilən etimad ləyaqətlə doğruldulacaqdır.

Yığıncaqda Milli Məclisin deputatı Rövşən Rzayev və Prezident Administrasiyasının məsul işçisi Rüfət Əliyev iştirak və çıxış etmişlər. Fəallar yığıncağında hesabat məruzəsində irəli sürülmüş vəzifələrin bütünlüklə yerinə yetirilməsinə yönəldilmiş geniş qərar qəbul edilmişdir. İştirakçılar adından rayona göstərdiyi xüsusi diqqət və qayğıya görə ölkə başçısına minnətdarlıq ifadə edən müraciət ünvanlanmışdır.

Y.TANRIVERDİYEV

Respublika.- 2013.- 5 mart.- S. 3.