Qazax: sosial–iqtisadi inkişaf müsbət nəticələr verir

Qazax rayonunun Gənclər Mərkəzində 2012–ci ilin sosial–iqtisadi inkişafının yekununa dair və 2013–cü ildə qarşıda duran vəzifələrə həsr olunmuş iclası keçirilmişdir.

İlk növbədə iştirakçılar ulu öndərin unudulmaz əziz xatirəsini yad edərək heykəli önünə gül–çiçək dəstələri qoydular. Sonra Qazax rayonunun sosial–iqtisadi inkişafına həsr olunmuş kino–rolikə tamaşa etdilər.

Qazax rayon icra hakimiyyətinin başçısı Ayaz Əsgərov iclasda 2012–ci ildə rayonun sosial–iqtisadi inkişafının yekununa dair məruzə ilə çıxış etdi. O dedi ki, ulu öndər Heydər Əliyevin uzaqgörənliklə irəli sürdüyü və həyata keçirilməsinin elmi, nəzəri və praktiki yollarını müəyyənləşdirdiyi inkişaf prioritetlərinin Prezident İlham Əliyevin ölkəyə rəhbərlik etdiyi son illərdə uğurla davam etdirilməsi Azərbaycanın tarixində görünməmiş yüksəlişi reallığa çevirmişdir. Artıq yüksək yaradıcılıqla həyata keçirilən inkişaf strategiyası bütün sahələrdə öz səmərəli nəticələrini verir. Bildiyiniz kimi, Azərbaycan Respublikasının Prezidenti cənab İlham Əliyevin sədrliyi ilə yanvarın 15–də Nazirlər Kabinetinin 2012–ci ilin sosial–iqtisadi inkişafına və 2013–cü ildə qarşıda duran vəzifələrə həsr olunmuş iclası keçirilmişdir. İclasda dövlət başçısı bildirmişdir ki, 2012–ci ildə də ölkəmizin uğurlu inkişafı davam etmişdir.

Ümumi daxili məhsul 2,2 faiz artmışdır. Ən əsası odur ki, bu artım qeyri–neft sektorunun hesabına əldə olunmuşdur. Ötən il qeyri–neft sənayemiz 8, kənd təsərrüfatı 6 faiz artmışdır. İnflyasiya cəmi 1,1 faiz təşkil etmişdir. Əhalinin pul gəlirləri 13,8 faiz artmışdır. İnflyasiya ilə pul gəlirləri arasında fərq 10 faizdən çox olmuşdur. Keçən il investisiya xərcləri rekord səviyyədə, 22 milyard dollardan çox olmuşdur. Davos İqtisadi Forumunun hesablamalarına görə iqtisadiyyatımız rəqabət qabiliyyətinə görə dünyada 46–cı, MDB məkanında isə birinci yerdədir. Bu il büdcəmiz 20 milyard manata yaxındır. Ümumi valyuta ehtiyatlarımız 46 milyard dollar səviyyəsindədir.

“2009–2013–cü illər üzrə Dövlət Proqramı”nda nəzərdə tutulmuş tədbirlərin icrası 2012–ci ildə Qazax rayonunda da uğurla davam etdirilmişdir.

Belə ki, dörd hektar sahəni əhatə edən “Heydər Əliyev” parkının 2 hektarlıq sahəsi tamamilə yenidən qurulmuşdur. Parkın ərazisində “Gənclər Mərkəzinin” tikintisi başa çatmış, sahəyə tamet plitə və mərmər plitə döşənmiş, səki daşı dəyişdirilmiş, 2 ədəd fəvvarə quraşdırılmış, çəmən otu əkilmiş, divarlar aqlayla üzlənmiş, 2 ədəd piramida qüllə ucaldılmış, çoxlu sayda dekorativ ağaclar və kollar əkilmiş, işıqlanma sistemi yenidən qurulmuşdur.

Yanvar ayında Heydər Əliyev Fondunun dəstəyi ilə “Şahmat Məktəbi”nin tikintisinə başlanılmış, binanın ətrafına milli memarlığa uyğun hasar çəkilmiş, sahəyə tamet döşənmiş, səki daşı düzülmüş, çəmən otu, çoxlu sayda dekorativ ağac və kollar əkilmişdir. Binanın qarşısında fəvvarə tikilmiş və işıqlanma sistemi qurulmuşdur.

Bütövlükdə qərb bölgəsinin və qonşu Gürcüstan Respublikasının azərbaycanlılar yaşayan hissəsinin kənd təsərrüfatı məhsullarını emal edəcək illik gücü 5 min ton olan müasir “Konserv zavodu”nun və uzunluğu 7 kilometr olan Qazaxbəyli–Aşağı Salahlı avtomobil yolunun tikintisi başa çatdırılaraq istifadəyə verilmişdir.

2012–ci il aprel ayının 12–də göstərilən obyektlərin açılışında Azərbaycan Respublikasının Prezidenti cənab İlham Əliyev iştirak etmişdir. Bundan əlavə Konserv zavodunun ərazisində məskunlaşmış məcburi köçkünlər üçün 24 mənzilli yaşayış evi tikilib istifadəyə verilmişdir.

Qazax şəhərində Qaratel adına ümumi orta məktəbin təmir — bərpa işləri və 80 şagird yerlik əlavə tədris korpusunun, 360 şagird yerlik 4 saylı tam orta məktəbin, Aslanbəyli kəndində 480 şagird yerlik, Canallı kəndində 220 şagird yerlik və Qazaxbəyli kəndində 180 şagird yerlik yeni məktəb binalarının tikinti işləri başa çatdırılaraq istifadəyə verilmişdir.

İllik gücü 1 milyon ton, ərazisi 56 hektar olan Qazax Sement zavodunun birinci hissəsində son tamamlama işləri aparılır, yaxın vaxtlarda istifadəyə verilməsi nəzərdə tutulur. Azadlıq küçəsi 108 ünvanda yerləşən qəza vəziyyətində olan kommunal binanın sakinlərinin yerləşdirilməsi üçün 24 mənzilli yeni yaşayış binasının tikintisi, uzunluğu 30 kilometr olan Yuxarı Salahlı – Kəmərli avtomobil yolunun əsaslı tikinti işləri başa çatmaq üzrədir. Qazax şəhərinin küçələrinin abadlaşdırılması məqsədilə küçələrə 16.760 kvadratmetr asfalt örtüyü qoyulmuş, 2.400 poqonmetr yolkənarı beton bordürlar dəyişdirilmiş, işıqlandırıcılarla birlikdə 131 ədəd yeni işıq dayaqları basdırılaraq yeni xətt çəkilmişdir.

Qazax rayonunda abadlıq–quruculuq işlərinin davam etdirilməsi, “Azərbaycan Respublikası Regionlarının 2009–2013–cü illərdə sosial–iqtisadi inkişafı Dövlət Proqramı”nda rayon üzrə müəyyən olunmuş tədbirlərin həyata keçirilməsinin sürətləndirilməsi məqsədilə Azərbaycan Respublikasının Prezidenti cənab İlham Əliyevin 13 aprel 2012–ci il tarixli 2157 nömrəli sərəncamı ilə Azərbaycan Respublikası Prezidentinin ehtiyat fondundan 2 milyon manat vəsait ayrılmışdır.

Qazax şəhərində “Şəhidlərin abidə kompleksi” sökülərək yerində tamamilə yeni üslubda abidə ucaldılmışdır. Abidənin ətrafında abadlıq işləri aparılaraq aqlay üzlük daş çəkilmiş, tamet plitə düzülmüş, asfalt örtüyü qoyulmuş, səki daşı yenisi ilə əvəz edilmişdir.

Dəmir yolu vağzalı binasının dam örtüyü tam dəyişdirilmiş, 1.115 kvadratmetr sahəyə tamet plitə döşənmişdir. Vağzala gedən Ə.Qədirov küçəsinin hər iki tərəfində daş hasar inşa edilmiş, suvanaraq rənglənmiş, piyadaların rahat hərəkəti üçün səki salınmış, asfalt örtüyü yenidən qoyulmuş, işıqlanma sistemi quraşdırılmış, küçə boyunca 3 binanın dam örtüyü dəyişdirilmiş, fasad hissəsində abadlıq işləri aparılmışdır.

Şəhərin qərbdən giriş hissəsində Dövlət Bayrağı Meydanı tikilmiş, 51 metrlik qüllə ucaldılmış, meydanda 6,8 metr hündürlükdə qala divarı və 5,2 metr hündürlükdə bürclər tikilmiş, Ağstafa rayonu ilə sərhəddə 22 metr hündürlüyündə rayonun ünvanını bildirən “Obelisk”, şəhərin girişində 2 ədəd qala divarı və dairəvi yolda oturacağının diametri 6 metr, hündürlüyü 14,3 metr olan qüllə inşa edilmişdir.

Magistral avtomobil yolunun kənarında 5 mərtəbəli yaşayış binasının fasad hissəsində müasir milli memarlıq üslubunda yenidənqurma işləri aparılmışdır. Hazırda H.Əliyev prospekti boyunca abadlıq–quruculuq işləri davam edir. Yaşayış evləri və ticarət obyektlərinin fasad hissələri yeni tərtibatda inşa edilmişdir. Heydər Əliyev Elm Mərkəzinin dam örtüyü tamamilə yenidən qurularaq daxili və fasad hissəsi əsaslı təmir edilərək yenidən qurulmuşdur.

Ölkəmizdə söz–sənət ustalarının xatirəsi həmişə əziz tutulmuş, onların adına park və xiyabanlar salınmış, abidələr ucaldılmış, ev muzeyləri yaradılmış və bu ənənələr hazırda da davam etdirilir. Gənc yaradıcı nəsillərin potensialının üzə çıxarılmasını, ədəbiyyatımızın milli istiqamətlərini və xalqımızın ədəbi–mədəni irsinin qorunmasının və təbliğinin vacibliyini nəzərə alaraq Azərbaycan Respublikasının Prezidenti cənab İlham Əliyev 01 iyun 2012–ci il tarixli 2255 nömrəli sərəncam ilə Qazax şəhərində “Ədəbiyyat Muzeyi”nin tikintisi üçün Azərbaycan Respublikasının 2012–ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Qazax Rayon İcra Hakimiyyətinə 5 milyon manat vəsait ayırmışdır. Hazırda “Ədəbiyyat muzeyinin” tikintisində işlər davam etdirilir.

Bundan əlavə rayonun daxili imkanları hesabına YAP Qazax rayon şöbəsinin yeni inzibati binası inşa edilir.

Azərbaycan Respublikasının Nazirlər Kabinetinin məlum sərəncamı ilə hesabat ilində rayon üzrə 5 məktəbdə, o cümlədən 640 şagird yerlik Çaylı kənd 2 saylı, 640 şagird yerlik Daş Salahlı kənd 2 saylı, 220 şagird yerlik Ürkməzli kənd və 180 şagird yerlik Xanlıqlar kənd tam orta məktəblərinin tikintisinə və Kəmərli kəndindəki Xanbağı tam orta məktəbində isə əsaslı təmir işlərinə başlanılmışdır.

2013–cü ildə 180 şagird yerlik Quşçu Ayrım tam orta, hər biri 80 şagird yerlik Məzəm və Bala Cəfərli kəndlərində ibtidai məktəblərin və Qarapapaq kənd ümumtəhsil orta məktəbində bərpa — gücləndirmə işlərinə başlanması məqsədilə layihə–smeta sənədləri hazırlanır.

Azərbaycan Respublikası regionlarının sosial–iqtisadi inkişafı Dövlət Proqramına uyğun olaraq rayonda yeni iş yerlərinin açılması ardıcıl olaraq davam edir. Belə ki, 2003–cü ildən bu günədək rayon üzrə 8.136, 2012–ci ildə isə 889–u daimi olmaqla 1.064 yeni iş yeri açılmışdır.

Adambaşına düşən ümumi məhsulun həcmi 1.599 manat, orta aylıq əmək haqqı ötən ilin müvafiq dövrü ilə müqayisədə 9 manat artaraq 225 manat olmuşdur. Əhalinin pul gəlirlərinin artması hesabına rayonumuzun yaşayış məntəqələrində 284 fərdi yaşayış evləri tikilmişdir.

Son illərdə kənd təsərrüfatı məhsullarının istehsalının artırılması ilə əlaqədar qəbul edilmiş sərəncam və qərarların icrasının nəticəsidir ki, 2012–ci ildə biçilmiş 5.898 hektar sahədən 15.043 ton taxıl istehsal olunmuşdur. Orta hesabla hər hektardan məhsuldarlıq 0,5 sentner artırılaraq 25,5 sentnerə çatdırılmışdır. Bununla yanaşı dən qarğıdalı istehsalı 2011–ci ilə nisbətən 828 ton artırılaraq 2.786 tona, meyvə istehsalı 1.783 ton artırılaraq 13.526 tona, üzüm istehsalı 571 ton artırılaraq 3.511 tona, tərəvəz istehsalı isə 11.666 tona çatdırılmışdır.

Mövcud şum traktorlarından və digər kənd təsərrüfatı texnikalarından istifadə olunaraq kifayət qədər şum qaldırılmışdır. Bunun nəticəsidir ki, bu ilin məhsulu üçün 6.125 hektarda payızlıq taxıl səpilmişdir: bunun 3.770 hektarı buğda olmaqla keçən ilkinə nisbətən çoxdur.

Heyvandarlıq sahəsində zoobaytar tədbirlərin planlı surətdə həyata keçirilməsinin nəticəsidir ki, məhsul istehsalı artmaqdadır. Belə ki, 2012–ci ildə ötən ilə nisbətən 1.220 ton artıq süd istehsal olunaraq 26.344 tona, 117 ton (diri çəkidə) artıq ət istehsal olunaraq 5.020 tona və 200 min ədəd çox yumurta alınaraq 10.800 min ədədə, iribuynuzlu mal–qaranın baş sayı 81 baş artaraq 30.019 başa çatmışdır.

Qazax Rayon Baytarlıq İdarəsi tərəfindən 2012–ci ildə epizootik, müalicə–profilaktik tədbirlər planına uyğun olaraq peyvəndlər aparılmışdır.

Əhalinin Sosial Müdafiəsi Fondunun rayon şöbəsi tərəfindən əhalinin pensiya və müavinətlərinin ödənilməsi üçün 2012–ci ildə ödəniş müəssisələrinə 24.637.400 manat vəsait köçürülmüşdür. Bu keçən ilin müvafiq dövrünə nisbətən 3.565.000 manat çoxdur. 2012–ci ildə şöbədə sosial sığorta haqları üzrə yığım proqnozu 97,5 faiz yerinə yetirilmişdir. Toplanmış vəsait 2011–ci ilin müvafiq dövrü ilə müqayisədə 482 min manat artıq olmuşdur. Hazırda 14.344 nəfər pensiyaçılardan hamısı öz pensiyalarını plastik kartlarla bankomatlar vasitəsilə alır.

2012–ci ildə Əmək və Əhalinin Sosial Müdafiəsi Mərkəzi tərəfindən 6.439.590 manat aylıq müavinət və birdəfəlik müavinət təyin edilmiş və ödənilmişdir. Bu rəqəm 2011–ci illə müqayisədə 162.040 manat çoxdur.

Möhtərəm Prezidentimiz cənab İlham Əliyevin 26 dekabr 2011–ci il tarixli fərmanına əsasən 2011–ci ilin 1 dekabr tarixindən bütün növ pensiya və müavinətlər artırılmışdır. 2012–ci ildə 1.474 ailəyə 1.970.336 manat ünvanlı sosial yardım təyin edilib ödənilmişdir.

Hesabat ili ərzində əhaliyə göstərilən ticarət, nəqliyyat, rabitə və məişət xidməti sahələrində də bir sıra işlər görülmüşdür.

Qazax Telekommunikasiya Qovşağı cari ildə planı 101,4 faiz yerinə yetirmiş və ötən müddət ərzində 187 ədəd yeni telefon xətti çəkilərək vətəndaşların istifadəsinə verilmişdir.

2011–ci ildə Qazax rayonunda 542 abunəçi sürətli internet xidmətindən istifadə edirdisə, hazırda bu xidmətdən 1400 abunəçi istifadə edir.

2012–ci il ərzində TKQ–nin xidmət ərazisində fəaliyyət göstərən kənd EATS–nin köhnə xətləri ləğv olunmuş və əvəzində 51 kilometr uzunluğunda fiber–optik kabel çəkilmişdir. Bununla da rayonumuz respublikada tam optikləşmiş ilk 10 rayon sırasına daxil olmuşdur.Mərkəzi EATS–də əhatə dairəsi 15 kilometr olmaqla 500 nömrə tutumlu simsiz telefon rabitəsinin baza stansiyası qurulmuşdur. Hazırda 99 abonent bu xətdən istifadə edir.

2012–ci ildə Qazax TKQ–nin inzibati binasında əsaslı təmir işlərinə başlanılmışdır.

Qazax Poçt filialı 2012–ci il ərzində planı 102 faiz yerinə yetirmişdir. Filial tərəfindən 2012–ci ildə əhalidən elektrik enerjisi, qaz, su və telefon pulları qəbul edilib aidiyyəti təşkilatların bank hesablarına köçürülmüşdür.

“Qazax–Avtovağzal “ATSC tərəfindən 2012–ci ildə 312.000 sərnişinə xidmət göstərilərək plan 102 faiz yerinə yetirmişdir.

2012–ci ildə Avtovağzalın binasının fasad hissəsi aqlay daşı ilə üzlənərək müasir görkəmə salınmışdır.

Ötən il 27 saylı Yol İstismar İdarəsinə “Azəryolservis” ASC tərəfindən 2 ədəd TATRA markalı yükünü özüboşaldan, 1 ədəd FORD markalı yol süpürən, 1 ədəd buldozer, 2 ədəd avtoyükləyici və 1 ədəd avtoqreyder verilmişdir.

Hesabat ilində əhalinin elektrik enerjisi, qaz, içməli su və kanalizasiya ilə təminatının yaxşılaşdırılması sahəsində də məqsədyönlü tədbirlər həyata keçirilmişdir.

Əhalini keyfiyyətli və fasiləsiz elektrik enerjisi ilə təmin etmək üçün elektrik şəbəkəsi tərəfindən 2012–ci ildə hava xəttində əsaslı və cari təmir işləri aparılmışdır. Yeni sayğaclar quraşdırılmış və köhnə sayğaclar yenisi ilə əvəz edilmiş, zədəli transformatorlar əsaslı təmir olunaraq sxemə qoşulmuşdur. Ağac dayaqlar yeni beton dayaqlarla əvəz edilmişdir.

2012–ci il ərzində Qazax Rayon Qaz İstismar Sahəsi tərəfindən əhali abonentlərə satılmış qazın yığım faizi 95,8 faiz olmuşdur.

Rayonun Xanlıqlar kəndində məskunlaşmış 58 məcburi köçkün və qaçqın ailələrinə müxtəlif diametrli 2.021 poqonmetr polietilen və 25 millimetrlik 110 poqonmetr metal boru çəkilmiş, 58 ədəd məişət qaz sayğacı və 58 ədəd fərdi qaz tənzimləyicisi quraşdırılaraq əhali təbii qazla təmin olunmuşdur.

2012–ci ildə rayonun Daş Salahlı, Birinci Şıxlı, İkinci Şıxlı, Yuxarı Salahlı və Kosalar kəndlərinə müxtəlif diametrli 312.964 poqonmetr qaz xətti çəkilmiş, 5.220 abonentin ev daxili qaz xətti bərpa edilmiş, 5.170 ədəd məişət qaz sayğacı və 5.170 ədəd qaz tənzimləyici quraşdırılmışdır.

Yuxarıda adları göstərilən kəndlərdə tikinti — quraşdırma işləri başa çatdırılaraq təbii qaz təminatı bərpa edilmişdir. Bununla da Qazax rayonunun bütün yaşayış məntəqələri təbii qazla təmin olunmuşdur.

Qazax şəhərinin su təchizatının və kanalizasiya sisteminin yenidən qurulması məqsədi ilə torpaqayırma və layihə sənədləri hazırlanmış, yaxın vaxtlarda tikinti işlərinə başlanılması nəzərdə tutulur.

Rayon təhsil şöbəsinin tabeliyində olan 34 tam orta, 6 ümumi orta, 7 ibtidai məktəbdə 11.627 nəfər şagirdin təlim–tərbiyəsi ilə 1.850 nəfər müəllim məşğul olmuşdur. 2012–ci ildə 809 nəfər XI sinif məzunlarından 236 nəfəri, əvvəlki illərin məzunlarından isə 89 nəfəri — cəmi 325 nəfər ali məktəblərə, 110 nəfər isə orta ixtisas məktəblərinə daxil olmuşlar. Qəbul olmuş məzunlardan 7 nəfəri 600–dən yuxarı bal toplamışdır. Ürkməzli kənd tam orta məktəbinin məzunu Səfərov Orxan Arif oğlu 700 bal toplamışdır. Məzunlardan 12 nəfəri respublikanın Ali Hərbi Akademiyasına və 17 nəfər Naxçıvanski adına Hərbi liseyə daxil olmuşdur.

2012–ci ilin yanvar ayında olimpiadanın ikinci rayon turunda 9 fənn üzrə 105 nəfər şagird iştirak etmiş, 7 nəfər fənn olimpiadalarının Respublika mərhələsinə vəsiqə qazanmış 5 nəfəri mükafata layiq yer tutmuşdur.

2012–ci ildə Azərbaycan Respublikası Prezidentinin Fərmanı ilə Alpout kənd tam orta məktəbinin müəllimi Sakibə Nəbiyeva “Əməkdar müəllim” fəxri adına layiq görülmüş, şəhər 3 saylı tam orta məktəbin direktoru Vüqar Xasməmmədov “Tərəqqi medalı” ilə təltif olunmuşdur.

Azərbaycan Müəllimlər İnstitutunun Qazax filialında 2 fakültə — “Pedaqoji ” və “Əlavə təhsil” fakültələri fəaliyyət göstərir. Pedaqoji fakültənin əyani şöbəsində 450 tələbə təhsil alır. 2012–ci ildə “Pedaqoji ” fakültəni bitirən 104 nəfər tələbə məzun adı qazanmış, “Əlavə təhsil” fakültəsində 620 müdavim ixtisasartırma təhsili almışdır.

Hesabat dövründə rayon səhiyyə şöbəsində çalışan 234 nəfər həkim və 643 nəfər orta tibb işçisi əhalinin sağlamlığı keşiyində dayanmışlar. 586 cərrahi əməliyyat aparılmışdır.

Mərkəzi və Ruhi xəstəxanada yeni tipli qazanxana və istilik sistemi quraşdırılaraq istifadəyə verilmişdir. Bala Cəfərli, Quşçu Ayrım kəndlərində tibb məntəqəsi, Cəfərli kəndində həkim məntəqəsinin tikintisinə başlanılmışdır. 2013–cü ildə rayon Mərkəzi Xəstəxanasının, Fərəhli, Məzəm, Aşağı Salahlı, Abbasbəyli kəndlərində yeni tibb məntəqələrinin tikintisi nəzərdə tutulmuşdur.

Qazax Müalicə Diaqnostika Mərkəzində 33 nəfər həkim və 133 nəfər orta və kiçik tibb işçisi çalışır. Hesabat ilində ambulator gəlişlərin sayı 24.184 nəfər, dövrü müayinələrin sayı 96.580 nəfər, cərrahiyyə əməliyyatlarının sayı isə 791 nəfər olmuşdur. Hemodiz şöbəsində 89 xəstə müalicə alır.

Rayon Mədəniyyət və Turizm şöbəsi tərəfindən 2012–ci ildə rayonda bayram konsertləri, şənliklər, yubileylər, sərgilər, əlamətdar günlər, müsabiqələr və kütləvi tədbirlər keçirilmişdir.

2012–ci ildə 2011–ci illə müqayisədə Mədəniyyət və Turizm şöbəsində əlavə olaraq 5 kütləvi tədbir keçirilmişdir.

Qazax rayonu ərazisində dövlət mühafizəsinə götürülmüş abidələrin 2001–ci ildə təsdiq olunmuş siyahısında 112 daşınmaz tarix və mədəniyyət abidələri vardır. Bunlardan 45–i memarlıq, 54–ü arxeoloji, 7–si monumental və xatirə, 5–i isə dekorativ tətbiqi sənət nümunələridir.

Ölkə Prezidenti cənab İlham Əliyevin sərəncamı ilə 2012–ci il “İdman ili” elan olunmuşdur. Gənclər və İdman idarəsi tərəfindən 2012–ci ildə gənclərlə iş sahəsi üzrə 25, bədən tərbiyəsı və idman sahəsi üzrə 34 tədbir keçirilmişdir, keçirilən tədbirlərdə gənclərin bütün təbəqələri təmsil olunmaqla 5.566 nəfər yeniyetmə və gənc iştirak etmişdir.

2012–ci il ərzində beynəlxalq yarışlarda 13 nəfər idmançımız mükafata layiq yerlər tutmuşlar. Bunlardan Qismət Vəkilov qol güləşi üzrə Dünya və Avropa, İsrafil Məmmədov və Azərbaycan Müəllimlər İnstitutunun tələbəsi Kübra Babayeva Poverliftinq və Benç–Press üzrə dünya çempionu olmuşlar.

Bildiyiniz kimi, fevralın 12–də Bakı Biznes Mərkəzində “Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nın icrasının dördüncü ilinin yekunlarına həsr olunmuş konfransda çıxış edən Prezident İlham Əliyev cənabları söyləmişdir ki, Dövlət Proqramının icrası nəticəsində maddi imkanlarımız artmış və maliyyə vəziyyətimiz yaxşılaşmışdır. Bu ilin sonunadək ikinci Dövlət Proqramının icrası təmin ediləcəkdir. Dövlətin üzərinə düşən bütün vəzifələrin icra edildiyini vurğulayan möhtərəm Prezident məmurlara da xəbərdarlıq etmişdir: Hər bir dövlət məmuru öz vəzifə borcunu şərəflə yerinə yetirməlidir, insanlara qulluq etməlidir və təvazökar olmalıdır. Ancaq bəzi hallarda təvazökarlıqdan, ümumiyyətlə, söhbət getmir. Konfransda dövlət başçısı tərəfindən çox ciddi fikirlər səslənmiş və tapşırıqlar verilmişdir. Eyni zamanda, yerlərdə sahibkarlığın inkişafı və bu inkişafa əngəl ola biləcək maneələrin aradan qaldırılması məsələsinə toxunulmuşdur.

Biz hamımız ölkə başçısının çox ciddi tənqidi fikirlərindən nəticə çıxarmalıyıq. İnsanlara münasibəti önə çəkməliyik, onların müraciət və təkliflərinə, problemlərinə diqqət və qayğı ilə yanaşmalıyıq, korrupsiyaya qarşı mübarizəni daha da gücləndirməliyik.

Yekunda Azərbaycan Respublikasının Prezidenti cənab İlham Əliyevi əmin etmək istəyirik ki, 2013–cü ildə qarşıda duran vəzifələrin yerinə yetirilməsi üçün bütün qüvvəmizi səfərbər edərək daha uğurlu nəticələr əldə edəcəyik və dövlət başçısının Qazax rayonuna göstərdiyi diqqət və qayğıya əməli işimizlə cavab verəcəyik.

İclasda Prezident Administrasiyasının məsul işçisi Habil Əzənmədov, millət vəkillərindən Əhməd Vəliyev, İlyas İsmayılov iştirak edirdilər.

İclasın sonunda möhtərəm Prezidentimiz İlham Əliyevə müraciət qəbul olunmuşdur.

Əzim Yusifbəyli

Respublika.- 2013.- 7 mart.- S. 8.