Sumqayıtda həyata keçirilən tədbirlər yüksək nailiyyətlərə yol açır

Respublikamızın iri sənaye mərkəzi olan Sumqayıt şəhərində “2012–ci ildə Sumqayıt şəhərinin sosial–iqtisadi inkişafının yekunları və 2013–cü ildə qarşıda duran vəzifələr haqqında” şəhər icra hakimiyyətinin hesabat tədbiri keçirilmişdir. Hesabatın dinlənilməsi və müzakirəsi üçün yerli müəssisə və təşkilat rəhbərləri, şəhərin fəalları və sakinləri S.Vurğun adına mədəniyyət sarayının geniş salonuna yığışmışdılar.

Tədbiri giriş sözü ilə Sumqayıt Şəhər İcra Hakimiyyətinin başçısı Eldar Əzizov açdı. O, ölkəmizdə son 10 ildə gedən dinamik inkişafdan və 2012–ci ildə də həmin proseslərin yüksək səviyyədə davam etməsindən danışdı. Dünyada gedən maliyyə böhranının fonunda ötən il Azərbaycanda ümumi daxili məhsul 2,2 faiz artmış, qeyri–neft sektorunda isə artım 9,7 faiz olmuşdur. Əhalinin pul gəlirləri 13,8 faiz artaraq inflyasiyanı 10 faizdən çox üstələmişdir. Hesabat ilində çox böyük sosial proqramlar icra edilmişdir və bunlardan biri də sovet dövründən qalmış əmanətlərə görə vətəndaşlara kompensasiyanın verilməsi olmuşdur. Ötən il investisiya xərcləri də rekord səviyyədə—22 miyard dollardan çox olmuşdur. Bu rəqəmləri söyləməklə E.Əzizov bu il yanvar ayının 15–də Azərbaycan Respublikası Nazirlər Kabinetinin 2012–ci ilin sosial–iqtisadi inkişafının yekunları və 2013–cü ildə qarşıda duran vəzifələrə həsr olunmuş iclasda dövlət başçısı İlham Əliyevin nitqindən bəzi məqamları bir daha tədbir iştirakçılarının yadına saldı.

Sonra E.Əzizov Sumqayıtda gedən geniş quruculuq–abadlıq işlərindən danışdı və nitqini bu sözlərlə yekunlaşdırdı: “Dövlət başçısının Sumqayıta və sumqayıtlılara olan xüsusi diqqət və qayğısının bariz göstəricisidir ki, möhtərəm Prezidentimiz son dövrdə dörd dəfə şəhərimizdə olmuşdur. Bu səfərlərin hər biri şəhərin yüksək inkişafında öz əksini tapmışdır. Şəhərimizin inkişafı naminə gördüyü bu cür işlərə və qayğıya görə biz cənab Prezidentə öz dərin minnətdarlığımızı bildiririk”. Bu sözlərdən sonra iclas salonunu alqış sədaları bürüdü.

Tədbirdə 2012–ci ildə Sumqayıtda aparılan quruculuq–abadlıq işlərini və şəhərdə olmuş əlamətdar hadisələri əks etdirən 20 dəqiqəlik film nümayiş olundu.

Bundan sonra Sumqayıt icra başçısının müavini Sahib Quliyev 2012–ci ilin yekunu ilə bağlı geniş məruzə etdi. Sahib Quliyev dedi:

—Azərbaycan Respublikasının Prezidenti cənab İlham Əliyevin ümummilli liderimiz Heydər Əliyevin müəyyənləşdirdiyi strategiyaya əsaslanan, bazar iqtisadiyyatı prinsiplərindən qaynaqlanan tarazlı iqtisadi siyasəti nəticəsində ölkəmiz dünya dövlətləri sırasında öz layiqli yerini tutmuş, qeyri–neft sektorunun inkişafının sürətlənməsində, sahibkarlığın və regionların inkişafında, əhalinin rifahının daha da yüksəlməsində yeni nailiyyətlər əldə olunmuş, iqtisadiyyatda dinamik inkişaf qorunub saxlanılmışdır.

Sosial infrastrukturun yaradılması ilə bağlı böyük işlər görülmüşdür—yüzlərlə məktəb, xəstəxana, idman kompleksi və digər sosial obyektlər tikilmiş və təmir edilmişdir. Cari ilin büdcəsində də bu sahəyə böyük vəsaitlərin ayrılması nəzərdə tutulur.

Ötən il eyni zamanda ölkəmizdə sənayeləşmə istiqamətində çox əlamətdar bir il olmuş, iri sənaye müəssisələrinin yaradılması, kiçik və orta sahibkarlığın inkişafı istiqamətində çox böyük işlər görülmüşdür.

Regional inkişaf Proqramı uğurla icra edilmişdir. Hesabat ilində 117 min yeni iş yeri açılmışdır ki, onlardan 93 mini daimi iş yeridir. Proqramın əvvəlindən 1 milyon 200 min yeni iş yeri açılmışdır ki, bu da öz növbəsində işsizliyin xeyli azalmasına xidmət göstərmişdir. İşsizliyin səviyyəsi 2012–ci ildə aşağı düşmüş və 5,2 faiz səviyyəsindədir. İşsizliklə bilavasitə bağlı olan yoxsulluğun səviyyəsi də 7,6 faizdən 6 faizə düşmüşdür.

Azərbaycan daha bir tarixi nailiyyət əldə etmiş və ilk dəfə olaraq BMT Təhlükəsizlik Şurasına sədrlik etmişdir. Bu da ilk növbədə Azərbaycan dövlətinin dünya miqyasında nüfuzunun göstəricisidir. Bir sözlə, ölkəmiz keçən il dünyada özünü daha geniş miqyasda təsdiq edə bilmişdir. Bütün bu uğurlar Azərbaycan Respublikasının Prezidenti cənab İlham Əliyevin qətiyyətli diplomatik siyasətinin, Azərbaycan xalqının öz dövlətinə və rəhbərinə sədaqətinin məntiqli nəticəsidir.

Ölkəmizin dinamik inkişafı, həyatımızın bütün sahələrində uğurla aparılan irimiqyaslı iqtisadi islahatlar, qazanılan müvəffəqiyyətlər Sumqayıt şəhərinin də hərtərəfli və dinamik inkişafına geniş imkanlar yaratmış, onun inkişafı, yeni, müasir istehsalatların yaradılması, şəhərin ən yüksək səviyyədə abadlaşdırılması, burada yaşayan insanların rifah halının daha da yaxşılaşdırılmasına yönəldilmiş layihələr məhz ölkə Prezidentinin Sumqayıta olan xüsusi diqqət və qayğısı nəticəsində öz həllini tapmış və bu istiqamətdə işlər uğurla davam etdirilməkdədir.

Bu diqqət və qayğının bariz nümunəsi kimi son iki ildə möhtərəm cənab Prezidentin şəhərimizə müxtəlif vaxtlarda 4 dəfə etdiyi səfərləri göstərmək olar. Hesabat dövrü də möhtərəm Prezidentimizin aprel və dekabr aylarında şəhərimizə etdiyi səfərləri ilə əlamətdar və yaddaqalan olmuşdur. Sumqayıt və sumqayıtlılara həmişə böyük diqqət və qayğı ilə yanaşan, şəhərin dinamik inkişafı üçün vaxtında və lazımi köməkliyini əsirgəməyən dövlət başçımız bu səfərlərində də şəhərdə baş verən əsaslı dəyişikliklərlə, yeni layihələrlə yaxından tanış olmuş, onların həyata keçirilməsinə öz tövsiyələrini vermişdir. Səfərlər zamanı ölkə başçımız ulu öndər Heydər Əliyevin abidə kompleksini ziyarət etmiş, Sumqayıt Texnologiyalar Parkında olmuş, burada yeni istifadəyə verilmiş boru istehsalı zavodunun ikinci mərhələsinin, 500 kilovoltuq kabel zavodunun ikinci mərhələsinin, ağır maşınqayırma və dəqiq emal mərkəzləri zavodlarının fəaliyyəti ilə tanış olmuşdur. Ölkə başçımız eyni zamanda “Azgüntex” MMC–nin günəş modulları və LED lampalar istehsalı sahələrinin açılış mərasimində iştirak etmiş, Qarabağ müharibəsi əlilləri və şəhid ailələri üçün inşa olunmuş binanın açılışında iştirak etmiş, bu kateqoriyadan olan bir qrup insanlara yeni mənzillərin və yeni avtomobillərin açarlarını təqdim etmiş, onların qayğıları ilə maraqlanmış, Nəsimi adına dənizkənarı mədəniyyət və istirahət parkında görülən əsaslı və yenidənqurma işləri ilə tanış olmuşdur.

2012–ci il bütün ölkəmizdə olduğu kimi, Sumqayıt şəhəri üçün də uğurlu olmuşdur. Ölkəmizin yüksək inkişaf mərhələsinə qədəm qoyması—ümumi daxili məhsulun artım tempi, büdcə gəlirlərinin ildən–ilə əhəmiyyətli dərəcədə çoxalması Sumqayıt şəhərinin sosial–iqtisadi həyatında yüksək artım tempinə imkan yaratmışdır. Hesabat ilində şəhər üzrə ümumi daxili məhsul istehsalı 661,7 milyon manat olmuş, əvvəlki ilin müvafiq dövrü ilə müqayisədə artım 30 faiz təşkil etmişdir. Şəhərin sənaye müəssisələrində məhsul istehsalı ötən ilin eyni dövrü ilə müqayisədə 28,4 faiz artaraq 402,5 milyon manat təşkil etmişdir. Sosial–iqtisadi sahələrdə çalışan işçilərin əməkhaqqı 15 faiz artmış, ümumilikdə orta aylıq əməkhaqqı 400 manat səviyyəsini ötmüşdür.

İl ərzində şəhərin kimya və neft–kimya müəssisələrində genişmiqyaslı təmir–bərpa işləri aparılmış, istehsalat sahələrinin yenidən qurulması və avadanlıqların təzələnməsi istiqamətində əhəmiyyətli tədbirlər həyata keçirilmişdir. “Azərikimya” İstehsalat Birliyinin Etilen–polietilen zavodunda əsas avadanlıq olan turbokompressorların əsaslı təmiri ilk dəfə olaraq istehsalçı müəssisənin mütəxəssislərinin iştirakı ilə yerində aparılmışdır.

Məlum olduğu kimi, Azərbaycan Respublikası Prezidentinin müvafiq fərmanı ilə rəqabətqabiliyyətli sənaye istehsalının inkişafı üçün münbit şərait yaratmaq və əhalinin istehsal sahəsində məşğulluğunu artırmaq məqsədilə Sumqayıt Kimya Sənaye Parkı yaradılmaqdadır. Burada neft–kimya və digər prioritet sənaye sahələri üzrə rəqabət qabiliyyətli məhsulların istehsalı və emalı müəssisələri yaradılması nəzərdə tutulur. Parkın yaradılması çoxsaylı iş yerlərinin açılmasına imkan verəcək və ixtisaslı mütəxəssislərə tələbat artacaqdır. İl ərzində Sumqayıt Kimya Sənaye Parkında bir sıra iri istehsal sahələrinin, “Azot gübrəsi—karbamid” zavodunun inşası ilə əlaqədar zəruri işlərin görülməsi davam etdirilmişdir.

Ötən il Azərbaycan Respublikasının Prezidenti cənab İlham Əliyevin göstərişi əsasında Sumqayıtda ilk dəfə olaraq müasir standartlar səviyyəsində neft–kimya sənayesi üçün hər il yüzlərlə ixtisaslı fəhlə–kadrların hazırlanacağı Təlim–Tədris Mərkəzi fəaliyyətə başlamışdır.

Hesabat ilində Sumqayıtda elektroenergetika sahəsində yeni infrastruktur layihələrinin həyata keçirilməsi davam etdirilmişdir. Sumqayıt Texnologiyalar Parkında ümumilikdə 20–dən çox iri müasir istehsal sahəsi fəaliyyət göstərir. Hazırda burada 500 kilovoltluq kabel zavodunun üçüncü mərhələsinin, polikarbonat lövhələr istehsalı, kanalizasiya boruları istehsalı, polikarbonat dolğulu sendviç panelləri istehsalı, transformatorlar istehsalı, metaləritmə və şüşə emalı zavodlarının inşası davam etdirilməkdədir.

Azərbaycan Respublikası Prezidentinin 5 noyabr tarixli 2012–ci il tarixli fərmanı ilə Sumqayıt şəhərində informasiya və kommunikasiya texnologiyaları, telekommunikasiya və kosmos, enerji səmərəliliyi sahələrində tədqiqatlar aparılması, yeni və yüksək texnologiyaların hazırlanması üçün zəruri infrastrukturu, maddi–texniki bazası və idarəetmə qurumları olan ərazi—Yüksək Texnologiyalar Parkı yaradılmasına başlanılmışdır.

Hesabat dövründə şəhərin iri metallurgiya müəssisəsi olan “Azərboru” ASC–də istehsal olunan məhsulların çeşidlərinin artırılması istiqamətində tədbirlər davam etdirilmişdir. İlin sonunda müəssisə “Baku Steel Compani”nin idarəetməsinə verilmişdir. Yaxın vaxtlarda burada yeni metal emalı texnologiyaları tətbiq ediləcək və işləyənlərin sayı əvvəlki dövrlərlə müqayisədə xeyli artacaqdır.

Şəhərin iri yüngül sənaye müəssisələrindən olan “İntertextil” ASC–də pambıq iplik istehsalı və trikotaj məhsullar istehsalı davam etdirilmişdir. Hazırda müəssisə fasiləsiz olaraq fəaliyyət göstərir, istehsalın həcmi və burada daimi işləyənlərin sayı tədricən artır.

“Azərbaycan Respublikası regionlarının 2009–2013–cü illərdə sosial–iqtisadi inkişafı Dövlət Proqramı”nda Sumqayıt şəhəri üzrə müəyyən olunmuş tədbirlər uğurla icra olunmuşdur. Onun mövcud sənaye potensialından səmərəli istifadə edilməsi və gücləndirilməsi baxımından hesabat ilində şəhərdə bir sıra yeni istehsal sahələrinin tikintisi istiqamətində əhəmiyyətli işlər həyata keçirilmişdir.

Ötən il “Azərsun Holdinq” şirkətlər qrupu tərəfindən Sumqayıt Sənaye Zonasında kağız–karton istehsalı kombinatı və yağ istehsalı fabrikində tikinti–quraşdırma işləri başa çatdırılmışdır. Hazırda hər iki müəssisədə sınaq məhsullar istehsal edilməsinə başlanılmışdır.

“MKT İK” MMC–nin Sumqayıt Tekstil filialı illik istehsal gücü 6,5 milyon metr parça olan müasir avadanlıqlarla təchiz olunacaq yeni müəssisənin inşası başa çatdırılmışdır. Hazırda həmin müəssisədə məhsul istehsalına başlanmışdır.

“Delta Qrup” MMC tərəfindən tutumu 4000 ton, ümumi sahəsi 8900 kvadratmetr olan soyuducu anbar kompleksinin həmin ərazidə sutkalıq istehsal gücü 120 ton olan Çörək zavodunun inşası yekunlaşmaq üzrədir.

İl ərzində şəhər üzrə bütün maliyyə mənbələrindən ayrı–ayrı sahələrin inkişafına 66 milyon manatdan çox əsaslı vəsait qoyulmuşdur. Kapital qoyuluşu əsasən inşaat işləri davam etdirilməkdə olan yeni sənaye obyektlərinin tikinti–quraşdırılmasına yönəldilmişdir.

Sumqayıt Elektrik Stansiyası ilin əvvəlindən müvəffəqiyyətlə işləyərək 2026 milyon kilovat/saat və ya 48255 min manatlıq elektrik enerjisi istehsal etmişdir. İstehsal edilmiş elektrik enercisi zəncirvarı enerji sisteminə ötürülmüşdür. Şərti yanacağın xüsusi sərfi 240,65 qram/kilovat/saat olmuşdur ki, bu da əvvəlki stansiyanın sərfiyyatından 2 dəfədən çox aşağıdır. Stansiyada enerjinin maya dəyərinin azaldılması sahəsində aparılan işlər öz nəticəsini vermiş, 1 kilovat elektrik enerjisinin istehsalına olan məsrəflər 11,2 faiz aşağı salınmışdır.

“Aztermoizol” ASJ “Qaradağ sement” zavodunda təmir–tikinti işlərini aparmış, “Metanol” zavodunun tikintisində iştirak etmişdir. Ümumilikdə müəsissisə tərəfindən yerinə yetirilmiş iş həcmi əvvəlki ilin müvafiq dövrü ilə müqayisədə 30 faizədək artmışdır.

“Poladkonstruksiya” və “Elektrikdəstləşdirmə” ASC–ləri ötən il fəaliyyətlərini iş həcminin artırılmasına yönəltmiş, nəticədə əvvəlki illə müqayisədə müvafiq olaraq 24 faiz və 42 faiz artım əldə etmişlər.

Yeni müəssisələrin işə başlaması, şəhərdə fəaliyyət göstərən iri müəssisələrin istehsalının genişləndirilməsi şəhər əhalisinin məşğulluğunun təmin edilməsində müsbət rol oynamışdır. 2011–ci illə müqayisədə 2012–ci ildə işaxtaran kimi qeydiyyatda olan vətəndaşların sayının 15,7 faiz azalması şəhər əhalisinin məşğulluğu sahəsində görülmüş işlərin müsbət nəticələr verdiyini göstərir. Ötən il Məşğulluq Mərkəzi tərəfindən 3002 nəfər işaxtaran kimi qeydiyyata alınmış və onlardan 1101 nəfəri işlə təmin olunmuşdur.

2012–ci il ərzində Sumqayıt şəhərində keçirilən “Əmək yarmarka”larında 12 dövlət, 23 qeyri–dövlət və 10 fiziki şəxs tərəfindən 509 boş iş yeri təqdim olunmuşdur. 680–ə yaxın işsiz və işaxtaran vətəndaşın iştirak etdiyi yarmarkada 334 nəfər işaxtaran vətəndaşa göndəriş verilmiş, bundan əlavə, 110 nəfər peşə hazırlığı kurslarına və 54 nəfər isə ictimai işlərə cəlb olunmuşdur.

İl ərzində şəhərdə həyata keçirilən tədbirlər nəticəsində hamısı daimi olmaqla 2915 yeni iş yeri yaradılmışdır.

Dövlət Sosial Müdafiə Fondunun Sumqayıt şəhər şöbəsində hazırda 18737 fiziki, 4176 hüquqi şəxs uçota alınmışdır ki, bu da ötən ilin eyni dövrü ilə müqayisədə müvafiq olaraq 27 və 68,5 faiz çoxdur. Ödənilən təqaüdün bir nəfərə düşən orta aylıq məbləği 156 manat təşkil edir ki, bu da əvvəlki illə müqayisədə 6 faiz artım deməkdir.

Əhalinin Sosial Müdafiəsi Mərkəzinə hesabat dövründə ünvanlı sosial yardım almaq üçün 5846 ailə müraciət etmiş, onlardan 5754 ailənin sənədi qəbul edilmiş və ünvanlı sosial yardım təyin edilmişdir. Təyinat aparılmış ailələrdən 438–i Sumqayıt şəhərində məskunlaşmış məcburi köçkün ailəsi, 123–ü ailə başçısını itirmiş, 198 tək analar ailəsi, 687 şəhid, Qarabağ müharibəsi əlili və Çernobıl əlili ailəsidir.

2012–ci ildə aparılmış təyinatların məbləği 816,5 min manat, bir ailəyə düşən orta məbləğ 142 manat olmuşdur ki, bu da əvvəlki illə müqayisədə 11,5 faiz çoxdur. Ümumilikdə, 2012–ci ildə mərkəzdən sosial müavinət alanların sayı 11605 nəfər təşkil etmişdir. “Özünüdəstək” proqramı üzrə layihələr 15 ailəni əhatə etmiş, o cümlədən 7 ailəyə fərdi yardımçı təsərrüfatın inkişafı üzrə, 8 ailəyə isə əmtəə və xidmətlərin istehsalı üzrə birdəfəlik yardım göstərilmişdir.

Sumqayıt Poçtamtının tərkibinə daxil olan 12 poçt şöbəsi tərəfindən şəhər və qəsəbələrdə yaşayan əhali poçt xidmətləri ilə tam əhatə edilmişdir. Əhaliyə göstərilən xidmətlərin həcmi əvvəlki illə müqayisədə artmış, tarif gəlirləri proqnozuna 101,7 faiz əməl edilmişdir. Poçt şöbələrində əhaliyə maliyyə xidmətlərinin göstərilməsinin tətbiqi sahəsində işlər davam etdirilmiş, beynəlxalq sürətli pul köçürmələri və elektron imza sistemləri işlənərək şəhər sakinlərinin istifadəsinə verilmişdir.

Əhaliyə 12,2 milyon manatlıq nəqliyyat, 7 milyon manatlıq rabitə xidmətləri göstərilmişdir. Sakinlərin yaşayış səviyyəsini əks etdirən əsas göstəriilərdən biri olan pərakəndə əmtəə dövriyyəsi üzrə artım tempi 17 faiz olmuşdur. Bütün sahələrdə uğurların əldə olunması, iqtisadi göstəricilərin ötən ilin müvafiq dövrü ilə müqayisədə artması nəticəsində şəhər büdcəsinin gəlirlər proqnozu 60,7 milyon manata qarşı 62,1 milyon manat və yaxud 102,3 faiz yerinə yetirilmişdir. Vergi və tədiyyələr üzrə tapşırıqların yerinə yetirilməsi şəhər büdcəsinin icrasına da müsbət təsir etmişdir. Artıq iki ildir ki, Sumqayıt şəhəri tam olaraq dövlət büdcəsindən dotasiya almır. Yeni istehsal sahələrinin fəaliyyətə başlaması ilə şəhər büdcəsinin subsidiyadan asılılığı aradan qaldırılmışdır.

Sumqayıt Şəhər Baş Gömrük İdarəsi tərəfindən proqnoz tapşırıq 106,1 faiz yerinə yetirilmiş, dövlət büdcəsinə 1 milyon manatdan artıq əlavə vəsait daxil olmuşdur.

Ölkə Prezidenti cənab İlham Əliyevin dəstəyi və bilavasitə yaxından köməyi sayəsində əhaliyə göstərilən xidmətlərin səviyyəsinin yüksəldilməsi, abadlıq, yenidənqurma, təmir–bərpa, yaşıllaşdırma, sahəsində xeyli işlər görülmüşdür. Şəhərin mərkəzi küçə və prospektləri müasir tələblərə uyğun yenidən qurularaq abadlaşdırılmış, səki daşları qoyulmuş, üzlük daşlar döşənmiş, yaşıllıqlar salınmış, ticarət obyektləri yeni layihələr üzrə işlənilir.

Ulu öndər Heydər Əliyevin adını daşıyan “Heydər bağı” parkının və mərkəzin, bilavasitə ölkə Prezidentinin nəzarətində olan Nəsimi adına mədəniyyət və istirahət parkının abadlaşdırılaraq yenidən qurulması, yeni yaşıllıqların salınması, kol və bitkilərin əkilməsi işləri davam etdirilir.

Şəhərin küçə, meydan və məhəllə–mikrorayon daxili yollarının 90 min kvadratmetrdən çoxunun asfalt örtüyü əsaslı təmir edilmiş, 13,7 min poqonmetr səki daşları qoyulmuş, piyada yolları, meydança və xiyabanlara 69,4 min kvadratmetr üzlük daş, 1,2 min kvadratmetrdən çox mərmər döşənmişdir.

Ərazidə 25,2 min kvadratmetr yeni qazon sahələri salınmış, 8 min ədəd ağac, minlərlə mövsümi və dekorativ gül əkilmiş, yaşıllıqlara qulluq etmək üçün 2,6 min poqonmetr suvarma xətləri çəkilmişdir. “Heydər bağı” parkı və Nəsimi adına mədəniyyət və istirahət parkının ərazisində kompleks şəkildə yenidənqurma, abadlaşdırma və yaşıllaşdırma işləri aparılmış və həmin işlər hazırda davam etdirilir.

Şəhər icra hakimiyyətinin inzibati binasının fasadı müasir dizayn əsasında yenidən qurulmuş və bina zövqoxşayan şəkildə bütövlükdə əsaslı təmir olunmuşdur. Binanın qarşısındakı meydan əsaslı surətdə yenidən qurulmuş, əzəmətli “Bayraq meydanı” yaradılmışdır. Hazırda bu meydanda demək olar ki, şəhərin hər tərəfindən görünən üçrəngli bayrağımız qürurla dalğalanmaqdadır.

“Bələdiyyə parkı”nın yenidən qurulması ilə bağlı aparılan işlər ötən ildə yekunlaşdırılmış və şəhər sakinlərinin istifadəsinə verilmişdir. Parkın ərazisinə üzlük daş döşənmiş, səki daşları düzülmüş, qazon əkilmiş, oradakı fəvvarə və onun ətrafı təmir olunmuş, işıqlandırma sistemi qurulmuşdur.

Sumqayıt Şəhər Polis İdarəsinin inzibati binası tikilərək istifadəyə verilmiş, bir sıra obyektlərin müasir üslubda yenidən qurulması işləri aparılmışdır. H.Əliyev prospektində, 34 və 36–cı məhəllələrin arasında yerləşən alleya müasir şəkildə yenidən qurulmuş, bundan başqa, H.Əliyev və Koroğlu prospektlərinin, N.Nərimanov və Sülh küçələrinin abadlaşdırılaraq mövcud tikililərin tərtib edilmiş layihələr üzrə yenidən qurulması, sıxlıq yaratmış obyektlərin digər əraziyə köçürülməsi, bordürlərin yenidən qurulması, 4, 16, 17, 20 və 36–cı məhəllələrin mərkəzi küçələrə çıxan hissələrində yerləşən binaların dam örtüklərinin və fasad hissələrinin təmiri aparılmış və hazırda bu işlər davam etdirilir. “Kimyaçı” mədəniyyət sarayı və onun qarşısındakı meydanda da əsaslı təmir və yenidənqurma işləri davam etdirilir. Sumqayıt–Novxanı yolu boyunca hasarlar təmir edilərək rənglənmişdir. Qeyd etmək lazımdır ki, son vaxtlar müxtəlif təyinatlı obyekt və fərdi ev layihələri işlənilmiş, zövqsüz köşk və quraşdırmalar götürülmüş, müxtəlif ərazilərdə qeyri–qanuni tikilmiş hasarlar və fərdi evlər sökülmüş, müasir tələblərə uyğun yeniləşdirilmişdir.

Sumqayıt şəhərinə hər səfəri zamanı Prezident cənab İlham Əliyev yeni sosial obyektlərin təməlqoyma və açılış mərasimlərində iştirak edərkən onların memarlıq üslubunda yerli və milli ənənələri qorumaqla müasirliyinə üstünlük vermiş, şəhərsalma qaydalarına uyğun olmasını vurğulamışdır.

Sumqayıt Cümə məscidində dindarlarla görüşü zamanı məscidin əsaslı təmir olunması və minarənin tikilməsi cənab Prezidentdən xahiş olunmuşdu. Ölkə başçımızın tapşırıqları əsasında çox qısa bir müddətdə yeni layihə hazırlanmış və yenidənqurma işlərinə başlanılmışdır. Artıq məscidin yenidən qurulması ilə əlaqədar işlər yekunlaşır.

Ötən ildə də məhəllə və mikrorayonların daxili ərazilərinin abadlaşdırılaraq yenidən qurulması, “Nümunəvi məhəllə”lərin yaradılması istiqamətində xeyli məqsədyönlü irimiqyaslı işlər həyata keçirilmişdir.

Şəhərdə artıq ənənəyə çevrilmiş “Nümunəvi məhəllə”lərin yaradılması işləri 17–ci mikrorayonda davam etdirilərək ümumilikdə 30–dan çox yaşayış binasının fasadı təmir olunmuş, zövqoxşayan boyalar ilə rənglənmiş, 20–dən çox “Xeyir–şər” evi yenidən qurulmuş və təmir edilmiş, 32 min kvadratmetr sahədə asfalt salınmış, xeyli sayda yeni ağaclar əkilmiş, ərazi abadlaşdırılaraq “Nümunəvi mikrorayon” yaradılmışdır. Eyni zamanda “Nümunəvi məhəllə”lərin yaradılması təkcə şəhəri deyil, ucqar əraziləri əhatə etmiş, H.Zeynalabdin qəsəbəsində “Şirvan” yaşayış massivində də belə məhəllələr yaradılmış, oradakı sakinlərin yaşayış və istirahət şəraitinin yaxşılaşdırılması istiqamətində uğurlu bir addım atılmışdır.

Qeyd etmək lazımdır ki, artıq şəhərimizdə əhalinin daha sıx yaşadıqları yerlərdə — 18, 13, 10, 17–ci mikrorayonlar və “Şirvan” yaşayış massivinin ərazilərində müvafiq abadlaşdırma, yenidənqurma və tərtibat işləri aparılaraq zəruri infrastruktura malik nümunəvi məhəllələr yaradılaraq sakinlərin ixtiyarına verilmişdir. Bu məhəllələrdə bir vaxt necə gəldi pərakəndə şəkildə bütün ərazi üzrə yerləşdirilmiş qarajların, sərhədləri çoxdan itmiş yaşıllıqlar üçün nəzərdə tutulmuş sahələrin, yöndəmsiz və əksəriyyəti sınıq–salxaq oturacaqların yerini ən müasir tələblərə cavab verən süni örtüklü zövqlə düzəldilmiş idman meydançaları, uşaqlar üçün müxtəlif əyləncə guşələri, yaşlı sakinlərin istirahət etmələri üçün xüsusi yaradılmış yerlər və digər qurğular tutmuşdur. Bu ərazilərə asfalt örtüyü, səki daşları qoyulmuş, ağac əkilmiş, çoxsaylı oturacaqlar düzülmüş, müasir işıqlandırma sistemi qurulmuş, hətta yumşaq ev əşyalarının yuyulub qurudulması üçün ətrafı bağlı xüsusi yerlər yaradılmışdır. Bütün bunlar sakinlərin rahatlığına xidmət edir və onlar tərəfindən böyük razılıqla qarşılanmışdır. Əhalinin asudə vaxtlarının təşkilinə, gənclərin pis vərdişlərdən yayındırılmasına xidmət edən, uşaqlar və gənclər üçün müxtəlif oyun və idman qurğularının yerləşdiriləcəyi növbəti belə nümunəvi məhəllə 12–ci mikrorayon ərazisində yaradılır. Cari ildə sakinlər tərəfindən böyük minnətdarlıqla qarşılanan belə məhəllələrin yaradılması digər ərazilərdə də davam etdiriləcəkdir.

Hesabat dövründə ölkə başçımız cənab İlham Əliyevin tövsiyə və tapşırıqlarına müvafiq olaraq əhali ilə canlı iş bizim gündəlik fəaliyyətimizdə prioritet istiqamət olmuş, daim ön plana çəkilmiş, onların qayğıları ilə maraqlanılmış, narahat edən problemlər aşkar edilərək həll olunmasına xüsusi önəm verilmişdir. Bizim cari işlərimizin proqnozlaşdırılmasında, mövcud problemlərin üzə çıxarılaraq həllində, müvafiq tədbirlərin görülməsində sakinlərlə və yerlərdə səyyar görüşlərin, xüsusən də canlı ünsiyyət vasitəsi kimi “Açıq mikrofon” tədbirlərinin keçirilməsi mühüm əhəmiyyət kəsb edir. İl ərzində belə görüşlərin keçirilməsi davam etdirilmişdir. Şəhərin bütün təsərrüfat və xidmət sahələrinin rəhbərlərinin iştirak etdikləri görüşlərdə sakinlər onları narahat edən problemlərdən, qayğılardan danışmış, şəhər həyatının müxtəlif sahələrində aparılan işlərdən razılıqlarını ifadə etmiş, hansı işlərin görülməli olduğundan söz açmışlar. Olduqca canlı və yüksək səviyyədə keçirilən görüşlərdə səslənən hər bir fikir və təklifə şəhər icra hakimiyyəti tərəfindən böyük diqqətlə yanaşılmış, onların əksəriyyəti bizim cari və perspektiv fəaliyyət proqramımızda öz əksini tapmışdır.

Şəhərin mənzil fondunun qorunub saxlanılması, dam örtüklərinin təmir olunması, ərazilərin təmizliyi, məişət tullantılarının daşınması daim nəzarətdə olan, icrası vacib əsas məsələlərdəndir. Bu barədə sakinlər icra hakimiyyətində qəbul edilərkən və müxtəlif görüşlərdə məsələ qaldırırlar. Hesabat dövründə bu sahələrdə bir çox işlər görülmüşdür. Sakinlərin müraciətləri əsasında və əvvəlcədən planlaşdırılmış şəkildə 334 mənzilin 19 min kvadratmetr dam örtüyü şiferlə, 659 mənzilin 67,8 min kvadratmetr dam örtüyü ruberoidlə örtülmüş, 25 yaşayış binasının fasadı təmir edilmiş və rənglənmişdir. 490 yaşayış binasının zirzəmisində aşağı şəbəkə üzrə içməli su və kanalizasiya xətləri cari, 48 yaşayış binasının zirzəmisində isə əsaslı təmir edilmiş, 76 yaşayış binasının zirzəmisinin suyu qurudularaq tullantılardan təmizlənmişdir. Hazırda Heydər Əliyev prospektində, Sülh, S.Vurğun və Azərbaycan küçələrində yaşayış binalarının fasadlarında və dam örtüklərində əsaslı təmir, bərpa və yenidənqurma işləri davam etdirilir.

Hesabat dövründə şəhər ərazisinin təmizliyi ilə əlaqədar işlər davam etdirilmişdir. Bərk məişət tullantıların yığılması üçün əlavə olaraq 380 ədəd konteynerlər yerləşdirilmiş, mütəşəkkil məntəqələrin sayı artırılmış, “Sumqayıt stansiyası”, “Tuğ zavod” ətrafı yaşayış massivlərində, “Xəzər”, “Metallurq” bağçılıq təsərrüfatlarının ərazilərində yeni məntəqələr yaradılmışdır. Ümumilikdə şəhər ərazisində tullantı qəbulu məntəqələrinin sayı 246–dan 305–ə çatdırılmışdır.

Əhaliyə kommunal xidmətlərin göstərilməsinin yaxşılaşdırılması şəhər rəhbərliyinin daim gündəlik diqqət mərkəzindədir. Hesabat dövründə əhaliyə elektrik enerjisi, su, təbii qaz verilməsi və digər kommunal xidmətlərin göstərilməsinin daha da yaxşılaşdırılması məqsədilə bir sıra tədbirlər həyata keçirilmiş, ayrı–ayrı avadanlıqlar yeniləri ilə əvəz olunmuş, əlavə ötürücü xətlər çəkilmiş, müasir sayğaclar quraşdırılmışdır.

Sumqayıt Elektrik Şəbəkəsində hesabat dövründə şəhərin fasiləsiz elektrik enerjisi ilə təchizatının və istehlakçılara satılmış elektrik enerjisinin dəyərinin ödənilməsinin maksimum səviyyədə təmin edilməsi istiqamətində tədbirlər planına uyğun olaraq bir sıra işlər görülmüşdür. İstehlakçıların elektrik enerjisinə artan tələbatını nəzərə alaraq enerji təchizatında fasilələrə yol verilməməsi üçün şəbəkənin xidməti ərazilərində bir sıra elektrik avadanlıqları və elektrik verilişi xətlərində əsaslı və cari təmir, yenidənqurma, bərpa işləri yerinə yetirilmişdir.

Sumqayıt Elektrik Şəbəkəsi tərəfindən hesabat dövründə yüksək gərginlikli 47 poqonkilometr kabel, 106,3 poqonkilometr SİP tipli kabel dəyişdirilmiş, 4 ədəd transformator daha güclüsü ilə əvəz edilmiş, 4 ədəd transformator əsaslı təmir edilmiş, 1 ədəd yeni transformator quraşdırılmış, 128 ədəd transformator yarımstansiyası cari təmir edilmiş, 12 transformator məntəqəsi binasının dam örtüyü və fasadı əsaslı təmir edilmiş, 366 ədəd dəmir–beton və 33 ədəd dəmir dayaq basdırılmış və əhali abonentləri üçün 4713 ədəd elektrik sayğacı quraşdırılmış və yenisi ilə əvəz edilmişdir. Hesabat dövründə güzəştsiz əhali üzrə elektrik enerjisinin ödənişi 11 milyon manat olmuşdur ki, bu da istehlak olunan enerji dəyərinin 93,5 faizini təşkil etmişdir. Ümumilikdə isə şəhər üzrə elektrik enerjisinin dəyərinin ödənilməsi 87,2 faiz olmuşdur.

“Küçə işıqları” təsərrüfathesablı xidmət sahəsi tərəfindən şəhərin küçə və prospektlərində 84 ədəd yeni elektrik–işıq dirəyi basdırılmış, 26,5 min poqonmetr elektrik kabeli çəkilmiş, 2 ədəd idarəetmə şkafı quraşdırılmışdır.

“Sumqayıt Sukanal” idarəsi tərəfindən hesabat dövründə müxtəlif diametrli 18973 poqonmetr su xətti, 285 poqonmetr kanalizasiya xətti çəkilmiş, 166 ədəd siyirtmə yenidən quraşdırılmış və təmir edilmiş, 122 yeni kanalizasiya və 209 yeni yağışqəbuledici quyu tikilmiş və təmir edilmişdir. Sudan istifadə edən əhali abonentləri üçün il ərzində 4659 ədəd yeni su sayğacı quraşdırılmışdır. Bununla da 77603 əhali abonentindən 52142–si və ya 70 faizi sayğaclaşdırılmışdır. Bu kateqoriya abonentlər tərəfindən istehlak edilən içməli suya görə 3,8 milyon manat ödənilmişdir, bu da 77 faiz təşkil edir. İstehlakçılara satılmış suyun dəyərinin ödənişi 93,6 faiz olmuşdur.

Şəhərdə yeni kanalizasiya xətlərinin çəkilişi işləri davam etdirilir.

Hesabat dövründə əhalinin təbii qazla təchizatının daha da yaxşılaşdırılması istiqamətində xeyli işlər görülmüşdür. Şəhərin məhəllə və mikrorayonlarında, bağlar ərazisində, yeni yaşayış massivlərində, H.Zeynalabdin qəsəbəsində müxtəlif diametrli 55 poqonkilometrdən çox yeni qaz xətləri çəkilmiş, 23 poqonkilometr qaz xətti yenisi ilə əvəz edilmiş, bir sıra xətlərdə təmir–bərpa işləri aparılmış, siyirtmə, qaztənzimləyici qurğu qoyulmuş, abonentlərə 3238 ədəd “Smart–kart” tipli müasir sayğac quraşdırılmış, 5826 ədəd sayğac yenisi ilə əvəz olunmuşdur. Güzəştsiz əhali üzrə hesabat dövründə istifadə olunan təbii qaza görə 7,6 milyon manat vəsait ödənilmiş, bu da 97,5 faiz təşkil edir və əvvəlki illə müqayisədə 2,6 faiz çoxdur.

Şəhər əhalisinin istiliklə təchiz edilməsi bu gün ön plana çəkilmiş və sakinləri, həqiqətən də, narahat edən məsələlərdən biridir. “Azəristiliktəchizat” ASC–nin Sumqayıt İstilik Sistemləri İstismarı Sahəsi tərəfindən görülmüş işlər nəticəsində şəhərdə 21 qazanxana, o cümlədən 6 modul tipli qazanxana fəaliyyət göstərir. Onların vasitəsilə 178 yaşayış binasındakı 8200 mənzildən 3400–ü istiliklə təmin edilir (41,5 faiz). Digər obyektlərə gəlincə, hazırda 30 məktəb, 12 uşaq bağçası, 17 səhiyyə binası və 5 inzibati bina istiliklə təmin olunur. İl ərzində 2 qazanxana binası istifadəyə verilmiş, 1 qazanxananın tikintisi isə yekunlaşmaqdadır.

Hesabat dövründə yüksəkmərtəbəli binalarda yaşayan sakinlər üçün mühüm əhəmiyyət kəsb edən lift təsərrüfatında mənzil fondunda istismarda olan 588 ədəd liftdən 14 mərtəbəli binadakı 6 ədəd ikinci yük liftləri istisna olmaqla 582 ədədi işlək vəziyyətdə olmuşdur. İl ərzində “Lift–Serviz” Birliyi tərəfindən bu liftlərə əsasən xidmət göstərilmiş, bir sıra digər işlər yerinə yetirilmişdir. İstismar müddətini başa vurmuş 9 lift yenisi ilə əvəz olunmuş, 18 lift əsaslı təmir edilib istismara verilmişdir. Şəhər uşaq xəstəxanası və 2 saylı xəstəxanada təmir işləri aparılmışdır. 10, 17 və 18–ci mikrorayonların ərazisində olan lift nəzarətçilərinin otaqları təmir olunmuş və rabitə ilə təchiz edilmişdir.

Dövlət Avtomobil Nəqliyyatı Xidmətinin Sumqayıt Regional Şöbəsi üzrə hesabat dövrü ərzində şəhərdaxili marşrutlarda xidmət səviyyəsinin yüksəldilməsi, sərnişinlərin rahatlığının təmin edilməsi üçün sahibkarlar tərəfindən 8 şəhərdaxili marşrutda işləyən, istismar müddətini başa vurmuş kiçik tutumlu mikroavtobuslar müasir tipli, orta tutumlu 71 ədəd komfortlu avtobuslarla əvəz edilmişdir. Digər şəhərdaxili marşrutlarda da əhalinin rahatlığının təmin edilməsi üçün köhnə mikroavtobusların müasir tipli, tutumu çox olan avtobuslarla əvəz edilməsi istiqamətində sahibkarlarla işlər aparılır. Belə ki, şəhərdaxili marşrutlarda işləyən 342 avtobusdan 194–ü hələ də köhnə və kiçiktutumludur. İl ərzində şəhərə 19 ədəd yeni taksi gətirilmişdir.

Hesabat dövründə Sumqayıt Şəhər Telekommunikasiya Qovşağı tərəfindən tarif gəliri proqnozu 100 faiz yerinə yetirilmiş, əsas telefon abonentlərinin sayı 667 ədəd artırılaraq istifadə tutumu 58 minə çatdırılmış, genişzolaqlı internet istifadəçilərinin sayı 2379 ədəd artırılaraq 5030–a çatdırılmışdır.

İl ərzində əhalinin internet və telefon xidmətlərinə olan tələbatını təmin etmək məqsədilə keçənilki hesabat yığıncağında səsləndirilmiş problemlərin həlli kimi Hacı Zeynalabdin qəsəbəsinin iki küçəsində, şəhərin 15–ci məhəlləsində, Kottec, Beton zavod və İnşaatçılar massivlərində layihə–tikinti işləri aparılmış və əlavə nömrələr, 4 müxtəlif ərazilərdə isə 900 nömrə üçün magistral şəbəkə tikilib istifadəyə verilmişdir.

Qovşağın tədbirlər planına uyğun olaraq xətt təsərrüfatının bütün sahələrində texniki normalara riayət olunması üçün müvafiq tədbirlər görülmüş, bütün stansiyaların tam gücü ilə işləmələri təmin olunmuşdur.

2012–ci ildə mədəniyyət müəssisələrinin əsaslı və cari təmiri, maddi–texniki bazasının möhkəmləndirilməsi, mədəni–kütləvi tədbirlərin sayının və keyfiyyətinin artırılması, diqqət mərkəzində olmuşdur.

Azərbaycan Respublikasının Prezidenti cənab İlham Əliyevin tapşırıq və tövsiyələrinə əsasən Nəsimi adına Mədəniyyət və İstirahət Parkında yeni layihə əsasında aparılan yenidənqurma və əsaslı təmir işləri davam etdirilmişdir.

İl ərzində bir sıra mədəniyyət müəssisələrində cari təmir işləri aparılmışdır.

Hesabat ili şəhərimizdə keçirilmiş genişmiqyaslı mədəni–kütləvi tədbirlərlə çox zəngin olmuşdur.

20 Yanvar faciəsinin Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzi kimi qeyd edilməsi ilə əlaqədar 18–20 yanvar tarixlərində bütün idarə, müəssisə və təşkilatlarda müxtəlif tədbirlər keçirilmiş, 20 Yanvar abidəsi və Şəhidlər Xiyabanı ziyarət edilmişdir.

Bəşər tarixinin ən dəhşətli və qanlı faciələrindən biri olan, nəinki azərbaycanlılara və türk dünyasına, bütövlükdə bəşəriyyətin mütərəqqi dəyərlərinə, insanlığa və beynəlxalq hüquq normalarına qarşı yönəldilmiş, qəddarlığı və amansızlığı ilə anoloqu olmayan Xocalı soyqırımının ildönümü ilə əlaqədar xocalılıların və şəhər ictimaiyəti nümayəndələrinin iştirakı ilə anım mərasimi təşkil edilmişdir.

Novruz Bayramı şənlikləri xüsusi özəlliklə, fərqli formatda təşkil olunmuşdur. Ümumşəhər tədbirində Sumqayıt sakinlərinə və şəhərimizin qonaqlarına sahibkarların təşəbbüsü ilə hazırlanmış uzunluğu 21, eni 5 metr, çəkisi 5 tondan çox olan paxlava və tutumu 700 litr, hündürlüyü 3 metr olan ən böyük samovarı təqdim olunmuşdur.

XX əsr ədəbi–elmi fikrinin korifeylərindən sayılan, çağdaş Azərbaycan tarixində yazıçı, pedaqoq, ədəbiyyatşünas alim kimi müstəsna və özünəməxsus yer tutan Mir Cəlal Paşayevin xatirə gecəsi də çox maraqlı və yaddaqalan olmuşdur.

11 may tarixində keçirilən ənənəvi Kitab bayramı bu il daha fərqli — geniş miqyası və məzmun dəyəri ilə şəhər sakinlərində böyük marağa səbəb olmuşdur.

28 may – Respubilika Günü münasibətilə H.Ərəblinski adına Sumqayıt Dövlət Musiqili Dram Teatrında təşkil edilən klassik musiqidən ibarət konsert və 15 iyun – Milli Qurtuluş Günü münasibətilə Nəsimi adına mədəniyyət və istirahət parkında Azərbaycan Dövlət Simfonik Orkestrinin konserti sumqayıtlılara xoş anlar bəxş etmişdir.

Azərbaycan Respublikası Prezidentinin tövsiyəsinə uyğun olaraq sentyabr ayının 26–da Sumqayıt şəhərində artıq ənənəyə çevrilmiş “Şəhər günü” bayramı keçirilmişdir. Bayram tədbirləri öncə qədim Corat kəndindən başlamışdır. Kəndin giriş qapısında, qala divarları qarşısında orta əsrlərə məxsus bazar meydanı açılmış, burada çox maraqlı ədəbi–bədii kompozisiya və meydan tamaşası göstərilmişdir.

Corat qalasının üstündə qurulmuş qədim toplardan atılan yaylım atəşləri ilə yekunlaşdırılan əyləncəli proqram Bayraq meydanında təntənəli bayram keçidi ilə davam etdirilmişdir. Paradda idmançıların, motosikletçilər və velosipedçilərin nümunəvi çıxışları, gənc hərbçilərin — məktəblilərin “Şahin” komandalarının və körpə fidanların keçidi çox maraqlı və yaddaqalan olmuşdur.

Bütöv bir günü əhatə edən “Şəhər günü” bayram tədbirlərinə axşam saatlarında respublikanın tanınmış incəsənət ustalarının iştirakı ilə hazırlanmış bayram konserti və atəşfəşanlıqla yekun vurulmuşdur. Tədbirdə xarici dövlətlərdən və Azərbaycanın bölgələrindən dəvət olunmuş çoxlu sayda qonaqlar və musiqi kollektivləri də iştirak etmişlər.

Yeni il ərəfəsində şəhər sahibkarlarının təklifi ilə uzunluğu 51 metr, çəkisi 11,5 tona yaxın olan Avropanın ən böyük tortu dekabrın 24–də hazırlanaraq şəhər ictimaiyyətinə təqdim olunmuşdur. Əzəmətli tortun üzərində 2012–ci ildə Azərbaycanda keçirilən “Eurovision–2012″ mahnı müsabiqəsinin loqo və atributlarının, “Kristal Hall”un, eləcə də, müsabiqə iştirakçılarının rəsminin həkk olunması tortun təqdimatını son dərəcə maraqlı və yaddaqalan etmişdir.

Azərbaycan Respublikası regionlarının sosial–iqtisadi inkişafı Dövlət Proqramı (2009–2013–cü illər) çərçivəsində 2012–ci ildə şəhərin təhsil sistemində təlim–tərbiyə müəssisələrinin maddi–texniki bazasının yaxşılaşdırılması və zənginləşdirilməsi məqsədilə Təbiət Elmləri Təmayüllü Gimnaziyada, 28 nömrəli məktəbdə əsaslı təmir işləri aparılmış, 40 nömrəli məktəb üçün yeni bina tikilmişdir.

Yeni dərs ili ərəfəsində bütün təhsil müəssisələrində cari təmir, abadlıq işləri görülmüş, məktəblərin hamısı laboratoriya, məktəb mebelləri və avadanlıqlarla təmin edilmişdir.

Bu il də qəbul imtahanlarının nəticələri şəhərimiz üçün uğurlu olmuş, ali məktəblərə qəbul 51 faizdən çox olmuşdur ki, bu da ötən illərlə müqayisədə xeyli yüksək göstəricidir, 92 məzun 600–dən yuxarı bal toplamışdır. Bu, əvvəlki illərlə müqayisədə ən yüksək göstəricidir. 7 məzun göstərdikləri yüksək nəticələrə görə Prezident təqaüdünə layiq görülmüşdür.

Narkomaniya əleyhinə mübarizə ilə bağlı maarifləndirmə, gənc nəsildə onun törətdiyi faciələr haqqında müəyyən təsəvvür yaratmaq və əyani şəkildə göstərmək məqsədilə müvafiq iş aparılmışdır. Şəhər Təhsil Şöbəsi, Şəhər Polis İdarəsi, Gənclər və İdman Baş İdarəsi, Ağsaqqallar Şurası və Narkoloji Dispanserin əməkdaşlarının iştirakı ilə təşkil edilmiş tədbirlər bu işin səmərəliliyini daha da artırmışdır.

Ötən ildə görülən işlərdən və keçirilən tədbirlərdən ən yaddaqalanlardan biri ümummilli liderimiz Heydər Əliyevin anadan olmasının 89–cu ildönümü münasibətilə gənclərin hərbi–vətənpərvərlik tərbiyəsinin yüksəldilməsinə xidmət edən məktəblilərin təntənəli hərbi paradı olmuşdur. Məktəblərin “Şahin” komandaları və balaca hərbçilər də daxil olmaqla 3000–ə yaxın iştirakçının qatıldığı, minlərlə tamaşaçının seyr etdiyi tədbir şəhər ictimaiyyətində böyük marağa səbəb olmuşdur.

Noyabr ayından etibarən məktəblərin fəaliyyətinə nəzarət daha da artırılmış, 31 məktəbdə 47 monitorinq keçirilmişdir. Monitorinqlər zamanı fəaliyyətində nöqsanlar aşkar edilmiş bir sıra məktəblərin direktorlarına qarşı intizam tədbiri görülmüşdür.

İl ərzində şəhər əhalisinə göstərilən tibbi xidmətin yaxşılaşdırılması sahəsində müəyyən tədbirlər həyata keçirilmişdir.

1 saylı Sumqayıt şəhər xəstəxanasının yenidən qurulması ilə bağlı əsaslı təmir işləri davam etdirilmişdir.

Səhiyyə şöbəsi tərəfindən Uşaq stomatoloji poliklinikasında, 4 saylı Uşaq poliklinikasında, 3 saylı şəhər poliklinikasında və Oftalmoloji xəstəxananın əməliyyat blokunda, Bərpa müalicəsi xəstəxanasının fizioterapiya bölməsində cari təmir işləri aparılmışdır. Oftalmoloji xəstəxananın və 1 saylı Doğum evinin istilik sistemləri bərpa edilərək yenidən qurulmuşdur. Səhiyyə şöbəsinin inzibati binasında da cari təmir işləri aparılıb və hazırda davam etdirilir. Corat qəsəbəsində yerləşən tibb məntəqəsində cari təmir işləri aparılmışdır.

Tibb müəssisələri bir sıra avadanlıqlarla təmin olunmuşdur.

Əhaliyə tibbi xidmətin yaxşılaşdırılması məqsədilə Sumqayıt Stansiyası və Tuğ zavod yaşayış massivlərində yerləşən orta məktəblərin binasında tibb məntəqələri yaradılmışdır.

Şəhərin ucqar ərazilərində yaşayan əhalinin yerində kütləvi tibbi müayinə edilməsi üçün Sumqayıt stansiyası, Şirvan yaşayış massivlərində, Corat və H.Zeynalabdin qəsəbələrində əhaliyə 8 dəfə səyyar tibbi xidmət göstərilmişdir.

İl ərzində tibb müəssisələrinə ambulator gəlişlərin sayı keçənilkinə nisbətən təxminən 1 faiz artmışdır.

Stasionar tibb müəssisələrində isə əksinə, çarpayıların plan üzrə dolması keçənilki 47,4 faizə qarşı 44,0 faiz olaraq azalmışdır. Bu da bir neçə tibb müəssisəsində əsaslı təmir işləri ilə əlaqədardır.

İl ərzində Sumqayıt Şəhər Gigiyena və Epidemiologiya Mərkəzi tərəfindən yoluxucu xəstəliklərə qarşı kompleks şəkildə görülən təşkilati, müalicə–profilaktik, əks–epidemik tədbirlər davam etdirilmişdir. Şəhərdə fəaliyyət göstərən obyektlər üzrə 60 xəbərdaredici sanitariya nəzarəti, 2008 reyd və yoxlamalar keçirilmişdir ki, bunlardan 1328–i sahibkarlıq subyektləri üzrə olmuşdur. 791 halda nöqsan və çatışmazlıq aşkar edilmişdir ki, bunun da 742–si aradan qaldırılmışdır.

Dövlət sanitariya nəzarəti zamanı aşkar olunan sanitar–gigiyenik pozuntu hallarına görə 56 nəfər məsul şəxs barəsində “İnzibati Xətalar Məcəlləsi”nin müvafiq bəndlərinə uyğun olaraq tədbir görülmüşdür. Kobud sanitar–gigiyenik pozuntu halları aşkar edilən 59 obyektin fəaliyyəti müvəqqəti olaraq dayandırılmış, 23 sahibkarlıq subyektləri barəsində isə daha ciddi tədbirlər görülməsi üçün hazırlanmış sənədlər hüquq–mühafizə orqanlarına göndərilmişdir.

Azərbaycan Respublikasının Prezidenti cənab İlham Əliyevin müvafiq sərəncamı ilə “İdman ili” elan edilmiş ötən ildə şəhərimizin idmançıları bir çox respublika və beynəlxalq yarışlarda iştirak etmiş və idmanın ayrı–ayrı növləri üzrə uğurlar qazanmışlar.

İdman növləri üzrə milli yığma komanda heyətlərində beynəlxalq səviyyəli yarışlarda iştirak edən şəhər idmançıları tərəfindən qazanılmış 212 medaldan 34 qızıl, 28 gümüş, 32 bürünc medal Dünya, Avropa kuboku yarışlarında əldə olunmuşdur. Bu medallardan 15 qızıl, 11 gümüş, 11 bürünc medal Olimpiya oyunlarının proqramına daxil olan idman növləri üzrədir.

2012–ci ildə XXX London Yay Olimpiya və XIV Paralimpiya oyunlarında şəhərin 7 idmançısı iştirak etmişdir.

İkiqat Paralimpiya çempionu İlham Zəkiyev oyunlarda müvəffəqiyyətlə çıxış edərək bürünc medal qazanmışdır.

Qalib idmançılar və onların məşqçiləri Sumqayıt Şəhər İcra Hakimiyyətində qəbul edilmiş, onlara qiymətli hədiyyələr verilmişdir.

Bildiyiniz kimi, Avropa Olimpiya Komitəsinin Baş Məclisində 2015–ci ildə birinci Avropa oyunlarının Azərbaycanda keçirilməsi haqqında qərar qəbul edilmişdir. Bu böyük bir tarixi hadisədir və ölkəmizin dünya miqyasında günbəgün artan nüfuzunu bir daha təsdiq edir. Əlamətdar haldır ki, bu oyunlar ilk dəfədir keçirilir. Bununla ölkəmiz, paytaxtımız daha bir möhtəşəm idman tədbirinin keçirilməsinə ev sahibliyi edəcəkdir. Ümidvarıq ki, hansısa idman növü üzrə oyunların Sumqayıtda keçirilməsi də Təşkilat Komitəsində baxılacaqdır.

Hesabat dövründə şəhər hüquq–mühafizə orqanları tərəfindən ictimai asayişin qorunması və cinayətkarlığa qarşı mübarizə sahəsində bir sıra məqsədyönlü, həmçinin qabaqlayıcı profilaktik tədbirlər həyata keçirilmişdir.

Sumqayıt Şəhər Polis İdarəsi tərəfindən qeydə alınmış 890 cinayət hadisəsindən 782 fakt üzrə cinayətin açılması təmin edilmiş, açılma faizi 83,1 faiz olmuşdur.

Narkotiklərlə mübarizə bölməsinin əməkdaşları digər xidmətlərlə birlikdə narkotiklərin qanunsuz dövriyyəsi ilə bağlı 101 cinayət faktı aşkar etmiş, nəticədə ümumi çəkidə 6 kiloqram 399 qram narkotik vasitə qanunsuz dövriyyədən çıxarılmışdır. Müəyyən olunmuş faktlar üzrə 86 şəxs cinayət məsuliyyətinə cəlb edilmişdir.

İl ərzində Dövlət Yol Polisi Şöbəsinin əməkdaşları tərəfindən ictimai qaydaları nümayişkəranə şəkildə pozan 60 nəfər “avtoxuliqan” sürücü saxlanılmış və onlar barəsində müvafiq inzibati tədbirlər görülmüşdür.

Şəhər üzrə gənclərin ordu sıralarına çağırışı ilə bağlı tapşırıqlar tam şəkildə yerinə yetirilmiş, bu işin təşkilinə şəhər icra hakimiyyəti tərəfindən lazımi köməklik göstərilmişdir. İl ərzində Səfərbərlik və Hərbi Xidmətə Çağırış üzrə Dövlət Xidmətinin Sumqayıt Şəhər İdarəsinin əməkdaşlarının iştirakı ilə şəhərdəki orta məktəblərinin yuxarı sinif şagirdləri ilə görüşlər keçirilmiş, gənclərlə hərbi–vətənpərvərlik mövzularında söhbətlər aparılmışdır.

Ölkəmizdə aparılan korrupsiyaya qarşı mübarizə tədbirləri Azərbaycan Respublikasının Prezidenti cənab İlham Əliyevin rəhbərliyi və nəzarəti altında davam etdirilməkdədir. Bu sahədə şəhərimizdə aparılan məqsədyönlü tədbirlərin nəticəsində korrupsiya, rüşvətxorluq və bu kimi digər neqativ halların qarşısı qətiyyətlə alınır, onları törətmiş şəxslərə qarşı müvafiq tədbirlər görülür.

Əhalinin problemlərini vaxtında öyrənmək, onları qısa müddətdə həll etmək, canlı və şəffaf ünsiyyət mexanizmi qurmaq, sakinlər üçün məhz onların yaşadıqları yerlərdə görüşlər təşkil etmək bizim fəaliyyətimizdə özünü uğurla doğruldur.

Hesabat dövründə şəhər icra hakimiyyətinə sakinlər tərəfindən əvvəlki illə müqayisədə 44,0 faiz az müraciətlər daxil olmuşdur. Bu isə onun nəticəsidir ki, biz ilk növbədə onların yaranma səbəblərinin aradan qaldırılması istiqamətində məqsədyönlü işlər aparmış, bütün sahələrdə qanunun aliliyinin təmin edilməsini əsas meyar kimi götürmüş, dövlət tərəfindən müəyyənləşdirilmiş vəzifə borcumuzu, qanunauyğun surətdə yerinə yetirmişik. Daxil olmuş müraciətlərin böyük əksəriyyəti müsbət həll olunmuş, qalan hissəsi barədə isə qanunauyğun müvafiq izahatlar verilmişdir.

Sonda tədbir iştirakçıları Azərbaycan Prezidentinə müraciət ünvanladılar.

Söhrab Səfiyev

Respublika.- 2013.- 6 mart.- S. 3-4.