Rabitəçilərin səyi öz bəhrəsini verir

2013–cü il İnformasiya–kommunikasiya texnologiyaları ilidir

Azərbaycan Respublikasının Prezidenti cənab İlham Əliyevin sədrliyi ilə keçirilən Nazirlər Kabinetinin 2012–ci ilin sosial –iqtisadi inkişafının yekunlarına və 2013–cü ildə qarşıda duran vəzifələrə həsr olunmuş iclasında ölkə başçısı demişdir: “… Bu müstəqillik dövründə doğrudan da, biz elə böyük uğurlara imza atmışıq ki, hər bir Azərbaycan vətəndaşı bununla fəxr edə bilər. Onların içində peykin buraxılması xüsusi yer tutur. Bu, həm böyük məna daşıyır, həm də bunun böyük rəmzi mənası vardır. Əminəm ki, bu hadisə gələcəkdə müasirliyə, inkişafa doğru atılan addımlarımızı artıracaqdır. Bu hadisəni və ümumiyyətlə İKT sahəsinə verilən diqqəti və bu sahədə əldə edilmiş uğurları nəzərə alaraq mən 2013–cü ili “İnformasiya–kommunikasiya texnologiyaları ili” elan edirəm və hesab edirəm ki 2013–cü ildə bu sahədə biz daha da böyük nailiyyətlərə çatmalıyıq”.

Ölkə başçısının bu proqram xarakterli tövsiyəsi respublikanın bütün rabitə işçilərinin qarşıdakı illər üçün həyat devizinə çevrilmişdir.

Son illər ərzində Azərbaycanda rabitə sisteminin müasir standartlara uyğun şəkildə qurulması, sahənin inkişafında dünyanın qabaqcıl ölkələrinin uzun illərdən bəri əldə etdikləri ən yeni nailiyyətlərindən istifadə olunması respublikanı bu sahədə nəinki MDB məkanında, eləcə də dünyanın qabaqcıl ölkələri səviyyəsinə qaldırmışdır.

Ölkə Prezidenti cənab İlham Əliyevin gündəlik diqqəti, göstərdiyi hərtərəfli qayğı bütün qeyri — sahələrlə birlikdə Azərbaycan rabiəsini də sözün həqiqi mənasında tənəzzüldən tərəqqiyə çıxarmışdır.

Bu gün ölkəmiz iqtisadi inkişaf sürətinə görə dünyanın ən qabaqcıl ölkələri sırasında layiqli yer tutur. Azərbaycan dünya miqyaslı kütləvi tədbirlərə uğurla ev sahibliyi edir. Dövlətimizin apardığı siyasətin nəticəsində Azərbaycanın ilk Kommunikasiya peykinin orbitə çıxarılması həyatımızın analoqu olmayan sevindirici hadisələrindən biri kimi dəyərləndirilməlidir. Bu tarixi hadisə Azərbaycanı dünyanın kosmik ölkələri sırasına çıxarmaqla ona həm də böyük hörmət gətirmişdir.

Ölkə Prezidenti cənab İlham Əliyevin 2012–ci ilin dekabrında imzaladığı “Azərbaycan 2020: gələcəyə baxış” inkişaf konsepsiyası ilə əlaqədar fərmanından irəli gələn vəzifələrin ilkin mərhələsinin uğurlu başlanğıcı kimi dəyərləndirilməli olan Kommunikasiya peyki ölkəmizə iqtisadi dividenddən də artıq siyasi dividend gətirəcəyi şəksizdir.

Respublikanın Rabitə və İnformasiya Texnologiyaları naziri Əli Abbasov İnformasiya və Telekommunikasiya sahəsində əldə edilən uğurlardan bəhs edərkən son üç ildə Azərbaycanın MDB ölkələri arasında geniş regionda internet istifadəçilərinin sıxlığına görə lider olmasını fəxrlə bildirmişdir.

“İKT sektoru 2004–2013–cü illər üzrə hər üç ildə təxminən iki dəfə genişlənmişdir. 2012–ci ildə sektorun artım tempi təxminən 18 faiz omuşdur. Bu isə ümumdünya orta artım tempindən təxminən 2,5 dəfə yüksəkdir. MDB ölkələri sırasında ilk dəfə 2008–ci ildə Azərbaycanda bütün yaşayış məntəqələri telefonlaşdırılmış, 2010–cu ildə isə tam elektronlaşdırılmış, yəni rəqəmləşdirilmişdir. Keçən il şəbəkəyə təxminən 20 min nömrə də əlavə olunaraq, “Yeni nəsil şəbəkəsi” texnologiyaları tətbiq olunmuşdur. Hesabat ilində sektora 400 milyon ABŞ dollarından çox investisiya qoyulmuşdur”.

Bütün bu uğurları indi ölkəmizin hər bir bölgəsində aydın görmək mümkündür. “Regionların sosial–iqtisadi inkişafı Dövlət Proqramı”nın tələblərinin vaxtında həyata keçirilməsini təmin edən rabitəçilər arasında Şamaxı Telekommunikasiya Qovşağının əməksevər kollektivinin öz payı vardır.

Rayon Telekommunikasiya Qovşağına təcrübəli mühəndis Faiq Hümbətov rəhbərlik edir. Onun idarəetmə səriştəsi, kollektivdə yaratdığı möhkəm əmək intizamı əldə olunan uğurların mayasını təşkil edir. Bacarıqlı rabitəçi ilə söhbətimiz ilin ilk günlərinə təsadüf edirdi. Yola saldığımız 2012–ci ildə kollektivin qazandığı nailiyyətlərdən söhbət açan Faiq müəllim vurğuladı ki, möhtərəm Prezidentimiz İlham Əliyevin rəhbərliyi altında həyata keçirilən genişmiqyaslı sosial–iqtisadi tədbirlərdən, ölkəmizin hər bir bölgəsində gedən inkişafdan Şamaxı rabitəçiləri də kənarda qalmamışdır.

Hələ bir neçə il əvvəl, respublikada pilot layihə kimi ilk dəfə olaraq “Yeni nəsil” rabitəsi Şamaxı rayonunda tətbiq edilmiş, rayonun yaşayış məntəqələri ilə mərkəzi EATS arası fibrooptik kabeli ilə birləşdirilmişdir.

Rayonun 27 kəndində elektron ATS qurularaq cəmi 48 kəndi rabitə ilə təmin edilmişdir. Yerdə qalan kəndlər isə digər rabitə növlərindən istifadə edir. İnternet abunəçilərinin sayının artmasını qeyd etmək yerinə düşər. Şəhərin S.Ə.Şirvani, Şirvan, H.Əliyev, Nərimanov və Azərbaycan küçələrində hava rabitə xətləri yeraltı kabel xətləri ilə əvəz olunmuşdur. 2012–ci ilin iqtisadi göstəricilərini idarə yüksək naliyyətlərlə başa vurmuşdur. Belə ki, tarif gəliri 102 faiz yerinə yetirilmişdir.

2011–ci ildə rayon üzrə 500 internet abunəçisi var idisə, hazırda onların sayı 2200–ə çatmışdır. Əgər ilk olaraq bir provayder fəaliyyət göstəribsə, indi beş provayder internet xidməti göstərir. Bundan əlavə Aip TV xidməti bu il daha da təkminləşərək əhalinin istifadəsinə verilmişdir.

Cənab Prezidentin məlum sərəncamı ilə “2013–cü il İKT ili” elan etməsi əlaqədar yerlərə göndərilmiş tədbirlər planına uyğun olaraq rayonumuzda cari ildə EATS rabitəsi olmayan kəndlərdə ATS–lər tikiləcək və mərkəzlə birləşdiriləcək, həmçinin “hər evə 10–100 mqb” layihəsi ilə evlərə FO kabel çəkilməsi nəzərdə tutulmuş işləri həyata keçirəcəyik.

Təbii ki, bu layihəni yerinə yetirən zaman bütün rabitə dirəkləri yenisi ilə əvəz olunacaq və yaxud təmir ediləcəkdir.

Ölkəmiz üçün dünya əhəmiyyətli hadisələr 2012–ci ildə çox olmuşdur.

Lakin bizim üçün ən əhəmiyyətli hadisə 2013–cü ildə öz milli peykimizin kosmosa buraxılmasıdır. Belə ki, cənab İlham Əliyevin şəxsən birbaşa kosmik idarəetmə mərkəzindən müşahidə etdiyi peykin orbitə çıxarılması prosesini Azərbaycan xalqı çox həyəcan və sevinclə izlədi. Peykin orbitə çıxarılmasında iştirak edən və gələcəkdə onu idarə edəcək kadrların azərbaycanlılar olmasını çox böyük ruh hissi ilə qeyd edən Prezidentimiz kollektivə uğurlar arzuladı.

Rabitə peykinin orbitə çıxarılması bir daha sübut etdi ki, Azərbaycan Respublikası bütün sahələr üzrə sürətlə inkişaf edir.

Biz isə öz növbəmizdə cari ildə uğurları daha artırmaqla qaşımıza qoyulmuş şərəfli vəzifələrin həllinə nail olmaq üçün var qüvvəmizi sərf edəcəyik.

İlham PƏNAHOV

Respublika.- 2013.- 6 mart.- S. 6.