Qusar: qeyri–neft sektorunun inkişafı ön plandadır

2012–ci il Qusar rayonunun tarixində əlamətdar hadisələrlə yaddaqalan olmuşdur. Ötən il Azərbaycan Respublikasının Prezidenti cənab İlham Əliyev Qusara iki dəfə səfər etmişdir.

Cənab Prezident son illərdə Qusarda gedən inkişafdan danışarkən qeyd etmişdir ki, “Qusar rayonunun inkişafı ilə bağlı konkret proqramlar icra edilir”.

Arxada qalan 2012–ci il Qusar rayonu üçün bütün sahələrdə uğurlu il kimi səciyyələnir. 2012–ci il üzrə sosial–iqtisadi inkişafın yekunları və 2013–cü ildə qarşıda duran vəzifələr Qusar Rayon İcra Hakimiyyətinin başçısı Şair Alxasovun hesabat məruzəsində öz əksini tapmışdır. RİH başçısı çıxışında demişdir:

—2012–ci il Qusarın tarixində “Şahdağ” Qış–Yay Turizm Kompleksinin, müasir üslubda tikilmiş Mərkəzi Xəstəxana binasının istifadəyə verilməsi, 10–dan çox yeni məktəb binasının tikintisi, kənd yollarının və körpülərin əsaslı təmiri və tikintisi, şəhərin içməli su təchizatı sisteminin yenidən qurulmasına başlanılması və abadlıq–quruculuq sahəsində görülən bir sıra digər işlərlə də yadda qalacaqdır.

2012–ci ildə rayonun iqtisadi göstəricilərində artım olmuşdur. Əhalinin aztəminatlı təbəqəsi və onların sosial problemləri diqqətdə saxlanılmış, respublika Prezidentinin 8 fevral 2012–ci il tarixli sərəncamına uyğun olaraq əmək pensiyalarının sığorta hissəsi 2011–ci il üzrə istehlak qiymətləri indeksinə uyğun olaraq 1 yanvar 2012–ci il tarixdən 7,9 faiz artırılmışdır. Hesabat dövründə ünvanlı sosial yardımın təyin edilməsi üçün müraciət etmiş 1398 ailədən 1356 ailənin 6615 nəfər ailə üzvünə ünvanlı sosial yardım təyin edilmiş, hər ailəyə ödənilən orta aylıq yardımın məbləği 118 manat təşkil etmişdir. Ünvanlı sosial yardım təyin olunanların sayı əvvəlki ilə nisbətən 521 nəfər çox olmuşdur. Hesabat ilində 253 nəfər tənha və kimsəsiz vətəndaşa evində xidmət göstərilmiş, 2839 nəfərə müxtəlif növ müavinət ödənilmişdir.

İşsiz vətəndaşların işlə təmin edilməsi və işaxtaran vətəndaşlara kömək məqsədilə 2012–ci il sentyabr ayının 7–də Qusar şəhərində “Əmək yarmarkası” keçirilmiş, yarmarkaya rayonun müxtəlif müəssisə və təşkilatlarında vakant olan 159 iş yeri çıxarılmışdır. “Əmək yarmarkası”nda 370 nəfər vətəndaş iştirak etmişdir. İxtisaslarına, arzu və istəklərinə uyğun iş yerini seçmiş 57 nəfər vətəndaşdan 56–sı işlə təmin olunmuşdur.

1 yanvar 2013–cü il tarixə rayonda 13065 nəfər pensiyaçı qeydiyyatda olmuş, bunlardan 8422 nəfərə yaşa görə, 3332 nəfərə əlilliyə görə, 1311 nəfərə isə ailə başçısını itirməyə görə pensiyalar hesablanıb ödənilmişdir. Pensiya, müavinət və əməkhaqlarının ödənilməsi rayonda fəaliyyət göstərən 5 bank filialının 12 bankomatı vasitəsilə həyata keçirilir.

Azərbaycan Respublikası Prezidentinin müvafiq fərmanına uyğun olaraq, Kapital Bankın rayon filialı tərəfindən əmanətçilərdən 24458 ərizə qəbul edilmiş, 21140 nəfər əmanətçiyə 7 milyon 250 min manat məbləğində birdəfəlik ödəniş həyata keçirilmişdir. 3318 nəfər əmanətçiyə isə fərdi birdəfəlik ödənişlərin hesablanması və ödənilməsinin cari ildə həyata keçirilməsi nəzərdə tutulur.

Hesabat ilində rayonda sahibkarlığın inkişafını dəstəkləyən bir sıra tədbirlər həyata keçirilmişdir. Ümumilikdə 2012–ci ildə İqtisadi İnkişaf Nazirliyinin Sahibkarlığa Kömək Milli Fondunun vəsaiti hesabına rayon sahibkarlarına 21 layihəyə 2 milyon 754 min manat güzəştli kredit verilmiş və bu layəhələrin həyata keçirilməsi nəticəsində 45 daimi iş yeri açılmışdır. 2012–ci ildə bütövlükdə rayonda 1639 yeni iş yeri açılmışdır ki, bundan 539–u daimi, 1100–ü müvəqqəti və mövsümü iş yerləri olmuşdur.

2012–ci ildə rayonun kənd təsərrüfatında fəaliyyət göstərən sahibkarlar tərəfindən 195 hektardan çox yeni meyvə bağları salınmışdır.

2012–ci ildə məhsulu yığılan 37141 hektar əkin sahəsinin 33115 hektarı, yəni 89,2 faizi payızlıq və yazlıq dənli bitkiləri təşkil etmişdir.

1 yanvar 2013–cü il tarixə gələn ilin məhsulu üçün rayonda 32189 hektar sahədə payızlıq şum sürülmüş, 23275 hektar sahədə payızlıq buğda və 8445 hektar sahədə payızlıq arpa əkilmişdir. 469 hektar sahə yazlıq bitkilərin əkini üçün saxlanılmışdır. Ötən il rayonda 4693 ton ət, 26426 ton süd, 8 milyon 684 min ədəd yumurta və 190 ton yun istehsal edilmiş, əvvəlki illə müqayisədə iribuynuzlu mal–qaranın sayı 257 baş artmışdır.

2012–ci il ərzində Bakı şəhərində keçirilən kənd təsərrüfatı məhsullarının satışı yarmarkalarına 593,6 ton məhsul çıxarılmışdır.

Hesabat dövründə əhaliyə göstərilən kommunal xidmətlərinin səviyyəsinin yüksəldilməsi sahəsində də bir sıra işlər görülmüşdür.

Hesabat dövründə Yaponiya Beynəlxalq Əməkdaşlıq Agentliyi və Azərbaycan hökuməti tərəfindən birgə maliyyələşdirilən “Kiçik şəhərlərdə su təchizatı və kanalizasiya layihəsi” çərçivəsində Qusar şəhərinin və ətraf 7 kəndin içməli su təchizatının yaxşılaşdırılması məqsədilə Qusarçayda 700 poqonmetrlik suqəbuledici qurğunun, Qusar şəhərində 1 və 2 saylı su anbarlarının ərazisində yenilərinin tikintisinə başlanılmışdır. Artıq suqəbuledici qurğunun və 2 ədəd su anbarının tikintisi başa çatdırılmışdır.

2012–ci ildə rayonda genişmiqyaslı tikinti, abadlıq–quruculuq işləri davam etdirilmişdir. Belə ki, əsaslı təmirinə 2010–cu ildə başlanılmış 22 kilometrlik Həzrə–Zuxul avtomobil yolunda əsaslı təmir işləri davam etdirilmiş, yolda Zuxul kəndi ərazisindən keçən hissədə Tahircal çayı üzərində giriş–çıxışları ilə birlikdə 84 poqonmetrlik yeni körpü inşa edilmiş, Uqur və Nəcəfkənd kəndləri ərazisindəki 2 körpü əsaslı təmir edilmişdir.

“Şahdağ” Qış–Yay Turizm Kompleksinin, beton əsaslı Bakı–Gəndob–Rusiya Federasiyası ilə dövlət sərhədi avtomobil yolunun rayon ərazisindən keçən hissəsinin və 39 kilometrlik Qusar–Əniğ–Ləzə avtomobil yolunun tikintisi aparılmış və yuxarıda qeyd olunduğu kimi, dekabr ayında “Şahdağ” Qış–Yay Turizm Kompleksinin 1–ci fazası və Qusar–Əniğ–Ləzə yolunun “Şahdağ” Turizm Kompleksinə kimi olan hissəsi cənab Prezidentin iştirakı ilə istifadəyə verilmişdir.

Həmçinin mövcud rayondaxili yollarda və şəhər küçələrində də bir sıra təmir işləri həyata keçirilmişdir.

Qusar şəhərində “Dövlət Bayrağı Kompleksi”ndən Azadlıq küçəsinə kimi yeni salınmış yolun və Azadlıq küçəsinin genişləndirilməsi və əsaslı təmiri işləri davam etdirilmişdir.

Ötən ildə həmçinin Kuzun kəndində “Mərasimlər evi”, Köhnə Xudat Qazmalar kəndində yeni kitabxana binası tikilib istifadəyə verilmiş, Avaran kəndində məscid binası, şəhər məscidində isitmə sistemləri təmir edilmişdir.

Respublika rəhbərliyinin diqqət və qayğısı sayəsində ötən il ərzində rayon ərazisində ümumtəhsil məktəblərinin maddi–texniki bazasının möhkəmləndirilməsi istiqamətində bir sıra tədbirlər həyata keçirilmişdir.

Məktəblərin maddi–texniki bazasının möhkəmləndirilməsi ilə yanaşı, cari ildə təhsil sahəsində bir sıra digər uğurlar da qeydə alınmışdır. Belə ki, rayonumuzun iki müəllimi “İlin ən yaxşı müəllimi” müsabiqəsində iştirak edərək qalib olmuş və respublika Prezidentinin 20 iyul 2012–ci il tarixli sərəncamı ilə onların hər birinə 5000 manat pul mükafatı verilmişdir. Bundan əlavə, iki şagird müxtəlif fənlər üzrə keçirilən olimpiadaların respublika turunda rayonumuzu müvəffəqiyyətlə təmsil edərək mükafata layiq yerlər tutmuşlar.

Hesabat ili səhiyyə sahəsində də mühüm yeniliklərlə yadda qalmış, ölkə rəhbəri cənab İlham Əliyevin iştirakı ilə mərkəzi rayon xəstəxanasının yeni binası istifadəyə verilmişdir.

Rayonda turizmin inkişaf etdirilməsi sahəsində də bir sıra əməli tədbirlər həyata keçirilmişdir. Ölkə başçısı cənab İlham Əliyevin xüsusi diqqət və qayğısı sayəsində ərsəyə gələn “Şahdağ” Qış–Yay Turizm Kompleksi ərazisində ötən ilin dekabr ayında tikintisi başa çatmış iki otel istifadəyə verilmiş, ərazidə turistlərin qəbulu üçün zəruri infrastruktur yaradılmışdır. Ölkə başçısının bu qayğısının nəticəsidir ki, Qusar rayonu turizm bölgəsi kimi günü–gündən daha da inkişaf edir. Ötən illər ərzində rayona gələn turistlərin sayında müşahidə edilən artım da söylənilənləri bir daha təsdiq edir.

Ötən il daha bir yenilik Heydər Əliyev Mərkəzinin istifadəyə verilməsi olmuşdur. İstifadəyə verildikdən sonra mərkəzin fəaliyyəti üçün bir sıra əməli tədbirlər həyata keçirilmiş, ilkin olaraq burada rəsm və xalçaçılıq dərnəklərinin yaradılması qərara alınmış, gənclərin asudə vaxtlarının səmərəli təşkili, internet və elektron kitabxana xidmətlərindən istifadə üçün münasib şərait yaradılmışdır.

Rayon icra hakimiyyəti tərəfindən rayonda mövcud olan problemlərin aradan qaldırılması məqsədilə “Qusar rayonunun 2013–cü il üçün İnkişaf Planı” hazırlanmışdır. İnkişaf planında rayonda infrastruktur sahələrinin yenidən qurulması, əhalinin içməli və suvarma suyu ilə, elektrik enerjisi və təbii qazla təminatının yaxşılaşdırılması, abadlıq–quruculuq işlərinin görülməsi, sosial obyektlərin tikintisi və digər tədbirlər nəzərdə tutulmuşdur.

Ziyafəddin Bayramov

Respublika.- 2013.- 16 mart.- S. 9.