GƏNCƏDƏ MUĞAM FESTİVALI

“Muğam aləmi” III Beynəlxalq Muğam Festivalı Gəncə şəhərində də davam edir. Bu böyük musiqi bayramına Çin Xalq Respublikasından gəlmiş incəsənət ustaları da qoşulmuşlar.

Gəncə Dövlət Dram Teatrında təşkil olunmuş tədbirin açılış mərasimində şəhər mədəniyyət idarəsinin məsul işçisi Bəxtiyar Muradov və Azərbaycan Dövlət Akademik Opera və Balet Teatrının baş rejissoru Hafiz Quliyev festival iştirakçılarını salamlayaraq, festivalın ilk dəfə olaraq Bakı ilə yanaşı bölgələri də əhatə etməsini yüksək qiymətləndirdilər.

Teatrın səhnəsində Üzeyir Hacıbəylinin “Leyli və Məcnun” operasından parçalar nümayiş etdirildi. Baş rejissor Hafiz Quliyevin quruluş verdiyi tamaşada Teymur Göyçayevin dirijorluğu ilə Qara Qarayev adına Azərbaycan Dövlət Kamera Orkestri və orkestrin xor kapellasının müşayiəti əsasında operadan parçaları solistlər İlkin Əhmədov və Vüsalə Musayeva ifa etdilər.

Sonra səhnə Çin Xalq Respublikasından gəlmiş incəsənət ustalarının ixtiyarına verildi. “Öhal mukamı”nın “Gözəl qızlar” ansamblının ifa etdiyi rəngarəng musiqi nömrələri və muğamlardan parçalar tamaşaçılar tərəfindən alqışlarla qarşılandı.

Çinli incəsənət ustaları ölkəmizdə keçirilən festivalın əhəmiyyətini yüksək qiymətləndirdilər. Onlar mədəniyyətlərarası dialoqun təntənəsinə çevrilən festivalın xalqlar arasında yeni dostluq münasibətlərinin yaranmasına təkan verəcəyinə də əminlik ifadə etdilər.

Çinin Sincan Milli Muğam Orkestrinin bədii rəhbəri, bəstəkar Davud Mahmud müxbirimizin sualını cavablandırarkən dedi ki, Azərbaycanda muğam festivalının təşkili çox maraqlı və səmərəli təşəbbüsdür. Dünyanın müxtəlif xalqlarının ifa etdiyi muğamlar müəyyən fərqli əlamətlərə malik olsalar da, onların vahid kökə söykəndiyi faktdır. Bu festival muğamların tətqiqi və daha dərindən öyrənilməsi işinə böyük səmərə verəcəkdir.

“Muğam aləmi” III Beynəlxalq Muğam Festivalı çərçivəsində Gəncədə keçirilən tədbirlərə martın 17–də yekun vurulacaqdır.

Y.TANRIVERDİYEV

Respublika.- 2013.- 16 mart.- S. 8.