Dahi şəxsiyyət

Çoxəsrlik dövlətçilik tariximizdə Heydər Əliyev epoxası müstəsna yer tutur. Dünya səviyyəli dahi siyasətçi, görkəmli dövlət başçısı müasir Azərbaycanın banisidir.

Ulu öndər xalqımızı başının üstünü almış bütün çətinliklərdən qoruyaraq Azərbaycanı inkişaf yoluna çıxardı. İlk Milli Konstitusiyamızı yaratdı. Azərbaycan dünyaya geniş inteqrasiya yolunu seçdi. Ölkəmiz dünya birliyinin ən önəmli üzvlərindən birinə çevrildi.

Böyük azərbaycanlı Heydər Əliyev ömrünü bütövlüklə öz xalqına və Vətəninə xidmətə həsr etmişdir. Hələ Azərbaycan Respublikasının Dövlət Təhlükəsizlik Komitəsində işləyərkən milli kadrların irəli çəkilməsinə nail olub. Heydər Əliyev 1969–cu ildə Azərbaycan KP MK–nın 1–ci katibi, 1982–ci ildə SSRİ Nazirlər Soveti sədrinin birinci müavini vəzifəsinə qədər yüksəlmişdir. 1993–cü ilin oktyabr ayında müstəqil Azərbaycanın prezidenti seçilmişdir.

Heydər Əliyevin respublikamıza rəhbərlik illəri iki mərhələni əhatə edir. Birinci mərhələdə Azərbaycan keçmiş Sovet İttifaqının tərkibində olsa da, Heydər Əliyev İttifaqın büdcəsindən respublikamıza daha çox vəsait ayrılması üçün, sözün əsl mənasında, qətiyyət göstərmişdir. Ulu öndərin uzaqgörənliyi bu gün hər birimizdə dərin heyrət doğurur. O, hələ Sovet İttifaqının mövcudluğu şəraitində gələcəyi düşünür, respublikamızın nə vaxtsa müstəqilliyə qovuşacağına inanır və bundan ötrü güclü maddi–texniki baza yaradırdı.

Heydər Əliyev ikinci dəfə Azərbaycana respublikamız müstəqillik qazandıqdan sonra—1993–2003–cü illərdə rəhbərlik etmişdir. Ulu öndər ikinci dəfə Azərbaycanın ali rəhbərliyinə qayıdanda ölkəmizdə çox ağır vəziyyət hökm sürürdü. Ayrı–ayrı qüvvələr, səriştəsiz siyasətçilər Azərbaycanı vətəndaş qarşıdurmasının astanasına gətirib çıxarmışdılar, müstəqilliyimizin itirilməsi, ölkəmizin parçalanması təhlükəsi yaranmışdı. Belə ağır vəziyyətdə xalq öz böyük oğlu Heydər Əliyevi Azərbaycana rəhbərliyə dəvət etdi. Xalqımızın səsinə səs verən və xalqına arxalanan ulu öndər özünəməxsus müdrikliklə Azərbaycanı bu ağır vəziyyətdən çıxarmağa nail oldu. Buna görə də Heydər Əliyevin adı tarixə digər böyük xidmətlər ilə yanaşı, ilk növbədə Azərbaycanın qurucusu kimi daxil olmuşdur.

Ü.Çörçillin fikrincə, “dövlət xadiminin siyasi xadimdən fərqi bundadır ki, siyasətçi gələcək seçkiləri, dövlət xadimi isə gələcək nəsilləri düşünmək üçün fəaliyyət göstərir”. Böyük azərbaycanlı Heydər Əliyev də məhz gələcək nəsilləri düşünən, qüdrətli Azərbaycan yaratmağa qadir olan müdrik dövlət xadimi olmuşdur.

Heydər Əliyevin parlaq siyasi zəkası sayəsində iki əsrin və iki minilliyin qovuşuğunda Azərbaycan öz milli–mənəvi dəyərlərini qoruyaraq üçüncü minilliyə inamla qədəm qoymuşdur.

Hər kəsin dəyəri onun yaşadığı zaman kəsiyində göstərdiyi xidmətləri, əməlləri ilə ölçülür. Ulu öndərin yeganə amalı taleyin ona bəxş etdiyi fitri qabiliyyətini, bütün qüvvə və bacarığını, əqli və fiziki potensialını ana yurdu Azərbaycana həsr etmək idi. Onun siyasəti gələcəyə istiqamətlənmişdi. Tarixi şəxsiyyətlər nəsillərin yaddaşında yaratdıqları və həyatda qoyub getdikləri tarixi abidələrlə əbədiləşirlər. Tarixi təkcə hadisələrin müəyyən xronologiya üzrə düzülməsi deyil, həm də bu hadisələrin ruhunun, mahiyyətinin açılması, insanların həmin dövrü öz duyğu və düşüncələrindən keçirərək yaşatmasıdır. Ulu öndərin xarici siyasət məsələlərinə müstəsna əhəmiyyət verməsi, milli məqsədlər naminə ən nüfuzlu kürsülərdən bacarıq və məharətlə istifadə etməsi Azərbaycan dövlətçiliyinin bugünü və gələcəyi baxımından son dərəcə əhəmiyyətli olmuşdur.

Ulu öndər Heydər Əliyev haqqında yazmaq, fikir söyləmək həm şərəflidir, həm də çox çətin və məsuliyyətli bir işdir. Çünki Heydər Əliyev elə böyük tarixi şəxsiyyətdir ki, onun gördüyü bütün işləri sadalamaq belə çətindir.

Heydər Əliyev dünya siyasətində öz dəst–xətti olan nəhəng şəxsiyyətdir və Azərbaycan yaşadıqca, ulu öndərimizin adı da yaşayacaqdır.

Həcər Heydərova,

Sumqayıt Şəhər Qeydiyyat

İdarəsinin rəisi, ədliyyə müşaviri.

Respublika.- 2013.- 19 mart.- S. 9.