UĞURLU NƏTİCƏLƏR DAHA BÖYÜK NAİLİYYƏTLƏRƏ SANBALLI ZƏMİN YARADIR

Cari ilin birinci rübü arxada qaldı. Gəncə ötən dövr ərzində sürətli inkişaf tempini daha da artırmış, nəzərdə tutulan böyük nailiyyətlərin möhkəm təməli yaradılmışdır.

“2013–cü ilin birinci rübündə Gəncə şəhərinin sosial–iqtisadi inkişafının yekunu və qarşıda duran vəzifələr haqqında” şəhərdə keçirilmiş fəallar yığıncağında nailiyyətlər geniş təhlil olunmuş, qarşıda duran böyük quruculuq və abadlaşdırma vəzifələrin, şəhərsalma tədbirlərinin uğurla yerinə yetirilməsi məqsədilə işlənib hazırlanmış İnkişaf Proqramı ətraflı təhlil edilmişdir.

Gəncə Şəhər İcra Hakimiyyətinin başçısı Elmar Vəliyev hesabat məruzəsi ilə çıxış etmişdir.

Məruzəçi demişdir ki, möhtərəm Prezident cənab İlham Əliyevin sədrliyi ilə keçirilən Nazirlər Kabinetinin 2013–cü ilin birinci rübünün sosial–iqtisadi inkişafına və qarşıda duran vəzifələrə həsr olunmuş iclasda dövlət başçısı respublikadakı iqtisadi və siyasi vəziyyəti dərindən təhlil etmiş, qarşıda duran vəzifələr və onların həlli yollarını dəqiq müəyyənləşdirməklə, Azərbaycanda iqtisadi islahatların uğurla aparıldığını, davam etdirildiyini, islahatların artıq gözəl nəticələrə gətirib çıxardığını, 2013–cü ilin birinci rübündə iqtisadi inkişafın özünü bir daha göstərdiyini, xüsusilə də qeyri–neft sektorunun inkişaf etdiyini vurğulamışdır.

Azərbaycan Respublikası Prezidentinin imzaladığı dövlət proqramlarından, fərman və sərəncamlarından irəli gələn vəzifələrin reallaşması nəticəsində ölkənin bütün bölgələri kimi, Gəncə şəhəri də sosial–iqtisadi inkişaf istiqamətində böyük uğurlar qazanmış, şəhərdə tikinti–quruculuq və abadlıq işləri geniş vüsət almışdır.

Şəhərin sosial–iqtisadi həyatında müşahidə olunan sabitlik cari ilin əvvəlindən də saxlanılmaqla həm sosial, həm də iqtisadi sahələrdə yeni nailiyyətlər əldə edilmişdir.

Cari ilin birinci rübündə ümumi daxili məhsulun həcmi 4,6 faiz artmış, müqayisəli qiymətlərdə 139,5 milyon manatlıq məhsul istehsal edilmiş və xidmətlər göstərilmişdir.

Sonra məruzəçi diqqəti şəhər sənayesində əldə olunmuş nailiyyətlərə yönəltmişdir. Şəhər iqtisadiyyatının əsasını təşkil edən sənayedə 2013–cü ilin birinci rübündə 39,6 milyon manatlıq məhsul istehsal edilmiş və xidmətlər göstərilmişdir.

İstehsalın 71,7 faizi özəl bölmənin payına düşmüş və onun həcmi ötən illə müqayisədə 5,7 faiz artmışdır.

İstehsal olunan məhsulun 98,9 faizi istehlakçılara göndərilmişdir. Müəssisələrin anbarlarında qalmış 6 milyon 44.0 min manatlıq hazır məhsul ehtiyatının 48,4 faizi Gəncə Avtomobil Zavodunun, 22,1 faizi “DET.AL. Alüminium” MMC–nin, 8,9 faizi “Gəncə Əlvan Metal Emalı” MMC–nin və qalan hissəsi isə digər istehsal müəssisələrinin payına düşür.

Möhtərəm Prezident cənab İlham Əliyevin xeyir–duası ilə istifadəyə verilmiş “Gəncə DET.AL” Alüminium MMC–nin Alüminium zavodunun ildə 50 min ton alüminium istehsal edəcək ikinci fazasının inşası davam etdirilir. Zavod ən yüksək texnoloji, ekoloji və keyfiyyət standartlarına cavab verir.

“Gəncə–Qənnadı” ASC–nin Süd emalı zavodunun may ayında istifadəyə verilməsi nəzərdə tutulur. Bundan əlavə müəssisənin inzibati binasında, eləcə də istehsalat sahəsində əsaslı təmir və bərpa işləri aparılır.

“Elba” Kəsim və Emal Fabrikası” MMC–nin tikintisi, həmçinin “İnter–Pak” MMC–də yeni xammalın ilkin emalı sexinin və xammal anbarının yenidən qurulması və inşası davam etdirilir.

“Neon” firmasında gündəlik istehsal gücü 25 ton olan ən müasir Çörək zavodunun istifadəyə verilməsi ilə müəssisədə əlavə olaraq 20–25 nəfər işlə təmin olunmuşdur.

“Gəncə Şərab–2″ ASC–də cari ilin birinci rübündə gündəlik istehsal gücü 5 ton olan spirtin emalından yaranan tullantıların təkrar emalı sexi istifadəyə verilmiş, şərab emalı sahəsində yeni avadanlıqların quraşdırılması işləri davam etdirilir.

“Gəncə–Dəyirman” MMC–də 2 ədəd 5 min tonluq taxıl anbarının inşası davam etdirilir, “Gəncə Aviaekologiya” MMC–də gündəlik istehsal gücü 20 min ədəd kərpic istehsalı sahəsində yeni avadanlıqlar quraşdırılır.

İstehsal müəssisələrinin müasir texnologiya əsasında yenidən qurulması və modernləşdirilməsi işləri daim diqqət mərkəzində saxlanılmalıdır. Elmar Vəliyev əsaslı tikinti–quraşdırma və abadlaşdırma işləri barədə məlumat verərkən demişdir ki, ölkə başçısının tapşırıq və tövsiyələrinin uğurla həyata keçirilməsi nəticəsində şəhərimiz dinamik inkişaf edir, həyata keçirilən yenidənqurma və abadlıq–quruculuq işləri özünün geniş miqyası ilə seçilməkdə davam edir.

2013–cü ilin birinci rübündə şəhərin iqtisadi və sosial sahələrinin inkişafına bütün maliyyə mənbələrindən əsas kapitala 32,6 milyon manatdan çox vəsait yönəldilmişdir.

Möhtərəm Prezident cənab İlham Əliyevin diqqət və qayğısını daim öz üzərində hiss edən gəncəlilər şəhərdə aparılan abadlıq–quruculuq və tikinti işlərinin həyata keçirilməsinin davamlılığı ilə yanaşı, sürətləndirilməsi də təmin edilmişdir.

Ulu öndər Heydər Əliyevin əvəzedilməz irsinin daha da mükəmməl öyrənilməsi, onların gənc nəslə yetərincə aşılanması, gələcək nəsillərə layiqincə çatdırılması məqsədilə ən müasir layihəyə əsasən sahəsi 4500 kvadratmetr olan üçmərtəbəli Heydər Əliyev Mərkəzinin tikintisi davam etdirilir. Bu möhtəşəm binada müxtəlif dərnəklər, sərgi zalı, elektron və adi kitabxana, ekspozisiya və müşavirə zalları da nəzərdə tutulmuşdur.

Gəncəçay çayı şəhəri iki hissəyə bölür. Çayın şəhər ərazisindən keçən hissəsində sahilboyu bərkitmə işlərinin aparılması və çayın məcrasının yenidən qurulması davam etdirilir. Çayın sağ hissəsində ilkin olaraq 1,2 km uzunluğunda salınacaq parkda yeni infrastruktur layihələr həyata keçiriləcək ki, bu da şəhərin qədim görkəminə yeni bir müasirlik gətirəcəkdir.

Prezident İlham Əliyev tərəfindən 2013–cü il Azərbaycanda “İnformasiya–kommunikasiya texnologiyaları ili” elan edilmişdir. Bu, Gəncə rabitəçiləri qarşısında bir sıra məsul vəzifələr qoyur. Ona görə də əldə edilmiş nailiyyətlər daha da möhkəmləndirilməli, əhalinin və digər istehlakçıların müasir, keyfiyyətli və fasiləsiz rabitə xidmətləri ilə təmin edilməsi istiqamətində işləri daha da gücləndirilməlidir. Məruzədə ticarət və xidmət sahəsində vəziyyət, pərakəndə əmtəə bazarının təşkilatı və pərakəndə əmtəə dövriyyəsinin mülkiyyət növlərinə görə strukturları ətraflı təhlil olunmuş, həyata keçirilmiş işlər qeyd edilməklə müvafiq idarə və təşkilatların rəhbərlərinə konkret tapşırıqlar verilmişdir.

Əhalinin sosial müdafiəsinin gücləndirilməsinin təşkili, Azərbaycan vətəndaşlarının daha da yaxşı yaşaması ölkə başçısı tərəfindən müəyyən edilən ən vacib vəzifələrdəndir.

İcra başçısı hesabat dövründə bu sahədə əldə olunmuş nailiyyətləri qeyd etməklə qarşıda duran vəzifələrə toxunmuşdur. Ölkədə bütün sosial məsələlər öz həllini tapmaqdadır. Əhalinin güzəranı ildən–ilə yaxşılaşır. Hər il əlavə sosial qayğılarla əhatə olunur, onların rifah halının yaxşılaşdırılması üçün həyata keçirilən layihələrin miqyası genişləndirilir.

Şəhər əhalisinin, xüsusən də aztəminatlı təbəqələrin sosial müdafiəsinin gücləndirilməsi, onların maddi rifah halının yaxşılaşdırılması məsələləri daim diqqət mərkəzində saxlanılmışdır.

Hesabat dövründə məcburi köçkün ailələri bayram günlərində 50 min manatdan çox bayram sovqatı ilə təmin edilmişdirr.

Azərbaycan Respublikası Prezidentinin 2011–ci il 15 noyabr tarixli sərəncamı ilə təsdiq edilmiş “Məşğulluq Strategiyasının həyata keçirilməsi üzrə 2011–2015–ci illər üçün Dövlət Proqramı”nın icrası və “Məşğulluq haqqında” Azərbaycan Respublikası Qanunundan irəli gələn vəzifələrin və tələblərin həyata keçirilməsi məqsədilə Gəncə Şəhər Məşğulluq Mərkəzi cari ilin əvvəlindən müəyyən işlər və bir sıra tədbirlər görmüşdür.

Respublikamızın ikinci sənaye və mədə

niyyət mərkəzi olan Gəncədə təhsil, səhiyyə, mədəniyyət, idman və gənclərlə iş prioritet vəzifələrdəndir.

Azərbaycan Respublikasının Prezidenti İlham Əliyevin diqqət və qayğısı sayəsində müvafiq sahələrin müasir tələblər səviyyəsinə çatdırılması istiqamətində bir çox işlər görülür. Respublikanın, eləcə də Gəncə şəhərinin sosial–mədəni inkişafında Heydər Əliyev Fondunun prezidenti, Milli Məclisin deputatı, YUNESKO və İSESKO–nun xoşməramlı səfiri Mehriban xanım Əliyevanın fəaliyyəti təqdirəlayiq olmaqla əvəzedilməzdir.

Təhsilin keyfiyyətinin yüksəldilməsi, onun bütün sahələrinin məqsədyönlü inkişafı və daha da zənginləşdirilməsi Gəncə Şəhər İcra Hakimiyyətinin daim diqqət mərkəzində saxlanılmışdır.

Gəncə Şəhər İcra Hakimiyyəti təhsil ocaqlarının tikintisi və təmirinə, onların müasir tələblərə uyğun qurulmasına, gənclərin ümumbəşəri dəyərlər əsasında layiqli təhsil almalarına xüsusi diqqət göstərir.

Hesabat dövründə şəhərdə idmanın müxtəlif növləri üzrə 12 şəhər birinciliyi və kütləvi idman tədbirləri keçirilmiş və bu yarışlarda 1 min 800–ə yaxın idmançı iştirak etmişdir.

Gəncə idmançıları 2013–cü ilin birinci rübündə müxtəlif səviyyəli respublika, Avropa, dünya və beynəlxalq yarışlarda iştirak edərək 75 müxtəlif əyarlı medal, o cümlədən 40 qızıl, 12 gümüş, 23 bürünc medallar əldə etmişlər.

Bakı şəhərində Poverliftinq və bench–press üzrə keçirilən Avropa çempionatında şəhər idmançılarından A.Beliyev, S.Sadıqov, P.Əsgərov, B.Hacıyev, H.Verdiyev Avropa çempionu adına layiq görülərək qızıl medal əldə etmişlər.

Elmar Vəliyev çıxışının sonunda demişdir ki, ölkə başçısının proqram xarakterli fikirlərinin həyata keçirilməsi istiqamətində artıq şəhərimizdə konkret işlər görülür. Gəncə qədimiliyini qorumaqla yanaşı, dinamik inkişaf yolunu tutaraq qısa zaman kəsiyində simasını dəyişməkdədir.

Azərbaycan Respublikasının Prezidenti İlham Əliyevin diqqət və qayğısını, verdiyi göstəriş və tapşırıqlarını öz fəaliyyətində rəhbər tutan Gəncə Şəhər İcra Hakimiyyəti və yerli icra orqanları bu il ərzində də qarşıya qoyulan bütün vəzifələri layiqincə və tam yerinə yetirəcəklər. Gəncə şəhəri daha da inkişaf edəcək, gözəlləşəcək, ölkənin yüksəlişinə özünün dəyərli töhfələrini verəcəkdir.

Məruzə ətrafında müzakirələrdə çıxış edənlər hesabat dövründə həyata keçirilmiş işləri yüksək qiymətləndirmiş, ölkə başçısının diqqət və qayğısına əməli işlərlə cavab verəcəklərinə əminlik ifadə etmişlər.

Hesabat yığıncağında müzakirə olunan məsələlərin həllinə yönəldilmiş geniş qərar və şəhərin inkişafına göstərdiyi diqqət və qayğıya görə ölkə başçısına minnətdarlıq ifadə edən müraciət qəbul edilmişdir.

Y.TANRIVERDİYEV

Respublika.- 2013.- 5 may.- S. 10.