Nəfis tərtibatlı oxunaqlı jurnal

Azərbaycan Naşirlər və Poliqrafçılar İctimai Birliyinin təsis etdiyi “Naşir” jurnalının ilk iki sayı çapdan çıxmışdır.

Bu, təkcə peşəkar nəşriyyat–mətbəə işçiləri üçün deyil, ümumiyyətlə, milli mətbuat tariximiz və kitabçılıq sahəsi üçün çox xoş hadisədir. Jurnalın yaradıcı kollektivinin məqsədi “Azərbaycanın ümumi inkişafı fonunda kitabın ali nüfuzunun bərpa olunmasına yardım etmək, Fotonəşriyyat–poliqrafiya müəssisələrinin işinin daha da yüksəldilməsinə, ölkədə kitab yayımının artmasına təkan vermək, kitab mədəniyyətinin təbliği və oxucu zövqünün formalaşmasına kömək etməkdir”.

Tanınmış qələm sahiblərinin —kitab sərraflarının təbriki, xeyir–duaları ilə mədəni ictimaiyyətlə ünsiyyəti başlayan jurnalın məramı və bədii–texniki quruluşu peşəkarcasına düşünülmüşdür. “Naşir” ilk sayından Azərbaycan kitab mədəniyyəti tarixində yeni olan mündərəcə, gözəl tərtiblə nəşr ediləcəyinə ümid verir. Başqa sözlə, kitaba xidmət edəcək elmi–bədii, həmçinin də yeni texnoloji söz və onun yüksək poliqrafik icrasına yönələn maraqlı, məsuliyyətli və hərtərəfli işıqlandırılmasına köklənəcəkdir.

Peşəkar kitab redaktorlarının təcrübədən çıxış edərək elmi–plaktik tövsiyəli yazılarının çapı, ümumiyyətlə, jurnalın ixtisas səviyyəsini artırır, həm də ona qəzet–jurnal bolluğu arasında fərqlilik xüsusiyyəti verir.

Jurnalın maraqlı rubrikalar sistemi var. Ümumiyyətlə, bütün rubrikalar çevikdir, onların ifadə forması da şablon deyil, poetik yönlüdür, ilk ümumi informasiya verməklə oxucunu özünə çəkib saxlaya bilir: “Söz diridir”, “Ümumidən xüsusiyə”, “Deyincə sənət”, “Ağ–qara”(redaktəsiz) və s.

İlk saylarından hiss edilir ki, “Naşir”in kollektivi kitabı ərsəyə gətirən bütün texnoloji proseslərin yüksək keyfiyyətlə icrasına xüsusi diqqət göstərir, müəllif–redaktor–rəssam–poliqrafik icra–hazır məhsul istiqamətində gedən yolun hər “mərhələsinə” kitaba çəkilən zəhmət və ona olan hörmət səviyyəsindən yanaşaraq “oxucu məhəbbəti”ni qazanmağa cəhd edilir.

Jurnalda böyüklər üçün söhbətlərlə yanaşı, uşaqların da yaddan çıxarlımaması çox müsbət haldır.

Yüksək poliqrafik icrada işıq üzü görən “Naşir”in mövcud potensialı onun təkcə peşəkarlar arasında deyil, geniş oxucu auditoriyası tərəfindən də sevgilərlə qarşılanacağına inam yaradır. Çünki onun yaradıcıları üçün kitab – əlahəzrətdir! Elm və irfan ondan başlayır əqidəsi istehsalat prosesində məslək kodeksi kimi dəyərləndirilir.

Nəşrin mövzu dairəsi genişdir. İlk baxışda oxucuya elə gələ bilər ki, məsələn, futbol kralı Pelenin, yaxud da qonşu Batum şəhərindəki metaldan hazırlanmış gözəl “Oğlan və Qız” heykəlinin bu jurnala nə dəxli var. Amma səbir edib oxuyanda ki, “Mən — Pele” adlı avtobioqrafik kitabı sərbəst mütaliə etmək üçün yüz minlərlə savadsız braziliyalı əlifbanı öyrənmişdir, ya da Qurban Səidin məşhur “Əli və Nino” kitabının eşqidir o nakamları qovuşduran və s. onda fikriniz dəyişəcəkdir. İşə belə tələbkar münasibət jurnalın içini rəngarəngləşdirir; son nəticədə isə uğur qazanan kitab və kitabsevər olur. Bu tipli istər iri, istərsə də kiçikhəcmli yazılara hər sayda rast gəlinir. Hətta reklam məlumatlarının da profilə uyğun seçilməsi, bütövlükdə, məmnunluq hissi yaradır.

Jurnalın bədii və texniki tərtibatı xüsusi qeyd edilməyə layiqdir. Burada müasir jurnal tərtibatçılığı elementlərilə nəfis və keyfiyyətli poliqrafik icra məsuliyyətinin vəhdəti gözəl zövq ovqatı yaradır. Fotolar məzmunlu və informasiya tutumludur. Rənglər yazının janrına və ruhuna uyğundur.

Oxucu vaxtına və əhval–ruhiyyəsinə uyğun bədii–publisistik yazı, kiçik xəbər, informasiya–məsləhət də tapa bilər burda.

Jurnal iki aydanbir işıq üzü görür. Ona görə də onun hər sayının zaman ölçüsünü əhatə etməsi sosial–siyasi mədəniyyət və operativlik tələb edir. Bu prinsip “Naşir”də gözlənilir. Qeyd edək ki, jurnalın bu blokundakı yazılarda forma və üslub müxtəlifliyi də hiss olunur.

“Naşir” sizin həm oxumalı, həm də baxmalı jurnalınızdır, kitab həvəskarları.

Elçin VƏLƏDOĞLU

Respublika.-2013.-19 may.-S.8.