Azərbaycan bayrağıdır

Ərşə qalxıb əzəmətlə göy üzündə dalğalanan,

Üç rəngiylə könüllərdə fərəh hissi, nur oyadan,

Al bayrağım yanan məşəl, əbədiyyət çırağıdır,

Fəxr etdiyim şərəf-şanım Azərbaycan bayrağıdır.

Şanlı Bayraq Meydanımız qəhrəmanlıq simvoludur,

Bayraq altda həmrəy millət tarix yazan bir uludur.

Azadlığa aparan yol ərənlərin ər yoludur,

Al bayrağım qazandığım azadlığın mayağıdır,

Vəsf etdiyim ruhum, canım Azərbaycan bayrağıdır.

Bayrağımız mərd Babəkin köynəyinin al qanıdır,

Şah İsmayıl Xətainin miras qalan nişanıdır,

Şəhidlərin vətənləşən ölümsüzlük ünvanıdır,

Ay-ulduzum şəfəq saçan müstəqillik qaynağıdır,

Od nəfəsim, axan qanım Azərbaycan bayrağıdır.

Qalx ayağa, Vətən oğlu, qaytar doğma torpağını,

Sanc Şuşanın zirvəsində üçrəngli haqq bayrağını,

Zəfər çalıb Yer üzünə yay səsini-sorağını,

Hayqır bərkdən, de Qarabağ, Oğuz elin torpağıdır,

Şərəf dolu adım-sanım Azərbaycan bayrağıdır.

Bayraq fəxrim, söz günəşim, söz dəryamda dürr-incidir,

Çiçəklənən azad ölkəm yüksəlişdə birincidir,

Xalq yaradan xariqələr xoş günlərin sevincidir,

Qürur dolu hər yeni gün şanlı tarix varağıdır,

Candan əziz hürr ünvanım Azərbaycan bayrağıdır.

Oqtay ZƏNGİLANLI.

Respublika.-2013.- 9 noyabr.- S.5.