Nəsimi rayonunda Konstitusiya günü ilə bağlı dəyirmi masa

Ümummilli liderimiz Heydər Əliyev ilk Milli Konstitusiyamızın hazırlanmasında həm Azərbaycanın milli dəyərlərindən, həm də ümumbəşəri dəyərlərdən, dünyanın demokratik dövlətlərinin təcrübəsindən istifadə edilməsini mühüm vəzifə kimi irəli sürmüşdü.

1995-ci il noyabrın 12-də Azərbaycan xalqı özünün çoxəsrlik dövlətçilik ənənələrini davam etdirərək bütünlükdə cəmiyyətin və hər kəsin firavanlığının təmin olunmasını istəyərək ümumxalq səsverməsi yolu ilə müstəqil dövlətimizin Konstitusiyasını qəbul etdi.

Bakının Nəsimi rayonunda müstəqil Azərbaycanın ilk Konstitusiyasının qəbul edilməsi ilə bağlı geniş mərasim keçirildi. Toplantıda rayon ictimaiyyətinin nümayəndələri iştirak edirdilər.

Yığıncaqda rayon icra hakimiyyətinin başçısı Nəsib Məhəməliyev çıxış edərək vurğuladı ki, Azərbaycanda yeni Konstitusiyanın qəbulu Heydər Əliyevin hakimiyyətə qayıdışından sonra mümkün oldu. Əsas Qanunun qəbulu cəmiyyət həyatında demokratik dəyişikliklərə yol açdı, insan hüquq və azadlıqlarının həyata keçirilməsi üçün əlverişli şərait yaratdı, bütün sahələrin inkişafına təkan verdi, xalqın tarixi ənənələrinə, milli və mədəni dəyərlərinə uyğun olan müasir dünyəvi və vətəndaş cəmiyyəti quruculuğu tələblərinə cavab verən dövlətçiliyin formalaşmasında mühüm addım oldu.

Vurğulamaq lazımdır ki, Azərbaycan Konstitusiyasının hüquqi fəlsəfəsində bir ali məqsəd - insan və vətəndaş hüquqlarının və azadlıqlarının təminatı məramı dayanır.

Ümummilli liderimiz Heydər Əliyevin layiqli davamçısı Prezident İlham Əliyevin rəhbərliyi ilə cəmiyyət həyatının bütün sahələrində əldə edilən uğurlar, sosial-iqtisadi islahatların dərinləşməsi bütövlükdə ölkəmizin həyatında özünü qabarıq göstərən fundamental dəyişikliklər və pozitiv yeniliklər Azərbaycan Konstitusiyasında yenidən bir sıra əlavə və dəyişikliklər edilməsini gündəmə gətirdi.

2009-cü il martın 18-də Konstitusiyaya əlavə və dəyişikliklərlə əlaqədar keçirilən ümumxalq səsverməsi Azərbaycan xalqının demokratikləşmə və liberallaşmaya xidmət edən, insan hüquqlarının qorunmasında əlavə imkanlar açan islahatları dəstəklədiyini bir daha təsdiqlədi. Əlavə və dəyişikliklər mahiyyətcə Konstitusiyanın daha da təkmilləşməsinə insan və vətəndaş hüquq və azadlıqları ilə bağlı prinsipial əhəmiyyətli məsələlərin bu sənəddə daha dolğun ifadəsini tapmasına xidmət etməklə yanaşı, onun müddəalarının liberallığı, demokratik səciyyə daşıması ilə seçilir.

Cənab İlham Əliyevin rəhbərliyi ilə Azərbaycan dövləti bu gün öz tarixinin böyük tərəqqi ilə xarakterizə olunan şərəfli dövrünü yaşayır, öz inkişafının keyfiyyətcə yeni, daha yüksək mərhələsinə qədəm qoymuşdur. Ölkə iqtisadiyyatı dinamik inkişaf edir, dövlət və cəmiyyət həyatının bütün sahələrində tərəqqi əldə olunur, genişmiqyaslı quruculuq işləri və sosial yönümlü layihələr uğurla həyata keçirilir, Azərbaycan dünya birliyində özünə layiqli yer tutaraq müstəqil siyasət yürüdür.

Azərbaycan Respublikası Konstitusiyasının qüvvəyə minməsindən artıq 18 il keçir. Bu müddət ərzində ölkəmizdə bütün sahələri əhatə edən islahatlar həyata keçirilmiş və Azərbaycanda dünyəvi demokratik dövlətçilik ənənələri, insan hüquq və azadlıqlarının toxunulmazlığını təmin edən sivil cəmiyyət formalaşmışdır. Bütün bunlar ölkəmizdə hüquqi dövlət quruculuğu işinin uğurlu nəticəsi kimi qiymətləndirilməlidir.

Nəsib Məhəməliyev çıxışında son olaraq vurğuladı ki, 2013-cü il oktyabrın 9-da keçirilmiş seçkilərdə təcrübəli siyasi lider kimi növbəti dəfə xalqın yüksək etimadını qazanmış cənab İlham Əliyevin rəhbərliyi ilə xalqımızın rifahı günbəgün daha da yaxşılaşacaqdır.

“Dəyirmi masa”da rayon icra hakimiyyəti hüquq şöbəsinin müdiri Vasif Əliyevin də geniş çıxışı oldu.

Qədir ASLAN

Respublika.-2013.- 13 noyabr.- S.12.