Ölkəmizin hərbi qüdrəti və döyüş potensialı daim artır

Azərbaycanda istehsalı mənimsənilən müdafiə təyinatlı məmulatların çeşidlərinin sayı 700–ə çatdırılıb

Azərbaycan son illər çox sürətlə və hərtərəfli inkişaf edir. Ölkəmizdə böyük maliyyə resursları yaradılıb ki, bu da bütün sahə və istiqamətlərdə köklü irəliləyişlərə nail olmağa imkan verir. Ölkəmizin hərtərəfli inkişafı naminə çoxsaylı dövlət proqramları, irimiqyaslı infrastruktur layihələri uğurla reallaşdırılır. Azərbaycan öz iqtisadi gücünü yüksək dərəcədə artıra bilib və bu proses həyatımızın bütün sahələrini əhatə etməkdədir. Daim artan iqtisadi qüdtətimiz indiki halda ölkəmiz üçün çox vacib olan hərbi sənayemizin inkişafına da güclü təkan verib. Müstəqil Azərbaycan dövlətinin hərtərəfli və sürətli inkişafını müəyyən edən amillər içərisində möhkəm iqtisadi potensialın, güclü ordunun və müdafiə sənayesinin mövcudluğu prioritet məsələlərdir. Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbrikində Prezident İlham Əliyev Azərbaycanda ordu quruculuğu və müdafiə sənayesi sahəsində işlərin uğurla davam etdirildiyini önə çəkərək deyib: “Bizim gücümüz artır, həm iqtisadi sahədə, həm hərbi sahədə. Beynəlxalq mövqelərimiz möhkəmlənir…Bununla bərabər, heç kəs üçün sirr deyildir ki, biz ordu quruculuğu prosesi ilə çox ciddi məşğuluq. Azərbaycan Ordusu Cənubi Qafqazın ən böyük qüvvəsidir. Ordunun inkişafı üçün bütün lazımi tədbirlər görülür. 2012–ci ildə böyük miqdarda hərbi texnika, silah–sursat, təyyarələr, helikopterlər, artilleriya qurğuları, hava hücumuna qarşı qurğular gətirilmiş, eyni zamanda, daxildə 40–dan yuxarı sənaye müəssisəsində hərbi təyinatlı məhsulların istehsalı təşkil edilmişdir. Biz ordumuzu 2013–cü ildə daha da gücləndirəcəyik. Ordumuza xərclənən vəsait Ermənistan büdcəsindən 50 faiz çoxdur və bundan sonra da bu istiqamətdə məqsədyönlü, hərtərəfli siyasət aparılacaqdır ki, Ermənistan–Azərbaycan, Dağlıq Qarabağ münaqişəsi tezliklə öz həllini tapsın, Azərbaycan öz ərazi bütövlüyünü bərpa etsin”.

2005–ci ildə Prezident İlham Əliyevin sərəncamı ilə müdafiə, radioelektronika, cihazqayırma sənayelərində dövlət siyasətini və tənzimlənməsini həyata keçirən Azərbaycan Respublikası Müdafiə Sənayesi Nazirliyinin yaradılması bu baxımdan olduqca mühüm əhəmiyyət daşıyır. Müdafiə Sənayesi Nazirliyi yaradıldığı gündən qarşısına qoyulmuş əsas məqsədlərə çatmaq üçün tabeliyinə verilmiş istehsal müəssisələrində əsaslı yenidənqurma işləri aparmaqla Silahlı Qüvvələri lazımi silah, hərbi texnika, sursat və s. təmin etmək üçün yeni istehsal sahələrinin yaradılması istiqamətində işləri uğurla həyata keçirir. Ötən müddət ərzində nazirliyin tabeliyində olan müəssisələrin böyük əksəriyyətində əsaslı tikinti və yenidənqurma işləri aparılaraq isifadəyə verilib. “İqlim”, “Dalğa” və “Sənayecihaz” elmi istehsalat müəssisələri, “Telemexanika”, “Peyk”, “Alov”, Elektron Hesablayıcı Maşınlar, “Radioquraşdırma”, Şirvan “Araz”, Bakı “Cihazqayırma”, Xaçmaz “Kondensator” zavodları, “AZAD Systems Co.” müəssisəsi və elmi–tədqiqat İnstitutu əsaslı təmir və yenidənqurmadan sonra istismara verilib. Qısa müddətdə ölkəmizdə müdafiə sənayesinin inkişafında ciddi dönüş yaranıb. Hazırda Dövlət Müdafiə Sifarişi Proqramı çərçivəsində müdafiə təyinatlı məmulatların yaradılması və istehsalı üzrə cari və perspektiv proqnozların hazırlanması, tətbiqi işi uğurla davam etdirilir və Azərbaycanın hərbi və müdafiə qüdrəti daim yüksəlir. Yeddi il ərzində nazirliyin birlik və müəssisələrində 40–dan çox yeni istehsal sahəsi yaradılıb ki, onlardan da üçü 2012–ci ildə istifadəyə verilib. Bunlar atıcı silahların yaradılması və təkmilləşdirilməsi üçün təcrübə–sınaq zavodu, fərdi əleyhqazların və xüsusi mühafizə vasitələrinin istehsalı və müxtəlif çaplı döyüş sursatlarının utilizasiyası sahələridir. Məsələn, 1990–cı ildə Bakı Aviasiya İstehsalat Birliyinin “Klimat” Konstruktor Bürosu kimi fəaliyyət göstərən təcrübə–sınaq zavodun yenidən qurulmasında əsas məqsəd atıcı silahların, o cümlədən avtomatların, pulemyotların, snayper tüfənglərinin yaradılması, modernləşdirilməsi və kütləvi istehsalın təşkili istiqamətində elmi–tədqiqat, təcrübi–konstruktor işlərinin aparılması, xüsusi standartlara uyğun sınaq metodikaları və proqramlarının tələblərinə cavab verən nümunələrin hazırlanmasından ibarətdir. Müdafiə Sənayesi Nazirliyi yaradıldıqdan sonra büronun işi təkmilləşdirilmiş, bənzəri olmayan ilk milli “İstiqlal” snayper tüfənginin yaradılması başa çatdırılmış və istehsalı təmin edilmişdir. Hazırda burada “İstiqlal–2″, “İstiqlal–4″, “İstiqlal–1T”, “Şimşək–9″ və digər müdafiə təyinatlı silahlar sınaqdan keçirilir. Prezident İlham Əliyev bu məsələlərə xüsusi önəm verərək deyib: “Biz öz müdafiə potensialımızı gücləndiririk… Bu, bizim məqsədyönlü siyasətimizin bir hissəsidir. Çünkü biz müharibə şəraitində yaşayırıq. Belə olan halda, biz diqqətimizi, ilk növbədə, ölkəmizin hərbi potensialının gücləndirilməsinə verməliyik və bunu edirik”.

Azərbaycanda milli ordu quruculuğu və müdafiə sənayesinin formalaşdırılması sahəsində ümummilli liderimiz Heydər Əliyevin xidmətləri danılmazdır. Ulu öndərimizin hələ Azərbaycana birinci dəfə rəhbərlik etdiyi 1970–1980–ci illərdə bu sahədə çox böyük işlər görülüb, müstəqillik illərində isə sözün həqiqi mənasında ölkəmizdə güclü milli ordu formalaşdırılıb. Xatırladaq ki, milli ordumuzun hərbi–texniki bazasının gücləndirilməsi məqsədilə 2003–cü ildə ümummilli liderimiz Heydər Əliyevin sərəncamı ilə Azərbaycan Respublikası müdafiə sənayesi müəssisələrinin 2003–2005–ci illərdə inkişafına dair Dövlət Proqramı təsdiq edilib və bu proqram hərbi müdafiə sahəsində yeni mərhələnin əsasını qoyub. Hazırda ulu öndərimizin siyasi kursu onun ən layiqli siyasi varisi, Azərbaycanın və regionumuzun yeni parlaq lideri, Prezident İlham Əliyev tərəfindən qloballaşan dünyanın tələbinə uyğun olaraq yeni məzmun və keyfiyyətdə uğurla davam etdirilir. Azərbaycanın hərbi qüdrətinin və müdafiə qabiliyyətinin gücləndirilməsi dövlətimizin başçısının xüsusi diqqət və qayğısı ilə əhatə olunub. Azərbaycanda Müdafiə Sənayesi Nazirliyinin yaradılması məhz bu diqqət və qayğının əyani təzahürüdür. Müdafiə Sənayesi Nazirliyinin fəaliyyət göstərdiyi 7 il ərzində bu qurumun tabeliyində olan müəssisələri ən müasir texnologiya və avadanlıqla təmin etmək üçün çox böyük işlər görülüb. Onlarca texnoloji avadanlıq, 1500–dən çox müxtəlif növ dəzgah, cihaz, alət və tərtibatlar alınıb quraşdırılıb. Nazirliyin müəssisələrində yaradılan yeni istehsalat sahələri Azərbaycan Respublikası Silahlı Qüvvələrini müasir tələblərə cavab verən müdafiə təyinatlı məmulatlarla və xalq təsərrüfatını maşınqayırma, cihazqayırma, elektrotexnika, rabitə sahələrində istifadə olunan avadanlıq və ehtiyat hissələri ilə təmin etmək üçün tam gücü ilə fəaliyyət göstərir. Həyata keçirilən genişmiqyaslı işlər sayəsində nazirliyin tabeli müəssisələrində istehsalı mənimsənilən müdafiə təyinatlı məmulatların çeşidlərinin sayı artıq 700–ə çatdırılıb. 2012–ci ildə 437 adda müdafiə təyinatlı məmulatın istehsalı üzrə müqavilə bağlanılıb. Sevindirici haldır ki, ötən il istehsal olunan müdafiə təyinatlı məmulatların həcmi 2007–ci illə müqayisədə 25 dəfədən çoxdur.

Regionun lider dövlətinə çevrilən Azərbaycanın qarşısında duran yeganə problem Ermənistan–Azərbaycan, Dağlıq Qarabağ münaqişəsinin həlli məsələsidir. Bu məsələdə ölkəmizin mövqeyi həmişə konstruktiv olub və uzun illərdir ki, danışıqlar prosesinə sadiqiq. Bunun əksinə olaraq, Ermənistan öz təcavüzkar siyasətini yeritməkdə, Azərbaycan torpaqlarını hələ də işğal altında saxlamaqdadır. Bütün dünyaya məlumdur ki, sülh danışıqları məhz Ermənistanın qeyri–konstruktiv mövqeyi üzündən heç bir nəticə vermir. Təcavüzkar Ermənistan BMT–nin məlum qətnamələrini, beynəlxalq təşkilatların təkliflərini də qulaq ardına vurur və bununla da bütün dünyaya meydan oxuyur. Artıq BMT də, Avropa Şurası da Ermənistanı rəsmi şəkildə təcavüzkar dövlət kimi tanıyıb. Bununla belə, beynəlxalq təşkilatların reallığı, ədaləti, beynəlxalq hüquq norma və prinsiplərini əks etdirən qərarları, qətnamələri icra olunmur

Prezident İlham Əliyev Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbrikində bəyan edib: “2012–ci ildə Ermənistan–Azərbaycan, Dağlıq Qarabağ münaqişəsinin həlli istiqamətində çox ciddi siyasi hadisələr baş vermişdir. Mən ilk növbədə, bu məsələ ilə məşğul olan Minsk qrupunun həmsədr ölkələrinin dövlət başçılarının bəyanatını qeyd etmək istəyirəm. O bəyanatda deyilmişdir ki, status–kvo qəbuledilməzdir. Yəni bu, onu göstərir ki, artıq heç kim, hətta bu məsələ ilə məşğul olan vasitəçilər, funksiyaları öz üzərinə götürən ölkələr də bu işğalla, bu vəziyyətlə barışmaq istəmir. Status–kvonun dəyişdirilməsi işğala son qoyulması deməkdir. Eyni zamanda, 2012–ci ildə Azərbaycanın qoşulduğu Qoşulmama Hərəkatının zirvə toplantısında Ermənistan–Azərbaycan, Dağlıq Qarabağ münaqişəsinin həlli ilə bağlı çox tutarlı və ədalətli qətnamə qəbul edilmişdir. Həmin qətnamədə deyilir ki, bu münaqişə yalnız Azərbaycanın ərazi bütövlüyü çərçivəsində öz həllini tapmalıdır. Eyni zamanda, 2012–ci ildə NATO–nun zirvə görüşündə də qəbul edilmiş qətnamədə Ermənistan–Azərbaycan münaqişəsinin ərazi bütövlüyü əsasında həll edilməsi haqqında məsələ qoyulmuşdur. Yəni Qoşulmama Hərəkatında və NATO–da birləşən ölkələr dünya birliyinin mütləq əksəriyyətini təşkil edir və bu ölkələrin mövqeyi birmənalıdır: Azərbaycanın ərazi bütövlüyü bərpa edilməlidir. Münaqişənin başqa həlli yoxdur”.

Təbii ki, Ermənistanın tutduğu qeyri–konstruktiv mövqe Azərbaycanı öz siyasətinə müəyyən düzəlişlər etməyə vadar edir. Dövlətimizin başçısının dəfələrlə vurğuladığı kimi, bizim səbrimiz tükənməz deyildir. Azərbaycan ya sülh yolu ilə, ya da hərbi yolla öz ərazi bütövlüyünü bərpa edəcəkdir. Bu gün Ermənistan istər iqtisadi, istər siyasi, istərsə də hərbi cəhətdən Azərbaycanla rəqabət aparmaq iqtidarında deyil. Azərbaycan inkişaf etdikcə bu fərq daha da artır və artacaqdır. Çünki Ermənistanın inkişaf etməsi üçün heç bir imkanı yoxdur. Onlar bütün beynəlxalq regional layihələrdən təcrid olunmuşlar. Əhali Ermənistanı tərk edir, canlı qüvvəsi çatışmadığından hətta təmas xəttinin qorunmasında da çətinlik çəkirlər. Tam müstəqil siyasət yürüdən Azərbaycan isə dünyanın ən aparıcı, qüdrətli dövlətlərindən birinə çevrilib. Bütün bunlar ölkəmizin hər cəhətdən üstün olduğunun əyani təsdiqidir.

Azərbaycanda bu gün ən müasir silahlar, düyüş sursatları və hərbi texnika istehsal olunur və proses daim təkmilləşdirilməkdədir. Ölkə başçısı cənab İlham Əliyevin tapşırığı ilə 2009–cu ildən başlayaraq Müdafiə Sənayesi Nazirliyinin müəssisələrində yaradılan və istehsal olunan müdafiə təyinatlı məmulatlar beynəlxalq müdafiə sənayesi sərgilərində nümayiş etdirilir və böyük maraqla qarşılanır. Sevindirici haldır ki, bu sərgilərdə Azərbaycan brendi kimi nümayiş etdirilən məmulatların çeşidlərinin sayı artmaqda davam edir.

2009–cu ildə Türkiyədə təşkil olunan İDEF–2009 sərgisində 27 adda müdafiə təyinatlı məmulatla respublikamızı təmsil edən Müdafiə Sənayesi Nazirliyi 2012–ci ilin noyabr ayında İndoneziyada keçirilən “İndoDefence–2012″ sərgisində artıq 125 adda müdafiə təyinatlı məmulat nümayiş etdirib. Onlardan müxtəlif növ atıcı və yaxınməsafəli döyüş vasitələrini, döyüş sursatlarını, optik nişangahları, mühəndis texnikasını və digərlərini göstərmək olar. Yeni yaradılan və istehsal olunan pilotsuz uçuş aparatları, gecəgörmə cihazı, zirehli dəbilqə və zirehli gödəkcə, AKM və AK–74 tipli avtomatlar üçün şəffaf patron daraqları, fərdi əleyhqazlar ilk dəfə idi ki, beynəlxalq sərgidə nümayiş etdirilirdi. ABŞ, İngiltərə, Almaniya, İtaliya, Rusiya, Fransa, Türkiyə və digər inkişaf etmiş ölkələr olmaqla dünyanın 50–dən artıq ölkəsindən 500–dən artıq şirkətin qatıldığı sərgidə Azərbaycan istehsalı olan məmulatlar, xüsusilə müxtəlif növ döyüş sursatları, pilotsuz uçuş aparatları, 12,7 və 14,5 millimetrlik İstiqlal snayper tüfəngləri, tapançalar böyük maraqla qarşılanıb.

Müxtəlif çaplı uzaqməsafəli artilleriya minaları və onların barıt atımları, müxtəlif növ artilleriya mərmiləri üçün partladıcılar, zirehli nəqliyyat vasitələri üçün döyüş modulları, atıcı silahların və onların döyüş sursatlarının daşınması və saxlanılması üçün müasir qablaşdırma qutuları və s. istehsalı müdafiə sənayemizdə həyata keçirilən müasir tipli yeni layihələrdir. Bunlar Azərbaycanın yeni yaradılmış müdafiə sənayesinin inkişafının real nümunəsidir.

Hazırda Müdafiə Sənayesi Nazirliyi aviasiya, naviqasiya, cihazqayırma və digər istiqamətlər üzrə dünyanın inkişaf etmiş dövlətlərinin 60–dan çox şirkət və firması ilə sıx əməkdaşlıq edir. Beynəlxalq sərgilərdə nümayiş olunan məmulatlara artan maraq sayəsində Azərbaycan ilə əməkdaşlıq edən ölkələrin və onların şirkətlərinin sayı artmaqdadır. 2007–ci illə müqayisədə ötən il yaradılma sahəsində başa çatdırılmış mövzuların sayı 4,5 dəfə, mərhələlərin icrası isə 5,1 dəfə artıb. İstehsalı mənimsənilmiş və seriyalı istehsalına başlanılmış yeni məmulatlardan yaylım atəşli reaktiv sistemini, zirehli texnikanın tırtıllarını, mühəndis texnikası üzrə elektron partlatma maşınını, fərdi əleyhqazı, aviasiya bombalarını, kollimator nişangahını, top kollimatorunu, müxtəlif minaatanları, siqnal tapançasını, zirehli texnikaların, artilleriya və atıcı silahların müxtəlif ehtiyat hissələrini göstərmək olar. Müasir tökmə prosesi ilə həyata keçirilən zirehli maşınların tırtıllarının və müxtəlif çaplı minaların gövdələrinin hazırlanması uğurla sınaqdan çıxmış və istehsalına başlanılmışdır ki, bu da mütərəqqi tökmə prosesinin ölkə iqtisadiyyatının digər sahələrində də tətbiqinə imkan yaradacaqdır.

Azərbaycanda bu gün kosmik sənaye də sürətlə inkişaf edir və bu həm də hərbi və müdafiə qüdrətimizin daha da gücləndirilməsinə gətirib çıxaracaqdır. Prezident İlham Əliyevin 17 avqust 2009–cu il tarixli sərəncamı ilə təsdiq olunmuş Azərbaycan Respublikasında kosmik sənayenin yaradılması və inkişafı üzrə Dövlət Proqramı Müdafiə Sənayesi Nazirliyinin də qarşısında yeni və məsul vəzifələr qoyub və bunların icrası istiqamətində də ciddi işlər görülür. Azərbaycanda bu gün kosmik sənaye də sürətlə inkişaf edir və bu həm də hərbi və müdafiə qüdrətimizin daha da gücləndirilməsinə gətirib çıxaracaqdır. Beləliklə, Azərbaycan nəinki iqtisadi, eləcə də hərbi qüdrətinə görə də təcavüzkar Ermənistanı müqayisəolunmaz dərəcədə üstələyir, xalqımız əmindir ki, dövlətimizin yürütdüyü uğurlu siyasət nəticəsində torpaqlarımız tezliklə azad ediləcəkdir. Prezident İlham Əliyev bu məsələdə də Azərbaycanın qəti mövqeyini ortaya qoyub: “Bir daha demək istəyirəm ki, Azərbaycan heç vaxt öz əzəli torpağında ikinci qondarma erməni dövlətinin yaradılmasına imkan verməyəcəkdir. Bugünkü Ermənistan tarixi Azərbaycan torpaqlarında yaranmışdır. Bu tarixi biz yaxşı bilirik. İrəvan xanlığı, Zəngəzur, Göyçə mahalı – bütün bunlar bizim tarixi torpaqlarımızdır. Azərbaycan torpağında ikinci erməni dövlətinin yaradılması heç vaxt mümkün olmayacaqdır. Azərbaycan heç vaxt buna imkan verməyəcəkdir. Dağlıq Qarabağa heç vaxt müstəqillik verilməyəcəkdir. Azərbaycan öz ərazi bütövlüyünü bərpa edəcəkdir və bu gün işğal altında olan bütün şəhərlərdə, o cümlədən Şuşada, Xankəndidə Azərbaycan bayrağı dalğalanacaqdır”.

Xəlil CABBAROV

Respublika.- 2013.- 11 yanvar.- S. 1;2.