“Neft Daşları” NQÇİ uğurlarını artırır

“Neft Daşları” NQÇİ 2014-cü ilin 3 ayı ərzində neft, qaz hasilatı və təhvili üzrə qarşıya qoyulmuş tapşırıqları artıqlaması ilə yerinə yetirmişdir. Belə ki, neft hasilatı üzrə 231800 ton plana qarşı 231879 ton neft hasil edilmişdir. Keçən ilin müvafiq dövrü ilə müqayisədə dəyişmə tempi 1,3 faiz və yaxud 2979 ton çox təşkil etmişdir.

Qazlift üsulu ilə 167503 ton, keçən ilin müvafiq dövrü ilə müqayisədə 4985 ton çox neft çıxarılmışdır.

Neft təhvili tapşırığına 100,1 faiz əməl olunaraq (plan 229600 ton, fakt 229770 ton) dövlətə 170 ton çox neft təhvil verilmişdir. Keçən ilin müvafiq dövrü ilə müqayisədə neft təhvili 2980 ton çox olmuşdur.

Neft satışı tapşırığına 100,0 faiz əməl olunaraq dövlətə 45 ton çox neft təhvil verilmişdir. Keçən ilin müvafiq dövrü ilə müqayisədə neft satışı 3005 ton çox olmuşdur.

Qaz hasilatı üzrə plan 100 faiz yerinə yetirilmişdir. Keçən ilin müvafiq dövrü ilə müqayisədə qaz hasilatı eyni olmuşdur. Qaz satışı (əmtəəlik qaz) üzrə plan 100 faiz yerinə yetirilmişdir. Keçən ilin müvafiq dövrü ilə müqayisədə qaz satışı 50 min kubmetr çox olmuşdur.

502 istismar quyu fondu olmuş, ondan da 461-i fəaliyyətdə olan quyu fondunu təşkil etmişdir. Bu quyu fondunun 398-i qazlift üsulu ilə, 60-ı fontan, 3-ü isə dərinlik nasosu üsulu ilə istismar olunur. Fəaliyyətsiz quyu fondu istismar fondunun 7,8 faizini, yəni 39 quyu təşkil edir. Mənimsəmə quyu fondu 2 quyu təşkil edir.

NQÇİ üzrə qazımadan 5 quyu istismara daxil edilmişdir. Bu da keçən ilin müvafiq dövrü ilə müqayisədə 4 quyu çox olmuşdur.

Qazımadan alınan quyulardan neft hasilatı faktiki olaraq 3591 ton olmuşdur. Keçən ilin müvafiq dövrü ilə müqayisədə hasil edilən neftin miqdarı 3287 ton çox olmuşdur.

“Neft Daşları” NQÇİ-nin yataqlarında qalıq çıxarıla bilən neft ehtiyatı 17296 min tondur. Neft Daşları yatağında neft ehtiyatı 12526 min ton, Palçıq Pilpiləsi yatağında isə qalıq çıxarıla bilən neft ehtiyatı 4770 min tondur. Neft ehtiyatının çıxarılması məqsədilə Neft Daşları yatağında qazıma gedən, tikintisi layihələndirilən və tikilən 12 meydançadan 102 quyunun qazılması nəzərdə tutulmuşdur.

2014-cü ilin I rübündə Neft Daşları yatağında “Neft Daşları” DQİİ tərəfindən 5 özüldə cəmi 6 quyuda qazıma işləri aparılmışdır.

Fəaliyyətsiz fonddan 3 quyu plana qarşı 5 quyu bərpa edilib istismara daxil olmuşdur. Keçən ilin müvafiq dövrü ilə müqayisədə fəaliyyətsiz fonddan istismara 1 quyu az daxil olmuşdur. Fəaliyyətsiz fonddan alınan quyulardan 467 ton plana qarşı 1774 ton neft alınmışdır ki, bu da keçən ilin müvafiq dövrü ilə müqayisədə 1189 ton çoxdur.

İstismar quyularında hasilatı sabit saxlamaq üçün əsaslı və cari təmirlər aparılmışdır. Bu baxımdan 2014-cü ilin əvvəlindən NQÇİ-də 50 təmir əvəzinə 60 əsaslı və 155 əvəzinə 157 yeraltı (2013-cü ilin 3 ayı ərzində 153 təmir, keçən ilin müvafiq dövrü ilə müqayisədə 4 təmir çox olmuşdur) təmir işləri aparılmışdır. Hesabat dövrü ərzində əsaslı təmirdən sonra 8591 ton (2013-cü ilin 3 ayı ərzində 6845 ton) neft hasil edilmişdir ki, bu da keçən ilin müvafiq dövrü ilə müqayisədə 1746 ton çox olmuşdur. Bir təmirin orta davametmə müddəti yeraltı təmirlər üzrə 96,3 saat, əsaslı təmirlər üzrə 162,6 saat təşkil etmişdir.

Həmçinin hesabat dövrü ərzində 30 tədbirə qarşı 40 geoloji tədbir həyata keçirilmiş və bunun hesabına 4398 ton neft hasil olunmuşdur.

Köhnə quyularda neft hasilatını sabit saxlamaq məqsədilə 78 tədbirə qarşı 124 texniki tədbir həyata keçirilib və nəticədə 3615 ton neft hasil olunmuşdur.

Lay təzyiqini saxlamaq üçün NQÇİ-də 16 quyu vasitəsilə 64790 kubmetr həcmində su vurulmuş və bunun hesabına 5018 ton neft hasil olunmuşdur.

2014-cü ilin I rübü ərzində PXTQ-yə əsasən 465 dəfə texniki xidmət göstərilib və yağlanıb.

97 və 1741 saylı meydançalara 2 ədəd damcıtutan və 5 kubmetrlik çən hazırlanmış və quraşdırılmışdır. 741 saylı meydançanın helikopter meydançasına 1 dəst köpük əmələgətirici generator və köpük məhlulu verilmiş, sistem işçi vəziyyətə gətirilmişdir.

2150 saylı meydançada HAK-250 tipli platforma kranı quraşdırılıb və sınaqdan keçirilərək istismara verilib. Özülün helikopter meydançasındakı köpük əmələgətirici sistem işçi vəziyyətə gətirildi. 2 saylı İNYM-də təhlükəli hissədən 3 ədəd SNS 180x175 tipli mərkəzdənqaçma nasosları çıxarılaraq təmir olunmuş hissəyə quraşdırılıb və istismara verilmişdir. 1 ədəd “Tornado” 230/1500 markalı dəzgahı QKS-nin mexaniki emalatxanasında quraşdırılıb.

Baza-1-də 1 ədəd texnoloji blok təmir olunaraq quraşdırılması üçün 418 saylı meydançaya verildi, 1304 saylı meydançada yerləşən texnoloji blok təmir olundu. 1 ədəd texnoloji blok təmir olunaraq 2150 SDÖ-də quraşdırılıb və istismara verilib. 2150 SDÖ-də 1 ədəd 800x88 tipli separator quraşdırılıb.

Bundan əlavə, 2 ədəd balansdan silinmiş porşenli NB-32 nasosu İATS-də təmir olunaraq 1645 və 418 saylı meydançaya verilib.

2014-cü ilin 3 ayı ərzində 0.470 kilometrə qədər estakadada 3 ədəd meydançada təmir işləri görülmüşdür, 1.732 kilometrə qədər müxtəlif təyinatlı və müxtəlif diametrli boru kəmərlərində əsaslı təmir işləri aparılmışdır.

10395 kvadratmetr korroziyaya qarşı mühafizə işləri, 5650 kvadratmetr asfalt-beton işləri yerinə yetirilmiş, bir çox estakada və meydançalarda küçə işıqlandırıcıları quraşdırılmış, 1,3 və 4 saylı KS-nın “Qaz-Su” soyutma sistemləri təmir edilərək yeniləri quraşdırılıb, sualtı elektrik kabelləri təmir olunaraq istismara verilmişdir. 3 ay ərzində 2 ədəd gəmi yanalma meydançası quraşdırılıb.

2014-cü ilin 3 ayı ərzində NQÇİ-də əmək şəraiti vəziyyətinin yaxşılaşdırılması və istehsalat zədələnmələrinin qarşısının alınması sahəsində müəyyən işlər görülmüşdür.

2014-cü ilin 3 ayı ərzində ətraf mühitin mühafizəsi sahəsində də xeyli işlər görülmüşdür. Belə ki, 95890 kubmetr lay suyu utilizasiya olunmuş, geoloji tədbirlər nəticəsində lay sularının hasilatı 959 kubmetr azalmış, 22520 kubmetr dəniz suyu Əks Osmos qurğusunda şirinləşdirilmişdir. 950 min kubmetr səmt qazı kompressorlar vasitəsilə tutularaq sistemə qaytarılmışdır. 35600 kubmetr məişət çirkab suları “Biomass” tipli təmizləyici qurğu vasitəsilə təmizlənmişdir. Mütəmadi olaraq NQÇİ-nin ərazilərində monitorinqlər keçirilmişdir.

2014-cü ilin 3 ayı ərzində sosial-məişət şəraitinin yaxşılaşdırılması istiqamətində “Neft Daşları” NQÇİ-də müəyyən işlər görülmüşdür.

Yataqxana korpuslarında, çay evində, vertolyot meydançasında, qəsəbə və park ərazisində təmizlik işləri aparılmış, yollar təmizlənmiş, parkda qazon sulanmış, biçilmiş, ağaclar budanmış və bu işlər mütəmadi olaraq davam etdirilir.

Yataqxana korpuslarının dəhlizlərində cari təmir işləri aparılmışdır. Quyuların əsaslı və yeraltı təmir sexinin emalatxanasında təmir işləri aparılmış, 4 ədəd plastik qapı verilmiş, DQİİ-nin yeməkxanasında cari təmir işləri, 1, 2, 4, 5 saylı NQÇS-nin inzibati binalarında sanitar qovşaqlarda təmir-bərpa, Çay Evinin 1-ci mərtəbəsində mətbəxin tavanına lambir vurulmuş, ağartma işləri aparılmışdır.

Sexlərdə, yataqxana korpuslarında dezinfeksiya tədbirləri görülmüşdür.

Üç ay ərzində işçilərin dəniz və hava nəqliyyatı vasitələri ilə gətirilib aparılmaları, içməli suyun və ərzaq məhsullarının gətirilməsi təşkil edilmişdir.

“Neft Daşları” NQÇİ-nin kollektivi qarşısında bu il çox gərgin və məsul vəzifələr dayanır. Bu vəzifələrin yerinə yetirilməsi üçün neftçilərimiz bundan sonra da qüvvə və bacarıqlarını əsirgəməyəcək, neft və qaz hasilatını daha da artırmaq üçün səylərini səfərbər edəcəklər.

Qoçalı MAHMUDOV,

Azneft İB-nin “Neft Daşları” NQÇİ-nin rəisi.

Respublika.-2014.- 25 aprel.- S.7.