SDU-da Dünya Bankının eksperti ilə görüş

Aprel ayının 14-də Azərbaycan Respublikası Təhsil Nazirliyinin nümayəndələri və Dünya Bankının eksperti xanım Sachiko Kataoka Sumqayıt Dövlət Universitetində qonaq olmuşlar.

Məlumat üçün bildirək ki, xanım Sachiko Kataoka ali və məktəbəqədər təhsilin maliyyələşdirilməsi sahəsində ixtisaslaşmış və bu sahələr üzrə bir sıra analitik və əməliyyat işləri aparmışdır. O, Azərbaycanda təhsilin III pilləsinin perspektivləri ilə bağlı İnkişaf planının hazırlanmasında iştirak etmiş və Təhsil Nazirliyinin ali təhsil layihələri üçün yaradılmış dəstək qrupuna rəhbərlik etmişdir.

SDU-nun rektoru Elxan Hüseynov qonaqları salamlayaraq bugünkü faydalı görüşün keçirilməsindən məmnunluğunu ifadə etmiş və universitet haqqında dolğun və məzmunlu məlumatı qonaqların diqqətinə çatdırmışdır. Görüşdə qeyd edilmişdir ki, yeni tədris korpuslarını, yataqxana binalarını, idman və istirahət komplekslərini inşa etmək üçün SDU kifayət qədər əraziyə malikdir. Bildirilmişdir ki, universitetdə 6 elmi-tədqiqat laboratoriyası fəaliyyət göstərir, lakin elmi tələbatlara tam cavab vermir. Tədris laboratoriyalarının modernləşdirilməsi üçün “LAB View” proqramı ilə işləyən virtual laboratoriyaların təşkil olunması da qarşıda duran məsələlərdəndir.

Hazırda universitetdə elektron kitabxana sistemi yaradılması və digər ali məktəblərin kitabxanası ilə birləşdirilməsi də nəzərdə tutulub.

SDU-nun regional tədris müəssisəsi olduğunu nəzərə alaraq burada ixtisasların əmək bazarına uyğunlaşdırılması vacib məsələdir. Bütün bunların yaradılması üçün maliyyə məsələləri təmin olunmalıdır. Nəzərə çatdırıldı ki, universitetin Azərikimya, Polimer Materialları İnstitutu və digər sənaye müəssissələri ilə müqavilələri var, orada baza kafedralarının açılması nəzərdə tutulmuşdur. Təhsil sahəsində aparılan islahatlar çərçivəsində rektor yüksək texnologiya və telekommunikasiya sistemlərinin təhsilə tətbiq olunması ilə tədrisin keyfiyyətinin yüksəldilməsi və dünya təhsil sisteminə inteqrasiyasının sürətləndirilməsi üçün Sumqayıt Dövlət Universitetində Elektron İdarəetmə və İnformasiya Sisteminin yaradılmasının vacibliyini də vurğuladı.

SDU güclü elmi-pedaqoji potensiala malikdir. Bu da ona əsas verir ki, universitetimiz ölkədaxili və xarici reytinq cədvəlində özünəməxsus yer tutsun. SDU nəinki ölkəmizin, həmçinin xarici ölkələrin qabaqcıl elm və təhsil ocaqları ilə qarşılıqlı əməkdaşlıq barədə müqavilələrə malikdir.

SDU-da Əcnəbi tələbələrin Hazırlıq mərkəzi fəaliyyət göstərir. Əsasən, qardaş Türkiyənin müxtəlif bölgələrindən, o cümlədən Koreya, Çin, Türkmənistan, Rusiya və. s dövlətlərdən olan tələbələrdir. Xarici tələbə axınını sürətləndirmək üçün, ilk növbədə universitetin maddi-texniki bazası inkişaf etdirilməlidir.

Görüşdə çıxış edən xanım Sachiko Kataoka bugünkü görüşün məqsədini açıqlayaraq bildirdi ki, “bizim məqsədimiz təhsil müəsissələrinin, xüsusilə, regionlarda fəaliyyət göstərən universitetlərin ehtiyaclarını müəyyənləşdirərək onlara maliyyə dəstəyi göstərməkdir”. Ehtiyaclar 3 istiqamətdə müəyyənləşir:

- Normativ-hüquqi bazanın müəyyənləşdirilməsində köməklik;

- Keyfiyyətin yüksəldilməsi məsələlərinə köməklik;

- Maliyyə islahatlarında köməklik.

Əməkdaşlıq çərçivəsində keçirilmiş görüşün təhsil sahəsində qarşılıqlı münasibətlərə səmərəli töhfə verəcəyi qeyd olunmuş, bu fəaliyətin gələcəkdə də uğurla davam edərək daha yeni sahələri əhatə edəcəyinə əminlik ifadə olunmuşdur. Sonra universitet rəhbərliyi və qonaqlar Azərbaycan iqtisadiyyatının qeyri-neft sektorunun inkişafının bariz nümunəsi olan Sumqayıt Texnologiyalar Parkında oldular. Onları STP-nin icraçı direktoru Sahib Musayev qarşıladı.

Qonaqlar texnologiya parkında mövcud olan bir sıra müəsissələrdə, mis emalı zavodunda, Sumqayıt yağ fabrikində, daha sonra yüksək kilovatlıq gərginlik kabelləri istehsal edən zavodda, “Azərsun Sənaye Parkı”nın nəzdində yaradılan kağız və karton istehsalı kombinatındakı iş prosesi ilə tanış olmuş və prezentasiya zamanı bildirilmişlər ki, respublika əhəmiyyətli məhsulların, o cümlədən müxtəlif tip kabellər, transformatorlar, yüksək gərginlikli avadanlıqlar, hidroturbinlər, su nasosları, elektrik mühərrikləri, borular, texniki qazların istehsal olunduğu STP-də hazırda 13 zavod fəaliyyət göstərir, 5 zavod isə tikilmək üzrədir.

Sənaye müəssisələri ilə tanış olan qonaqlara burada emal prosesinin dünya standartlarına uyğun həyata keçirildiyi bildirildi.

Söhbət “dəyirmi masa” ətrafında davam etdirildi. Sahib Musayev son illər respublikamızın ali təhsil müəssisələri arasında texnoparkların yaradılmasının diqqət mərkəzində olduğunu, bu cür texnoparkların bir və ya bir neçə universitet, həmçinin elmi-tədqiqat mərkəzləri ilə birbaşa və ya ortaq fəaliyyətləri ilə əlaqədar olduğunu, tərkibində elmi nəticələrə və yüksək texnologiyalara əsaslanan şirkətlərin yaradılmasına və onların inkişafına təşəbbüs göstərmək məqsədi ilə qurulduğu barədə məlumat verdi.

Söhbət əsnasında SDU-nun rektoru Elxan Hüseynov bildirdi ki, ölkə Prezidentinin 4 may 2009-cu il tarixli sərəncamı ilə təsdiqlənmiş, “Azərbaycan Respublikasında 2009-2015-ci illərdə elmin inkişafı üzrə Milli Strategiya” da elmi-texniki infrastrukturun modernləşdirilməsi, elmin, təhsilin və istehsalatın inteqrasiyasının təmin edilməsi, innovasiya fəaliyyəti infrastrukturunun inkişaf etdirilməsi, o cümlədən texnoparkların, texnoloji mərkəzkərin genişləndirilməsi əsas vəzifə olaraq qarşıya qoyulub. Məlum məsələdir ki, texnoloji parkların yaradılmasında əsas məqsəd bilik və ixtiraların texnologiyalara, bu texnologiyaların isə kommersiya məhsuluna çevrilməsi, tədqiqatlara yönəldilmiş milli xərclərin səmərəliliyinin yüksəldilməsidir.

Hazırda Sumqayıt Azərbaycanın sənaye mərkəzi olmaqla, şəhərimiz müasir, zəngin sənaye və parklar şəhərinə çevrilir. Bu gün STP Azərbaycanın istənilən guşəsində tikilən elektrik stansiyalarını, yarımstansiyaları yüksək gərginlik kabelləri və digər zəruri məmulatlarla təmin edir. Bu baxımdan Sumqayıt Dövlət Universitetinin bacarıqlı və yüksək intellektə sahib olan tələbələrinin əldə etdikləri nəzəri biliklərin burada təcrübədən keçirməsi məqsədəuyğun olardı.

Görüş qarşılıqlı maraq doğuran digər məsələlər barədə ətraflı fikir mübadiləsi ilə yekunlaşdı. Sonda xatirə şəkli çəkdirildi.

SDU-nun Mətbuat Xidməti.

Respublika.-2014.-16 aprel.-S.-7.