2013-cü İLDƏ
ÖLKƏNİN SOSİAL, İQTİSADİ
İNKİŞAFI
Ölkə
iqtisadiyyatının inkişafı ilə yanaşı əhalinin
rifah halının daha da yüksəlməsi, dövlət tərəfindən
bütün sosial və iqtisadi öhdəliklərin tam yerinə
yetirilməsi, infrastrukturun təkmilləşdirilməsi, yeni
iş yerlərinin yaradılması sayəsində işsizlik
və yoxsulluq səviyyəsinin endirilməsi, əmək
haqlarının və pensiyaların artırılması və
digər amillər onu deməyə əsas verir ki, ölkənin
iqtisadi və sosial həyatında son illər müşahidə
olunan dinamik inkişaf 2013-cü ildə də davam etmişdir.
Ölkənin inkişafını xarakterizə edən əsas makro göstərici-ümumi daxili məhsul istehsalı 5,8 faiz artaraq 57,7 milyard manata çatmış, onun əhalinin hər nəfərinə düşən həcmi 6207,3 manat (7912,5 ABŞ dolları) olmuşdur. Son 10 ildə Ümumi Daxili Məhsul istehsalı hər il orta hesabla 12,4 faiz artmışdır.
Yola saldığımız ildə iqtisadiyyatın qeyri-neft sektoru 10,0 faiz artmış, onun ÜDM-də xüsusi çəkisi əvvəlki ildəki 53,5 faizdən 56,6 faizədək yüksəlmişdir. ümumi daxili məhsulun 43,4 faizi neft-qaz istehsalı və emalı sahələrinin payına düşmüş və əvvəlki ilə nisbətən 1,0 faiz artmışdır.
2013-cü ildə sənayenin qeyri-neft sahələrində əlavə dəyər 4,2 faiz, tikintidə 23,0 faiz, turistlərin yerləşdirilməsi və ictimai iaşə sahələrində 16,0 faiz, informasiya və rabitədə 10,7 faiz, ticarət və nəqliyyat vasitələrinin təmiri üzrə xidmətlər sahəsində 9,9 faiz, nəqliyyat və anbar təsərrüfatında 6,3 faiz, kənd təsərrüfatı, meşə təsərrüfatı və balıqçılıq, sosial və digər xidmətlər sahələrinin hər birində 4,9 faiz artmışdır.
üDM-in 46,3 faizi sənayedə, 11,8 faizi tikintidə, 7,1 faizi ticarət və nəqliyyat vasitələrinin təmiri üzrə xidmətlər sahəsində, 5,3 faizi kənd təsərrüfatı, meşə təsərrüfatı və balıqçılıqda, 4,8 faizi nəqliyyat və anbar təsərrüfatında, 1,8 faizi turistlərin yerləşdirilməsi və ictimai iaşə xidmətləri sahəsində, 1,8 faizi informasiya və rabitədə, 14,7 faizi sosial və digər xidmət sahələrində istehsal olunmuş, məhsula və idxala görə ödənilmiş xalis vergilərin payı 6,4 faiz təşkil etmişdir.
2013-cü ildə sənayedə istehsal
olunmuş malların və göstərilmiş xidmətlərin
həcmi 33,7 milyard manat təşkil edərək əvvəlki
illə müqayisədə 1,8 faiz çox olmuşdur. Sənayenin bütün bölmələrində - mədənçıxarma,
emal sənayesi, elektrik enerjisi, qaz və buxar istehsalı,
bölüşdürülməsi və təchizatı, su təchizatı,
tullantıların təmizlənməsi və emalı -
2012-ci illə müqayisədə istehsalın artımı
qeydə alınmışdır. İstehsalın dörddə üç hissəsi mədənçıxarma,
20,1 faizi emal, 5,2 faizi elektrik enerjisi, qaz və buxar istehsalı,
bölüşdürülməsi və təchizatı, 0,7
faizi isə su təchizatı, tullantıların təmizlənməsi
və emalı bölmələrində həyata
keçirilmişdir. Son 10 ildə sənaye istehsalı hər il orta hesabla 10,3 faiz artmışdır.
Sənayenin
qeyri-neft sektorunda fəaliyyət göstərən müəssisələrin
və sənaye məhsulu istehsal edən fiziki şəxslərin-fərdi
sahibkarların səyi nəticəsində 2012-ci illə
müqayisədə 2013-cü ildə qeyri-neft sənayesi
istehsalında 4,8 faiz artım
müşahidə olunmuşdur. Neft sektorunda isə məhsul
istehsalı 1,1 faiz yüksəlmişdir.
Özəl
bölmədə istehsalın həcmi sənaye məhsulunun
81,4 faizini təşkil etmiş, ümumi
istehsalın 93,1 faizi sənaye mallarının (əmtəələrin),
6,9 faizi isə sənaye xarakterli xidmətlərin istehsalı
hesabına yaradılmışdır.
Mədənçıxarma
bölməsində istehsalın həcmi 24,9
milyard manat olmaqla əvvəlki ilin səviyyəsindən 0,7
faiz yüksək olmuşdur.
Sahənin
əsas məhsulu olan xam neft hasilatı 43,1
milyon ton, əmtəəlik təbii qaz hasilatı isə 17,9
milyard kub-metr təşkil etmiş, qaz hasilatı 3,6 faiz, neft
hasilatı isə 0,2 faiz artmışdır. Bu məhsullardan
başqa bölmədə 21,8
min ton bentonit, 380,6 min ton inşaat üçün əhəng
daşı, 1,6 ton qızıl, 630,0 kq gümüş və
s. istehsal edilmişdir.
Emal
bölməsinin müəssisələri və fərdi
sahibkarları (ev təsərrüfatlarının sənaye
istehsalı da nəzərə alınmaqla) tərəfindən
6,8 milyard manat dəyərində və ya əvvəlki
ilə nisbətən 5,8 faiz çox məhsul istehsal
olunmuş və sənaye xarakterli xidmətlər göstərilmişdir.
Qida və
içki istehsalı müəssisələri tərəfindən
2,8 milyard manat həcmində məhsul
istehsal edilmiş, əvvəlki illə müqayisədə
qida məhsullarının istehsalında 4,8 faiz, içki
istehsalında isə 12,5 faiz artım müşahidə
olunmuşdur. Bu sahələrin əsas məhsullarından qənd
və şəkər tozunun istehsalı 16,4
faiz, üzlü süd istehsalı 1,2 faiz, pendir və kəsmik
istehsalı 5,1 faiz, pivə istehsalı 9,8 faiz, alkoqolsuz
içkilərin istehsalı 1,9 faiz artmışdır.
Toxuculuq,
geyim, dəri, dəridən məmulatlar və ayaqqabı
istehsalı sahələri üzrə ixtisaslaşan müəssisələr
tərəfindən 94,3 milyon manatlıq məhsul, o cümlədən
sahənin əsas məhsullarından 11,8 min ton pambıq lifi,
15,5 min ton pambıq iplik, 0,7 min kv. metr
xalça və xalça
məmulatları, 4,5 milyon cüt corab məmulatları, 269,9 min ədəd
pambıq yataq ağları və s. məhsullar istehsal
edilmişdir.
Neft məhsullarının
istehsalı müəssisələri tərəfindən
istehsalın həcmi 2,1 milyard manat olmaqla əvvəlki
illə müqayisədə 6,1 faiz
artmışdır. Əsas neft məhsullarından avtomobil benzininin istehsalı
8,5 faiz, ağ neftin istehsalı 12,2 faiz, dizel
yanacağının istehsalı 5,3 faiz , neft bitumunun
istehsalı isə 8,5 faiz artmışdır. Bununla
yanaşı, sürtkü yağlarının istehsalı 25,9 faiz azalmışdır.
Kimya sənayesi,
əczaçılıq məhsullarının, rezin və
plastmas məmulatlarının istehsalı müəssisələri
tərəfindən 267,1 milyon manatlıq məhsul
istehsal edilmişdir. Əvvəlki illə müqayisədə
kimya sənayesində 19,5 faiz, əczaçılıq
məhsullarının istehsalında 12,7 faiz, rezin və
plastmas məmulatların istehsalında isə 5,7 faiz artım
müşahidə olunmuşdur. Əsas kimya məhsullarından propilenin istehsalı 7,0 faiz ,
lak-boya məmulatlarının istehsalı 18,8 faiz, polietilenin
istehsalı 13,1 faiz, izopropil spirtinin istehsalı isə 91,7 faiz
artmışdır. Rezin və plastmas məmulatlarından bərk
polipropilen boruların istehsalı 58,2 faiz,
məsaməli poliuretan lövhələrin istehsalı 2,6 faiz
artmışdır.
Tikinti
materialları istehsalı müəssisələri tərəfindən
istehsal edilmiş məhsulun həcmi 21,0
faiz, o cümlədən sement istehsalı 7,9 faiz, tikinti gipsi
istehsalı 66,2 faiz, hörmə üçün hazır
beton qarışığı istehsalı 13,8 faiz
artmışdır.
Metallurgiya
sənayesi və hazır metal məmulatlarının
istehsalı müəssisələrində 399,6 milyon
manatlıq məhsul istehsal olunmuş və xidmətlər
göstərilmiş, istehsalın həcmi metallurgiya sənayesində
1,5 faiz artmış, hazır metal məmulatlarının
istehsalı sahəsində isə 42,9 faiz
azalmışdır. İl ərzində sahə üzrə 1,9 min ton və ya 49,7 faiz çox çuqun
tökmə, 219,9 min ton polad tökmə məhsulları, 60,8
min ton polad borular istehsal edilmişdir.
Kompyuter,
elektron və optik məhsulların, elektrik
avadanlıqlarının istehsalı sahəsində məhsul
istehsalının həcmi 238,0 milyon manat
olmuşdur. Əvvəlki illə müqayisədə kompyuter
və digər elektron avadanlıqlarının istehsalı 22,2 faiz, elektrik avadanlıqlarının
istehsalı isə 2,7 faiz azalmışdır. 2013-cü il ərzində
173 ədəd güc transformatoru, 6,7 min ədəd məişət
soyuducusu, 24,5 min ədəd televizor istehsal edilmiş, əvvəlki
illə müqayisədə məişət
soyuducularının və televizorların istehsalı
müvafiq olaraq 29,0 faiz və 2,2 faiz artmışdır.
Maşın
və avadanlıqların istehsalı, nəqliyyat vasitələri,
avtomobil və qoşquların istehsalı sahələrində
məhsul istehsalının həcmi 262,6 milyon manat olmaqla 246 ədəd
yük avtomobili, 424 ədəd minik avtomobili, 739 ədəd
traktor və s. məhsullar istehsal edilmişdir.
Elektrik
enerjisi, qaz və buxar istehsalı,
bölüşdürülməsi və təchizatı
bölməsinin müəssisələri tərəfindən
il ərzində 1,8 milyard manat həcmində
məhsul istehsal olunmuş və xidmətlər göstərilmişdir.
Əvvəlki illə müqayisədə bu sahədə 3,2 faizlik artım əldə olunmuşdur.
Ölkədə 20,6 milyard kVt-saat elektrik
enerjisi istehsal olunmuş, onun 6,6 faizi su elektrik
stansiyalarının, 93,4 faizi isə istilik elektrik
stansiyalarının payına düşmüşdür.
Su təchizatı,
tullantıların təmizlənməsi və emalı bölməsində məhsul
və xidmətlərin istehsalı 11,6 faiz
artmışdır.
2013-cü
ildə ölkənin iqtisadi və sosial sahələrinin
inkişafı üçün bütün maliyyə mənbələrindən
əsas kapitala 17872,1 milyon manat vəsait
yönəldilmiş, onun 66,3 faizi tikinti-quraşdırma
işlərinin yerinə yetirilməsinə sərf
edilmişdir. Əvvəlki illə müqayisədə əsas
kapitala yönəldilmiş vəsaitin həcmi 15,1 faiz, tikinti-quraşdırma işlərinə
sərf edilmiş vəsaitin həcmi 25,0 faiz
artmışdır. Dövlət mülkiyyətində olan
müəssisə və təşkilatlar əsas kapitala 10326,3 milyon manat, qeyri-dövlət müəssisələri
isə 7545,8 milyon manat vəsait sərf etmişlər. Məhsul
istehsalı obyektlərinin inşasında 8635,7
milyon manat, xidmət sahələri üzrə obyektlərin
tikintisində 9236,4 milyon manat vəsait istifadə
edilmişdir.
Daxili mənbələrdən
əsas kapitala yönəldilmiş vəsaitin həcmi əvvəlki
illə müqayisədə 11,9 faiz artaraq ümumi sərmayənin
76,7 faizini təşkil etmiş, onun 70,7 faizi dövlət,
29,3 faizi isə qeyri-dövlət
bölməsinin payına düşmüşdür.
Əsas
kapitala yönəldilmiş sərmayənin ümumi həcmində
müəssisə və təşkilatların vəsaitləri
8012,1 milyon manat (ümumi vəsaitdə 44,8 faiz), bank kreditləri
860,6 milyon manat (4,8 faiz), büdcə vəsaitləri 7829,2
milyon manat (43,8 faiz), büdcədənkənar fondların vəsaitləri
558,7 milyon manat (3,2 faiz), əhalinin şəxsi vəsaitləri
469,1 milyon manat (2,6 faiz), sair vəsaitlər 142,4 milyon manat (0,8
faiz) təşkil etmişdir.
2013-cü
ildə əsas kapitala yönəldilmiş ümumi vəsaitin
39,6 faizi sənaye sahələrinin inkişafına, 19,6 faizi nəqliyyat
və anbar təsərrüfatına, 7,5 faizi daşınmaz əmlakla
əlaqədar əməliyyatlara, 6,7 faizi dövlət idarəetməsinə,
5,5 faiz tikintiyə, 4,8 faizi istirahət, əyləncə və
incəsənətə, 4,4 faizi təhsilə, 3,2 faizi kənd
təsərrüfatına, 2,6 faizi ticarətə, 2,2 faizi səhiyyəyə,
2,0 faizi inzibati və yardımçı xidmətlərin
göstərilməsinə, 1,1 faizi informasiya və rabitəyə,
0,4 faizi turistlərin yerləşdirilməsi və ictimai
iaşəyə, 0,3 faizi digər sahələrdə xidmətlərin
göstərilməsinə, 0,1 faizi peşə, elmi və
texniki fəaliyyətə sərf edilmişdir.
2013-cü
ildə xarici mənbələrdən əsas kapitala 4167,2 milyon manat vəsait yönəldilmişdir.
Xarici
ölkələr və beynəlxalq təşkilatlar tərəfindən
yönəldilmiş vəsaitin 3632,2 milyon
manatı (87,2 faizi) Böyük Britaniya, ABŞ, Norveç,
Yaponiya, Çexiya, Türkiyə və Fransa sərmayədarlarına
məxsus olmuşdur.
Ölkənin sosial-iqtisadi həyatında mühüm əhəmiyyətə
malik olan yeni tikili və obyektlərin istifadəyə verilməsi
davam etmişdir.
2013-cü
ildə Bakı şəhərində Gəmi təmiri
istehsalat bazası, Gəmiqayırma və Çörək
zavodları, Heydər Əliyev Beynəlxalq Aeroportunda anqar
kompleksi və Beynəlxalq Logistika Mərkəzi, Qaz Turbinli
İstilik Elektrik Stansiyası, Azərbaycan Tibb Universitetinin Tədris-Cərrahiyyə Klinikası, “Alov qüllələri”
kompleksindəki “Fairmont Baku” oteli, “Qələbə Meydanı”
müxtəlif səviyyəli tunel tipli yol qovşağı,
Yeraltı avtomobil dayanacağı, Şərur rayonunda
Arpaçay Su Elektrik Stansiyası, Sumqayıt şəhərində
“Gilan” Tekstil Parkı, Polad boru zavodu, “Sağlam qida” Aqrar Sənaye
Kompleksi, Şirvan şəhərində “Cənub” Elektrik
Stansiyası, Olimpiya İdman Kompleksi və Şirvan-Muğan
qrup su kəməri, Abşeron rayonunda Birdəfəlik plastik
qablar və priforminqlər istehsalı və “Milla” süd məhsulları
və dondurma istehsalı zavodları, Ağcabədi rayonunda
“Aqat-Aqro” heyvandarlıq kompleksi, Mərkəzi Xəstəxana,
Gənclər Mərkəzi, Ağstafa rayonunda Peyntbol və
Atıcılıq Mərkəzi, Astara rayonunda Boks Mərkəzi,
Balakən rayonunda Soyuducu anbar kompleksi, Cəlilabad rayonunda Mərkəzi
Xəstəxana, Gədəbəy rayonunda Qızıl
emalı zavodu, Aşıq musiqi məktəbi, Soyuducu anbar kompleksi, Qazax rayonunda Sement zavodu, Qəbələ
rayonunda üzüm emalı zavodu,
Heyvandarlıq-südçülük kompleksi, Aqrar Sənaye
Kompleksi, “Qafqaz Karvansaray” otel kompleksi, Qobustan rayonunda İdman
Kompleksi, Quba rayonunda Milli Qolf Klubu, Gənclər Mərkəzi,
“Rixos Quba Azerbaijan” oteli, Qusar rayonunda “Şahdağ” və “Pik
Palas” otelləri, Hacıqabul rayonunda Seramik plitələr
istehsalı zavodu, Xaçmaz, Qax, Saatlı rayonlarında
Olimpiya İdman kompleksləri, İsmayıllı rayonunda
Tikiş fabriki, “İsmayıllı-1” Su Elektrik Stansiyası,
Sabirabad rayonunda Kür çayı üzərində
körpü, İstixana Kompleksi, Lənkəran, Siyəzən
rayonlarında Gənclər Mərkəzi, Şabran rayonunda Vəlvələçay-Taxtakörpü
kanalı, Taxtakörpü su anbarı, Taxtakörpü Su
Elektrik Stansiyası, Şəmkir rayonunda “Zəka”
İntellektual Gənclər Mərkəzi, “Excelsior Hotel
Shamkir” mehmanxanası, Tovuz rayonunda Hemodializ Mərkəzi,
Yevlax rayonunda Hava Limanı, Mərkəzi Xəstəxana,
bütün maliyyə mənbələri hesabına ölkədə
ümumi sahəsi 2,3 milyon kvadrat metr olan yeni yaşayış
evləri, 1338 çarpayılıq xəstəxana, növbədə
638 nəfəri qəbul edən ambulatoriya-poliklinika müəssisələri,
36062 şagird yerlik ümumtəhsil məktəbləri, 2466 yerlik məktəbəqədər
təhsil müəssisələri, 1124 yerlik klub və s.
obyektlər istifadəyə verilmişdir. Son 10 ildə əsas
kapitala yönəldilmiş vəsaitlərin həcmi hər
il orta hesabla 16,1 faiz, o cümlədən
qeyri-neft sektoruna 28,4 faiz artmışdır.
İlkin
məlumatlara görə, 2013-cü il ərzində
iqtisadiyyatın inkişafına, müxtəlif sosial və
infrastruktur layihələrinin həyata keçirilməsinə
22,0 milyard manat (28,0 milyard ABŞ
dolları) həcmində investisiya yönəldilmişdir.
İnvestisiyaların 62,4 faizi daxili mənbələr
hesabına maliyyələşdirilmiş, 37,6 faizi isə
xaricdən cəlb edilmişdir.
Bu
dövr ərzində istifadə olunmuş investisiya vəsaitlərinin
5,6 milyard manatı (7,2 milyard ABŞ
dolları) neft-qaz sektorunun inkişafına, 16,3 milyard
manatı (20,8 milyard ABŞ dolları) iqtisadiyyatın qeyri-neft
sahələrinin və maliyyə bazarının inkişaf
etdirilməsinə yönəldilmişdir.
Əvvəlki
illə müqayisədə ölkədə ümumi
investisiya qoyuluşlarının həcmi 8,7
faiz, o cümlədən qeyri-neft sektoruna yönəldilmiş
investisiyalar 7,0 faiz artmışdır. Son 10 ildə ölkə
iqtisadiyyatına bütün mənbələrdən 155,6 milyard dollar investisiya qoyulmuş və hər
il orta hesabla 20,5 faiz, o cümlədən qeyri-neft sektoruna
yönəldilən sərmayələr 34,3 faiz
artmışdır. İnvestisiyaları cəlb
etməklə yanaşı, ölkəmiz investisiya ixracatçısı
kimi də çıxış edir. 2013-cü ildə Azərbaycan
tərəfindən digər ölkələrin
iqtisadiyyatına 1,5 milyard dollar sərmayə
yatırılmış və əvvəlki illə müqayisədə
35,6 faiz artmışdır. Son 10 ildə isə
investisiyaların ixracı 8,0 milyard dollar
olmuşdur.
Regionların
sosial-iqtisadi inkişafına və əhalinin ərzaq məhsulları
ilə etibarlı təminatına dair Dövlət
proqramlarında nəzərdə tutulmuş tədbirlərin
uğurla həyata keçirilməsi, sahibkarlara göstərilən
hərtərəfli dövlət dəstəyi (güzəştli
kreditlərin verilməsi, emal müəssisələri və
məhsul saxlama anbarlarının şəbəkəsinin
genişləndirilməsi, kənd təsərrüfatı
texnikası ilə təminatın
yaxşılaşdırılması, cins mal-qaranın
satışı və s.) ayrı-ayrı kənd təsərrüfatı
məhsullarının istehsalının
artırılmasına öz müsbət təsirini göstərmiş
və nəticədə ölkənin aqrar bölməsi
2013-cü ili uğurla başa vurmuşdur.
Kənd təsərrüfatının
ümumi məhsulunun dəyəri 5,2
milyard manat olmuş və 2012-ci ildəkinə nisbətən
4,9 faiz, o cümlədən bitkiçilik məhsulları
üzrə 4,2 faiz, heyvandarlıq məhsulları üzrə
isə 5,5 faiz artmışdır.
Kənd təsərrüfatının
ümumi məhsulunda bitkiçilik məhsullarının
xüsusi çəkisi 50,1 faiz,
heyvandarlıq məhsullarının isə müvafiq olaraq
49,9 faiz olmuşdur.
Bitkiçilik. 2013-cü ildə qarğıdalı da daxil olmaqla 1073,7
min hektar sahədən, hər hektardan orta hesabla 27,6 sentner
olmaqla, ilkin çəkidə 2962,0 min ton taxıl məhsulu
toplanmış və 2012-ci ilə nisbətən onun
istehsalı 5,7 faiz və ya 159,8 min ton artmışdır.
Dənli və dənli paxlalıların tərkibində
payızlıq və yazlıq buğda əsas yer tutur. İstehsal olunmuş
taxıl məhsulunun 64,1 faizini və ya
1898,1 min tonunu buğda, 7,0 faizini və ya 208,2 min tonunu
qarğıdalı təşkil etmişdir.
2013-cü
ildə 45,2 min ton xam pambıq və 3,5 min
ton tütün istehsal edilmişdir.
Ölkədə
5,5 min hektar sahədə emal
üçün şəkər çuğundurunun əkini
aparılmış və həmin sahələrdən 187,9 min
ton məhsul götürülmüşdür.
2013-cü
ildə sahələrdən 992,8 min ton kartof, 1236,3 min ton tərəvəz,
429,8 min ton bostan məhsulları toplanmış və əvvəlki
ilin müvafiq dövrünə nisbətən kartofun
istehsalı 2,5 faiz, tərəvəzin istehsalı 1,7 faiz,
bostan məhsullarının istehsalı 0,4 faiz
artmışdır.
Meyvə
və giləmeyvə istehsalı 2012-ci ilə nisbətən
43,8 min ton (5,4 faiz), üzüm istehsalı 3,1 min ton (2,1 faiz)
artaraq müvafiq olaraq 853,8 min tona və 154,1 min tona
çatmış, çay yarpağı istehsalı isə təqribən
keçən illə eyni səviyyədə (568 ton)
olmuşdur.
Heyvandarlıq. Heyvandarlıq kənd təsərrüfatının
vacib sahəsidir və son illər sürünün cins tərkibinin
yaxşılaşdırılması istiqamətində
görülmüş tədbirlər məhsuldarlığın
yüksəldilməsinə və mal-qaranın baş
sayının sabitləşdirilməsinə səbəb
olmaqla yanaşı, məhsul istehsalına da öz müsbət
təsirini göstərmişdir.
2014-cü
il yanvarın 1-i vəziyyətinə ölkə üzrə
2735,4 min baş iribuynuzlu mal-qara, o cümlədən 1316,2 min
baş inək və camış,
8733,6 min baş qoyun və keçi mövcud olmuşdur.
İribuynuzlu mal-qaranın 48,1 faizini inək
və camışlar təşkil etmişdir.
2013-cü
ildə diri çəkidə 514,4 min ton ət, 1820,5 min ton
süd, 1401,5 milyon ədəd yumurta və 16,8 min ton yun
istehsal edilmişdir. Ət istehsalı 2012-ci illə müqayisədə
4,3 faiz, süd istehsalı 5,9 faiz, yumurta
istehsalı 14,2 faiz, yun istehsalı isə 1,9 faiz
artmışdır.
Ölkə iqtisadiyyatının əsas
infrastrukturlarından biri olan nəqliyyat sektoru da
dayanıqlı inkişaf edir. Əvvəlki illərdə
olduğu kimi, 2013-cü ildə də nəqliyyat sektoruna
investisiyaların yönəldilməsi, dəmir yolunun, hava nəqliyyatının
yenilənməsi, yeni avtomobil yollarının çəkilişi,
yenidənqurulması, iri layihələrin icrası sahənin
inkişafına öz müsbət təsirini göstərmişdir.
2013-cü
ildə nəqliyyat sektorunda fəaliyyət göstərən
təsərrüfat subyektləri tərəfindən 218,0 milyon ton və ya əvvəlki illə
müqayisədə 3,4 faiz çox yük
daşınmış, qeyri-neft yüklərinin həcmi isə
7,0 faiz artmışdır. Nəqliyyat vasitələri ilə
daşınmış yüklərin 57,4 faizi avtonəqliyyat,
26,6 faizi boru kəməri, 10,7 faizi dəmir yolu, 5,3 faizi dəniz
nəqliyyatı vasitələri ilə həyata
keçirilmişdir.
Ötən
ildə qeyri-dövlət bölməsində yük
daşınması 5,0 faiz artmış, bu
bölməyə məxsus nəqliyyat vasitələri ilə
yük daşınmasının payı nəqliyyat sektorunda
75,0 faiz təşkil etmişdir.
İl ərzində
nəqliyyatçılar 1746,1 milyon nəfərə
və ya əvvəlki ilin eyni dövrü ilə müqayisədə
8,0 faiz çox sərnişinə xidmət göstərmişlər.
Sərnişinlərin 87,9 faizi avtomobil, 11,8
faizi metro nəqliyyatının xidmətlərindən istifadə
etmişlər.
Dəmir
yolu nəqliyyatı ilə yük daşınması 23,2 milyon ton olmuş və əvvəlki illə
müqayisədə 0,5 faiz artmışdır. Orta
hesabla sutkada 662 vaqon yüklənmiş, 585 vaqon
boşaldılmışdır.
Sutka ərzində
dəmir yolunun Şimal istiqaməti üzrə 25,0 min ton, Qərb istiqaməti üzrə 6,4 min
ton, Cənub istiqaməti üzrə isə 5,8 min ton yüklənmə
işi yerinə yetirilmişdir.
Dəniz
nəqliyyatında daşınmış yüklərin həcmi
11,5 milyon ton təşkil etmişdir.
Yüklərin 56,4 faizini neft yükləri,
43,6 faizini isə quru yüklər təşkil etmiş və
bütün daşımalar xarici əlaqə üzrə həyata
keçirilmişdir. Dəniz limanlarında 12,4
milyon ton yükləmə-boşaltma işləri həyata
keçirilmişdir. İşlənmiş yüklərin 85,0 faizini beynəlxalq tranzit yüklər təşkil
etmişdir.
Nəqliyyat
sektorunda daşımaların həcminə görə ən
böyük paya malik olan avtomobil nəqliyyatı ilə 125,2 milyon ton yük, 1535,2 milyon sərnişin
daşınmış və 2012-ci illə müqayisədə
müvafiq olaraq 6,0 faiz və 8,3 faiz artım qeydə
alınmışdır. Sərnişinlərin 96,3 faizi avtobus, 3,7 faizi isə minik taksilərinin
xidmətlərindən istifadə etmişlər. Yük
dövriyyəsi 6,1 faiz, sərnişin
dövriyyəsi isə 9,2 faiz artmışdır.
Metro nəqliyyatının
xidmətlərindən istifadə etmiş sərnişinlərin
sayı 206,7 milyon nəfər olmaqla 5,6
faiz artmışdır.
Hava nəqliyyatı
ilə 1665,6 min və ya 4,2 faiz çox sərnişin
daşınmış, daşınmanın 99,6 faizi dövlət,
0,4 faizi isə özəl müəssisələrə məxsus
hava gəmiləri ilə həyata keçirilmişdir. Bu nəqliyyat
növü ilə yükdaşıma 1,5 dəfə
artaraq 121,9 min tona çatmışdır.
Magistral
neft kəmərləri ilə 43,5 milyon ton
neft nəql edilmişdir. Nəqletmənin dördə
üç hissəsi Bakı-Tbilisi-Ceyhan neft ixrac kəməri
ilə həyata keçirilmiş və ötən il ərzində
bu kəmər vasitəsilə 33,0 milyon
ton neft ötürülmüşdür. Dövr ərzində
gəmilər vasitəsilə ölkəyə gətirilərək
Səngəçal terminalından BTC kəməri ilə 3,3 milyon ton tranzit Türkmənistan nefti nəql
edilmişdir.
Magistral
qaz kəmərləri ilə 20,0 milyard
kubmetr qaz nəql edilmiş və 3,9 faiz artım qeydə
alınmışdır. Nəql edilmiş qazın 23,6 faizi Bakı-Tbilisi-Ərzurum Cənubi Qafqaz
boru kəməri vasitəsilə həyata keçirilmiş və
4,7 milyard kub-metr qaz ötürülmüşdür.
2013-cü
ildə “İpək yolu” nəqliyyat dəhlizinin Azərbaycan ərazisində
59,0 milyon ton və ya 3,8 faiz çox
yük, 285,1 milyon nəfər və ya 9,3 faiz çox sərnişin
daşınmışdır. Yüklərin 27,4
milyon tonu və ya 46,5 faizi avtomobil nəqliyyatı, 21,4 milyon
tonu və ya 36,2 faizi dəmir yolu nəqliyyatı, 10,2 milyon
tonu və ya 17,3 faizi dəniz nəqliyyatı ilə
daşınmışdır.
Yük
daşımaları fəaliyyətindən 476,3
milyon manat, sərnişin daşınmasından isə 106,5
milyon manat gəlir əldə olunmuş və müvafiq olaraq
7,5 faiz və 15,8 faiz artmışdır.
İnformasiya və rabitə sektoru öz inkişaf
sürətinə görə iqtisadiyyatın digər sahələrini
qabaqlamışdır. Son 10 ildə bu sektor 8,1 dəfə
və ya hər il orta hesabla 23,3 faiz irəliləmişdir.
Ötən ildə təsərrüfat subyektlərinə və
əhaliyə 1528,1 milyon manatlıq və
ya əvvəlki ilin müvafiq dövrünə nisbətən
müqayisəli qiymətlərlə 10,7 faiz çox xidmət
göstərilmişdir. Əhaliyə göstərilmiş
informasiya və rabitə xidmətlərinin payı 72,4 faiz təşkil etmişdir.
Xidmətlərdən
əldə olunmuş gəlirlərin 59,1
faizi mobil telefon rabitəsindən yaranmış və 2012-ci
illə müqayisədə bu xidmətlərin həcmi 17,4
faiz artaraq 902,5 milyon manat təşkil etmişdir.
2013-cü
ildə əmtəə bazarının dinamik inkişafı
davam etmiş, pərakəndə ticarət şəbəkəsində
satılmış əmtəələrin həcmi 2012-ci ilin səviyyəsini
9,9 faiz üstələyərək 19,7 milyard manat
olmuş, real artımın 3,8
faizi hüquqi şəxslərin,
75,1 faizi hüquqi şəxs yaratmadan fəaliyyət göstərən
fərdi sahibkarların ticarət subyektlərində, 21,1 faizi
isə əmtəə bazarlarında yaranmışdır.
İstehlak bazarından alınmış məhsulların 51,7 faizini ərzaq məhsulları, 48,3 faizini
qeyri-ərzaq malları təşkil etmiş, ərzaq məhsullarının
satışı 2,3 faiz, qeyri-ərzaq mallarının
satışı isə 20,2 faiz artmışdır.
İstehlakçıların pərakəndə ticarət
şəbəkələrində xərclədiyi vəsaitin
51,7 faizi qida məhsulları və içkilərin, 1,7 faizi
tütün məmulatlarının, 19,3 faizi toxuculuq
malları, geyim və ayaqqabının, 4,4 faizi elektrik
malları və mebelin, 1,2 faizi kompyuter avadanlıqları,
kitab və digər çap məmulatlarının, 1,2 faizi əczaçılıq
və tibbi malların, 6,4 faizi benzin və digər neft məhsullarının,
14,1 faizi isə digər qeyri-ərzaq mallarının
alınmasına sərf olunmuşdur.
2013-cü
il ərzində əhalinin alıcılıq qabiliyyətinin
yüksəlməsi müşahidə olunmuş, pərakəndə
ticarət şəbəkəsində hər bir ölkə
sakini orta hesabla ayda 176,2 manatlıq və ya 2012-ci illə
müqayisədə 16,7 manat çox əmtəə
almışdır.
2013-cü
ildə pərakəndə elektron ticarət dövriyyəsinin
real həcmi 1,6 dəfə artaraq 2586,0 min
manat olmuşdur. Elektron ticarət üzrə istehlak
mallarının satışının 82,6
faizi hüquqi şəxslər, 17,4 faizi hüquqi şəxs
yaratmadan sahibkarlıq fəaliyyəti göstərən fiziki
şəxslərin ticarət subyektləri tərəfindən
həyata keçirilmişdir.
2013-cü
ildə elektron ticarət dövriyyəsinin 89,7
faizini təşkil edən qeyri-ərzaq mallarının
satışı 2012-ci il ilə müqayisədə 1,5 dəfə
artaraq 2319,0 min manata bərabər olmuşdur. Elektron ticarət
əsasında istehlakçılara 267,0
min manatlıq və ya 2012-ci il ilə müqayisədə 2,4
dəfə çox ərzaq malları
satılmışdır.
2013-cü
ildə ictimai iaşə dövriyyəsinin həcmi 2012-ci illə
müqayisədə 16,0 faiz artaraq 800,1
milyon manata çatmışdır.
Özəl
sektorda ictimai iaşə dövriyyəsinin 47,3
faizi hüquqi şəxs statuslu müəssisələrin,
52,7 faizi isə bu sahədə sahibkarlıq fəaliyyəti
ilə məşğul olan fərdi sahibkarların payına
düşür. Hüquqi şəxs statuslu müəssisələrdə
dövriyyənin həcmi 2012-ci illə müqayisədə 17,0 faiz artaraq 372,3
milyon manat təşkil etmişdir.
Əhaliyə
göstərilən pullu xidmətlərin həcmi əvvəlki
ilin müvafiq dövrü ilə müqayisədə 8,2 faiz artaraq 6527,3 milyon manat olmuşdur. Artımın 64,1
faizi hüquqi şəxslərin müəssisələrində
yaranmış və bu müəssisələrdə əhaliyə
4879,8 milyon manatlıq və ya 7,0 faiz çox pullu xidmətlər
göstərilmiş, hər bir ölkə sakini hər ay orta
hesabla 58,5 manatlıq və ya 5,6 manat çox müxtəlif
pullu xidmətlərdən istifadə etmişdir.
2013-cü
ildə Azərbaycan Respublikasının
rezidentləri dünyanın 149 ölkəsindəki tərəfdaşları
ilə ticarət əməliyyatları həyata
keçirmiş, 105 ölkəyə əmtəə ixrac
olunmuş, 141 ölkədən idxal olunmuşdur.
Dövlət
Gömrük Komitəsindən daxil olmuş məlumatlara əsasən
2013-cü ildə xarici ölkələrlə 34,7 milyard
ABŞ dolları məbləğində ticarət, o cümlədən
24,0 milyard dollarlıq ixrac və 10,7 milyard dollarlıq idxal əməliyyatları
aparılmış, 13,3 milyard dollarlıq müsbət saldo
yaranmışdır. 2012-ci ilə nisbətən əmtəə
mübadiləsinin dəyəri müqayisəli qiymətlərlə
6,3 faiz, o cümlədən ixracın həcmi
5,1 faiz, idxalın həcmi isə 9,1 faiz artmışdır.
Xarici
ticarət dövriyyəsinin beşdə dörd hissəsindən
çoxu (83,9 faizi) İtaliya, İndoneziya, Rusiya, Almaniya, Türkiyə, Böyük Britaniya,
Tailand, Fransa, Amerika Birləşmiş Ştatları,
İsrail, Hindistan, Ukrayna, Yunanıstan, Çin,
Gürcüstan, Portuqaliya, Avstriya və Tayvan (Çinin əyaləti)
dövlətlərinin hesabına formalaşmışdır.
Ölkəmizə
idxal olunmuş malların ümumi həcminin 14,1 faizi
Rusiyanın, 13,7 faizi Türkiyənin, 12,5 faizi Böyük
Britaniyanın, 7,7 faizi Almaniyanın, 5,5 faizi Ukraynanın, 5,3
faizi Çinin, 4,0 faizi Fransanın, hər birində 3,5 faiz
olmaqla Amerika Birləşmiş Ştatları və
Braziliyanın, 2,9 faizi Qazaxıstanın, 2,7 faizi
Yaponiyanın, 2,3 faizi
İtaliyanın, 2,1 faizi Koreyanın, 1,9 faizi
İranın, 1,7 faizi Niderlandın, 1,5 faizi İsveçrənin,
1,2 faizi Gürcüstanın, 13,9 faizi isə digər ölkələrin payına düşür.
İxrac olunmuş
malların 25,0 faizi İtaliyaya, 11,6 faizi İndoneziyaya, 6,9 faizi Tailanda, 5,7
faizi Almaniyaya, 5,3 faizi İsrailə, 4,7 faizi Fransaya, 4,6 faizi
Hindistana, 4,5 faizi Rusiyaya, 4,1 faizi Amerika Birləşmiş
Ştatlarına, 3,4 faizi Yunanıstana, hər birində 2,2
faiz olmaqla Türkiyə, Portuqaliya və Gürcüstana, 2,0
faizi Böyük Britaniyaya, 1,9 faizi Tayvana (Çinin əyaləti),
1,7 faizi Avstriyaya, 1,5 faizi İraqa, 1,3 faizi Vyetnama, qalan 9,2 faizi
isə digər ölkələrə göndərilmişdir.İxrac
olunmuş, lakin 2013-cü ildə məlumatları rəsmiləşdirilməyən xam neft və təbii qazın həcmi
də nəzərə alınmaqla, statistik məlumatlara əsasən
xarici ticarət dövriyyəsinin həcmi 43,5 milyard ABŞ
dollarına bərabər olmuş və 2012-ci illə
müqayisədə 2,7 faiz artmışdır. Əmtəə
dövriyyəsinin ümumi həcminin 75,4
faizini, yaxud 32,8 milyard dollarını ölkədən ixrac
olunmuş mallar təşkil etmişdir. Xarici ticarət
dövriyyəsinin 39,5 milyard dolları,
yaxud 90,7 faizi, o cümlədən ixracın 31,3 milyard
dolları (95,4 faizi) MDB üzvü dövlətləri istisna
olmaqla digər dövlətlərin payına
düşmüşdür. Bu ölkələrlə ticarət
dövriyyəsi 2,4 faiz, ixrac olunan
malların həcmi isə 0,2 faiz artmışdır. Qeyri-neft
məhsullarının ixracı ilbəil artaraq 2013-cü ildə
1773 milyon dollara çatmış və son 10 il ərzində
hər il orta hesabla 10,6 faiz
artmışdır.
2009-2013-cü
illəri əhatə edən regionların sosial-iqtisadi inkişafının
ikinci Dövlət Proqramının başa çatması nəticəsində
ölkədə 471,0 min yeni, o cümlədən
358,2 min daimi iş yeri açılmışdır. Təkcə
2013-cü ildə 109,9 min, o cümlədən
83,0 mini daimi iş yerləri yaradılmışdır ki, bu
da işsizlik və yoxsulluq səviyyəsinin aşağı
salınmasını şərtləndirən əsas amillərdən
biridir. Belə ki, işsizlik səviyyəsi 0,2
faiz bəndi azalaraq 5,0 faizə, yoxsulluq səviyyəsi isə
0,7 faiz bəndi azalaraq 5,3 faizə enmişdir.
2013-cü
ildə dövlət büdcəsinin gəlirləri 19,5 milyard manat, xərcləri 19,1 milyard manat təşkil edərək
əvvəlki illə müqayisədə müvafiq olaraq 12,8
faiz və 9,9 faiz artmışdır.
Daxilolmaların
13,9 faizi əlavə dəyər vergisi, 12,2 faizi hüquqi
şəxslərin mənfəət (gəlir) vergisi, 4,4 faizi
fiziki şəxslərin gəlir vergisi, 3,0 faizi aksiz vergisi,
3,5 faizi xarici iqtisadi fəaliyyətlə bağlı vergilər,
2,2 faizi digər vergilər, 60,8 faizi isə vergi olmayan gəlirlər
hesabına təmin edilmişdir.
Büdcə
vəsaitlərinin 8,2 milyard manatı (42,9 faizi)
iqtisadiyyatın inkişaf etdirilməsinə, 1,7 milyard
manatı (9,2 faizi) əhalinin sosial müdafiəsi və sosial
təminatına, 1,4 milyard manatı (7,5 faizi) təhsilin, 618,9
milyon manatı (3,2 faizi) isə səhiyyənin maliyyələşdirilməsinə
xərclənmişdir.
Büdcənin
icrasında yaranmış 351,1 milyon
manatlıq profisit ümumi daxili məhsulun 0,6 faizini təşkil
etmişdir.
2014-cü
il yanvarın 1-i vəziyyətinə ölkənin bank-kredit təşkilatları
tərəfindən 15,4 milyard manat həcmində
və ya il ərzində 26,0 faiz çox kreditlər
verilmişdir. Qüvvədə olan kreditlərin 34,4 faizi dövlət, 62,8 faizi özəl
banklar, 2,8 faizi bank olmayan kredit təşkilatlarının
payına düşmüşdür. ümumi
kredit portfelinin 78,4 faizini uzunmüddətli kreditlər təşkil
etmiş, 5,1 faizinin ödənilmə vaxtı
keçmişdir.
2014-cü
il yanvarın 1-nə əhalinin banklardakı əmanətlərinin
həcmi 25,1 faiz artaraq 6,4 milyard manata
çatmışdır.
Əmanətlərin
3888,3 milyon manatı və ya 60,8 faizi milli,
2507,5 milyon manatı xarici valyuta şəklində qoyulmuş
və əvvəlki ildəkinə nisbətən müvafiq
olaraq 31,2 və 16,6 faiz artmışdır.
2013-cü
ildə istehlak mallarının qiymətləri və xidmət
tarifləri 2012-ci ilə nisbətən 2,4
faiz, o cümlədən ərzaq məhsullarının qiymətləri
2,2 faiz, qeyri-ərzaq mallarının qiymətləri 0,8 faiz,
pullu xidmətlərin qiymət və tarifləri isə 3,5
faiz bahalaşmışdır.
Ərzaq
məhsullarından “Yağ və piylər” qrupu məhsullarının
qiymətləri 1,0 faiz, “Qənd, cem, bal, şokolad və
konfetlər” qrupu məhsullarının qiymətləri 1,4
faiz ucuzlaşmış, “Çörək məmulatları və
yarmalar” qrupu məhsullarının qiymətləri 1,3 faiz,
“Ət məhsulları” qrupu 0,5 faiz, “Balıq məhsulları”
qrupu 0,2 faiz, “Meyvə” qrupu 5,2 faiz, “Tərəvəz” qrupu 4,1
faiz, “Qəhvə, çay və kakao” qrupu 1,6 faiz, “Spirtli
içkilər” qrupu 0,1 faiz, “Tütün məmulatları”
qrupu məhsullarının qiymətləri 11,5 faiz
bahalaşmışdır.
Qeyri-ərzaq
mallarından “İri alət və avadanlıqlar” qrupu mallarının qiymətləri 2,4
faiz, “Minik avtomobilləri” qrupu 3,2 faiz, “Telefon faksimil
cihazları” qrupu 0,9 faiz, “Fotoqrafiya, kinematoqrafiya
avadanlıqları və optik cihazlar” qrupu 0,3 faiz, “Oyuncaqlar” qrupu
0,3 faiz, “Zərgərlik məmulatları” qrupu
mallarının qiymətləri 0,3 faiz ucuzlaşmış,
“Parçalar” qrupu mallarının qiymətləri 1,1 faiz,
“Geyim” qrupu 0,9 faiz, “Ayaqqabı” qrupu 1,0 faiz, “İnşaat
materialları” qrupu 0,4 faiz, “Duru yanacaq” qrupu 2,8 faiz, “Mebel və
ev əşyaları” qrupu 1,0 faiz,
“Xalça və digər döşəmə
örtükləri” qrupu 0,9 faiz, “Məişət
cihazları” qrupu 0,1 faiz, “Kiçik alət və
avadanlıqlar” qrupu 0,2 faiz, “Şüşə məmulatları,
yemək qabları və əşyaları” qrupu 1,5 faiz, “Dərmanlar”
qrupu 0,4 faiz, “Minik avtomobilləri üçün ehtiyat hissələri”
qrupu 0,1 faiz, “Yanacaq və sürtkü materialları” qrupu
2,5 faiz, “Məlumatın işlənməsi
üçün avadanlıqlar” qrupu mallarının qiymətləri
0,1 faiz
bahalaşmışdır.
2013-cü
ildə “Tibbi xidmət” qrupu 0,1
faiz, “Mehmanxana xidməti” qrupu 0,3 faiz, “Kompleks istirahətin təşkili”
qrupu 0,7 faiz, “Dəmiryol sərnişindaşıma nəqliyyatı”
qrupu tarifləri 1,2 faiz ucuzlaşmış, “Paltarların təmizlənməsi,
təmiri və kirayəsi” qrupu 0,8 faiz, “Ayaqqabıların təmiri”
qrupu 3,8 faiz, “Məişət cihazlarının təmiri”
qrupu 1,1 faiz, “Ali təhsil” qrupu 4,5 faiz, “Hava sərnişindaşıma
nəqliyyatı” qrupu 10,1 faiz, “Sadalanan kateqoriyalara aid edilməyən
digər xidmətlər” qrupu tarifləri isə 76,1 faiz
bahalaşmışdır.
2013-cü
il ərzində müəssisə və təşkilatların
sayı 8,9
faiz artaraq, 2014-cü il yanvarın 1-i vəziyyətinə
86010 olmuşdur.
Artım əsasən
iqtisadiyyatın “Digər sahələrdə xidmətlərin
göstərilməsi”, “Təhsil”, “İnformasiya və rabitə”,
“Peşə, elmi və texniki fəaliyyət”, “Daşınmaz
əmlakla əlaqədar əməliyyatlar” bölmələrində
daha nəzərəçarpacaq dərəcədə
olmuşdur.
“Ticarət;
nəqliyyat vasitələrinin təmiri”, “Digər sahələrdə
xidmətlərin göstərilməsi”, “Tikinti”, “Kənd təsərrüfatı,
meşə təsərrüfatı və
balıqçılıq” və “Emal sənayesi” bölmələrində müəssisə və təşkilatların
Dövlət registrindəki xüsusi çəkisi daha
yüksək olmuşdur.
Xüsusi
mülkiyyətə malik olan müəssisə və təşkilatların
əsas hissəsi “Ticarət; nəqliyyat vasitələrinin təmiri”
(30,2%), “Digər sahələrdə xidmətlərin
göstərilməsi” (17,4%), “Kənd təsərrüfatı,
meşə təsərrüfatı və
balıqçılıq” (12,3%), “Tikinti” (11,4%), “Emal sənayesi”
(6,6%) və “Peşə, elmi və texniki fəaliyyət”
(5,3%) bölmələrinin payına düşür.
Statistik
vahidlərin Dövlət registrində qeydiyyatdan
keçmiş tam xarici investisiyalı və birgə müəssisələr
əsasən Türkiyə (34,0%),
Böyük Britaniya (9,9%), Rusiya (7,3%), İran (5,8%), ABŞ
(3,9%), Almaniya (2,4%) və digər ölkələrin (36,7%)
sahibkarları tərəfindən yaradılmışdır.
2014-cü
il yanvarın 1-i vəziyyətinə
hüquqi şəxs yaratmadan sahibkarlıq fəaliyyəti ilə
məşğul olmaq üçün qeydiyyatdan
keçmiş fərdi sahibkarların sayı 454 mindən
çox olmuşdur. Bu dövrdə fərdi sahibkarların
çox hissəsi “Ticarət; nəqliyyat vasitələrinin təmiri”
(38,8%), “Nəqliyyat və anbar təsərrüfatı”
(15,0%), “Kənd təsərrüfatı, meşə təsərrüfatı
və balıqçılıq” (13,9%) və “Digər sahələrdə
xidmətlərin göstərilməsi” (13,2%) bölmələrində
qeydiyyatdan keçmişdir.
Sahibkarlıqla
məşğul olan fərdi sahibkarların 82,1
faizini kişilər, 17,9 faizini isə qadınlar təşkil
etmişdir.
2013-cü
ildə əhalinin gəlirləri əvvəlki ilə nisbətən
8,0 faiz artaraq 37,6 milyard manata, hər nəfərə
düşən gəlirlərin məbləği isə 6,6
faiz artaraq 4039,6 manata
çatmışdır.
Bu
dövr ərzində gəlirlərin 64,3 faizi son istehlaka, 8,3
faizi vergilər, sosial sığorta və üzvlük
haqlarının, 1,8 faizi kreditlər üzrə faizlərin
ödənilməsinə, 25,6 faizi isə əmanətlərin
və kapitalın artırılmasına yönəldilmişdir.
Əhalinin
sərəncamında qalan gəlirlər 34,5
milyard manat təşkil edərək əvvəlki ilin eyni
dövrünə nisbətən 8,0 faiz artmışdır.
2013-cü
ildə ölkə iqtisadiyyatında muzdla çalışan
işçilərin orta aylıq əmək haqqı əvvəlki
ilə nisbətən 6,2 faiz artaraq 423,0
manat, neft sektorunda 1554,0 manat, qeyri-neft sektorunda 393,3 manat,
dövlət bölməsində 344,6 manat, özəl
bölmədə 542,3 manat təşkil etmişdir.
Digər fəaliyyət növləri ilə müqayisədə
mədənçıxarma sənayesində, maliyyə və
sığorta fəaliyyətində, informasiya və rabitədə,
peşə, elmi və texniki fəaliyyət sahəsində,
tikintidə, inzibati və yardımçı xidmətlərin
göstərilməsi sahəsində orta aylıq nominal əmək
haqqı daha yüksək olmuşdur.
Əhalinin sosial müdafiəsinin
yaxşılaşdırılması ölkədə həyata
keçirilən sosial siyasətin əsas istiqamətlərindən
biridir.
2006-cı
il yanvarın 1-dən tətbiq edilən
sığorta-pensiya sistemi əmək pensiyalarının baza
hissəsinin istehlak qiymətləri indeksi nəzərə
alınmaqla bütün pensiyaçılar üzrə bərabər
məbləğdə artırılmasını və
sığorta hissəsinin indeksləşdirilməsini nəzərdə
tutur ki, bu da bazar iqtisadiyyatı mühitində vətəndaşların
pensiya təminatı hüququnun etibarlı müdafiəsini
ifadə edir.
İlkin
məlumatlara əsasən, 2014-cü ilin əvvəlinə
ölkədə pensiyaçıların sayı 1276,2 min nəfər olmuş və ölkə əhalisinin
13,6 faizini təşkil etmişdir. Təyin olunmuş aylıq
pensiyaların orta məbləği 170,4
manata çatmış və orta əmək haqqının
40,3 faizini təşkil etmişdir.
Cari ilin əvvəlinə
316,4 min nəfər sosial müavinət, 35,0 min nəfər
Azərbaycan Respublikası qarşısında xüsusi xidmətlərə
görə təqaüd və 140,7 min ailənin 615,5 min nəfər üzvü
ünvanlı dövlət sosial yardımı
almışdır. 2013-cü il ərzində birdəfəlik
müavinət alanların sayı 120,8 min
nəfər olmuşdur.
Son zamanlar ölkəmizdə səhiyyə sistemində
mühüm islahatlar həyata keçirilmişdir. Azərbaycanın
dövlət büdcəsində səhiyyə sahəsinin
inkişafına ayrılan vəsaitin məbləği
artır, ölkədə yeni müasir müalicə
ocaqları inşa edilir və yenidən qurulur.
Ötən
il ərzində 81 tibb müəssisəsində
təmir-tikinti işləri aparılmışdır.
Bütün müəssisələr ən müasir tibbi
avadanlıq və ləvazimatlarla təchiz olunmuşdur.
Əhaliyə
göstərilən tibbi xidmətin həcminin genişləndirilməsində
və keyfiyyətinin artırılmasında səhiyyənin
ayrı-ayrı sahələri üzrə qəbul edilmiş və
budcədən maliyyələşdirilən dövlət
proqramlarının əhatə etdiyi sahələr üzrə
həyata keçirilən tədbirlər nəticəsində
ana və uşaqlara, onkoloji, endokrinoloji, irsi qan xəstəliyi, böyrək
çatışmazlığı və sair xəstələrə
göstərilən tibbi xidmətin səviyyəsi xeyli
yüksəlmiş, bu xəstəliklər üzrə
müayinələrin həcmi artırılmış, xəstələrin
dərmanla təchizatı əhəmiyyətli dərəcədə
yaxşılaşmışdır.
Proqramların icrasına ayrılan vəsait ilbəil
artırılır. Təkcə 2013-cü ildə proqramların icrası məqsədilə
80,1 milyon manat vəsait sərf olunmuşdur. 2014-cü ilə
isə 86,0 milyon manat vəsaitin
ayrılması planlaşdırılır.
İlkin
məlumatlara əsasən, 2014-cü ilin əvvəlinə
ölkədə 33,3 min həkim və 58,2 min orta tibb
işçisi çalışan 550 xəstəxana və
1734 ambulatoriya-poliklinika müəssisəsi fəaliyyət
göstərmiş və əhalinin hər 10 min nəfərinə
orta hesabla 36 həkim və 62 orta tibb işçisi
düşmüşdür.
Ətraf mühitin mühafizəsi, ölkə vətəndaşlarının
təhlükəsiz və sağlam mühitdə
yaşamasının təmin edilməsi, təbii sərvətlərdən
xalqın rifahının yaxşılaşdırılması
üçün səmərəli istifadə edilməsi,
ekoloji problemlərin aradan qaldırılması istiqamətindəki
işlər ötən ildə də davam etdirilmişdir.
2014-cü
ilin əvvəlinə flora və faunanın qorunub
saxlanması və təkrar istehsalı üçün
ölkədə ümumi sahəsi 209,1 min hektar olan 11 dövlət
təbiət qoruğu, sahəsi 322,3 min hektar olan 9 milli park və
sahəsi 361,2 min hektar olan 24 yasaqlıq mövcuddur.
Ekologiya və
Təbii Sərvətlər Nazirliyinin monitorinq xidmətləri
tərəfindən 2013-cü ildə 1879 müəssisədə
müvafiq müayinələr aparılmış və nəticədə
su hövzələrinin çirkləndirilməsi üzrə
tədqiq olunmuş hər dörd müəssisədən
birində və atmosfer havasının çirkləndirilməsi
üzrə müayinəyə cəlb olunmuş hər beş müəssisədən birində
atılan tullantıların icazə verilən həddən
artıq olması qeydə alınmışdır. Təbiəti
mühafizə qanunvericiliyinin pozulmasına görə ötən
il inzibati məsuliyyətə cəlb olunmuş 842 nəfər
vəzifəli şəxs və vətəndaşdan 1344,6 min manat məbləğində cərimə
tutulmuşdur.
Təhsil
sistemində aparılan uğurlu islahatlar nəticəsində
əhalinin təhsil səviyyəsi ilbəil artır və bu
gün 15 və yuxarı yaşda olan əhalinin hər 1000 nəfərindən
969-u ali, orta ixtisas və orta təhsilə
malikdir.
İlkin
məlumatlara əsasən, 2014-cü ilin yanvarın 1-i vəziyyətinə
ölkədə fəaliyyət göstərən 1637
dövlət və 40 qeyri-dövlət məktəbəqədər
təhsil müəssisəsində 112 min uşaq və ya 1-5
yaşlı uşaqların 15,0 faizi tərbiyə
almışdır.
2013/2014-cü
tədris ilinin əvvəlinə ölkənin 4477 dövlət
və 28 qeyri-dövlət əyani
ümumi təhsil müəssisələrində 1,3 milyon
şagird təhsil alır. Bundan əlavə,
sağlamlıq imkanları məhdud olan 6352 uşağın
təhsil aldığı 17 xüsusi məktəb və ya
ümumi təhsil müəssisələrində xüsusi
siniflər fəaliyyət göstərir.
Son illər ikinci və üçüncü növbələrdə
məşğul olan şagirdlərin xüsusi çəkisinin
azalması müşahidə olunur. Belə ki, şəhər yerlərində
yerləşən ümumi təhsil müəssisələrində
bu göstərici 18,2 faizdən 17,0 faizə,
kənd yerlərində isə 14,2 faizdən 12,6 faizə
düşmüşdür.
Dövlət ümumi təhsil müəssisələrinin
sayında lisey və gimnaziyalar şəbəkəsinin
inkişafı davam edir. 2013/2014-cü tədris ilinin əvvəlinə
şagirdlərinin sayı 49,9 min nəfərdən
artıq olan 81 dövlət liseyi və gimnaziyası fəaliyyət
göstərmişdir.
Dövlət müəssisələrinin ümumi
sayında məcburi köçkün uşaqlar üçün
620 əyani ümumi təhsil müəssisəsi fəaliyyət
göstərir və burada 78 min nəfər şagird təhsil
alır.
Dövlət
Statistika Komitəsi tərəfindən 2013-cü ilin sentyabr
ayında dövlət əyani ümumi təhsil müəssisələrində
keçirilmiş statistik müayinənin nəticələrinə
görə, məktəblərin 88,3 faizi,
o cümlədən şəhər yerlərində 97,4 faizi,
kənd yerlərində isə
85,0 faizi kompyuterlərlə təmin olunmuşdur.
Əvvəlki
illə müqayisədə kompyuterlərin sayı 5,8 min ədəd və ya 12,6 faiz artaraq, 51,6 minə
çatmışdır. Hazırda hər 25
şagirdə orta hesabla bir kompyuter düşür. Cari
tədris ilinin əvvəlinə 79,9 faiz şəhər, 37,1
faiz kənd ümümi təhsil müəssisələrinin
internetə çıxışı, 36,1 faiz şəhər,
6,3 faiz kənd ümümi təhsil müəssisələrinin
isə elektron poçtu olmuşdur.
2013/2014-cü
tədris ilinin əvvəlinə ölkədə fəaliyyət
göstərən 58 orta ixtisas təhsil müəssisəsində
63,3 min tələbə təhsil almış, onların
üçdə iki hissəsini qızlar təşkil
etmişdir.
Azərbaycanda
bakalavr və magistrlərın hazırlanmasını həyata
keçirən 37 dövlət və 15 qeyri-dövlət ali təhsil
müəssisəsində təhsil alanların sayı 151,3
min nəfər olmuşdur ki, onların da 48,4 faizini qızlar
təşkil edir.
2013-cü
ildə ölkənin ali təhsil müəssisələrinə
35,4 min nəfər tələbə qəbul
olunmuş və qəbul geniş profilli ixtisas
siyahısına uyğun olaraq həyata keçirilmişdir.
Hazırda
dövlət ali təhsil müəssisələrinin əyani
şöbələrində oxuyan tələbələrin 36,4 faizi təqaüd alır. Tələbələrin
aldığı təqaüdün orta məbləği
bakalavr səviyyəsi üzrə 71 manat 50 qəpik,
magistratura səviyyəsi üzrə 77 manat, əlacı qiymətlərlə
oxuyanlar üçün müvafiq olaraq 88 manat və 93 manat
50 qəpik olmuşdur.
Ölkənin
ali təhsil müəssisələrində
Azərbaycan vətəndaşları ilə birgə 54 xarici
ölkənin 4374 nəfər vətəndaşı da təhsil
alır. Əcnəbi tələbələrin
sırasında Türkiyə, İran, Gürcüstan, Rusiya,
Türkmənistan, Çin Xalq Respublikası və İraq vətəndaşları
üstünlük təşkil edirlər.
2013/2014-cü tədris ilinin əvvəlinə
xarici ölkələrdə dövlət xətti ilə təhsil
alan tələbələrin sayı 3035 nəfər təşkil
etmişdir. Xaricdə təhsil alan gənclərin 62,6 faizi Bakı, 37,4 faizi isə Azərbaycanın
müxtəlif regionlarında yerləşən məktəblərin
məzunlarıdır. Tələbələrin əksəriyyəti
Türkiyə və Rusiyanın ali təhsil
müəssisələrində təhsil alır.
Ölkədə elmin inkişafına dövlət tərəfindən
xüsusi diqqət və dəstək göstərilir. 2014-cü ilin
əvvəlinə ölkədə müxtəlif elmi-texniki
xidmətləri həyata keçirən 140 elmi təşkilat
və müəssisə fəaliyyət göstərmişdir.
Bu elm ocaqlarında elmi tədqiqat və işləmələrlə
21,6 minə yaxın mütəxəssis məşğul
olur, onların da 71,1 faizi tədqiqatçılardır. Mütəxəssislərin hər üç nəfərindən
birinin elmlər doktoru və fəlsəfə doktoru alimlik dərəcəsi
vardır.
Bundan əlavə,
elmi-tədqiqat bölmələrində ştatda olmayan və
ali təhsil müəssisələrində
çalışan 10 min nəfər elmi pedaqoji işçi
elmi-tədqiqat bölmələrində tədqiqat və
işləmələri yerinə yetirir, onların da
yarıdan çoxu elmlər doktoru və fəlsəfə
doktoru alimlik dərəcəsinə malikdirlər.
2014-cü ilin əvvəlinə Milli Elmlər
Akademiyasının 52 akademiki və 100 müxbir üzvü
olmuşdur.
Hazırda ölkədə mədəniyyət sahəsinin
inkişafı ilə əlaqədar bir sıra əhəmiyyətli
layihələr həyata keçirilmiş, milli mədəniyyətimizin
dünyada tanıdılması, ölkəmizin dünyanın
mədəniyyət məkanına uğurla inteqrasiya
olunması, milli mədəni irsimizin, dəyər və sərvətlərimizin
qorunub saxlanılması, inkişaf etdirilməsi istiqamətində
mühüm nəticələrə nail olunmuşdur.
Bu gün
Azərbaycanda 35 milyon kitabxana fondu olan 3389 kütləvi kitabxana, 2747 klub
müəssisəsi, 227 muzey, 28 peşəkar teatr və 347 mədəniyyət
və istirahət parkı əhaliyə xidmət göstərir.
2013-cü
ildə muzeylərə gələnlərin sayı 2,1 milyon nəfər, teatrlara gələnlərin
sayı 582 min nəfər olmuşdur. Teatrlarda
repertuar müntəzəm olaraq təzələnir və
tamaşalar azərbaycan dili ilə yanaşı, rus və ləzgi
dillərində də göstərilir.
Hazırda
Azərbaycanda 28 dövlət əhəmiyyətli tarix, mədəniyyət,
memarlıq, bədii və etnoqrafiya qoruqları mövcuddur.
2013-cü
il Azərbaycan idmanı üçün
uğurlu il olmuşdur. İdmançılarımız
Tələbələrin Yay Universiadasında böyük
uğurlara imza atmış və 16 medal qazanaraq komanda
hesabında 15-ci yerə layiq görülmüşlər.
Ümumiyyətlə, müxtəlif beynəlxalq
yarışlarda qazanılmış 782 medalın 280-i
qızıl, 233-ü gümüş, 269-u isə
bürünc əyarlıdır. Olimpiya idman
növləri üzrə qazanılan medalların
sayı 296-dır. Eyni zamanda, Olimpiya idman növləri üzrə
dörd idmançımız dünya çempionu olmuşdur.
İlkin
məlumatlara görə, 2014-cü ilin əvvəlinə
ölkədə idman qurğularının sayı 10,3 minə çatmış, idmanla məşğul
olanların sayı müntəzəm olaraq artmaqdadır. Əhali arasında futbol, voleybol, şahmat,
yüngül atletika, dama, basketbol, sərbəst güləş,
cüdo və stolüstü tennis kimi idman növlərinə
daha çox maraq göstərilir.
Ölkə
əhalisinin sayı 2013-cü ilin əvvəlinə nisbətən 120,6
min nəfər və yaxud 1,3 faiz artaraq 2014-cü ilin əvvəlinə
9477,1min nəfər olmuşdur.
Əhalinin
ümumi sayından 53,2 faizi şəhər,
46,8 faizi kənd sakinlərinin, 49,7 faizi kişilərin, 50,3
faizi isə qadınların payına düşür.
2013-cü
ildə ölkədə 172,6 min körpə
doğulmuş, onların 53,6 faizini oğlanlar, 46,4 faizini
qızlar təşkil etmişdir. Körpələrin
2270-i əkiz, 42-si isə üçəm doğulmuşdur.
2013-cü
il ərzində ölkədə 86,9 min nikah və 11,7 min
boşanma halları qeydə alınmış və əhalinin
hər 1000 nəfərinə hesabı ilə əvvəlki ilə
nisbətən nikahların sayı 8,6-dan 9,3-ə qədər,
boşanmaların sayı isə 1,2-dən 1,3-ə qədər
artmışdır.
2013-cü
ildə Daxili İşlər Nazirliyi və Dövlət
Miqrasiya Xidmətinin müvafiq qurumları tərəfindən
Azərbaycana daimi yaşamaq üçün 3,1
min nəfər gələn və 0,8 min nəfər ölkədən
gedən qeydə alınmışdır. 2013-cü il ərzində
Azərbaycana daimi yaşamaq üçün gələnlərin
sayı 2012-ci illə müqayisədə 957 nəfər və
ya 44,1 faiz artmışdır.
Dövlət Statistika Komitəsi.
Respublika.-2014.- 22
fevral.- S.8-9.