Qazax: sosial-iqtisadi inkişaf uğur deməkdir

Qazax Rayon İcra Hakimiyyətində 2014-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilmişdir.

İclası Qazax Rayon İcra Hakimiyyətinin başçısı Ayaz Əsgərov giriş sözü ilə açaraq bildirmişdir ki, 2014-cü ilin birinci yarım ili rayon üçün uğurlu olmuşdur.

Rayonda regionların sosial-iqtisadi inkişafı Dövlət Proqramına uyğun olaraq təmir-tikinti, abadlıq, bərpa, quruculuq işləri əvvəlki illərdə olduğu kimi 2014-cü ilin birinci yarımilində də uğurla davam etdirilmişdir.

Dövlət Sosial Müdafiəsi Fondunun Qazax rayon şöbəsi tərəfindən əhalinin pensiya və müavinətlərinin ödənilməsi üçün 2014-cü ilin 6 ayında ödəniş müəssisələrinə 13.423.000 manat vəsait köçürülmüşdür. Bu isə keçən ilin müvafiq dövrünə nisbətən 1.015.000 manat çoxdur.

2014-cü ilin birinci yarımilində Qazax rayon Əhalinin Sosial Müdafiəsi Mərkəzi tərəfindən 2.213.798 manat aylıq müavinət və birdəfəlik müavinət təyin edilmiş və ödənilmişdir. Ötən 6 ay ərzində Mərkəz tərəfindən 2.022 ailəyə ünvanlı sosial yardım təyin edilərək 1.413.510 manat vəsait ödənilmişdir.

Hesabat dövrü ərzində əhalinin elektrik enerjisi və təbii qaz yanacağı ilə təmin olunması sahəsində də müəyyən işlər görülmüşdür.

2014-cü ilin birinci yarımilində Qazax Elektrik şəbəkəsi tərəfindən 10 kilovat hava xəttində 1,13 kilometr, 0,4 kilovat hava xəttində 3,3 kilometr uzunluğunda cari təmir işləri aparılmış, 30 ədəd yararsız dayaqlar yenisi ilə əvəz edilmiş və 36 ədəd transformator cari təmir olunaraq sxemaya qoşulmuşdur.

Qazax şəhərini qidalandıran 35/10 kilovotluq Qazax-1 yarımstansiyasında 4 MVA gücündə olan transformator yeni 6,3 MVA transformatorla əvəz edilmişdir.

Qazax “Su Kanal” idarəsi tərəfindən 2014-cü ilin 6 ayında 5.836 abonentə xidmət göstərilmiş və 207.448 manat vəsait toplanmışdır.

Qazax Mənzil İstismar Sahəsi balansında olan 16 yaşayış binasının dam örtüyündə cari təmir işləri aparmış, ötən 6 ayı ərzində vətəndaşlardan 118,7 faiz mənzil xidmət haqqı toplamışdır.

2014-cü ilin 6 ayı ərzində rayonun təhsil, səhiyyə və mədəniyyət müəssisələri tərəfindən də bir sıra işlər görülmüşdür.

Rayon Təhsil şöbəsinin tabeliyində olan 34 tam orta, 6 orta ümumtəhsil, 7 ibtidai məktəbdə 11.293 nəfər şagirdin təlim-tərbiyəsi ilə 1.808 nəfər müəllim məşğul olur.

2014-cü ilin yanvar ayında olimpiadanın ikinci rayon turunda 9 fənn üzrə 90 nəfər şagird iştirak etmişdir. Onlardan 10 nəfəri mart ayında Bakı şəhərində keçirilən respublika turunda iştirak etmiş, ürkməzli kənd tam orta məktəbin 10-cu sinif şagirdi Baxşəliyev Yadigar biologiya fənni üzrə üçüncü yeri tutmuşdur.

Dövlət başçısı cənab İlham Əliyevin tapşırığına əsasən ölkəmizdə əhalinin tibbi müayinədən keçirilməsi aksiyası Qazax rayonunda da uğurla aparılmışdır. Qazax Rayon İcra hakimiyyəti Başçısının sərəncamı ilə yaradılmış komissiya əhali arasında təbliğat, təşviqat və məlumatlandırma işləri aparmışdır. Bunun nəticəsidir ki, əhali aksiyada mütəşəkkil sürətdə iştirak etmişdir. Müayinə nəticəsində 4.191 nəfərə ambulator, 118 nəfərə stasionar müalicə kursu təyin olunmuş, 47 nəfər isə Bakı şəhərinə müalicəyə göndərilmişdir. Rayonda 20 may 2014-cü il tarixdə qan vermə aksiyası keçirilmiş, 169 nəfər qan vermiş, bu göstərici respublika səviyyəsindən yuxarı olmuşdur.

Rayon gənclər və idman idarəsi tərəfindən 2014-cü ilin 6 ayında gənclərlə iş sahəsi üzrə 11, bədən tərbiyəsı və idman sahəsi üzrə 17 tədbir keçirilmişdir. Keçirilən tədbirlərdə gənclərin bütün təbəqələri təmsil olunmaqla 2.946 nəfər yeniyetmə və gənc iştirak etmişdir. Hesabat dövründə beynəlxalq yarışlarda 19, Respublika yarışlarında 43 nəfər idmançımız mükafata layiq yerlər tutmuşdur.

Regionların sosial-iqtisadi inkişafı Dövlət Proqramı ilə əlaqədar Qazax rayonunda davamlı surətdə yeni iş yerləri açılır. Birinci yarımildə 16 yeni müəssisə yaradılmış, 540-ı daimi olmaqla 560 yeni iş yeri açılmışdır. 2014-cü ilin 6 ayı ərzində Məşğulluq Mərkəzinə 13 dövlət müəssisəsindən 121 və 13 qeyri-dövlət müəssisəsindən 209, cəmi 330 boş iş yeri təqdim edilmişdır. Məşğulluq Mərkəzinə müraciət etmiş 500 nəfər vətəndaşlardan 259 nəfəri iş axtaran kimi qeydiyyata alınmış, 68 nəfər münasib işlə təmin olunmuşdur.

Belə ki, illik gücü 1 milyon ton, ərazisi 56 hektar olan Qazax Sement zavodunun birinci hissəsində tikinti işləri başa çatdırılmış, İİ hissədə klinker istehsalı üzrə tikinti işləri davam etdirilir.

Azərbaycan Respublikası Prezidentinin 18 fevral 2013-cü il tarixli 2730 nömrəli sərəncamı ilə 26 min nəfər əhalinin yaşadığı 15 yaşayış məntəqəsini birləşdirən “Qazax Quşçu Ayrım avtomobil yolunun tikintisi” məqsədilə Azərbaycan Respublikasının 2013-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Qazax rayon İcra Hakimiyyətinə 6,9 milyon manat vəsait ayrılmışdır. Bundan əlavə Qazax-Quşçu Ayrım avtomobil yolunun inşasının başa çatdırılması məqsədilə Azərbaycan Respublikası Prezidentinin 07 oktyabr 2013-cü il tarixli 3183 nömrəli sərəncamı ilə 2 milyon və Azərbaycan Respublikası Nazirlər Kabinetinin 30 dekabr 2013-cü il tarixli 3983 nömrəli müvafiq sərəncamına uyğun olaraq 1,72 milyon manat vəsait ayrılmışdır. Yolun tikinti işləri başa çatdırılaraq istifadəyə verilmişdir. 5 kilometr uzunluğunda Fərəhli avtomobil yoluna nəqliyyatın hərəkətini yaxşılaşdırmaq üçün dəmyə xırı daşınaraq yayılmışdır.

Bundan əlavə Dövlət Proqramına uyğun olaraq Qazax-Kosalar avtomobil yolunun tikinti işlərinə başlanılması nəzərdə tutulmuşdur.

Nazirlər Kabinetinin 30 dekabr 2013-cü il tarixli 374s saylı sərəncamına uyğun olaraq 180 şagird yerlik Quşçu Ayrım kənd tam orta, hər biri 80 şagird yerlik Məzəm və Bala Cəfərli kəndlərində ibtidai məktəblərin tikintisi və Qarapapaq kənd ümumtəhsil orta məktəbində bərpa gücləndirmə işləri sürətlə davam etdirilir. Yeni dərs ilinin başlanılmasına kimi məktəblərin istifadəyə verilməsi nəzərdə tutulur.

Heydər Əliyev Fondunun dəstəyi ilə Qazax şəhərində hər biri 100 yerlik olmaqla 2 ədəd körpələr evi-uşaq bağçalarının tikinti işlərinə başlanılmışdır. Həmin müəssisələr sentyabr ayında istifadəyə veriləcəkdir.

Qazax şəhərinin prospekt və küçələrində yeni işıqlandırma sistemlərinin quraşdırılması işləri davam etdirilir.

Ağköynək kəndi ərazisində şəhərin məişət tullantılarının tökülməsi üçün 30 hektar ərazidə hamarlama və təmizləmə işləri aparılmış, tullantıların mərkəzləşmiş qaydada bir yerə tökülməsi üçün maşın-mexanizmlərinin köməyi ilə “Poliqon” yaradılmışdır. Aslanbəyli kəndində əhalinin içməli suya olan tələbatını yaxşılaşdırmaq məqsədi ilə hər birinin tutumu 16 ton olan 3 ədəd su çənləri quraşdırılmış və su xətləri çəkilərək istifadəyə verilmişdir.

Nazirlər Kabinetinin 30 dekabr 2012-ci il tarixli 374s saylı sərəncamına uyğun olaraq köhnə mərkəzi xəstəxananın yerində yeni 145 çarpaylıq Mərkəzi Xəstəxana Kompleksinin tikintisinə başlanılmışdır.

Ölkə Prezidentinin müvafiq sərəncamı ilə təsdiq edilmiş qaçqın və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramına uyğun olaraq Qazax rayonunun Qazaxbəyli kəndi ərazisində 300 məcburi köçkün ailəsinə bütün infrastrukturlarla birlikdə yeni yaşayış binalarının tikintisi üçün 10 hektar torpaq sahəsi ayrılmışdır. Hazırda Layihə İnstitutu tərəfindən yeni salınacaq qəsəbənin layihə-smeta sənədləri hazırlanır. Yaxın vaxtlarda tikinti işlərinə başlanılacaqdır.

2014-cü ilin 6 ayı ərzində Qazax rayonunda kənd təsərrüfatı məhsullarının artırılması məqsədilə bir sıra səmərəli işlər görülmüş və müsbət nəticələr əldə olunmuşdur.

Nazirlər Kabinetinin 15 fevral 2007-ci il tarixli 32 nömrəli və sonrakı qərarlarının icrası ilə əlaqədar kənd təsərrüfatı məhsulları istehsalçılarına istifadə etdikləri yanacaq və motor yağlarına görə dövlət büdcəsi vəsaiti hesabına 13.553 hektar əkin sahəsi üçün 542.120 manat yardım hesablanaraq sənədlər yardım komissiyasına təqdim edilmişdir.

2014-cü ilin məhsulu üçün payızda və yazda əkilmiş 7.880 hektar sahədə yetişdirilmiş taxıl məhsulu vaxtında biçilərək 20.173 ton məhsul istehsal olunmuşdur. Bu da keçən ilə nisbətən 3.794 ton çoxdur. Hektardan orta məhsuldarlıq 25,6 sentnerə çatdırılmışdır.

2014-cü ilin birinci yarım ili ərzində rayonda ağac əkini davam etdirilmiş, əkilmiş 164.800 ədəd ağacın 30.000 ədədi Bakı-Qırmızı körpü magistral avtomobil yolunun Qazax rayonu ərazisindən keçən hissəsində əkilmişdir. Əkilmiş ağaclara aqrotexniki qulluq işləri davam etdirilir.

İstehsalçılara texnika cəhətdən kömək göstərilməsi məqsədilə Aqroservisdə və şəxsi vətəndaşlarda olan 28 ədəd şum traktoru, 253 ədəd təkərli traktorlar, 15 ədəd toxum təmizləyən, 23 ədəd taxıl və qarğıdalı səpən, 17 ədəd mala, 10 ədəd gübrəsəpən və 50 ədəd digər kənd təsərrüfatı texnikalarından istifadə olunur.

Kənd təsərrüfatı bitkilərindən normal məhsul alınmasına təsir edən əsas amillərdən biri bitkilərin vaxtında suvarma suyu ilə təmin edilməsidir. Cari ilin 6 ayı ərzində suvarma su mənbələrində kifayət qədər suyun olmaması nəticəsində istehsalçılara 39,1 milyon kubmetr su əvəzinə 28,2 milyon kubmetr su verilərək tələbat tam ödənilməmişdir.

Hesabat dövrü ərzində süni yolla mayalandırılmış heyvanlardan 397 baş bala alınmışdır. Heyvandarlıq sahəsində zoobaytar tədbirlərinin planlı surətdə həyata keçirilməsinin nəticəsidir ki, məhsul istehsalı dinamik surətdə artmaqdadır. Belə ki, keçən 6 ay ərzində ötən ilin eyni dövrünə nisbətən 449 ton artıq süd istehsal olunaraq, 14.535 tona, 61 ton artıq ət istehsal olunaraq, 2.476 tona və 88 min ədəd çox yumurta alınaraq 5.525.000 ədədə çatdırılmışdır.

Qazax rayonu baytarlıq idarəsi tərəfindən 2014-cü ilin 6 ayı epizootik, müalicə-profilaktik tədbirlər planına uyğun olaraq aparılmışdır.

2014-cü ilin 6 ayı ərzində Qazax RİH başçısı tərəfindən 22 səyyar görüş-qəbullar keçirilmişdir. Həmin görüşlərdə iştirak edənlərin sayı 14.232 nəfər, müraciət edənlərin sayı 250 nəfər olmaqla 172 təklif irəli sürülmüşdür. Qaldırılan problemlər və təkliflərdən 82-si icra edilmiş, 74 təklif ilə əlaqədar aidiyyəti təşkilatlar qarşısında məsələ qaldırılmış, 16 məsələ üzrə işlərə başlanılmışdır.

İclasın sonunda əminliklə qeyd olundu ki, bundan sonra da həm Dövlət Proqramında nəzərdə tutulmuş vəzifələrin, həm də cari tapşırıqların həyata keçirilməsində səylə çalışacaq, ölkəmizin sosial-iqtisadi sahədə əldə etdiyi uğurlara öz töhfələrini verəcəklər.

İclasın yekununda Qazax Rayon Təhsil Şöbəsinin müdiri Əhməd Dərgahquliyev, Dövlət Sosial Müdafiə Fondu rayon şöbəsinin müdiri Laçın Qurbanov, rayon mərkəzi xəstəxanasının baş həkimi Arzu Novruzov və rayon suvarma sistemləri idarəsinin rəisi Abbas Göyüşov rayonun sosial-iqtisadi inkişafından, əldə olunan uğurlu nəticələrdən söz açdılar.

Əzim YusifbƏyli,

Respublika.-2014.- 20 iyul.- S.3.