“Dənizçi günü”nə həsr olunmuş təntənəli tədbir

İyunun 25-də “Dənizçi günü”nə həsr edilmiş təntənəli yığıncaq keçirilmişdir.

Azərbaycan Respublikası Dövlət Dəniz Administrasiyasının, “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin, Bakı Beynəlxalq Dəniz Ticarət Limanının və “Rusiya Dəniz Registri Azərbaycanda” QSC-nin rəhbərliyi, dənizçilər Fəxri Xiyabanda, ulu öndər Heydər Əliyevin və Zərifə Əliyevanın məzarlarını ziyarət edib abidələri önünə əklil və tər güllər qoyduqdan sonra Dənizçilərin Mədəniyyət Sarayına gəldilər. Dövlət himni oxunduqdan sonra söz DDA-nın rəisi Qüdrət Qurbanova verildi. Q.Qurbanov ölkə Prezidenti cənab İlham Əliyevin 19 iyun tarixli sərəncamı ilə təsis edilmiş yeni “Dənizçi günü” peşə bayramı münasibətilə dənizçiləri təbrik etdi.

Q.Qurbanov çıxışında bildirdi ki, ARDDA ulu öndərimiz Heydər Əliyevin sərəncamı ilə 2001-ci il aprelin 21-də yaradılmış və həmin tarixdən öhdəsinə düşən vəzifələri layiqincə yerinə yetirməkdir.

Natiq qeyd etdi ki, ARDDA Azərbaycan Respublikası Prezidentinin 20 aprel 2006-cı il tarixli fərmanı ilə təsdiqlənmiş əsasnaməyə müvafiq olaraq Azərbaycan Respublikası ərazisində dəniz nəqliyyatı sahəsində müəyyən edilmiş qaydada dövlət siyasətini və tənzimlənməsini həyata keçirən mərkəzi icra hakimiyyəti orqanıdır.

Azərbaycan Respublikası 15 may 1995-ci ildən Beynəlxalq Dəniz Təşkilatının üzvüdür.

DDA BDT ilə sıx əlaqə yaradır, təşkilatın iclaslarında yaxından iştirak edir.

DDA indiyə qədər 20-dən çox beynəlxalq konvensiyalara qoşulub.

Sonra söz “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin sədri Rauf Vəliyevə verildi. QSC-in rəisi dənizçiləri peşə bayramı münasibətilə təbrik edərək dedi:

—Bu gün biz tarixi bir gün yaşayırıq. Birləşmiş dənizçilik cəmiyyəti kimi, ilk dəfə rəsmi olaraq, “Dənizçi günü”nü peşə bayramını qeyd edirik. Azərbaycan Respublikasının Prezidenti cənab İlham Əliyevin 19 iyun tarixli Sərəncamı ilə ölkəmizdə “Dənizçi günü” peşə bayramı təsis edilmişdir. Bu, bütün Azərbaycan dənizçilərinin gərgin, lakin şərəfli əməyinə dövlət başçımızın verdiyi çox yüksək qiymətdir.

Möhtərəm Prezidentimizin dəniz nəqliyyatına daimi diqqət və qayğısının daha bir təzahürü bir qədər əvvəl burada səslənən sərəncamlardır. Əməkdə fərqlənən on dörd nəfər işçiyə fəxri adların verilməsi, onların “Tərəqqi” medalına layiq görülməsi hər birimizin qəlbini iftixar və minnətdarlıq hissi ilə doldurur. Biz ölkə rəhbərinə dərin təşəkkürümüzü bildiririk.

Bu gün tam əminliklə deyə bilərik ki, möhtərəm Prezidentimizin rəhbərliyi altında Azərbaycan dünyada ən sürətlə inkişaf edən dövlətlər sırasındadır.

Fərəhli haldır ki, Azərbaycanın inkişafı təkcə Bakıda deyil, bütün rayonlarda, kəndlərdə hiss olunur. Və bu gün biz qurur hissi ilə qeyd edə bilərik ki, Azərbaycanımızın sürətli inkişafında bizim dənizçilərin də xüsusi əməyi vardır.

Ölkəmiz tarixən Xəzər hövzəsində dənizçiliyin mərkəzi, Bakı ən böyük və əhəmiyyətli liman şəhəri olub. Xəzərdə dənizçilik sahəsinin ən inkişaf etdiyi ölkə kimi, Azərbaycan uzun illər 2 müxtəlif sahədə fəaliyyət göstərən gəmiçilik şirkətinə, gəmi təmiri zavodlarına, liman və digər aidiyyəti infrastruktura malik olubdur. Azərbaycanın keçmişində və bu günündə xüsusi yer tutan Xəzər Dəniz Gəmiçiliyi və Xəzər Dəniz Neft Donanması ayrı-ayrılıqda kifayət qədər iri gəmiçilik təşkilatları kimi fəaliyyət göstəriblər.

Hər iki donanma böyük və zəngin tarixə malikdir. Ötən il Xəzər Dəniz Gəmiçiliyi 155 yaşını qeyd edib, Xəzər Dəniz Neft Donanması isə bu il özünün 65 illiyini qeyd edəcəkdir. Bu iki dənizçilik təşkilatı və onun fədakar dənizçiləri Azərbaycanın müstəqillik qazanması istiqamətində gedən proseslərdə yaxından iştirak edərək xalqımızın ən ağır günlərində həmişə bir yerdə, mübarizənin ön sıralarında olublar. 1990-cı ilin 20 Yanvar hadisələrində dənizçilərimiz hansı donanmada çalışmalarından asılı olmayaraq, vətəndaşlıq şücaəti göstəriblər, imperiya qüvvələrinə qarşı birlikdə mübarizə aparıblar və bütün dünyadan təcrid olunmuş Azərbaycanda baş verən faciə barədə məlumatı ilk olaraq dünya ictimaiyyətinə ötürüblər.

Eyni zamanda, müstəqilliyimizin ilk illərində, iqtisadiyyatımızın ən çətin günlərində, gəmiçilik şirkətlərimiz ölkəmizin həyatında xüsusi rol oynayıblar. Belə ki, 90-cı illərin əvvəllərində və respublikamız müstəqillik qazandıqdan sonra beynəlxalq yükdaşımaların həyata keçirilməsində, Azəri-Çıraq-Günəşli, Şahdəniz, Bahar, Ümid, 28 May və digər bu kimi nəhəng və perspektivli neft-qaz yataqlarının mənimsənilməsində fəal iştirak edən dənizçilərimiz dövlətçiliyimizin möhkəmlənməsinə, iqtisadiyyatımızın gücləndirilməsinə əvəzsiz töhfələr veriblər. Bu tarixi yolda əmək qələbələri də, çətinliklər də çox olub.

Müstəqilliyimizin ilk illərində bütün ölkə iqtisadiyyatında müşahidə edilən tənəzzül, qonşu respublikalarda gəmiçilik və donanmaların ardıcıl olaraq dağılması prosesi hər birimizin yaxşı yadındadır. Belə çətin bir dövrdə yalnız Azərbaycanda mənfi proseslərin qarşısını almaq mümkün oldu. Bu, ümummilli liderimiz Heydər Əliyevin tarixi xidməti idi. Bütün dənizçilər dəniz nəqliyyatının qorunub saxlanması, sonradan daha da inkişaf etdirilməsi üçün məhz ulu öndərə minnətdardırlar. Heydər Əliyev hələ sovet dövründə Azərbaycana rəhbərlik edəndə və Moskvada işləyəndə dəniz nəqliyyatına daim xüsusi diqqət və qayğı göstərib, donanmalarımızın yenilənməsi prosesinin əsasını qoyub, sonradan isə onların dağılmasının qarşısının alınınmasında və bu günümüzə gəlib çatmasında müstəsna rol oynayıb. Həmin tərəqqi strategiyası bu gün möhtərəm Prezidentimiz cənab İlham Əliyev tərəfindən bacarıqla davam etdirilir. Həm nəqliyyat, həm də neft donanmamız hazırda vahid orqanizm kimi bir amala — Azərbaycanın inkişafına xidmət edir.

Möhtərəm Prezidentimiz yeni yaradılmış cəmiyyət qarşısında yerli və beynəlxalq daşımaların səmərəliliyinin artırılması, ölkənin rəqabət qabiliyyətinin və tranzit potensialının gücləndirilməsi kimi, eləcə də “Azərbaycan 2020: Gələcəyə baxış” İnkişaf Konsepsiyasında nəqliyyat səhəsində nəzərdə tutulmuş digər vacib vəzifələr müəyyən etmişdir.

Əsas hədəflərimiz ilkin mərhələdə Xəzər dənizi hövzəsində, daha sonra isə Xəzərdən kənarda rəqabətədavamlı və beynəlxalq standartlara uyğun daşıma xidmətləri göstərən nüfuzlu və çevik gəmiçilik şirkəti qurmaq, kommersiya baxımından səmərəli fəaliyyəti təmin etmək, Azərbaycanın beynəlxalq əhəmiyyətli nəqliyyat və logistika mərkəzinə çevrilməsi siyasətinə xidmət etmək, gəmiçilik sahəsində yüksək ixtisaslı yerli kadrların formalaşmasına nail olmaqdır.

Biz ətraflı inkişaf strategiyasının hazırlanmasını, yeni kadr siyasətinin tətbiqini, idarəetmə strukturunun təkmilləşdirilməsini, idarəetmə mexanizmlərinin effektivliyinin artırılmasını, maliyyə-təsərrüfat fəaliyyətinin optimallaşdırılmasını və beynəlxalq standartlara uyğunlaşdırılmasını, donanmaların yeniləndirilməsini, müştərilər arasında etibarlı tərəfdaş imicinin yaradılmasını qarşıdakı məqsədlərə çatmaq üçün əsas vasitələr kimi qiymətləndiririk.

“Azərbaycan Xəzər Dəniz Gəmiçiliyi” Qapalı Səhmdar Cəmiyyəti tam şəffaflıq və tam nəzarət prinsiplərinə əməl olunmaqla, Maliyyə Hesabatlarının Beynəlxalq Standartlarının tətbiqinə başlamış, müasir SAP ERP proqramı üzrə modulların tətbiqini təmin etmişdir. Bu istiqamətdə işlər beynəlxalq standartlara tam uyğunlaşana qədər davam etdiriləcəkdir.

Bu gün “Azərbaycan Xəzər Dəniz Gəmiçiliyi” Qapalı Səhmdar Cəmiyyəti nəqliyyat kompleksində önəmli yer tutur və beynəlxalq yükdaşıma bazarında, xüsusilə Avrasiya nəqliyyat dəhlizində aparıcı nəqliyyat müəssisəsi kimi fəaliyyət göstərir.

Bununla yanaşı, cəmiyyətə məxsus gəmilər üçün Xəzər regionunda sabit yük bazasının formalaşması bir sıra ciddi problemlərlə üzləşir. Belə ki, Xəzər dənizində fəaliyyət göstərən gəmiçilik şirkətləri arasında rəqabət getdikcə kəskinləşir. Hazırda Xəzər dənizində cəmiyyətin donanmasından başqa, Türkmənistan, Qazaxıstan, İran və Rusiyanın gəmiçilik şirkətləri fəaliyyət göstərərək, öz donanmalarının potensialını daim artırırlar. Cəmiyyətin qarşısında duran ən başlıca vəzifələrdən biri də bu rəqabətə davam gətirmək və yükdaşımalar bazarında öz mövqeyini qoruyub saxlamaqdır.

Regionda nəhəng beynəlxalq layihələrin gerçəkləşdirilməsi, xüsusilə də Bakı Beynəlxalq Dəniz Ticarət Limanının və Bakı-Tbilisi-Qars dəmir yolunun tezliklə istismara verilməsi ilə əlaqədar yük həcminin və bu yüklərin daşınması üçün müxtəlif təyinatlı gəmilərə olan tələbatın daha da artacağı gözlənilir. Tələbatın çoxaldığını və gəmilərimizin orta yaş həddinin 29 il olduğunu nəzərə alaraq, donanmanın yenilənməsi prosesinin davam etdirilməsi zəruridir. Xəzər dənizində rəqabət günbəgün sərtləşdiyindən, nəqliyyat donanmasının gücləndirilməsi üçün yeni, müasir gəmilərin alınması daim diqqət mərkəzindədir. 2012-ci ildə dövlət büdcəsindən 1 ədəd üzən dokun və 1 ədəd yedək gəmisinin alınmasına 25,6 milyon manat vəsait ayrılmışdır. 2013-cü ilin sentyabrında yedək gəmisi artıq alınmış və istismara verilmişdir. 2014-cü ildə isə yeni üzən dokun istismara verilməsi gözlənilir..

Həmçinin 2013-cü ildə Bakı Gəmiqayırma Zavodu tərəfindən “Socar-1” gəmisi tikilərək istismara verilmişdir. Bu il aprelin 25-də Bakı Gəmiqayırma Zavodu ilə 26 milyon 550 min dollar dəyərində 3 ədəd 80 nəfərlik sərnişin gəmisinin tikintisi ilə bağlı müqavilə imzalanmışdır.

Dənizdə neft-qaz hasilatı ilə bağlı müxtəlif təyinatlı xidmətlərin həyata keçirilməsi Xəzər Dəniz Neft Donanmasının iştirakı ilə aparılır. Həmin işlərə seysmik və geoloji axtarış, dəniz özüllərinin daşınması və estakadaların tikilməsi, istismar dövründə təmir işlərinin təmin olunması, dəniz obyektlərinin yanğından mühafizəsi, neft-qaz kəmərlərinin çəkilməsi, dəniz neftçilərinin iş yerlərinə çatdırılması, yanacaq-sürtkü materiallarının, kimyəvi reagentlərin daşınması, sualtı-texniki, qəza-xilasetmə işlərini və sairi aid etmək olar.

Xəzər Dəniz Neft Donanması müvafiq xidmətlər göstərmək üçün Dövlət Neft Şirkətinin müxtəlif idarə və törəmə müəssisələri, Dövlət Sərhəd Xidməti, Bahar Enerji Əməliyyat Şirkəti, Baku Steel Company, Fövqəladə Hallar Nazirliyi, Bakı Gəmiqayırma Zavodu, habelə BP, Saipem, Transmarine, Arizona, BUE-Caspian, CMS və sair şirkətlərlə müqavilələr əsasında işləyir, sifarişləri vaxtında və keyfiyyətlə yerinə yetirməyə çalışır.

Dənizçi peşəsi həmişə nüfuzlu peşə sayılıb. Təəssüf ki, son illərdə bu peşənin prestiji, dənizçilərin sosial rifahı günün tələbləri səviyyəsində olmayıb. Biz dənizçinin nüfuzunu özünə qaytarmalı, bu istiqamətdə təcrübəli veteranlarımızın əmək ənənələrindən bəhrələnməli, yeni, gənc, savadlı dənizçi nəsli yetişdirməliyik. Bizim gələcəyimiz olan tələbələrimizin yüksək bilikli mütəxəssis kimi hazırlanması üçün əlimizdən gələni etməliyik. Mən veteranlarımızı, gənclərimizi, bütün kollektivimizi, dəniz nəqliyyatı işçilərini peşə bayramı münasibətilə ürəkdən təbrik edir, sizin hər birinizə uğurlar diləyir, ən xoş arzularımı bildirirəm.

Sonra Bakı Beynəlxalq Dəniz Ticarəti Limanının baş direktoru Elçin Mirzəyevə söz verildi.

E.Mirzəyev Bakı şəhərindən 70 kilometr aralıda, Ələt qəsəbəsində tikilən yeni Beynəlxalq Dəniz Ticarət Limanının gələcək fəaliyyətindən, onun dünya standartları səviyyəsində tikilməsindən dənizçilərə geniş və ətraflı məlumat verdi. Sonra Dəniz Nəqliyyatı İşçiləri Müstəqil Həmkarlar İttifaqı Respublika Komitəsinin sədri Səməd Allahverdiyev çıxış edərək işçilərin hüquq və qanuni mənafelərini müdafiəsi istiqamətində görülən işlərdən danışdı, qeyd etdi ki, bu işlər “Həmkarlar İttifaqı haqqında” qanuna, Azərbaycan Respublikası Əmək Məcəlləsinin tələblərinə əsasən həyata keçirilir.

Səməd Allahverdiyev onu da vurğuladı ki, qısa müddət ərzində Səhmdar Cəmiyyətin rəhbərliyi tərəfindən 7 əmr-qərar hazırlanıb imzalanmışdır. Bu qərarlar işçilərin rifah halının, sağlamlığının yaxşılaşdırılmasına, təhlükəsizlik, iş şəraitinin yaxşılaşdırılması üçün zəmin yaradar.

Yığıncağın sonunda dənizçilər adından Prezident cənab İlham Əliyevə müraciət qəbul edildi.

Kamal İBADOV,

Respublika.-2014.- 26 iyun.- S.9.