DAĞLAR DİYARI LERİK UĞURLU İNKİŞAF, TƏRƏQQİ YOLUNDA

Ötən il dağlar qoynunda yerləşən Lerik rayonunun iqtisadi, sosial və mədəni həyatında yüksək nailiyyətlər əldə olunmuşdur. Azərbaycan Prezidenti cənab İlham Əliyevin ucqar dağ rayonunun sosial-iqtisadi inkişafına göstərdiyi misilsiz qayğı sayəsində tikinti, abadlıq, quruculuq işlərinin həcmi artmış, irimiqyaslı layihələrin həyata keçirilməsinə başlanılmışdır. Leriklilər cənab Prezidentin yüksək qayğısını böyük razılıqla, minnətdarlıqla qarşılamış, doğma rayonun dinamik inkişafına yeni töhfələr vermişlər.

Bu günlərdə Lerik Rayon İcra Hakimiyyətinin başçısı yanında şuranın geniş tərkibdə keçirilən iclasında 2013-cü ilin sosial-iqtisadi inkişafının yekunları ətraflı təhlil olunmuş, qarşıdakı dövr üçün yeni vəzifələr müəyyənləşdirilmişdir.

Şura iclasında Lerik Rayon İcra Hakimiyyətinin başçısı Rövşən Bağırov ötən ilin yekunları ilə bağlı məruzə etmişdir. İcra başçısı bildirmişdir ki, 2013-cü il bütün sahələrdə əldə olunmuş mühüm nailiyyətlərlə tarixə çevrilmişdir.

2013-cü ildə kənd təsərrüfatı məhsulları istehsalı keçən ilin müvafiq dövrünə nisbətən rayonda 16,8 faiz artaraq 38 milyon 225 min manata, sənaye məhsulu 2,9 faiz artaraq 712,3 min manata, nəqliyyat xidməti 2,9 faiz artaraq 2 milyon 703 min manata, pərakəndə əmtəə dövriyyəsi 3,8 faiz artaraq 68 milyon 596 min manata, pullu xidmətlər 15,3 faiz artaraq 12 milyon 939 min manata çatmışdır. Tikinti-quraşdırma işlərinin həcmi 6,8 dəfə artaraq 27 milyon 746 min manat olmuşdur.

Torpaqdan səmərəli istifadə edilməsi ilə bağlı aparılan təbliğat işləri öz bəhrəsini verir. Yerli fermerlər taxılçılıqla yanaşı, üzümçülüyün də inkişafına diqqəti artırmışlar. Lələdulan, Gürdəsər və Molalan kəndlərində xəstəliyə davamlı, məhsuldar üzüm tingləri əkilmiş, yeni bağlar salınmışdır.

Heyvandarlıq rayonda sürətlə inkişaf edir. İribuynuzlu mal-qaranın, qoyun və keçilərin baş sayı keçən ilin müvafiq dövrünə nisbətən xeyli artmışdır. Süd, ət, yumurta, yun istehsalı da çoxalmışdır.

Yeni cins mal-qaranın yetişdirilməsi ilə əlaqədar bir sıra tədbirlər həyata keçirilmişdir. Mal-qaranın cins tərkibinin dəyişdirilməsi sahəsində uğurlarla yanaşı, müəyyən problemlər qalmaqdadır.

Kənd təsərrüfatının inkişaf etdirilməsi üçün fermer təsərrüfatlarına uzunmüddətli, güzəştli kreditlərin verilməsinə ciddi ehtiyac vardır.

Piran kəndində müasir avadanlıqlarla təchiz edilmiş broyler fabriki fəaliyyət göstərir. Burada 6 ferma, 150 ton yem istehsal edən zavod və 5 min tonluq yem anbarı tikilmişdir. Müəssisə saatda 6 min ədəd toyuq, həftədə 132 min ədəd cücə istehsal etmək gücünə malikdir. Fabrik “Lerik-broyler” nişanı ilə öz məhsullarını satışa çıxarmışdır.

İkinci Dövlət Proqramının icrası dövründə rayonda 4369 iş yeri, o cümlədən cari ildə 926, 2004-2013-cü illər ərzində 9123 yeni iş yeri açılmışdır. İş yerlərinin 40 faizdən çoxu daimi iş yerləridir.

Cənab Prezidentin tapşırığı və yüksək qayğısı sayəsində rayonun yaşayış məntəqələrinin qazlaşdırılması uğurla davam etdirilir. Hesabat dövrndə Dövlət Neft Şirkətinin prezidenti Rövnəq Abdullayevin, Milli Məclisin deputatı İqbal Məmmədovun iştirakı ilə Çayrud, Monidigah, Qosmalian, Blaband və Nuravud ərazi dairələrində açılış mərasimləri keçirilmiş, 24 yaşayış məntəqəsinə mavi qazın verilməsi təmin edilmişdir. Hazırda 10 kənddə işlər davam etdirilir.

Lerik şəhərində aparılan tikinti, quruculuq işləri diqqəti cəlb edir. Şəhərin daxili küçələrinə asfalt örtüyü salınmış, müasir işıq dirəkləri quraşdırılmışdır. Küçələrdə istinad divarları hörülmüş, divarlar çay daşı, aqlay plitələri ilə üzlənmiş, səkilərə aqlay və tamet döşənmişdir.

Cari ildə şəhərdə 9 kommunal binanın dam örtükləri dəyişdirilmiş, rayonun simvolik abidəsinin tikintisi başa çatdırılmış, ərazidə abadlıq işləri görülmüşdür. Şəhərdə 300 nəfərlik xeyir-şər evi sakinlərin istifadəsinə verilmişdir.

Ötən il 12 yeni məktəb binası, rayon statistika idarəsi üçün inzibati bina, mərkəzi xəstəxananın uşaq xəstəlikləri şöbəsi, 75 yerlik şəhər uşaq bağçası tikilib istifadəyə verilmiş, Nuravud kənd tam orta məktəbi, DSMF-in rayon şöbəsinin inzibati binası əsaslı təmir edilmişdir. Lerik şəhərindəki uşaq bağçasının ikinci korpusunda son tamamlama işləri aparılır. Hazırda 4 kənddə yeni məktəb binaları tikilir, Mastayıl kənd tam orta məktəbində əsaslı təmir işləri aparılır.

Ölkə Prezidentinin sərəncamları ilə 26 kilometr uzunluğunda Lerik-Qosmalian-Kəlvəz yolu tikilərək istifadəyə verilmiş, 30 min nəfər əhalinin yaşadığı, 50 yaşayış məntəqəsini birləşdirən 36 kilometr uzunluğunda Noda-Şingədulan-Xanagah avtomobil yolunun tikintisinə başlanılmışdır. Leriklilər rayonun yol infrastrukturunun yeniləşdirilməsinə göstərdiyi misilsiz qayğıya görə dövlətimizin başçısına dərin minnətdarlıqlarını bildirirlər.

Son illər Piran, Noda, Vizəzəmin, Cəngəmiran, Günəşli və Qosmalian kəndlərində 6 kilometr uzunluğunda daxili yollara asfalt döşənmiş, kəndarası yollarda təmir işləri aparılmışdır.

Lerik-Lənkəran yolu rayonu respublikanın digər şəhərləri ilə birləşdirən yeganə yoldur. 56 kilometrlik uzunluğunda yolun müəyyən hissələri intensiv yağışlar nəticəsində qəzalı vəziyyətə düşmüşdür. Dekabr-yanvar aylarında baş verən torpaq sürüşmələri yolun istismarını təhlükə altına almışdır.

Rayon icra hakimiyyətinin dəstəyi və kənd sakinlərinin yaxından iştirakı ilə kəndarası yollarda 200 min manatlıq təmir-bərpa işləri görülmüş, Milli Məclisin deputatı İqbal Məmmədovun köməyilə Murya və Livədirqə kəndlərində çaylar üzərində yeni körpülər tikilmişdir.

Piran-Hamarat-Vıjaker avtomobil yolu dərin dərələrdən, sərt qayalardan keçir. 22 kilometrlik yolun əsaslı təmiri üçün sənədlər hazırlanaraq Prezident Administrasiyasına təqdim edilmişdir. Dövlət Neft Şirkəti qayaların partladılaraq yolun genişləndirilməsi və əsaslı təmiri üçün ilkin qaydada maliyyə vəsaiti ayırmışdır.

Rayonun hüdudlarından kənarda yaşayan leriklilərin doğma kəndlərinə, el-obaya qayğı göstərməsi çox sevindirici və təqdirəlayiq haldır. Belə nəcib, xeyirxah insanların köməkliyilə Şingədulan, Çayrud, Nücü, Lərmərud, Tikəband, Gürdəsər və digər kəndlərdə xeyli abadlıq işləri görülmüş, kənddaxili yollar abadlaşdırılmış, Gürdəsər kəndində 200 yerlik xeyir-şər evi inşa edilmişdir.

Rayonda sahibkarlığın inkişafına xüsusi diqqət yetirilir. Lənkəran-Lerik yolunun 37-ci kilometrliyində çörək sexi tikilib istifadəyə verilmişdir. Müəssisədə 10 nəfər daimi işlə təmin edilmiş, istehsal olunan 4 növ çörək məhsulları satışa çıxarılmışdır.

Lerik şəhərində tədarük məntəqəsi kimi fəaliyyət göstərmiş obyektlərdə yenidənqurma, təmir işləri aparılmış, müəssisədə plastik qapı və pəncərələrin istehsalına başlanılmışdır. Şəhərdə ikimərtəbəli mebel və məişət avadanlıqları salonu tikilib istifadəyə verilmişdir.

Peştətük kəndində süfrə suyu və şirə istehsal edən müəssisə tikilir, Lerik şəhərində isə çörək zavodu əsaslı şəkildə yenidən qurulur. “Azercell” şirkəti tərəfindən yeni xidmət müəssisəsinin tikintisində son tamamlama işləri aparılır.

Lerik şəhərinə xüsusi yaraşıq verəcək 400 yerlik şadlıq sarayının, ikimərtəbəli ictimai iaşə obyektinin tikintisində işlər sürətlə davam etdirilir.

Sahibkarlığa Kömək Milli Fondunun dəstəyilə il ərzində 27 nəfər sahibkara 3 milyon 187 min manat, ümumilikdə isə 132 nəfər sahibkara 15 milyon manatdan yuxarı güzəştli kreditlər verilmişdir.

Respublika iqtisadiyyat və sənaye naziri Şahin Mustafayev Lerik rayonunda Lerik, Astara, Lənkəran, Masallı, Yardımlı, Cəlilabad, Biləsuvar və digər rayonların vətəndaşlarını qəbul etmişdir. Nazir Piran kəndində broyler fabrikində aparılan tikinti-quraşdırma işləri və Lənkəran-Lerik şosesinin 37-ci kilometrliyində yerləşən çörək zavodunun fəaliyyətilə tanış olmuş və tövsiyələrini söyləmişdir.

Fövqəladə Hallar Nazirliyi tərəfindən evləri qəzalı vəziyyətdə olan 6 ailə üçün fərdi yaşayış evləri tikilmişdir. Rayon icra hakimiyyətinin rəhbərliyi təbii fəlakət nəticəsində evləri qəzalı vəziyyətə düşmüş, evləri yanmış vətəndaşlara tikinti materialları vermiş və maddi yardımlar göstərmişdir.

Molalan kəndində Əmək və Əhalinin Sosial Müdafiəsi Nazirliyi tərəfindən Qarabağ müharibəsi əlili üçün yaşayış evi inşa edilmişdir. Rayon icra hakimiyyətinin dəstəyilə Qarabağ müharibəsi əlilinin övladı üçün “Nur” şadlıq sarayında toy mərasimi keçirilmiş, gənc ailəyə məişət avadanlıqları və hədiyyələr verilmişdir.

Lerik-Yardımlı 35 kilovoltluq yüksək gərginlikli yeni elektrik hava xətti çəkilərək istismara verilmişdir. Lerik şəhərində 17 meqavatlıq modul tipli elektrik stansiyasının tikintisi başa çatdırılmışdır. Ərazidə meydançalara asfalt örtüyü çəkilmiş, səkilər salınmış, bəzək ağacları əkilmişdir. Müəssisədə 60 nəfər işlə təmin olunacaqdır.

Rayon icra hakimiyyətinin, iş adamlarının və kənd sakinlərinin köməyilə yaşayış məntəqələrində artezian quyuları qazılmış, evlərə su xətləri çəkilmişdir.

Meliorasiya və Su Təsərrüfatı ASC-in sifarişi ilə Lerik şəhərinin su təchizatının yenidən qurulması və kanalizasiya sisteminin yaradılması layihəsi həyata keçirilir. Artıq Qosmalian-Lerik və şəhərdaxili yüksək təzyiqli su xətləri çəkilmiş, məhəllələrdə kanalizasiya sistemi quraşdırılmışdır. Şəhərdə su anbarlarının tikintisi, yaşayış evlərinin su və kanalizasiya sisteminə qoşulması istiqamətində müəyyən işlər görülmüşdür.

Dövlət Sərhəd Xidmətinin rəisi, general-leytenant Elçin Quliyevin iştirakı ilə Kələxan kəndində Lənkəran Sərhəd Dəstəsinin yeni inşa olunmuş “Kələxan” komendantlığının açılış mərasimi keçirilmişdir.

Lerik respublikamızda və onun hüdudlarından kənarda həm də turizm diyarı kimi tanınır. Son illər Lənkəran-Lerik yolu boyunca, Qosmalian, Kələxan və Bilnə kəndlərində hər cür şəraiti olan yeni turizm istirahət mərkəzləri, çoxlu ticarət, iaşə obyektləri tikilmişdir.

Rusiya, Türkiyə, Almaniya, Belarus, Gürcüstan, İran və digər xarici ölkələrdən gələn turistlər rayonun füsunkar təbiətinə, zəngin flora və faunasına, tarixi abidələrinə valeh olduqlarını bildirirlər. Bakı şəhərində keçirilən III Beynəlxalq Humanitar Forumun iştirakçılarından bir qrupu rayonda olmuş, Lerikin təbiəti, tarixi abidələri, mətbəxi ilə tanışlıqdan məmnunluqlarını ifadə etmişlər.

İl ərzində rayon əhalinin sosial müdafiəsi mərkəzi tərəfindən 1708 ailəyə ünvanlı dövlət sosial yardımı təyin edilmişdir.

DSMF-in rayon şöbəsində 9225 fiziki, 2318 hüquqi şəxs, 8572 nəfər torpaq mülkiyyətçisi, 9967 nəfər əmək pensiyaçısı qeydiyyatdadır. 2013-cü ildə şöbə tərəfindən 19 milyon 630 min manat pensiya ödənişi həyata keçirilmişdir.

Kapitalbankın rayon filialı keçmiş SSRİ dövründən əmanətləri qalmış 4777 nəfərin əmanətlərini tam ödəmişdir. Keçən il Şingədulan kəndində daha bir bankomat quraşdırılaraq müştərilərin istifadəsinə verilmişdir.

Lerik Rayon İcra Hakimiyyəti tərəfindən şəhid ailələri, Qarabağ müharibəsi əlilləri və digər kateqoriyadan olan imkansız ailələrə mütəmadi qaydada ərzaq, maddi yardımlar verilmişdir. “Nur” və “Elvin” şadlıq saraylarında onlar üçün bayram süfrələri açılmış, sosial və məişət problemlərinin həllinə köməklik göstərilmişdir.

Rayonda iqtisadiyyatın bütün sahələri üzrə 31915 nəfər çalışır. Bunlardan 4565 nəfər dövlət sektorunda, 27350 nəfər özəl sahədə işləyir.

Əhalinin məşğulluğunun təmin edilməsi məqsədilə mədəniyyət evində keçirilən əmək yarmarkasına 234 iş yeri çıxarılmış, 48 nəfər işaxtaran işlə təmin olunmuşdur.

Ötən il “İnformasiya-kommunikasiya texnologiyaları ili” elan edilmişdir. İl çərçivəsində mövcud ATS-lər elektron tipli ATS-lərlə, birləşdirici xətlər optik kabellərlə əvəz edilmişdir. Rayonun əksər kəndlərinə sürətli internet verilişi təmin edilmişdir. Lerik şəhərində 801, kəndlər üzrə isə 416 internet istifadəçisi vardır.

Rayonun elektrik təsərrüfatında təmir-bərpa işləri aparılmışdır. Dövlət Neft Şirkətinin dəstəyilə 300-dən çox dəmir dayaq 10 və 0,4 kv-luq elektrik hava xətlərinin bərpasına sərf edilmişdir. Avadanlıqların çatışmaması üzündən xətlərin bərpasında çətinliklər mövcuddur. Bunun nəticədidir ki, Vizəzəmin, Orand, Nücü, Bürsülüm, Conu və digər ərazilərdə elektrik xətlərində tez-tez qəzalar olur, enerji verilişində fasilələr yaranır.

Hesabat ilində təhsil işçiləri bir sıra uğurlara imza atmışlar. Tam orta təhsil pilləsində bir nəfər qızıl medala, ümumi təhsil pilləsində 5 nəfər, o cümlədən 3 qız “Xüsusi nümunəvi şəhadətnamə”yə layiq görülmüşdür. Məzunlardan 126 nəfər ali, 212 nəfər orta ixtisas məktəblərinə daxil olmuşdur. Sevindirici haldır ki, lerikli gənclər təkcə respublikamızın deyil, xarici dövlətlərin tanınmış, nüfuzlu ali məktəblərində təhsil alırlar.

Lerik şəhər peşə liseyində 140 şagirdin təlim-tərbiyəsi ilə 15 nəfər ümumi və texniki fənn müəllimi, mühəndis məşğul olur.

Səhiyyə işçiləri də ötən ili uğurla başa vurmuşlar. Rayonda sanitar-epidemioloji vəziyyət sabitdir. Son vaxtlar xüsusi təhlükəli xəstəliklər qeydə alınmamış, uşaqlar arasında peyvənd təqviminə daxil olan xəstəliklər aşkar edilməmişdir.

İl ərzində 24 kəndə səyyar həkim briqadaları göndərilmiş, rayon mərkəzinə gələ bilməyən 289 xroniki xəstə aşkarlanaraq ambulator və stasionar müalicəyə cəlb olunmuşdur. İmtiyazlı xəstələr vaxtında lazımi dərman preparatları ilə təchiz edilmişlər.

Mədəniyyət işçiləri əhalinin asudə vaxtlarının səmərəli keçirilməsi üçün maraqlı tədbirlər həyata keçirmişlər. İctimai-siyasi tədbirlərlə yanaşı, mədəni-kütləvi tədbirlərin, milli bayramların keçirilməsi diqqətdə saxlanılır. Ötən il Gənc Tamaşaçılar, İrəvan, Şuşa və Nəcəf bəy Vəzirov adına Lənkəran Dram teatrları yeni, maraqlı əsərlərlə rayon sakinlərinin görüşünə gəlmişdir.

Rayonda idmanın inkişafına, onun kütləviliyinin artırılmasına xüsusi diqqət yetirilir. Yeniyetmə və gənclərin iştirakı ilə müxtəlif idman yarışları keçirilir, əhalinin kütləvi şəkildə idmana cəlb olunmasına səy göstərilir. Futbol, voleybol, sərbəst güləş, ağır atletika, taekvando, şahmat və digər idman növləri üzrə keçirilən zona və respublika yarışlarında idmançılar layiqli qələbələr qazanmışlar.

Azərbaycan Prezidenti cənab İlham Əliyevin uğurlu daxili və xarici siyasəti, görüşləri, regionlara və xarici dövlətlərə səfərləri, ölkəmizin dinamik inkişafı sahəsində qazanılmış nailiyyətləri əhaliyə çatdırmaq məqsədilə Rayon İcra Hakimiyyətində təbliğat qrupları fəaliyyət göstərir. Qruplar qrafik üzrə hər həftə yerlərdə olur, əhali ilə görüşlər keçirir.

Rayonda cinayətkarlıqla mübarizə işi günün tələbləri səviyyəsində qurulmuşdur. Qanunçuluğun möhkəmləndirilməsi istiqamətində aparılan profilaktik tədbirlərin nəticəsində cinayət hadisələrinin sayı əvvəlki illə müqayisədə 17 fakt azalmışdır.

2013-cü ildə rayon icra hakimiyyəti başçısı yanında şuranın 24 iclası keçirilmişdir. İclaslarda iqtisadi, sosial-mədəni və digər yerli əhəmiyyətli 40 məsələ müzakirə edilmişdir.

Rayon icra hakimiyyəti başçısı tərəfindən bütün inzibati ərazi dairələrində rayonun hüquq-mühafizə orqanlarının, idarə, müəssisə və təşkilatlarının rəhbərlərinin iştirakı ilə səyyar qəbul və görüşlər keçirilmişdir.

Keçən il rayon icra hakimiyyətinə 1438 yazılı müraciət daxil olmuşdur. Rayon icra hakimiyyəti başçısının qəbulunda 1218 nəfər qeydiyyata alınmışdır. İcra başçısı tərəfindən əvvəlki ilə nisbətən 363 nəfər çox vətəndaş qəbul edilmişdir.

Cənab Prezidentin tapşırığına əsasən əhalini narahat edən problemlər araşdırılmış, irəli sürülmüş təkliflər ümumiləşdirilərək 60 bənddən ibarət layihə hazırlanmış və İqtisadiyyat və Sənaye Nazirliyinə təqdim edilmişdir.

Hesabat ilində dövlət başçısının sərəncamı ilə Lerik Rayon İcra Hakimiyyəti başçısı aparatının ərazi idarəetmə və yerli özünüidarəetmə orqanları ilə iş şöbəsinin müdiri Mahmud Zahidov “Dövlət qulluğunda fərqlənməyə görə”, Lerik şəhər 1 saylı texniki fənlər üzrə liseyin müəllimi Dünyaxanım Kərimova “Tərəqqi” medalı ilə təltif edilmişdir. Bu, cənab Prezidentin rayonda çalışan ziyalıların, sadə peşə adamlarının əməyinə verdiyi yüksək qiymətin parlaq təzahürüdür.

Rayonun bütün idarə və müəssisələri müasir kompyuter avadanlıqları ilə təchiz edilmiş, əksəriyyəti elektron informasiya şəbəkəsinə qoşulmuşdur. Vətəndaşların rayon mərkəzinə gəlmədən rayon icra hakimiyyəti başçısı tərəfindən qəbulunu və müraciətlərinin dinlənilməsini təmin etmək məqsədilə Çayrud, Piran, Şingədulan, Noda və Qosmalian ərazi icra nümayəndəliklərində operativ idarəetmə mərkəzləri yaradılmışdır. Ərazilərdə video konfranslar vasitəsilə səyyar qəbul və görüşlər keçirilmiş, sakinləri narahat edən problemlərin həlli istiqamətində müvafiq tədbirlər görülmüşdür.

Şura iclasında statistika idarəsinin rəisi Ədail Məmmədov, rayon prokuroru Bəhruz İbrahimov, mərkəzi xəstəxananın baş həkimi Mübariz Ağayev, Lerik şəhər uşaq bağçasının müdiri Lalə Əliyeva, 43 saylı yol istismar idarəsinin rəisi Elxan Əliyev, rayon poçtamtının rəisi Baba Tağıyev, ziyalılardan Elxan Nurullayev, Dünyaxanım Kərimova, Qafur Xosiyev, Gülbala Qardaşov çıxış edərək görülmüş işlərdən danışmış, Lerikin sosial-iqtisadi inkişafının sürətləndirilməsinə göstərdiyi yüksək qayğıya görə dövlətimizin başçısı cənab İlham Əliyevə dərin minnətdarlıqlarını bildirmişlər.

Milli Məclisin üzvü İqbal Məmmədov iclasda çıxış etmiş, möhtərəm Prezidentimizin rəhbərliyilə həyata keçirilən irimiqyaslı layihələrdən, ucqar dağ rayonunun inkişafına göstərilən dövlət qayğısından, son vaxtlar rayonda aparılan quruculuq işlərindən danışmışdır.

Azərbaycan Respublikası Prezidenti Administrasiyasının məsul işçisi Vəfadar Bağırov şura iclasında çıxış etmiş, dövlətimizin başçısı cənab İlham Əliyevin regionların dinamik inkişafına xüsusi önəm verdiyini, ötən il bütün sahələrdə yüksək nailiyyətlərin əldə olunduğunu diqqətə çatdırmış, Lerik rayonunun icra strukturları qarşısında duran vəzifələrdən danışmışdır.

Şura iclasında dövlət qulluğunda fərqlənənlərin bir qrupuna Lerik Rayon İcra Hakimiyyətinin fəxri fərmanları və hədiyyələr təqdim olunmuşdur.

Lerik Rayon İcra Hakimiyyətinin başçısı Rövşən Bağırov şura iclasını yekunlaşdırmış, aparılan quruculuq, abadlıq işlərinin cari ildə də davam etdiriləcəyini, qarşıya qoyulan vəzifələrin əzmlə, yüksək mütəşəkkilliklə həyata keçiriləcəyini, leriklilərin müstəqil Azərbaycanın sürətli inkişafına və daha da çiçəklənməsinə layiqli töhfələr verəcəklərini bildirmişdir.

Şura iclasının iştirakçıları tərəfindən Azərbaycan Respublikası Prezidenti cənab İlham Əliyevə müraciət qəbul olunmuşdur.

Əlisəfa HƏSƏNOV

Respublika.-2014.- 5 mart.- S.5.