YARDIMLIDA İQTİSADİ İNKİŞAF SOSİAL PROBLEMLƏRİN HƏLLİNİ SÜRƏTLƏNDİRMİŞDİR

Azərbaycan Prezidenti cənab İlham Əliyev Yardımlıya növbəti səfəri zamanı görülmüş işləri yüksək qiymətləndirərək demişdir: “Yardımlıda görülən işlər məni çox sevindirir. Çünki vaxtilə burada başlanmış bu proqram uğurla icra edilir. Rayon inkişaf edir. Rayonun böyük potensialı vardır”.

Möhtərəm Prezidentimizin ucqar dağ rayonunun inkişafına göstərdiyi misilsiz qayğı yardımlılıları sevindirmiş, onları daha əzmlə, yüksək işgüzarlıqla işləməyə ruhlandırmışdır. 2013-cü ilin sosial-iqtisadi inkişafının yekunları ilə əlaqədar keçirilən yığıncaqda bu barədə ətraflı söhbət açılmışdır.

Yığıncaq iştirakçıları əvvəl ümummilli lider Heydər Əliyevin adını daşıyan parka gələrək ulu öndərin abidəsini ziyarət etmişlər. Sonra mədəniyyət evində rayonda istehsal olunmuş sənaye və kənd təsərrüfatı məhsullarının sərgisinə baxış keçirilmişdir.

Yığıncaqda Yardımlı Rayon İcra Hakimiyyətinin başçısı Sevindik Hətəmov ötən ildə rayonun sosial-iqtisadi inkişafının yekunları və cari ildə qarşıda duran vəzifələr barədə məruzə etmişdir.

İcra başçısı bildirmişdir ki, cənab Prezidentin rəhbərliyilə ötən il regionların inkişafına dair ikinci Dövlət Proqramının icrası başa çatmışdır. Hər iki proqramın icrası bölgələrdə ciddi dönüşün yaradılmasına səbəb olmuş, bölgələr abadlaşmış, yerlərdə müasir infrastruktur yaradılmışdır.

2013-cü il çox mühüm və əlamətdar hadisələrlə yadda qalmışdır. Sentyabrın 4-də ölkə Prezidenti cənab İlham Əliyev rayona tarixi səfər etmişdir. Möhtərəm Prezidentimizin xeyir-duası ilə müasir üslubda inşa olunan Yeni Azərbaycan Partiyası Yardımlı rayon təşkilatının inzibati binası, ümummilli lider Heydər Əliyevin adını daşıyan Park və Mərkəz, Yardımlı şəhərinə çəkilmiş yeni içməli su xətti, Yardımlı-Deman-Arvana avtomobil yolu istifadəyə verilmişdir.

Dövlətimizin başçısı Gənclər parkında rayon ictimayyətinin nümayəndələrilə görüşmüş, yaxın vaxtlarda rayonda yeni infrastruktur layihələrin həyata keçiriləcəyini bildirmişdir.

Cənab Prezident rayona səfərindən dərhal sonra on min nəfər əhalinin yaşadığı, 12 yaşayış məntəqəsini birləşdirən Yardımlı-Hamarkənd-Abbasabad avtomobil yolunun tikintisi üçün 2 milyon manat, Yardımlı rayonunun sosial-iqtisadi inkişafını sürətləndirmək məqsədilə ehtiyat fondundan 2 milyon manat vəsaitin ayrılması barədə sərəncam imzalamışdır. Yardımlılılar göstərdiyi yüksək diqqət və qayğıya görə möhtərəm Prezidentimizə dərin minnətdarlıqlarını bildirirlər.

2013-cü ildə rayonda tikinti, abadlıq, quruculuq işləri və digər infrastruktur layihələr sürətlə həyata keçirilmişdir. Statistika idarəsi üçün yeni inzibati bina tikilib istifadəyə verilmiş, Şəhidlər Xiyabanı abidə kompleksi əsaslı təmir olunmuş, mədəniyyət və istirahət parkında fəvvarə müasir üslubda yenidən qurulmuşdur.

Şəhərin Heydər Əliyev küçəsi əsaslı şəkildə təmir edilmişdir. Uzunluğu 8 kilometr olan küçədə 233 ədəd küçə işıqları quraşdırılmış, küçə boyunca istinad divarları hörülmüş, səkilər salınmışdır. Şəhərin girişində Qala divarları inşa olunmuş, müasir işıqlandırma sistemi yaradılmışdır.

Möhtərəm Prezidentimizin tapşırığına əsasən rayonda müasir idman kompleksinin tikintisinə başlanılmışdır.

Yardımlı şəhərinə su və kanalizasiya xətlərinin çəkilişi davam etdirilir. İndiyə kimi 31 kilometr uzunluğunda su və 10,5 kilometr uzunluğunda kanalizasiya xətti çəkilmişdir. Su çəkilişi üzrə işlərin 56 faizi, kanalizasiya çəkilişi üzrə işlərin 23 faizi icra olunmuşdur. Yaxın vaxtlarda şəhər fasiləsiz içməli su ilə təmin olunacaqdır.

Kəndlərdə əhalinin içməli suya tələbatının ödənilməsi daim diqqətdə saxlanılır. Əhalisi 14 min nəfər olan 18 kəndin içməli su tələbatını təmin etmək məqsədilə Viləş çayının Qaraqaya qolundan, “Sineyir” adlanan ərazidən kəndlərə su çəkilişinə başlanılmışdır. Artıq mənbədən 8 kilometr məsafəyə - Osnakəran kəndinə su xətti çəkilmiş və 500 tonluq anbar inşa olunmuşdur. Odrağaran kəndində subartezian quyu qazılmış, evlərə su xətləri çəkilərək istifadəyə verilmişdir.

Yaşayış məntəqələrinin qazlaşdırılması sahəsində müəyyən işlər görülmüşdür. Şəhərin Ünəç küçəsinə, Bilnə, Bozayran, Qabaqdibi, Mişkireyin və Vəlixanlı kəndlərinə təbii qaz verilmiş, abonentlərin sayı 1895-ə çatdırılmışdır. Şəhərin Daşkənd küçəsinin və Urakəran kəndinin qazlaşdırılması istiqamətində işlər davam etdirilir.

Nəqliyyat Nazirliyinin yaxından köməkliyi və daxili imkanlar hesabına şəhərin avtomobil yollarına çınqıl döşənmiş, Çayüzü kəndində yolun 1,2 kilometrlik hissəsinə asfalt örtük çəkilmişdir.

Bozayran-Bürzümbül kəndləri arasında suötürücü qurğunun sıradan çıxmış hissəsi bərpa edilmişdir. Urakəran-Qaraqaya, Çayüzü-Peştəsər və Yardımlı-Dəlləkli avtomobil yolunda irihəcmli suötürücü qurğular quraşdırılmış və avtomobillərin rahat gediş-gəlişi təmin olunmuşdur.

2013-cü ildə rayonda 84 milyon 668 min manatlıq ümumi məhsul istehsal olunmuşdur. Bu, əvvəlki ilin müvafiq dövrü ilə müqayisədə 8,8 faiz çoxdur. İl ərzində 609 min 900 manatlıq sənaye, 29 milyon 672 min manatlıq kənd təsərrüfatı məhsulları istehsal olunmuş, əhaliyə 43 milyon 700 min manatlıq ticarət, 1 milyon 174 min manatlıq nəqliyyat, 269 min manatlıq rabitə xidmətləri göstərilmiş, 9 milyon 243 min manatlıq tikinti işləri həyata keçirilmişdir.

Ötən il əsas kapitala yönəldilən investisiyaların həcmi 24 milyon 441 min manat təşkil etmişdir. Bu, 2003-cü illə müqayisədə 99 dəfə, əvvəlki ilə nisbətən 2,3 dəfə çoxdur. Orta aylıq əməkhaqqı isə 2003-cü illə müqayisədə 4,2 dəfə artaraq 277,4 manata çatmışdır.

İqtisadiyyat və Sənaye Nazirliyinin Sahibkarlığa Kömək Milli Fondu tərəfindən rayonda sahibkarlarla görüş təşkil olunmuş və sahibkarlara 81 layihə üzrə 659 min manat güzəştli kreditlər verilmişdir. Rayonda 233 fiziki və 34 hüquqi şəxs qeydiyyatdan keçmişdir. Sahibkarlar tərəfindən keçən il 82 milyon 128 min manatlıq məhsul istehsal olunmuşdur. Bu da ümumi məhsulun 97 faizini təşkil edir.

Rayonun iqtisadiyyatının əsasını kənd təsərrüfatı təşkil edir. Əhali əkinçilik və heyvandarlıqla məşğul olur. Fermerlərə yanacaq və sürtkü materialına görə 1437 manat, məhsul istehsalçılarına isə 156811 manat subsidiya ödənilmişdir. Keçən il 4076 hektar sahədə 7884,1 ton taxıl istehsal edilmişdir.

Ötən ilin müvafiq dövrü ilə müqayisədə mal-qaranın və davarların sayı çoxalmışdır. Rayonda 3521,2 ton ət, 15457,1 ton süd, 6 milyon ədəd yumurta, 141 ton yun istehsal olunmuşdur. 2012-ci illə müqayisədə ət istehsalı 641 ton, süd istehsalı 1042,5 ton, yumurta istehsalı 10 min ədəd, yun istehsalı 4,3 ton artmışdır.

2003-2013-cü illərdə yeni müəssisələrin yaradılması hesabına rayonda 4177 yeni iş yerləri açılmışdır. Bunun 2980-ı daimi iş yerləridir. Keçən il 334 yeni iş yeri yaradılmışdır. Bu, əvvəlki illə müqayisədə 2,2 dəfə çoxdur.

Ötən il təhsil ocaqlarının tikintisi sürətlə davam etdirilmişdir. Alçabulaq və Avaş kəndlərində 220 şagird yerlik təzə məktəblər tikilmiş, 55 yerlik uşaq bağçası əsaslı təmir edilmişdir. Ostayir kəndində 220 şagird yerlik, Zevində 360, Anzovda 180, Zenqaranda 80 şagird yerlik, Solqard və Fındıqlı Qışlaq kəndlərində yeni məktəb binalarının, Yolocaq kəndində uşaq bağçasının tikintisi davam etdirilir.

Keçən il 256 nəfər ali məktəblərə qəbul olunmaq üçün sənəd vermişdir. Əvvəlki ilin məzunları ilə birlikdə 155 nəfər tələbə adına layiq görülmüşdür. Onlardan 16 nəfəri qızlardır. Məzunlardan 5 nəfər 600-dən yuxarı, 10 nəfər isə 500-dən yuxarı bal toplamışdır. Rayon icra hakimiyyətində birinci kurs tələbələrilə görüş keçirilmiş, yüksək bal toplamış tələbələrə kompyuter, pul mükafatları verilmişdir

Keçən il səhiyyə xidmətinin yaxşılaşdırılması ilə əlaqədar müəyyən işlər görülmüşdür. Əhali, xüsusilə uşaqlar arasında təhlükəli infeksion xəstəliklər qeydə alınmamışdır. İl ərzində imtiyazlı xəstələrə 90625 manat məbləğində dərman preparatları və sarğı materialları verilmişdir. Tibb ocaqlarında 1391 nəfər stasionar müalicəyə cəlb edilmiş, 147 xəstə üzərində müxtəlif cərrahi əməliyyatlar aparılmışdır.

Ölkə Prezidentinin tapşırıq və tövsiyələrinə uyğun olaraq hər bir vətəndaşın probleminə həssaslıqla yanaşılmış, vətəndaşların müraciətlərinə vaxtında və obyektiv baxılmasına diqqət artırılmışdır. Keçən il rayon icra hakimiyyəti başçısı aparatında 535 nəfər, səyyar qəbullar zamanı 135 nəfər qəbul edilmişdir. Vətəndaşların qaldırdıqları məsələlərin əksəriyyəti həll olunmuş, həlli vaxt tələb edən məsələlər nəzarətə götürülmüşdür.

İl ərzində vətəndaşlardan 758 yazılı müraciət daxil olmuşdur. Bu, əvvəlki illə müqayisədə 52 fakt azdır. Yazılı müraciətlərin 731-i ərizə, 26-sı şikayət, biri təklif olmuşdur. Müraciətlərin ümumi sayında şikayətlər cəmi 3,4 faiz təşkil etmişdir.

Yığıncaqda rayon maliyyə idarəsinin rəisi Malik Abışov, telekommunikasiya qovşağının rəisi İqbal Ağayev, mərkəzi rayon xəstəxanasının baş həkimi Fəxrəddin Əkbərov, qaz istismar sahəsinin rəisi Vəfadar Ağayev, rayon ziyalılar cəmiyyətinin sədri Feyruz Sultanov, Hamarkənd inzibati ərazi dairəsi üzrə icra nümayəndəsi Vahid Qasımov, sahibkar Vaqif Ağayev görülmüş işlər barədə danışmış, ucqar dağ rayonunun sosial-iqtisadi inkişafının sürətləndirilməsinə göstərdiyi yüksək qayğıya görə dövlətimizin başçısı cənab İlham Əliyevə dərin minnətdarlıqlarını bildirmişlər.

Milli Məclisin üzvü Sabir Rüstəmxanlı son illər Yardımlıda aparılan abadlıq və quruculuq işlərindən, mövcud problemlərdən söhbət açmış, yardımlılıların bundan sonra da dövlətçiliyimizin möhkəmləndirilməsinə, ölkəmizin dinamik inkişafına layiqli töhfələr verəcəklərini bildirmişdir.

Azərbaycan Respublikası Prezidenti Administrasiyasının məsul işçisi Vəfadar Bağırov yığıcaqda çıxış etmiş, möhtərəm Prezidentimizin rəhbərliyilə qazanılmış uğurlardan, Yardımlı rayonunun icra strukturları qarşısında duran vəzifələrdən danışmışdır.

Yardımlı Rayon İcra Hakimiyyətinin başçısı Sevindik Hətəmov yığıncağı yekunlaşdırmış, qarşıdakı dövrdə görüləcək işlərdən danışmışdır.

Yığıncaq iştirakçıları tərəfindən Azərbaycan Respublikasının Prezidenti cənab İlham Əliyevə müraciət qəbul olunmuşdur.

Əlisəfa HƏsƏnov

Respublika.-2014.- 8 mart.- S.7.