Heydər Əliyev Müstəqil Azərbaycan Respublikasının memarıdır

Çox qədim tarixə malik olan xalqımız görkəmli simaları ilə tarixin yaddaşına saysız-hesabsız fəxarətlər həkk etmişdir. XX əsrdə Ulu Tanrı Azərbaycan xalqına əvəzedilməz Heydər Əliyev zəkasını, siyasi dühasını bəxş etdi və onun respublikaya rəhbərlik fəaliyyəti ilə 1969-cu ildə çağdaş tariximizdə yeni era başladı. Heydər Əliyev dahiliyi, müdrikliyi, idrakı, kamilliyi, iradəsi və dünyagörüşü, epopeyalara sığmayan yüzlərlə möhtəşəm elmi mövzuların predmetidir.

Heydər Əliyev şəxsiyyəti öz xalqına sədaqətlə xidmət etməyin, bu yolda var qüvvə ilə bütün bilik və bacarığını yorulmadan sərf etməyin simvoludur. Məhz 70-ci illərdə onun fəaliyyəti nəticəsində Azərbaycanın iqtisadiyyatında yeni-yeni zirvələr fəth edildi, iri sənaye obyektləri inşa edildi. Kənd Təsərrüfatı sahəsində böyük nailiyyətlər əldə olundu. Təhsil sistemi köklü surətdə yenidən təşkil edildi, tələbələrin, Azərbaycandan kənarda təhsil alması istiqamətində geniş işlər görüldü. Respublika iqtisadiyyatı sahəsində ixtisaslı və dünya standartına cavab verə bilən mütəxəssislər ordusu hazırlandı. Texniki, mədəni, sosial sahədə sadaladığımız nailiyyətlərin qazanılması fövqəladə və uzaqgörən lider Heydər Əliyevin öz xalqına sonsuz istək və məhəbbətinin ifadəsinin real nəticələri idi.

XX əsrin sonunda Azərbaycan ikinci dəfə müstəqillik qazandı. Müstəqilliyimizin ilk illərində—1991-1993-cü illərdə Azərbaycanda mürəkkəb, acınacaqlı və çətin vəziyyət, siyasi hərc-mərcilik, iqtisadi böhran hökm sürürdü. Belə bir mürəkkəb dövrdə respublikanın rəhbərlik və idarəetmə sükanı xalqın birmənalı və yekdil dəstəyi ilə Heydər Əliyevə tapşırıldı. Dünya şöhrətli, müdrik, siyasi xadim, milli liderimiz sözün həqiqi mənasında Azərbaycan xalqını, onun başının üstünü almış fəlakətdən xilas etdi. Dünyanın mötəbər tribunlarında gənc müstəqil Azərbaycan adlı dövlətin çiçəklənməsindən, onun inkişafının gələcək perspektivlərindən danışıldı. Bu da dünya siyasətinin nəhəng liderlərindən biri olan Heydər Əliyevin xarici siyasət sahəsindəki uğurları idi. Nəhəng siyasi xadimin rəhbərliyi sayəsində respublikamızda siyasi-iqtisadi, mədəni və dövlət quruculuğunda qazanılan uğurların miqyası ölçüyəgəlməz dərəcədə artdı.

1994-cü ildə “Əsrin Müqaviləsi” adlanan neft kontraktının imzalanması bu nailiyyətlərin danılmaz olmasında həlledici rol oynadı. “Əsrin Müqaviləsi” məmləkətimizin qapılarını tərəqqipərvər bəşəriyyətin üzünə geniş açdı. Xalqımıza təbii sərvətlərdən özü istədiyi kimi istifadə etmək imkanının reallaşdırılması da Heydər Əliyevin fitri uzaqgörənliyi və misilsiz xidmətidir.

Xatırladaq ki, Heydər Əliyev hələ təhlükəsizlik orqanlarında işlədiyi zaman, xüsusilə bu orqana rəhbərlik etdiyi dövrdə ölkənin milli mənafeyinin müdafiə edilməsi sahəsində xeyli iş görmüşdü. Bir çox xarici dövlətlərin kəşfıyyat fəaliyyəti zərərsizləşdirilmiş, peşəkar əməliyyatlar həyata keçirilmişdi. Heydər Əliyevin uzaqgörən siyasəti nəticəsində, Təhlükəsizlik Xidməti orqanlarında azərbaycanlı zabit və siravi əməkdaşların sayı artdı. Sovetlər birliyində Azərbaycan Respublikası yeganə bir respublika idi ki, burada Dövlət Təhlükəsizlik Komitəsinin sədri, milli kadr idi. Bu da milli liderimizin böyük nüfuza malik olmasından xəbər verirdi. Sonralar ulu öndər qeyd edirdi ki, 1953-cü ildən sonra Dövlət Təhlükəsizlik Komitəsində həm kəşfiyyat, həm də əkskəşfiyyat sahəsində, bütün başqa təhlükəsizlik orqanlarında çox gözəl azərbaycanlı kadrlar yetişmişdi.

Heydər Əliyev Moskvada olarkən Sovet dövlətinin xarici siyasət xəttinin həyata keçirilməsində də fəal iştirak edirdi. Xarici ölkələrə göndərilən nümayəndə heyətinə, onların fəaliyyətinə başçılıq edirdi. O, Sovet İttifaqının rəhbərləri arasında ən intellektual, nüfuzlu şəxs kimi ad çıxarmışdı. Əldə etdiyi nailiyyətlərə görə Heydər Əliyevə SSRİ Ali Sovetinin 1983-cü il 7 may tarixli fərmanı ilə ikinci dəfə Sosialist Əməyi Qəhrəmanı adı verildi. Heç bir mübaliğəsiz demək olar ki, o zaman Heydər Əliyev Sovet dövlətinin lideri səviyyəsinə yüksəlmişdir. Təsadüfi deyil ki, K.U.Çernenkodan sonra SSRİ-də hakimiyyətə ən real namizədlərdən biri, məhz Heydər Əliyev olmalı idi. Uzun müddət SSRİ-nin xarici işlər naziri olmuş A.A.Qromıko qeyd etmişdi ki, bizim Siyasi büroda ancaq üç adam nisbətən cavandır: Romanov, Qorbaçov və Əliyev. Axırıncı mənə daha çox xoş gəlir.

Onun vaxtında Azərbaycan xüsusən, kənd təsərrüfatı çox sürətlə inkişaf etmişdir. Əliyev gözəl təşkilatçıdır, təmiz və ləyaqətli adamdır. Amma təssüf ki, onun namizədliyi istisna olunur. O, “nəyə görə, milliyyətinə görə?” sualına belə cavab vermişdi: “bu məsələdə hə, milliyyətinə görə”.

Beləliklə Kremldə hakimiyyətə, M.Qorbaçov gətirildi. Sonralar Heydər Əliyevə qarşı Qorbaçovun apardığı gizli oyunlar aşkar oldu. 1987-ci il oktyabrın 21-də Sov. İKP MK-nın plenumu keçirildi. Rəsmi məlumatda göstərilirdi ki, plenum “Səhhətinə görə pensiyaya çıxması ilə əlaqədar Sov. İKP MK siyasi bürosunun üzvü Heydər Əliyevin vəzifəsindən azad edilməsi barədə xahişini təmin etmişdir”.

Ulu öndərin müstəqil Azərbaycana 10 illik prezidentliyi dövründə çox böyük işlər görüldü. “Əsrin Müqaviləsi” imzalandıqdan sonra iqtisadiyyat yüksək templərlə inkişaf etdi. Bu, respublikada digər sahələrin inkişafının əsasını qoydu.

Heydər Əliyev respublikada dövlətçiliyin qurulmasına və möhkəmlənməsinə çox böyük diqqət yetirirdi.

Bizim Universitetimiz bugünkü fəaliyyətinə görə ulu öndərə minnətdardır. Çünki Heydər Əliyev 2000-ci ildə Nazirlər Kabinetinə göstəriş vermişdi ki, Azərbaycan Kooperasiya Universitetinin inkişaf etdirilməsi üçün tədbirlər görsün. Onun hesabınadır ki, bu gün biz lisenziya almış və akreditasiyadan keçmiş çox yüksək maddi-texniki bazaya, gözəl laboratoriya və kabinetlərə, işıqlı auditoriyalara malik olan universitetdə çalışırıq.

Ulu öndər təhsilə çox böyük diqqət və qayğı göstərirdi. O, 1998-ci il martın 30-da “Azərbaycan Respublikasında Təhsil sahəsində islahatlar üzrə Dövlət komissiyası haqqında” sərəncam verdi. 1998-2005-ci ildə təhsillə bağlı Prezident fərmanları və sərəncamları təhsilin inkişafında çox böyük rol oynadı. Universitetlərin, Elmi Tədqiqat institutlarının elmi-texniki bazası zənginləşdirildi MDB respublikalarına və xarici dövlətlərə göndərilən tələbələrin sayı sürətlə artırıldı. Bütün bunlara görə Milli liderimiz tələbələrin və gənclərin sevimlisinə çevrilmişdi. O vaxtlar Heydər Əliyev qeyd edirdi ki, mən respublikaya rəhbər təyin edildikdən sonra, birinci növbədə təhsil məsələləri ilə məşğul olmağa başladım. Azərbaycanda təhsilin xüsusilə ali təhsilin vəziyyəti ilə daim maraqlanmışam.

Ümummilli liderimiz Azərbaycana şöhrət qazandırdı. Respublikaya səfər edən xarici dövlət başçıları birinci növbədə onun qəbrini ziyarət edir və qəbrinin üstünə gül çələngi və çiçəklər düzürlər. Ulu öndər cismən aramızda olmasa da, təskinliyimiz odur ki, Heydər Əliyevin siyasi kursu onun ən layiqli siyasi varisi Prezident İlham Əliyev tərəfindən uğurla davam etdirilir.

Ölkədə gənc nəslin tərbiyəsində, hazırladığımız mütəxəssislərin dünya standartına cavab verməsində qürur duyuruq və Azərbaycanda yaşadığımız üçün fəxr edirik.

Vilayət Əliyev,

Azərbaycan Kooperasiya Universiteti əmtəəşünaslıq və ekspertiza kafedrasının müdiri, professor.

Respublika.-2014.-9 may.-S.9.