Dəniz neftçilərinin böyük uğuru

“Abşeronneft” Neft və Qazçıxarma İdarəsinin kollektivi bütün bacarıq və daxili imkanlarından səmərəli istifadə edərək, 2014-cü ilin I rübündə nəzərdə tutulan neft hasilatı üzrə tapşırığı 64 900 ton əvəzinə 76 678 ton, yəni 118,1 faiz yerinə yetirərək, əlavə 11 778 ton artıma nail olmuşdur. Keçən ilin müvafiq dövrü ilə müqayisədə neft hasilatı 22 165 ton artmışdır və artım tempi 40,7 faiz təşkil etmişdir.

Bu dövr ərzində neft təhvili üzrə tapşırıq 64 900 ton əvəzinə 75 650,6 ton, yəni 118,2 faiz yerinə yetirilmişdir və 11650,6 ton plandan əlavə neft təhvil verilmişdir. Keçən il ilə müqayisədə neft təhvili 21 927,3 ton, yəni 40,8 faiz artmışdır.

Qaz hasilatı üzrə plan 104,2 faiz yerinə yetirilmişdir. Nəzərdə tutulan 10 mln 990 min kubmetr əvəzinə 11 mln 457 min kubmetr yəni plandan əlavə 467 min kubmetr artıq qaz hasil edilmişdir. Keçən illə müqayisədə qaz hasilatı 341 min kubmetr artmışdır və artım tempi 3,1 faiz təşkil etmişdir.

Qaz təhvili planı da 107 faiz yerinə yetirilmişdir. İdarə üzrə 7 mln 326,9 min kubmetr qaz təhvil verilmişdir. Artım 476,9 min kubmetr təşkil etmişdir. Keçən il ilə müqayisədə qaz təhvili 5 faiz artmışdır.

Bu il aprelin əvvəlinə Neftqazçıxarma İdarəsi üzrə istismarda olan quyu fondu 557 quyu təşkil etmişdir, bu da keçən ilin müvafiq dövrü ilə müqayisədə 38 quyu çox olmuşdur.

Fəaliyyətdə olan quyu fondu da bu il keçən ilə nisbətən 55 quyu artıb və I rübün sonuna 497 quyu təşkil etmişdir.

İlin əvvəlindən fəaliyyətsiz quyu fondundan 10 quyu təmir edilərək istismara daxil edilib, nəticədə 1 730 ton neft hasil edilib. Bu göstərici üzrə də keçən ilə nisbətən hasilat 1091 ton artıb.

İdarə üzrə bu ilin birinci rübündə qazmadan istismara 7 quyu daxil edilib, nəticədə bu quyulardan 1 519 ton neft hasil edilmişdir. Keçən il ilə müqayisədə istismara daxil olan quyuların sayı 3 quyu artıb, onlardan hasil edilən neft də 299 ton artıb.

Keçici fonddan 73 429 ton neft hasil olunub və planda nəzərdə tutulduğundan 9 454 ton əlavə neft hasil edilmişdir. Keçən il ilə müqayisədə bu il keçici fonddan 20 775 ton artıq neft hasil edilib.

“Abşeronneft” NQÇİ-də bütün istismar üsulları ilə çıxarılan neft də plana nisbətən artıqlaması ilə yerinə yetirilib. Köhnə quyularda neft hasilatının səviyyəsini saxlamaq məqsədi ilə 2014-cü ilin I rübündə 202 texniki tədbir həyata keçirilmişdir və bu tədbirdən 1 118,5 ton neft hasil edilmişdir. Keçən il ilə müqayisədə tədbirlərin sayı 9, hasil edilən neft 77,5 ton artıb.

Bu müddət ərzində mədənlər üzrə 26 geoloji tədbir keçirilib və bu tədbirlərdən 2 042 ton neft səmərə alınıb. Keçən ilə nisbətən bu il tədbirlərin sayı 10 tədbir və bu tədbirlərdən alınan neft də 1 771 ton artıb.

Quyularda hasilatın səviyyəsinin saxlanması üçün geoloji-texniki tədbirlərlə yanaşı, əsaslı və cari təmirlərin də aparılması vacıb amildir. Bu baxımdan 2014-cü ilin I rübündə 14 yeraltı təmir briqadaları vasitəsi ilə 590 yeraltı və 10 əsaslı təmir briqadaları vasitəsi ilə 46 əsaslı təmir həyata keçirilmişdir. Əsaslı təmirdən sonra təmir olunmuş quyulardan 2 457,6 ton əlavə neft hasil olunmuşdur ki, bu da keçən ilin müvafiq dövrünə nisbətən 1 471,6 ton çox olmuşdur.

İdarə üzrə bu ilin I rübündə 1 ton əmtəəlik neftin maya dəyəri faktiki 265 man 24 qəp təşkil etmişdir və keçən il ilə müqayisədə bu göstərici 32 man 02 qəp azalmışdır.

1000 kubmetr əmtəəlik qazın maya dəyəri 173 man 08 qəp. təşkil etmişdir və keçən ilə nisbətən 49 man 99 qəp azalmışdır.

NQÇİ-nin ekologiya sahəsində, təbii sərvətlərdən səmərəli istifadə və ətraf mühitin mühafizəsinə dair təsdiq olunmuş tədbirlər planı üzrə xeyli işlər görülmüşdür. 3 ay ərzində 425 metr neft kollektoru, 75 metr qaz xətti, 331 metr atqı xətti təmir edilmişdir. Neft yığma məntəqəsində planda nəzərdə tutulmuş 9 ədəd su və 31 ədəd neft nasosları təmir edilmişdir. 38 ədəd müxtəlif ölçülü siyirtmə və ventillər təmir edilmişdir.

İdarənin daxili imkanları hesabına 2 ha yol kənarları təmizlənib və hamarlanıb, ərazi məişət və istehsalat tullantılarından təmizlənmiş və abadlaşdırma işləri aparılmışdır.

Quyuların yeraltı və cari təmiri zamanı qapalı yuma qurğularından istifadə olunur. Ətraf mühitin sağlamlığı məqsədi ilə idarədə ilin əvvəlindən 200 ədəd zeytun, 300 ədəd Eldar şamı ağacları və 100 ədəd mövsümi güllər əkilib. Ayrı-ayrı dəniz özüllərində, sex və mədən ərazilərində vaxtaşırı monitorinqlər keçirilib.

“Abşeronneft” NQÇİ-nin Əməyin mühafizəsi şöbəsi tərəfindən 2014-cü ilin I rübü ərzində struktur bölmələrdə əmək şəraitinin yaxşılaşdırılması, istehsalatda baş verə biləcək qəzaların, yanğınların, bədbəxt hadisələrin və peşə xəstəliklərinin qarşısını almaq məqsədilə müəyyən işlər görülmüşdür.

2014-cü ilin I rübü ərzində idarənin əməyin təhlükəsizliyi üzrə daimi fəaliyyət göstərən komissiyası və əməyin mühafizəsi şöbəsi tərəfindən bütün struktur bölmələrində əmək şəraitinin vəziyyəti kompleks yoxlanılıb və aşkar olunmuş nöqsanlar, çatışmazlıqlar aradan qaldırılmışdır.

“Azneft” İstehsalat Birliyi bu ilin I rübü ərzində idarəmizdə 11 yoxlama aparmış və ümumilikdə 52 nöqsan və pozuntular aşkar etmişdir ki, bunlar da aradan qaldırılmışdır.

İşçilərin təhlükəsizliyinin təmin edilməsi, onlara təhlükəsiz iş üsullarının öyrədilməsi, onların biliyinin artırılması, işçilər arasında maarifləndirməni gücləndirmək məqsədilə struktur bölmə rəhbərlərinin, baş mütəxəssislərin iştirakı ilə slayd formasında prezentasiyalar keçirilmişdir. Belə prezentasiyalar odsöndürücülərdən istifadə edilməsi, işlərin təhlükəsiz icrası prosedurları, riskin qiymətləndirilməsi, təxliyyə raportu, insident raportu, ilk yardımın göstərilməsi, “Mənim fəaliyyətim”, elektrik təhlükəsizliyi və sairə müxtəlif mövzular üzrə rüb ərzində 10 prezentasiya keçirilmişdir. Bundan əlavə, işçilər arasında hesabat dövründə: yanğın zamanı ilkin yanğınsöndürmə vasitələrindən istifadə və davranış qaydaları, xəsarət alana ilk tibbi yardımın göstərilməsi və belə hallarda davranış qaydaları, fontana qarşı təlim, işçilərin təxliyyəsi mövzuları üzrə 48 təlim-məşqlər keçirilmişdir.

Görülən işlərin qəzasız və yüksək səviyyədə yerinə yetirilməsində kadrların rolunun böyük olduğunu nəzərə alaraq, rəhbər və mühəndis texniki işçilərin təhlükəsizlik texnikası üzrə biliklərinin artırılması məqsədi ilə hesabat dövründə 73 nəfər mühəndis-texniki işçilərin bilikləri yoxlanılmışdır.

İdarə üzrə 2014-cü ilin I rübü ərzində Dənizdə İnsan Həyatının Mühafizəsi üzrə Təlim Mərkəzində təşkil olunan stasionar dəniz platformalarının və üzən qazma qurğularının heyətləri üçün təhlükəsizlik üzrə tanışlıq, ilkin hazırlıq və təlimat kurslarına və digər kurslara istehsalatdan ayrılmaqla ümumilikdə 42 nəfər göndərilmişdir.

Təhlükəsiz iş şəraiti yaratmaq, təhlükəsizlik texnikasının norma və tələblərinə əməl etmək istehsalatda zədəsiz işləmək deməkdir. Qeyd olunanları həyata keçirmək üçün fəhlə və qulluqçular qayda və qanunları lazımi səviyyədə bilməlidirlər. Bu məqsədlə əməyin mühafizəsi kabineti təşkil olunmuşdur. Kabinet lazımi texniki vasitələrlə təchiz olunmuşdur, bu da işçilərə əyani surətdə əməyin mühafizəsi və təhlükəsizlik texnikası sahəsində daha dolğun məlumat almaq üçün təşkil edilmişdir.

“Abşeronneft” NQÇİ əməyin mühafizəsi sahəsində əldə olunan yüksək göstəricilərə görə Azərbaycan Respublikası Həmkarlar İttifaqı Konfederasiyası tərəfindən ölkə üzrə ən yüksək yerə layiq görülmüşdür.

“Abşeronneft” NQÇİ-də 2014-cü il 1-ci rübündə işçilərin sosial məişət şəraitinin yaxşılaşdırılması istiqamətində müəyyən işlər görülmüşdür. 2014-ci ilin I rübündə işçilərin sosial-məişət şəraitinin yaxşılaşdırılması üçün 3 saylı NQÇS-nin xidməti və istehsalat təyinatlı binalarının tikintisi davam etdirilir. İşçilərin məişət şəraitinin yaxşılaşdırılması məqsədi ilə xüsusi geyimlərin qurudulması üçün 4 ədəd vaqon evciklər hazırlanmış və Dəniz Özüllərinə yerləşdirilmişdir.

Zərərli iş şəraitində calışan işçilərə süd məhsullarının verilməsi məqsədi ilə mart ayı üçün 8000 ədəd “Pal süd” alınaraq paylanılmışdır. İşçilərin iş yerlərində su ilə təchizatını yaxşılaşdırmaq məqsədi ilə 3 ay ərzində 582 ədəd “Bonaqua” mineral suyu alınmış və işçilərə paylanmışdır.

ARDNŞ-in işçilərinə maddi yardım verilməsi haqqında “Əsasnamə”yə müvafiq olaraq maddi yardımların göstərilməsi davam etdirilmişdir.

“8 Mart” qadınlar bayramı və Novruz bayramı ilə əlaqədar olaraq bayram tədbirləri keçirilmiş, NQÇİ-nin sex və sahələrinə bayram hədiyyələr, xonçalar paylanılmışdır.

“31 Mart Azərbaycanlıların Soyqırımı” və “Yaşlı nəslin təcrübəsindən faydalanaq” mövzularında tədbirlər keçirilmişdir.

“Azneft” İB-nin telefonoqramına əsaslanaraq NQÇİ-nin inzibati binası, sex və sahələrin həyətlərində iməciliklər keçirilmiş, bu istiqamətdə işlər davam etdirilmişdir.

“Abşeronneft” NQÇİ-nin dəniz və quru sahəsində təmirə ehtiyacı olan məişət avadanlıqları (kondisioner, soyuducu, televizor və s.) barədə “Azneft” İB-yə məktubla müraciət edilmiş və avadanlıqlar “A-Kond-1” MMC tərəfindən təmir edilmişdir.

Şübhəsiz ki, qarşıda görəcəyimiz işlər hələ çoxdur. Bu işləri yüksək səviyyədə icra etmək üçün kollektivin səyləri səfərbər edilmişdir.

Şahmar HÜSEYNOV,

“Azneft” İB-nin “Abşeronneft” NQÇİ-nin rəisi.

Respublika.-2014.- 24 may.- S.4.