ÖLKƏMİZİN MÜSTƏQİLLİYİ DAİMİ VƏ ƏBƏDİDİR

Mayın 28-də Azərbaycan Xalq Cümhuriyyətinin yaradılmasının 96-cı ildönümü tamam olur. Respublika Günü kimi qeyd edilən bu tarixi gün şərəfli keçmişə ehtiram və gələcəyə inam hisslərini özündə cəmləşdirərək Azərbaycan xalqının həyatına çox mühüm və əlamətdar bir hadisə kimi daxil olmuşdur. Xalqımız hər il bu günü böyük təntənə ilə qeyd edir. Mayın 27-də Respublika Günü münasibətilə Prezident İlham Əliyev Azərbaycan Xalq Cümhuriyyətinin şərəfinə ucaldılmış abidəni ziyarət edərək, ADR-in qısa, lakin şərəfli tarixinə ehtiramını bildirmişdir.

1918-ci il mayın 28-də – Gülüstan və Türkmənçay müqavilələrindən sonra müstəqilliyini itirən, yüz ildən artıq müstəmləkə şəraitində yaşayan, mədəniyyəti, dili, dini sıxışdırılan Azərbaycan azadlığa çıxmışdır. 1918-ci ilin məhz həmin günü xalqımız azadlıq və müstəqillik arzularına qovuşmuş, müsəlman şərqində ilk demokratik respublika olan Azərbaycan Xalq Cümhuriyyətini elan edərək istiqlaliyyət uğrunda mübarizə tarixinə parlaq və şanlı səhifə yazmışdır.

1918-ci il mayın 28-də “İstiqlal bəyannaməsi”ndə Azərbaycanın müstəqil dövlət olduğu elan edilirdi. Azərbaycan Xalq Cümhuriyyəti müsəlman şərqində yaranmış ilk xalq demokratik respublikası idi. Hər bir xalqın, millətin sahib olduğu ən böyük sərvət isə onun müstəqil dövlətinin olmasıdır. Lakin müstəqillik təsadüfən qazanılmır və ya onu hədiyyə etmirlər. Müstəqilliyə gedən yol böyük mübarizələrdən keçir. Onu qazanmaq və qoruyub saxlamaq qurban tələb edir. Əldə edilmiş bu azadlıq xalqımızın böyük mübarizəsinin, onun böyük oğlu Məhəmmədəmin Rəsulzadə başda olmaqla görkəmli ziyalılarımızın təfəkkürünün bəhrəsi idi. Müstəqilliyimizi qoruyub saxlamaq üçün ciddi tədbirlər görüldü. Azərbaycan Xalq Cümhuriyyətinin ilk hökumət başçısı Fətəli xan Xoyski 1918-ci il mayın 30-da teleqrafla bütün dünya ölkələrinə Azərbaycanın müstəqil olmasını elan etdi. İyun ayının 4-də qardaş Osmanlı dövləti ilə sülh və dostluq müqaviləsi bağlanaraq, Osmanlı dövlətindən hərbi yardım alındı. Beləliklə də 1918-ci il iyunun 26-da Azərbaycanın milli ordusu yaradıldı. Azərbaycan dili dövlət dili elan edildi. Üçrəngli – göy, qırmızı, yaşıl bayrağımız yaradıldı. Xalqımızın savadlanması üçün məktəblər, yaşlılar üçün savad kursları, türk olmayan xalqlar üçün türkdilli kurslar açıldı. 1919-cu ildə ən böyük ali təhsil ocağı Bakı Dövlət Universiteti açıldı. Məktəblər üçün dərsliklər yazılır, kitabxanalar açılır, onlarca qəzet və jurnal nəşr olunurdu. Milli muzeyimiz – “İstiqlal” muzeyi yaradıldı. Bütün bunlar hamısı qısa sürmüş müstəqillik zamanı əldə edilmiş uğurlar idi.

Bir sözlə, xalqımızın milli oyanışı və dirçəlişi proseslərinin məntiqi nəticəsi kimi meydana çıxan Azərbaycan Xalq Cümhuriyyəti qısa zaman ərzində öz ərazisində tam dövlət hakimiyyətinə malik olmaqla müstəqil xarici və daxili siyasət yeritmiş, dövlətə xas olan təsisatlar – parlament, hökumət, ordu, maliyyə sistemi yaratmış, xalqımızın tarixində böyük iz qoyan tədirlər həyata keçirmişdir.

Demokratik hüquq və azadlıqların bərqərar olması, etnik və dini mənsubiyyətdən asılı olmayaraq bütün vətəndaşların bərabər hüquqlarının tanınması, hətta bir çox Avropa ölkəsindən daha əvvəl qadınlara seçki hüququnun verilməsi, Azərbaycan dilinin dövlət dili elan edilməsi, təhsil və mədəniyyətin inkişafına xüsusi diqqət göstərilməsi, nizami milli ordunun, təhlükəsizlik strukturlarının qurulması və sair işlər Xalq Cümhuriyyəti hökumətinin yürütdüyü siyasətin miqyasını, mahiyyət və mənasını əyani şəkildə səciyyələndirir.

Demokratik Respublika dövründə kitabxana və muzey işinin quruluşunda böyük yeniliklər edilmişdir. Azərbaycan hökuməti geniş oxucu kütləsinin ehtiyaclarını ödəmək üçün Bakıda ümumi kitabxana təşkil etmək məsələsini qaldırmışdır. 1920-ci ilin apreli üçün Azərbaycanda 95 min nüsxə kitab fondu olan 11 kitabxana var idi.

Həmin dövrdə Bakıda etnoqrafiya muzeyinin yaradılması haqqında Maarif Nazirliyi qarşısında məsələ qaldırılmışdır. Xalq Cümhuriyyətinin zəngin və rəngarəng, orijinal mətbuatı olmuşdur. 1918-20-ci illərdə Bakıda, Gəncədə və respublikanın digər şəhərlərində onlarca qəzet və jurnal nəşr olunmuşdur.

Milliyyətindən, siyasi və dini məsubiyyətindən, cinsindən asılı olmayaraq bütün vətəndaşlara bərabər hüquqlar verilməsi, dövlət sərhədlərinin müəyyən olunması, dövlətçilik rəmzlərinin qəbul edilməsi, ana dilinin dövlət dili elan edilməsi Azərbaycanın gələcək müstəqilliyi üçün möhkəm təməl yaratmışdır.

Çox çətin və ziddiyyətli tarixi şəraitdə qurulan Azərbaycan dövləti cəmi 23 ay fəaliyyət göstərmişdir. 1920-ci il aprel ayının 28-də Sovet Rusiyası beynəlxalq hüquq normalarını kobudcasına pozaraq silahlı qüvvələrini Azərbaycan ərazisinə yeritmiş, cümhuriyyətin varlığına son qoymuşdur.

Azərbaycan Demokratik Respublikasının süqutundan sonra Sovet imperiyasının 70 illik əsarəti dövrü başladı. Lakin xalqımız müstəqillik uğrunda mübarizəni davam etdirdi. Bu mübarizədə çoxlu şəhidlər verdik.

XX əsrin sonlarında xalqımız özünün müstəqillik mübarizəsinin nəticəsi kimi dövlət suverenliyinin yenidən bərpasına nail oldu. 1991-ci ildə müstəqilliyimizi yenidən əldə etdik. 18 oktyabr 1991-ci il tarixində Azərbaycanın dövlət müstəqilliyi haqqında Konstitusiya aktı qəbul edilərək müstəqil Azərbaycan dövlətinin yaradılması və yeni qurulan dövlətin Azərbaycan Xalq Cümhuriyyətinin hüquqi varisi olması bəyan edilmişdir.

Azərbaycan özünün müstəqilliyinin ilk illərindən yeni geosiyasi vəziyyətin diktə etdiyi ciddi siyasi, iqtisadi, sosial və idarəçilik problemləri ilə qarşılaşmalı oldu. Ermənistanın hərbi təcavüzünün nəticəsi kimi ortaya çıxan Dağlıq Qarabağ problemi və iqtisadi tənəzzül, hüquqi qeyri-müəyyənlik, siyasi təlatümlər, zorakılıqlarla müşayiət olunan hakimiyyət ambisiyaları dövlət həyatını və cəmiyyəti idarəolunmaz vəziyyətə gətirmişdi. Bütövlükdə isə bu problemlər milli təhlükəsizliyi və müstəqilliyin özünün mövcudluğunu ciddi təhdid edəcək səviyyəyə qədər qalxmışdı. Təsadüfi deyildir ki, Azərbaycanın müasir müstəqillik tarixinin araşdırıcıları da həmin dövrü – 1991-1993-cü illəri xaosun, anarxiyanın, böhranın dərinləşdiyi, dövlətin parçalanma, millətin isə məhv olma təhlükəsi ilə qarşı-qarşıya qaldığı dövr kimi qiymətləndirərək “formal müstəqillik” mərhələsi kimi xarakterizə edirlər.

1993-cü ilə qədər ölkəmiz elə vəziyyətə düşmüşdü ki, bir daha dirçələcəyimizə gümanımız yox idi, Azərbaycanın bir dövlət kimi mövcudiyyəti şübhə altına düşmüşdü. Elə bir xaos, özbaşınalıq şəraiti yaranmışdı ki, bundan baş çıxarmaq hər kəsin işi deyildi. Problemlər baş alıb gedirdi, həmin problemləri aradan qaldıra biləcək yeganə qüvvə isə yalnız Heydər Əliyev şəxsiyyəti ola bilərdi. Ölkəni görünməmiş bəlalardan xilas etmək üçün lazım olan enerji, müdriklik və uzaqgörənlik yalnız bu nadir insanda var idi, ümidlər yalnız ona idi. Çünki xalq hələ 1969-cu ildə hakimiyyətə gələndən sonra Heydər Əliyevin necə böyük işlər gördüyünü görmüşdü.

1993-cü ilin iyununda Azərbaycanın öz müstəqilliyini itirmək təhlükəsi reallaşdı. Bir ovuc quldur dəstəsinin əlində aciz qalmış AXC-Müsavat hakimiyyəti artıq ölkəni idarə etmək iqtidarında deyildi. Ölkədə qanunlar işləmir, anarxiya baş alıb gedir, erməni təcavüzü sürətlə genişlənir, yeni-yeni ərazilərimiz işğal olunurdu. Azərbaycanın bir dövlət kimi məhvi labüd görünürdü. Lakin xalq milli fəlakətin astanasında yenə öz sözünü dedi: Azərbaycanı faciədən yalnız ümummilli liderimiz Heydər Əliyev xilas edə bilər. Bu qətiyyətin arxasında möhkəm sınaqlardan çıxmış inam dururdu.

Ümummilli liderimiz Heydər Əliyevin xalqın tələbi ilə respublika rəhbərliyinə qayıdışı dövlətçiliyimizi, müstəqilliyimizi xilas etdi. Onun siyasi uzaqgörənliyi, dərin iradəsi, dövlət idarəçiliyi sahəsində zəngin təcrübəsi Azərbaycanı fəlakətdən qurtardı.

O dövrdə müdrik rəhbərin qısa zaman kəsiyində həyata keçirdiyi tədbirlərlə cəbhə xəttində atəşkəsə nail olundu, qanunsuz silahlı dəstələr zərərsizləşdirildi, dövlət çevrilişi cəhdlərinin və terror aktlarının qarşısı alındı. Bununla da respublika ərazisində stabil, normal həyat bərqərar olundu.

Sabitlik əldə olunandan sonra dövlət quruculuğu istiqamətində təxirəsalınmaz addımlar atıldı, bir çox mühüm qanunlar qəbul edildi. Bu da öz növbəsində dövlət institutunu möhkəmləndirdi. Ölkə iqtisadiyyatının dirçəlişi yönümündə də çoxsaylı vacib müqavilə və proqramlar imzalandı, xalq təsərrüfatının ayrı-ayrı sahələrində perspektiv layihələr, islahatlar həyata keçirildi. Odur ki, 1995-ci ildən iqtisadiyyatın hər sahəsində inkişaf açıq-aydın gözə çarpmağa başladı.

Azərbaycanın dövlət müstəqilliyinin möhkəmləndirilməsində milli sərvətlərimizdən ölkənin və xalqın mənafeyinə uyğun istifadə olunmasında ümummilli liderimiz Heydər Əliyevin uğurlu neft strategiyası olduqca xüsusi əhəmiyyət kəsb edir. 1994-cü il sentyabrın 20-də dünyanın iri neft şirkətləri ilə imzalanmış “Əsrin müqaviləsi”, 1999-cu il noyabrın 18-də ATƏT-in İstanbul zirvə toplantısında Bakı-Tbilisi-Ceyhan əsas neft ixrac boru kəmərinin inşa olunmasına dair bağlanmış saziş Azərbaycanın dövlət müstəqilliyinin möhkəmlənməsində müstəsna rol oynadı.

Bu gün Azərbaycan dinamik inkişaf edən, dünya birliyində layiqli yer tutan, müstəqil siyasət yürüdən bir dövlətdir, imzalar içində millətimizin də imzası görünür.

Ulu öndərimiz Heydər Əliyevin Azərbaycan dövlətçiliyi qarşısında başlıca xidmətlərindən biri də dövlət quruculuğunun hüquqi bazasının yaradılmasıdır. 1995-ci ildə qəbul olunmuş ilk milli Konstitusiya Azərbaycan Respublikasının hüquqi, dünyəvi dövlət kimi ilk dəfə olaraq insan hüquqlarının qorunmasını öz siyasətinin prioriteti kimi qəbul etdiyini göstərdi.

Xalqımız yeni tarixi şəraitdə öz dövlət müstəqilliyini bərpa etdikdən sonra ümummilli liderimiz Heydər Əliyevin rəhbərliyi altında Xalq Cümhuriyyətinin ənənələrini əsas tutaraq, müstəqil Azərbaycan dövlətini yaratdı. Lakin Azərbaycan Respublikası Azərbaycan Xalq Cümhuriyyətindən fərqli olaraq, mürəkkəb vəziyyətdə öz müstəqilliyini və suverenliyini qorumağı və möhkəmləndirməyi bacardı, dövlətçiliyin qorunması üçün qətiyyətli tədbirlər görüldü, ölkədə davamlı ictimai-siyasi sabitlik bərpa edildi. Bu gün möhtərəm Prezidentimiz cənab İlham Əliyevin rəhbərliyi altında Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi uğurla davam etdirilir. Bu sahədə qazanılmış nailiyyətlər qürur doğurur. Respublikamızda siyasi, iqtisadi və sosial islahatlar uğurla həyata keçirilir, ölkə iqtisadiyyatı dönmədən inkişaf etdirilir, əhalinin sosial müdafiəsinin gücləndirilməsi üçün təsirli tədbirlər görülür.

Artıq Azərbaycan Qafqazın lider ölkəsinə sevrilib və özünün beynəlxalq aləmdəki mövqeyini getdikcə möhkəmləndirir. Dünyanın super dövlətləri olan ABŞ, Rusiya, Fransa ilə münasibətlərimiz strateji tərəfdaşlıq səviyyəsinə yüksəlib. Ən başlıcası isə müstəqilliyimiz əbədi, sarsılmaz xarakter alıb. Azərbaycanın ərazi bütövlüyünü bərpa etməyə qadir güclü ordusu var.

Biz bu gün də Azərbaycan Xalq Cümhuriyyətinin tarixini, onun görkəmli şəxsiyyətlərinin fəaliyyətini dərindən öyrənməli, ideyalarını təbliğ etməli, təcrübəsindən bəhrələnməliyik. Cümhuriyyətin tarixi təcrübəsi göstərir ki, dövlət müstəqilliyini və suverenliyi əldə etmək kifayət deyil, həm də onu bütün vasitələrlə qorumaq və möhkəmləndirmək lazımdır.

Müstəqilliyimizi bərpa etdikdən sonra bu bayram hər il ölkəmizdə böyük təntənə ilə qeyd edilir. Keçirilən tədbirlərdə Cümhuriyyət dövrünə bir daha nəzər salınır, onun tariximizdəki yeri və rolu ətraflı təhlil edilir, dövlət quruculuğu təcrübəsi hərtərəfli öyrənilir.

Müsəlman Şərqində ilk demokratik respublika olan Azərbaycan Xalq Cümhuriyyəti ölkəmizin çoxəsrlik sosial-iqtisadi, ictimai-siyasi və mədəni inkişafının, xalqımızın milli oyanışı və dirçəlişi proseslərinin məntiqi nəticəsi kimi meydana çıxmışdır. Azərbaycan Xalq Cümhuriyyəti xalqımızın siyasi şüur səviyyəsinin, intellektual və mədəni potensialının, yüksək istedad və qabiliyyətinin göstəricisi idi. 1918-ci il mayın 28-də Azərbaycanın istiqlaliyyətinin elan edilməsində, Xalq Cümhuriyyətinin təşəkkül tapmasında və fəaliyyət göstərməsində Cümhuriyyətə rəhbərlik etmiş şəxslərin Əlimərdan bəy Topçubaşovun, Məhəmmədəmin Rəsulzadənin, Fətəli xan Xoyskinin, Həsən bəy Ağayevin, Nəsib bəy Yusifbəylinin, Səməd bəy Mehmandarovun, Əliağa Şıxlinski və başqalarının böyük xidmətləri olmuşdur. Bu görkəmli dövlət xadimlərinin, vətənpərvər ziyalıların, peşəkar hərbçilərin adları xalqımızın yaddaşına əbədi həkk olunmuşdur.

XIX əsrin sonlarında və XX yüzilliyin əvvəllərində Tbilisi şəhəri Zaqafqaziyanın mədəni mərkəzlərindən biri sayılırdı. Azərbaycan Xalq Cümhuriyyəti süqut edəndə azadlıq fədailərinin sığınacaq məkanlarından birinə çevrilmişdi. Tariximizə böyük diqqət və hörmətlə yanaşan ümummilli liderimiz Heydər Əliyev Şəmkir Rayon İcra Hakimiyyətinin başçısı vəzifəsində işlədiyim zaman mənə tapşırıq verdi ki, bu qədim şəhərdə dünyasını dəyişən ziyalıların taleyini araşdırım. Ulu öndərin xüsusi tapşırıqları ilə, ilk öncə Mirzə Fətəli Axundovun geniş və yaraşıqlı evində müəyyən təmir-bərpa işləri aparılaraq azərbaycanlıların mədəniyyət mərkəzinə çevrildi. Sonra Nəriman Nərimanovun doğma ocağı erməni əsilli nankorlardan təmizləndi. Mirzə Cəlilin mənzilində, “Molla Nəsrəddin” jurnalının redaksiyasında, “Qeyrət” mətbəəsində təmir-bərpa işləri aparılaraq xatirə muzeyləri yaradıldı. Gürcüstan-Azərbaycan Mədəni Əlaqələr Cəmiyyətinin nəzdində İbrahim İsfahanlı adına teatrın fəaliyyəti bərpa olundu. Az qala, unudulmaqda olan bu səhnə fədaisinin 100 illik yubileyi təntənəli şəkildə qeyd edildi. Cümə məscidinin qənşərində böyük sənətkarın yaşadığı binaya xatirə lövhəsi vuruldu.

Tbilisidəki Nəbatat bağında yenidənqurma işləri aparıldı. Köhnə qəbirlər tamamilə sıradan çıxa bilərdi. Ulu öndərin tövsiyəsilə iki yüz kvadratmetrdən çox ərazi abadlaşdırıldı. Azərbaycanlı şəxsiyyətlərin əbədiyyətə qovuşduğu bu müqəddəs yer əsl ziyarətgaha çevrildi. Böyük mütəfəkkir Mirzə Fətəli Axundovun büstü bərpa edildi. Unudulmaz şairimiz Mirzə Şəfi Vazehin qəbirüstü abidəsi ucaldıldı. Görkəmli ziyalı Həsən bəy Ağayevin büstü qoyuldu. Qədim müsəlman qəbiristanlığında Tiflis ədəbi mühitindən çıxmış, müstəqil Azərbaycan dövlətçiliyi uğrunda mübarizə aparmış insanların, tanınmış elm və mədəniyyət nümayəndələrinin, ictimai-siyasi xadimlərin adları yazılmış fəxri güşə yaradıldı. Zərli boya ilə “Azərbaycan övladları” sözləri yazılmış mərmər lövhədə öz dövrünün adlı-sanlı ziyalılarının, böyük şəxsiyyət kimi tanınan soydaşlarımızın: Mirzə Şəfi Vazeh, Mirzə Fətəli Axundov, Fətəli xan Xoyski, Həsən bəy Ağayev, Əliqulu Qəmküsar, Hüseyn Əfəndi Qayıbov, Eynalı bəy Sultanov, Behbudağa Şahtaxtinski, Nazlı xanım Məmmədquluzadə, Müzəffər Nərimanov və onlarca başqalarının adları həkk olundu. Bütün bunlar bilavasitə xalqımızın ümummilli lideri Heydər Əliyevin təşəbbüsü və tövsiyəsi ilə həyata keçirildi.

Heydər Əliyevin Fətəli Xan Xoyskiyə xüsusi rəğbəti olmuşdur. 1996-cı ilin soyuq qış günlərindən biri idi. Həmişə olduğu kimi, soydaşlarımızla görüş üçün Tbilisiyə getmişdik. İşimizi görüb evə qayıtmağa hazırlaşırdıq. Axşam saat doqquz olardı. Mənə məlumat verdilər ki, ağbirçək bir qadın təklikdə görüşmək, nəsə bir söz demək istəyir. Görüşdük, söhbətdən məlum oldu ki, qocaman müəllim xalqımız üçün çox böyük əhəmiyyətə malik bir sirrin üstünü açmaq fikrindədir. Müəllim illər boyu heç kimə bildirmədiyi bir həqiqəti – Fətəli Xan Xoyskinin dəfn edildiyi yeri mənə açıqladı: “O zaman - dedi, – Fətəli Xan Xoyskini allahsız adam kimi Şeyx Sənan dağının ətəyindəki qəbiristanlıqda, mənim qardaşımın yanında basdırdılar...”.

Sonra qadın o yeri göstərib dedi ki, buradakı ermənilər xəbər tutsalar, Xoyskinin qəbrini dağıdarlar, bu məsələni cənab Heydər Əliyevə çatdırmağınızı xahiş edirəm.

Həmin gün axşam Şəmkirə qayıtdım və ulu öndər Heydər Əliyevlə əlaqə saxlayıb Gürcüstanla bağlı ümumi məlumat verdim. Sonda ölkə Prezidentinə ağbirçək müəllimin dediklərini də çatdırdım. Ümummilli liderimiz dərhal soruşdu: “Bu məsələdən daha kimin xəbəri var?” Cavab verdim ki, məndən başqa sürücüm və daha iki nəfər bilir. Ani sükutdan sonra Heydər Əliyev soruşdu:

—Yorulmamısan? Dedim: —Xeyir. Tapşırdı ki, elə indi geri qayıdıb, orada keşik çəkin. Səhər isə Tbilisi Cümə məscidinin axundunu da götürüb müsəlman adət-ənənəsi ilə, deputatlarımızın və digər ziyalılarımızın iştirakı ilə Xoyskinin qəbrinin M.F.Axundovun büstünün yanına köçürülməsini təmin edin. F.X.Xoyskiyə xüsusi məhəbbətim olduğu üçün qəbirüstü abidənin açılışında mən özüm iştirak edəcəyəm.

Ulu öndərin dediyi kimi də etdik. Abidə vaxtında hazır oldu. Çox gözəl də alındı. 1996-cı il mart ayının 9-da Heydər Əliyev Fətəli xan Xoyskinin büstünün açılışında şəxsən iştirak etdi.

Abidənin açılışında iştirak edən ulu öndər özünə xas olan tərzdə Xoyskinin həyatı ilə bağlı çox maraqlı çıxış etdi. Çıxışında Xoyskinin ermənilər tərəfindən qətlə yetirildiyini və bu hadisədə azərbaycanlının da iştirak etdiyini təəssüf hissi ilə qeyd etdi.

Ümummilli lider Heydər Əliyev mənə Tbilisidə Azərbaycan Xalq Cümhuriyyətinin elan edildiyi binanın önündə (hazırda burada Gənclər Sarayı yerləşir) xatirə lövhəsinin asılmasını tapşırmışdı. Bu tapşırıq yüksək səviyyədə həll edilmişdi və 28 may ilə bağlı bütün tədbirlər həmin binada keçirilirdi. Belə tədbirlərin birində Gürcüstan prezidenti Eduard Şevardnadze gülümsəyərək mənə bildirdi ki, AXC-nin xatirə lövhəsi həm tərtibat baxımından, həm də ölçülərinə görə yüksək səviyyəlidir. İstərdim ki Gürcüstan Respublikasının da müstəqilliyi həmin binada elan edildiyi üçün həmin formada xatirə lövhəsi asılsın. Biz bu xahişi də yerinə yetirdik. Və həmin binada Azərbaycan Xalq Cümhuriyyətinin və Gürcüstan Respublikasının xatirə lövhələri binanın girişində öz əksini tapdı.

Hazırda bu siyasət Prezident İlham Əliyev tərəfindən davam etdirilir. Ölkə Prezidentinin diqqət və qayğısının daha bir bariz nümunəsi də 2014-cü ilin yanvar ayında Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmmədəmin Rəsulzadənin anadan olmasının 130 illik yubileyinin keçirilməsi barədə ölkə Prezidentinin sərəncamıdır. Bu sərəncam həm də onu deməyə əsas verir ki, Prezident İlham Əliyev Azərbaycan tarixi və mədəniyyətinin milli-mənəvi həyatımızdakı yerini və rolunu olduqca dərindən bilir və onu yüksək dərəcədə qiymətləndirir, Azərbaycan tarixinə, mədəniyyətinə böyük hörmət və məhəbbət bəsləyir.

Tariximizə qayğı baxımından millət vəkili, Heydər Əliyev Fondunun prezidenti Mehriban xanım Əliyevanın Heydər Əliyev irsinə sadiq olaraq Mirzə Şəfi Vazehin, Mirzə Fətəli Axundovun, Fətəli Xan Xoyskinin qəbirüstü abidələrinin rekonstruksiyası və orada xiyabanın yaradılması barədə irəli sürdüyü təşəbbüs təqdirəlayiqdir.

Bu gün müstəqil Azərbaycan dövlətinin öz siyasi dəst-xətti, dövlətçilik siması, inkişaf yolu vardır. Ölkə iqtidarının milli maraqlara əsaslanan siyasəti, iqtisadi inkişaf və demokratikləşdirmə, hüquqi dövlət quruculuğu, effektiv diplomatiya istiqamətində ardıcıl və məqsədyönlü fəaliyyəti də məhz milli müstəqilliyin praktik olaraq gerçəkləşdirilməsini təmin etmişdir.

Azərbaycanın inkişaf səviyyəsini göstərmək üçün statistik rəqəmlərə ehtiyac yoxdur. Çünki bu titanik intibah hər birimizin şəxsi həyatında, iş şəraitində, yaşadığı mənzildə, küçədə, şəhərdə müşahidə etdiyi gündəlik yeniliklərdir.

28 May müstəqillik tariximiz olmaqla, hər bir soydaşımız üçün milli iftixarla dolu əziz bir gündür. İnanırıq ki, hörmətli Prezidentimiz cənab İlham Əliyevin məqsədyönlü fəaliyyəti sayəsində ölkəmizin iqtisadi potensialı daha da yüksələcək, işğal altında olan torpaqlarımız erməni daşnaklarından azad olunacaq, Azərbaycan dünyanın qüdrətli dövlətlərindən birinə çevriləcəkdir.

Aslan Aslanov,

YAP Siyasi Şurasının üzvü.

Respublika.-2014.- 28 may.- S.5.