Qazanılmış nailiyyətlər dövlət qayğısının nəticəsidir

Tarixi həqiqətdir ki, Azərbaycanda təhsilin dünyanın inkişaf tendensiyalarına və beynəlxalq standartlara cavab verən hazırkı səviyyəyə çatması və inkişafında ümummilli liderimiz Heydər Əliyevin müstəsna xidmətləri olmuşdur. Bu gün sürətlə dünya birliyinə inteqrasiya olunan müstəqil Azərbaycan dövləti, onun çağdaş milli tarixinin son bir qərinəsi məhz Heydər Əliyevin adı ilə bağlıdır. Bu dövr ölkəmizdə sosial-iqtisadi və mədəni sahələrin, xüsusilə də milli təhsilin inkişafında xüsusi mərhələ təşkil edir. Ulu öndərimizin siyasi kursunun layiqli davamçısı, Prezidentimiz İlham Əliyev tərəfindən son on il ərzində bütün sahələrdə olduğu kimi təhsil sisteminin də yenidən qurulmasına yönəldilən sosial siyasət bu gün öz parlaq təzahürlərini verməkdədir. Təhsil sisteminin mükəmməl tərzdə inkişaf etdirilməsi, onun maddi-texniki bazasının mükəmməlləşdirilməsi nadir potensialının gücləndirilməsi bütün bunlar yeni-yeni uğurların qazanılmasında başlıca rol oynamışdır. Ölkəmizin qabaqcıl təhsil ocaqlarından biri olan Mingəçevir şəhər təhsil şöbəsi son vaxtlarda xeyli uğurlu işlərə imza atmış, yeniyetmə və gənclərin əsl vətənpərvər kimi formalaşması istiqamətində ürəkaçan işlər görmüşdür.

Həmsöhbətimiz şəhər təhsil şöbəsinin müdiri, filologiya üzrə fəlsəfə doktoru, respublikanın əməkdar müəllimi Sahib Məmmədovdur.

—Ölkəmizin dinamik inkişafı cəmiyyət həyatının bütün sahələrində özünü büruzə verir, – deyə sözə başlayan Sahib müəllim bildirdi ki, bu baxımdan təhsil də istisna təşkil etmir. Müstəqillik əldə edildikdən sonra Azərbaycan məhz ümummilli lider Heydər Əliyevin hazırladığı və həyata keçirdiyi neft strategiyası nəticəsində iqtisadi inkişaf yoluna qədəm qoydu və hazırda bu yolla irəliləməkdədir. Amma sirr deyil ki, neft, qaz kimi sərvətlər daimi deyil. Prezident İlham Əliyev dəfələrlə bildirib ki, respublikamızda iqtisadiyyatın modernləşdirilməsi ilə bağlı ardıcıl işlər görülür və Azərbaycan hökumətinin apardığı siyasətin əsas istiqamətlərindən biri “qara qızıl”ı insan kapitalına çevirməkdən ibarətdir. “Qara qızıl”ın insan kapitalına çevrilməsi istiqamətində son illər ölkədə mühüm addım atılıb, təhsilin normativ-hüquqi bazasının təkmilləşdirilməsi, maddi-texniki təminatı istiqamətində ölkə Prezidentinin sərəncamları əsasında geniş tədbirlər həyata keçirilib. Bu işlər respublikanın hər bir guşəsində olduğu kimi, doğma şəhərimizdə də yüksək səviyyədə həyata keçirilir. Təhsil müəssisələrimizdə məskunlaşan köçkün soydaşlarımız üçün yeni şəhərciyin istifadəyə verilməsi məktəblərimizdə tədrisin normal təşkili üçün yaxşı şərait yaratmışdır. Bu, möhtərəm Prezidentimizin həm köçkünlərin həyat şəraitinin yaxşılaşdırılmasına, həm də təhsılə diqqət və qayğısının nəticəsidir. Əlavə olaraq qeyd edim ki, məcburi köçkünlərimizdən boşaldılan məktəblərimizin əksəriyyətində bu ildən yüksək səviyyədə əsaslı təmir işləri başlanmasına göstəriş verilmişdir. Bu işlər şəhərimizin 4 və 10 saylı tam orta məktəblərində, 10 və 12 saylı körpələr evi-uşaq bağçalarında yekunlaşmaq üzrədir. Digər 7 məktəbdə isə layihə işləri tamamlanaraq bu günlərdə təmirə başlanılacaqdır. Bu, Mingəçevir və Mingəçevirin təhsil işçilərinə göstərilən böyük diqqət və qayğıdır. Biz təhsil işçiləri bu qayğıya cavab olaraq və yaradılan şəraitdən istifadə edərək bir sıra uğurlara imza atmışıq.

Ötən tədris ilində XI sinfi bitirmiş şagirdlərimizin 18 nəfəri qızıl medala layiq görülmüşdür ki, bu nailiyyət şəhərimizin təhsil tarixində heç vaxt olmamışdır. IX sinfı bitirən 9 nəfər şagirdimiz isə fərqlənmə şəhadətnaməsi almışdır.

Ali məktəbə qəbul üçün sənəd vermiş məzunlarımızın 408 nəfəri qəbul imtahanlarını müvəffəqiyyətlə verərək respublikamızın və xarici ölkələrin ali təhsil müəssisələrinə qəbul olmuşlar. Bu, ümumi şagirdlərin 61 faizini təşkil edir. Onlardan 14 nəfəri xüsusi təyinatlı ali təhsil müəssisələrinə sənəd verənlərdir. Ali məktəbə qəbul olunanların 2 nəfəri 700 bal (respublika üzrə cəmi 6 nəfər olmuşdur) 32 nəfəri 600-dən yuxarı bal toplayaraq tələbə adını qazanmışdır. Üç nəfər şagirdimiz Prezident təqaüdünə layiq görülmüşdür. 500-700 bal toplayanların faiz göstəricisinə görə Mingəçevir 8,84 faiz olmaqla respublika birincisidir. Dövlət sifarişi üzrə qəbul göstəricisinə görə Mingəçevir respublika ikincisidir. Respublikanın ən yaxşı məktəblər siyahısına Mingəçevirin 4 məktəb: təbiət, riyaziyyat və humanitar elmlər təmayüllü lisey, 19 saylı THL və 10 saylı məktəblər daxil edilmişdir. Fizika, kimya, biologiya və rus dili fənni üzrə Mingəçevirin göstəricisi respublkanın ən yüksəklərindəndir. Rus bölmələri üzrə qəbula görə Mingəçevir respublika birincisi olmuşdur. Şəhərimizin 14 saylı tam orta məktəbinin rus bölməsi üzrə göstəricisi respublika üzrə ən yüksək göstəricilərindəndir.

Şagirdlərimiz il ərzində yarış və müsabiqələrdə də Mingəçeviri uğurla təmsil etmişlər. 1 saylı tam orta məktəbin şagirdi Gülnar Mirzə qızı Tağıyeva “Ana dilimizi sevək, sevdirək” müsabiqəsinin Respublika turunun qalibi olmuş və qızıl medala layiq görülmüşdür. Ulu öndərimiz Heydər Əliyevin 91 illiyinə həsr edilmiş respublika inşa müsabiqəsində 18 saylı tam orta məktəbin XI sinif şagirdi Pərvanə Allahverdiyeva həvəsləndirici yer tutmuşdur. Şahmat məktəbinin yetirməsi Zeynəb İsmayılzadə Avropa kuboku yarışlarında öz yaş qrupunda II yeri tutmuşdur.

4 N-li tam orta məktəbin informatika müəllimi Natəvan Mustafayeva “İlin ən yaxşı müəllimi” müsabiqəsinin qalibi olmuşdur. Texniki Humanitar liseyin müəllimləri Sevda İsmayılova və Arzu Hüseynovanın hazırladıqları “Riyaziyyat-6” dərsliyi Təhsil Nazirliyi tərəfindən əsas dərslik kimi təsdiq edilmişdir. Onlar “Riyaziyyat-7” dərsliyinin üzərində işləyirlər.

3 N-li tam orta məktəbin rus dili müəllimi Sevil Abdulkərimova Təhsil Nazirliyi tərəfindən keçirilən “Elektron təhsil müsabiqəsi”ndə “Müəllim bloqu” nominasiyası üzrə I yerə layiq görülmüşdür. Fənn olimpiadalarının respublika turunda 20 N-li tam orta məktəbin X sinif şagirdi Məmmədli Ayşən Habil qızı tarix fənni üzrə 2-ci yerə layiq görülmüşdür. 13 N-li məktəbin şagirdi Vəlizadə Zakir Alim oğlu ətraf mühitin mühafizəsinə həsr edilmiş “İNEPO” Beynəlxalq yarışda 3-cü olmuşdur.

Bütün bu uğurlarımızın əldə olunmasında bizə və bütövlükdə Azərbaycan təhsilinə göstərdiyi diqqət və qayğıya görə cənab Prezıdentimiz İlham Əliyevə öz minnətdarlığımızı bildiririk. Hər bir nailiyyətimizin əldə edilməsində bizlərə ruh verən, köməklik göstərən, hər dəfə səmimi qəbul edərək dəyərli təkliflərini verən, şagirdlərimizin tez-tez görüşünə gələrək müxtəlif hədiyyələrlə onları sevindirən və ruhlandıran hörmətli icra başçımız Niyazi Bayramova da Mingəçevir müəllimlərinin təşəkkürünü çatdırmaq istəyirəm.

Söhğə zamanı bu gün Sahib müəllim təhsil işçilərini narahat edən bəzi problemlərə də toxunaraq vurğuladı ki, qeyd edilən uğurlarla yanaşı bizləri narahat edən, düşündürən, həllini vacib hesab etdiyimiz məsələlər də vardır. Yüksək nailiyyətlər əldə edən Mingəçevir məktəbləri və müəllimlərinin respublikada keçirilən “İlin ən yaxşı məktəbi” və ən yaxşı müəllimi” müsabiqələrindəki zəif çıxışı, gənc müəllimlərimizin fəaliyyəti, şagirdlərimizin asudə vaxtlarının təşkili kimi məsələlər bu gün təhsilimizin diqqət mərkəzindədir. Uşaqların yay istirahət düşərgələrindən, asudə vaxtlarının səmərəli keçirilməsindən söhbət düşəndə çoxları sovet dövrünün nisgili ilə köks ötürür. O dövrdə uşaqları yay istirahətləri zamanı yay düşərgələrinə göndərir, müxtəlif ekskursiyalar təşkil edilirdi.

Heç şübhəsiz, asudə vaxtın səmərəli təşkili uşaqların inkişafında mühüm rol oynadığını nəzərə alaraq çalışacağıq ki, şəhərimizin müvafiq şəraiti olan məktəblərimizdə belə düşərgələrin fəaliyyətinə dəstək verək.

Deyirlər zirvədə dayanmaq ora qalxmaqdan daha çətindir. Çox haqlı deyimdir. Lakin Mingəçevir müəllimləri növbəti tədris ilində daha böyük uğurlara imza atmağı qarşısına bir məqsəd qoyub. Böyük rus yazıçısı Lev Tolstoy yazılarının birində deyirdi: “Xoşbəxt olmaq üçün xoşbəxtliyin mümkünlüyünə inanmaq lazımdır”. Bu gün biz Mingəçevir müəllimləri daha böyük zirvələrə qalxacağımıza inanırıq. Bu inamı bizə verən təhsili dövlətin prioritet sahəsi hesab edən cənab Prezidentimiz İlham Əliyevin apardığı cahanşümul işləri, şəhər rəhbərliyinin bizlərə olan qayğısı, valideynlərimizin bizlərlə olan qırılmaz əlaqəsi və müəllimlərimizin yüksək peşəkarlıq və bacarığıdır.

Söz yox ki, əldə etdiyimiz nailiyyətlər bizi arxayınlaşdıra bilməz.

Tədris ilini uğurla başa vurmaq, yeni tədris ilində daha böyük nailiyyətlər qazanmaq üçün pedaqoji kollektivlərimiz bundan sonra da səylərini əsirgəməyəcəklər.

İlham PƏNAHOV,

Respublika.-2014.- 30 may.- S.13.