Statistika Ağstafa rayonunun inkişafını əks etdirir

Ağstafa rayon Statistika İdarəsinin nəşr etdiyi “Ağstafa rayonunun statistik göstəriciləri (2009-2013-cü illər)” adlı statistik məcmuəsindəki göstəricilərin təhlili təsdiq edir ki, həmin illərdəki problemlər az zaman ərzində öz həllini tapmış, idarə, müəssisə və təşkilatların normal fəaliyyət göstərə bilməsi üçün zəruri şərait yaradılmış, qarşıya qoyulan vəzifələrin icrasının mümkünlüyünə inam artmışdır. Bu inamın başlıca mənbəyi isə Azərbaycan Respublikasının ümummilli lideri Heydər Əlirza oğlu Əliyevin memarı və yaradıcısı olduğu Azərbaycan dövlətinin daha da möhkəmləndirilməsi üçün Azərbaycan Respublikasının Prezidenti İlham Əliyevin bilavasitə rəhbərliyi ilə əhalinin həyat səviyyəsinin daha da yüksəldilməsinə xidmət edən məqsədli proqramların qəbulu və icrasının təşkili sahəsində nəhəng layihələrin gerçəkləşməsinin real olaraq təmin olunmasıdır.

Dünyanın aparıcı dövlətlərinin iqtisadiyyatına sarsıdıcı zərbə vuran qlobal maliyyə böhranı şəraitində Azərbaycanda makroiqtisadi sabitlik saxlanılmış, neft sektoru ilə yanaşı, qeyri-neft sektorunun tarazlı inkişafı üçün kompleks tədbirlər həyata keçirilməsi ilə iqtisadi artımın davamlılığı təmin olunmuş, əhalinin gəlir əldə etmək imkanları genişləndirilmiş, səhiyyə, təhsil, mədəniyyət sahəsində xidmətlərin səviyyəsi yüksəldilməklə yanaşı, onlara çıxış imkanları artırılmış, sosial infrastrukturun inkişaf etdirilməsi (əslində yenidən yaradılması), institusional islahatların bütün idarəetmə pillələrində davam etdirilməsi, əhalinin sosial müdafiəsinin daha səmərəli müdafiəsi sisteminin qurulması təmin olunmuş və bu işlər proqram əsasında davam etdirilir.

Azərbaycan Respublikasının Prezidenti cənab İlham Əliyev seçildiyi vaxtdan Ağstafa rayonuna 5 dəfə səfər etmiş, 16 obyektin açılışında iştirak etmiş, əhali ilə görüşmüş, onları dinləmiş, promlemlərini öyrənmiş və qərarlar qəbul etmişdir. Belə ki, Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət proqramlarında nəzərdə tutulmuş tədbirlərlə yanaşı, Ağstafa rayonunun sosial-iqtisadi inkişafının sürətləndirilməsi üçün 2004-cü ildən indiyə kimi 6 sərəncam imzalanmış, həmin sərəncamlarla 18 adda iri infrastruktur layihələrinin icrası təmin olunmuşdur. Bu işlərin həyata keçirilməsi ilə ağstafalıların həyat səviyyəsinin yaxşılaşmasına sanballı töhfələr verilmişdir.

Hazırda Azərbaycan minimum əmək haqqı, yaşayış minimumu və ehtiyac meyarının məbləğinə görə MDB-də Rusiya və Qazaxıstandan sonra 3-cü yerdədir. 2015-ci ilədək ehtiyac meyarının məbləğinin yaşayış minumumuna çatdırılması nəzərdə tutulmuşdur ki, bununla da yoxsulluğun ləğvi öz həllini tapmış olacaqdır. Ölkə üzrə yoxsulluq səviyyəsi 2003-cü ildə 46,7 faiz qeydə alınmışdırsa, bu göstərici 2009-cu ildə 10,9 faiz, 2013-cü ildə 5.3 faiz olmuşdur.

Ölkəmizdə 2006-cı ildən yeni sığorta-pensiya sisteminin tətbiqi nəticəsində əmək pensiyalarının məbləği 4 dəfə, orta aylıq məbləği 5.8 dəfə artmışdır. Ağstafa rayonunda təyin olunmuş pensiyaların orta məbləği 2009-cu ildə 84.97 manat olmuşdursa, 2013-cü ildə 66,93 manat və ya 78 faiz artaraq 151.90 manata çatmışdır. Ən başlıcası, yeni sistemin tətbiqindən sonra, pensiyaların orta məbləği pensiyaçılar üçün yoxsulluq həddini üstələməyə başlamışdır. Bu, ən uğurlu, dəyər verilməyə layiq hadisədir.

2009-2013-cü illərdə Ağstafa rayonunda 3232 yeni iş yerləri yaradılmışdır. 2013-cü ildə muzdla işləyənlərin sayı 8768 nəfər olmuşdur. 2013-cü ildə 1 nəfərə düşən orta aylıq əmək haqqı 2009-cu illə müqayisədə 50.80 manat və ya 28 faiz artaraq 228.60 manata çatmışdır.

Rayonda 2013-cü ildə iqtisadiyyatın əsas sahələrində (faktiki qiymətlərlə) 128135.7 min manatlıq, əvvəlki illə müqayisədə 14996.5 min manatlıq və ya 13.3 faiz çox məhsul istehsal olunmuşdur. 2009-cu illə müqayisədə məhsul istehsalının həcmi 1.9 dəfə artmışdır.

Regionların sosial-iqtisadi inkişafına dair Dövlət proqramlarında, 25 avqust 2008-ci ildə təsdiq olunmuş “2008-2015-ci illərdə Azərbaycan Respublikasında əhalinin ərzaq malları ilə etibarlı təminatına dair Dövlət Proqramı”nda və sosial-iqtisadi inkişafın sürətləndirilməsinə dair Azərbaycan Respublikası Prezidentinin sərəncamlarında kənd təsərrüfatı istehsalçılarının dəstəklənməsi üçün yeni və nəhəng infrastruktur layihələrinin gerçəkləşdirilməsi ilə yanaşı, kənd təsərrüfatına xidmət göstərən təşkilatların maddi-texniki bazasının möhkəmləndirilməsinə yönəldilmiş əsaslı işlərin görülməsi sürətləndirilmişdir.

Ağstafa Aqrolizinq ASC-nin yaradılması, onun maddi-texniki bazasının davamlı qaydada möhkəmləndirilməsi, kənd təsərrüfatı texnikası istehsal edən Avropanın aparıcı firmalarının istehsal etdiyi texnikaların alınması, onların istismarı qaydalarının yerli kadrlara öyrədilməsinin və tətbiqinin təşkili Ağstafa rayonu ilə yanaşı, ətraf rayonlarda da kənd təsərrüfatının inkişafına təkan verir. Bu işlər 2014-cü ildə də davam etdirilmişdir. Hazırda həmin təşkilatda ən müasir texnikadan istifadə edilir və onların sayı az deyildir.

Toxumçuluğun, baytarlıq xidmətinin səviyyəsinin yüksəldilməsi üçün məqsədli proqramlar icra olunmuşdur.

Həyata keçirilmiş tədbirlərin nəticəsidir ki, Ağstafa rayonunda 2013-cü ildə kənd təsərrüfatı sahəsində 43552.4 min manatlıq məhsul istehsal edilmişdir ki, bu da 2009-cu illə müqayisədə 38 faiz, 2012-ci illə müqayisədə 4 faiz çoxdur.

Ağstafa rayonunda sosial-iqtisadi inkişafın təmin olunmasında tikinti sektorunun xüsusi payı var. Rayon üzrə ümumi məhsul buraxılışının tərkibində tikinti sektorunun payı əhəmiyyətli mövqeyə malik olmaqla, hər il davamlı qaydada artmış, hətta ilk dəfədir ki, ümumi məhsul buraxılışının strukturunda həmişə üstün mövqeyə malik olan kənd təsərrüfatı sahəsində yeni yaradılmış dəyərin göstəricisini üstələyərək ondan çox olmuşdur. Belə ki, 2013-cü ildə rayon üzrə ümumi məhsul buraxılışının tərkibində tikintinin payı 38,6 faiz təşkil etmişdir. Eyni göstərici kənd təsərrüfatı üzrə 33 faiz olmuşdur.

2013-cü ildə rayonda iqtisadiyyatın, sosial sahələrin inkişafı üçün bütün maliyyə mənbələri hesabına əsas kapitala 60728.0 min manat investisiya yönəldilmişdir. Bu göstərici 2003-cü illə müqayisədə 29,7 dəfə, 2008-ci illə müqayisədə 2.4 dəfə, 2012-ci illə müqayisədə 50.1 faiz çoxdur. İnvestisiyanın 39,4 faizi məhsul istehsalı, 60,6 faizi xidmət sahələri üzrə obyektlərin tikintisində istifadə olunmuşdur.

Xüsusi qeyd olunmalıdır ki, ulu öndər Heydər Əliyevin qətiyyəti və uzaqgörən siyasəti nəticəsində 20 il əvvəl imzalanmış “Əsrin müqaviləsi”nin icrası bütün Azərbaycan xalqının, region dövlətlərinin xalqlarının mənafeyinə, Avropanın enerji təhlükəsizliyinə sanballı töhfələr vermişdir və verməkdə davam edir. Bakı-Tbilisi-Ceyhan əsas ixrac boru kəmərinin Ağstafa rayonunun ərazisindən keçməsi tikinti zonasına düşmüş torpaq sahələrinin onların mülkiyyətçilərindən və istifadəçilərindən kompensasiya ödənilməsi ilə satınalınması həmin vətəndaşların iqtisadi durumuna sanballı töhfələr vermişdir. Kəmərin keçdiyi kəndlərin ərazisində onlarca sosial layihələr həyata keçirilmişdir. Əslində bunlar əhalinin həyat səviyyəsinin yüksəlməsinə yönəlmiş birbaşa investisiyadır.

Sevindirici haldır ki, 20 sentyabr 2014-cü ildə təməli qoyulmuş “Cənub” Qaz Kəməri layihəsinin tikintisinin başlanılması Azərbaycanın əlavə maliyyə qaynaqlarının yaradılması ilə yanaşı, Avropada enerji təhlükəsizliyində mövcud olan rolunun daha artmasına imkan verəcəkdir. Həmçinin region və iştirakçı dövlətlərin iqtisadiyyatının möhkəmlənməsində yeni layihənin mühüm əhəmiyyəti olacaqdır.Əlbəttə, həmin kəmərin Ağstafa rayonunun ərazisindən keçməsi, yenə də ağstafalıların həyat səviyyəsinə bilavasitə təsir edə biləcək investisiyaların qoyulması ilə nəticələnəcəkdir.

Ağstafa rayonunda son 6 ildə, 2008-2013-cü illərdə 92.5 min kvadratmetr yaşayış evləri istifadəyə verilmişdir. Bu, əvvəlki 8 ildəki, 2000-2007-ci illərdə olan göstəricidən 60.0 min kvadratmetr və ya 2.4 dəfə çoxdur. 2000-2013-cü illərdə 109.8 min kvadratmetr mənzil sahəsi vətəndaşların vəsaiti hesabına inşa olunmuşdur ki, bu da həmin dövrdə istifadəyə verilmiş umumi yaşayış sahəsinin 82 faizi qədərdir.

2000-2013-cü illərdə rayonda dövlət vəsaiti hesabına 213 mənzili olan 8 ədəd çoxmərtəbəli, 5 fərdi yaşayış evləri tikilib istifadəyə verilmişdir. Həmin binaların sakinləri Qarabağ müharibəsi əlilləri, şəhid ailələri, digər imtiyazlı və qəzalı vəziyyətdə olduğuna görə sökülmüş binalarda yaşayanlar olmuşdur.

SSR İttifaqı dövründə Ağstafa rayonunda birtipli layihə əsasında cəmi 7 məktəb binası inşa olunmuşdursa, müstəqillik dövründə, daha doğrusu, 2001-ci ildən indiyə kimi birtipli layihə əsasında 4380 şagird yeri olan 16 yeni məktəb binası inşa olunmuşdur. Eyni zamanda 1991-ci ildən sonra ilk dəfə Ağstafa şəhərində son 3 ildə 3 yeni məktəbəqədər uşaq tərbiyə müəssisəsinin tikintisi başa çatdırılmış, 2-nin tikintisi davam etdirilir.

Ağstafa rayonunun yol infrastrukturunun yaxşılaşdırılması üçün Azərbaycan Respublikasının Prezidentinin sərəncamlarının icrası ilə həmin sahədə rayon əhalisini uzun illər narahat edən avtomobil yolları yenidən tikilmişdir. Əhalisinin sayı 38.5 min nəfər olan 27 kənd və qəsəbələri Ağstafa şəhəri, Qazax rayonu, Gürcüstan Respublikasının Dövlət sərhədi, magistral avtomobil yolları ilə birləşdirən uzunluğu 80 km olan 3 adda avtomobil yolu əsaslı qaydada yenidən inşa olunmuşdur. Bakı-Qazax magistral avtomobil yolunun Ağstafa rayonunun ərazisindən keçən hissəsi də (20 km) daxil olmaqla, 2003-2013-cü illərdə rayonda 100 km uzunluğunda avtomobil yolları inşa edilmişdir. Həmin illərdə Ağstafa şəhərinin prospekt və küçələrində 20 km-dən çox yollar əsaslı təmir olunmuş, yeni asfalt örtüyü salınmışdır. Bu işlər rayonda proqram üzrə davam etdirilir.

Həmin yolların istifadəyə verilməsi Bakı-Qazax magistral avtomobil yolunun Ağstafa və Qazax rayonlarının ərazisindən keçən hissəsində hərəkətin intensivliyinin azalmasına şərait yaratmaqla, avtomobil nəqliyyatı vasitələrinin Ağstafa və Qazax şəhərlərinə daxil olmadan hərəkət etmələrinə imkan yaratmışdır ki, bu da təhlükəsizlik və iqtisadi cəhətdən sərfəlidir.

Rayonda qeydə alınmış tikinti müəssisələrində 2013-cü ildə 11823.8 min manatlıq tikinti işləri görülmüşdür. Bu, həmin ildə rayonda görülmüş tikinti-quraşdırma işlərinin 22 faizi qədərdir.

Nəqliyyat sahəsində 2013-cü ildə 2661.6 min manatlıq, 2009-cu illə müqayisədə 41 faiz çox yeni dəyər yaradılmışdır. 2009-cu ildə hər 100 ailəyə 20 minik avtomobili düşürdüsə, 2013-cü ildə bu göstərici 27 minik maşını olmuşdur. İnformasiya və rabitə sahəsində də inkişaf davamlı olmuşdur. 2013-cü ildə həmin sahələrdə 534.6 min manatlıq məhsul istehsal olunmuşdur ki, bu da 2009-cu ildəki göstəricilərdən 23 faiz çoxdur (nəzərə almaq lazımdır ki, bu göstəricilər tariflərin aşağı salınması şəraitində qeydə alınmışdır). Elektron sistemli ATS-lərdə ümumi tutum 2009-cu ildə 5696 nömrə olmuşdursa, 2013-cü ildə 37 faiz çox, 7856 nömrə qeydə alınmışdır.

2013-cü ildə rayon əhalisinə 27558.1 min manatlıq ticarət xidməti göstərilmişdir. Bu, 2009-cu ilin göstəricisindən 41 faiz çoxdur. Adambaşına düşən pərakəndə əmtəə dövriyyəsi 2009-cu illə müqayisədə 228.22 manat, 29 faiz artaraq 2013-cü ildə 1008.16 manata çatmışdır.

Ağstafa rayonunda əhalinin gəlirləri 2009-cu ildə 115917.3 manat olmuşdursa, 2013-cü ildə 161181.0 min manat və ya 39 faiz çox, 1 nəfərə düşən gəlir eyni dövrdə 1441.8 manatdan 1928 manata çatmış və ya 33 faiz çox olmuşdur. Qeyd edilməlidir ki, rayon üzrə 2009-cu ildə əhalinin 1 nəfərinə düşən gəlirin səviyyəsi eyni ildə ölkə üzrə 1 nəfərə düşən gəlirin 56 faizini təşkil edirdisə, ötən illərdə rayon əhalisinin gəlirləri davamlı qaydada artmış və nəticədə həmin göstərici 48 faiz təşkil etmişdir. Əhalinin gəlirlərinin artması onların həyat səviyyəsinin daha da yüksəlməsinin şərtidir. Bu gün Ağstafa rayonunun bütün kəndlərində yeni evlər, sahibkarlıq obyektləri tikilir, evlərin, parkların və məhəllələrin daha abad olması üçün işlər görülür. Elektrik enerjisi fasiləsiz verilir, təbii qazla təminat yaxşılaşdırılır. 2003-cü illə müqayisədə rayonda isifadə olunan əmtəəlik qazın həcmi 2013-cü ildə 2.4 dəfə artmışdır. Məktəblərdə təhsilin səviyyəsi yüksəldilir.

İnsanlar yalnız yaşaya bilmək qayğıları ilə artıq məşğul olmurlar. Onlar daha yaxşı, layiqli həyat səviyyəsi istəyirlər. Daha yaxşı və hər cür kommunal şəraiti olan ev, asfalt yolu və işıqlandırılan küçə, yaxşı məktəb, iş yeri, xarici markalı avtomobil, daha keyfiyyətli ərzaq və qeyri-ərzaq malları, keyfiyyətli səhiyyə xidməti, sürətli internet, açıq və örtülü idman meydançaları, üzgüçülük hovuzları istəyirlər, keyfiyyətli mədəni əyləncələr, sərgilər, muzeylər, konsertlər arzulayırlar. Kurortlara gedənlərin və getmək istəyənlərin də sayı çoxalmışdır. İnsanlar daha yaxşı yaşamaq istəyirlər, bunun üçün də daha çox pul qazanmaq istəyirlər. Təbiidir, bu istək də normaldır.

Sevindirici haldır ki, rayonda hər bir valideyn övladının yaxşı təhsil almasına çalışır, bunun üçün vəsait sərf edir və bilir ki, Azərbaycan dövləti savadlı kadrlara sahiblik edir və edəcəkdir. Əslində dövlətimiz də onların gücü ilə güclənir və yaxşı haldır ki, bunları əksər insanlarımız müşahidə edə bilirlər. Bu, artıq faktdır, inkişafdır, gələcəyə inamdır.

İstifadəçilərə təqdim olunmuş statistik göstəricilər Ağstafa rayonunda son illərdə sosial-iqtisadi göstəricilərin səviyyəsinin bütün sahələrdə yaxşılaşmasını təsdiq edir. 2014-cü ilin ötən dövrü ərzində rayonda görülən sosial-iqtisadi quruculuq işlərinin görülməsinə dair ilkin statistik göstəricilərin təhlili sübut edir ki, cari ildə də rayonun inkişaf göstəriciləri ürəkaçan olacaqdır.

Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən nəhəng işlərin bir məqsədi var: insanlar yaxşı yaşasınlar!

Yuxarıda göstərilən faktlar həmin istiqamətdə sanballı nəticələrin qazanıldığını, demoqrafiya, əhali statistikası sahəsində göstəricilər də bütün sahələrdəki inkişafın insan amilinə, onun daha yaxşı yaşamasına yönəldildiyini təsdiq edir. Belə ki, rayonun əhalisi 2014-cü ilin əvvəlinə, yarandığı 1990-cı illə müqayisədə 20761 nəfər, 33,0 faiz artmışdır. 2014-cü ilin əvvəlinə rayon əhalisinin ümumi tərkibində 0-14 yaşa qədər olan uşaqların sayı 17.2 min nəfər və ya rayon əhalisinin 20,6 faizi , 14-29 yaşlı gənclərin sayı 24.9 min nəfər, cəmi əhalinin 29,8 faizini təşkil etmişdir. Göründüyü kimi, Ağstafa rayonunun əhalisinin 42.1 min nəfərinin və ya 50.4 faizinin yaşı 29 yaşa qədərdir. 2009-cu ildə keçirilmiş əhalinin siyahıya alınmasının yekununa görə rayonda orta yaş 31 olmuşdur. 2009-2013-cü illərdə rayon üzrə miqrasiya saldosu müsbət 309 nəfər olmuşdur, yəni rayona 884 nəfər köçüb gəlmiş, 575 nəfər getmişdir. Həmin dövrdə 3608 nikah qeydə alınmış, boşanmaların səviyyəsi aşağı düşmüşdür. Rayon üzrə ümumtəhsil məktəblərində birinci sinfə qəbul olunan şagirdlərin sayının son 3 ildə artması davam etmişdir. Bu, demoqrafik inkişafın yaxşı göstəricisidir.

Rayonun statistik göstəricilərinin hazırlanması prosesi ilə tanış olmaq oxucular üçün də maraqlı olar. Ağstafa Rayon Statistika İdarəsinin fəaliyyəti “Rəsmi statistika haqqında” Azərbaycan Respublikası Qanunundan, “Rayon (şəhər) statistika idarəsi haqqında” Əsasnamədən, Dövlət Statistika Komitəsinin yerli statistika orqanları üçün statistik işlər proqramından irəli gələn vəzifələrin həllinə yönəldilmişdir. Rayon üzrə hazırda qeydiyyata alınmış 3836 fiziki şəxsdən 875-nin fəaliyyəti olmuş, bundan hesabat almaq üçün 231-i (26.4 faizi) seçməyə düşmüş, 313 hüquqi şəxs qeydiyyatdan keçmiş, onlardan 139-u (44.4 faizi) fəaliyyətli olmuşdur. Başqa sözlə, Statistik Vahidlərin Dövlət Reyestri üzrə statistik vahidlərin sayı 1188, hesabat alınması nəzərdə tutulmuş fəaliyyətli hüquqi və seçməyə düşmüş fiziki şəxslərin sayı 370 (31.4 faiz) olmuşdur. 2014-cü il ərzində onlardan, 29 aylıq, 53 rüblük, 106 illik, 3 yarımillik, 2 xüsusi proqramla, 1 operativ, 1 adda kənd təsərrüfatında islahatların gedişi, 1 adda nümayəndəlik və filialların fəaliyyəti haqqında hesabatların toplanılıb, emal olunub göndərilməsi nəzərdə tutlmuşdur. Hesabatların elektron qaydada ötürülməsinin, qiymətlərin uçotunun aparılmasının, ev təsərrüfatlarının tədqiqinin, əhalinin iqtisadi fəallığına dair və digər mövzular üzrə müayinələrin aparılmasının təşkili sahəsində tədbirlərin icrasının daim diqqət mərkəzində saxlanılmasına çalışılır.

Əlbəttə, rayonun statistik göstəriciləri dövlət orqanları, idarəetmə təşkilatları, iqtisadçılar, mütəxəssislər tərəfindən təhlil olunur, qisa zaman kəsiyində mühüm əhəmiyyətli proqramların icra olunduğu faktdır. Eyni zamanda həmin təhlillərlə rayon əhalisinin həyat səviyyəsinin daha da yüksəldilməsinə nail olmaq üçün mövcud potensialın aşkar olunması, onun hərəkətə gətirilməsi imkanlarının nəzərdən keçirilərək həllinə yönəldilmiş qərarlar qəbul olunması sahəsində əməli tədbirlərin həyata keçirilməsi zərurətə çevrilir. Kənd təsərrüfatı məhsullarının istesalının intensivləşdirilməsi, tədarükünün, emalının və satışının təşkili, suvarma problemlərinin həlli, kənd təsərrüfatı məhsullarının satış qiymətlərinin onun istehsalına çəkilən xəclərə uyğunluğuna nail olunması, sənaye istehsalı sahəsində ehtiyatların hərəkətə gətirilməsi, əhaliyə göstərilən xidmətlərin kəmiyyətinin və keyfiyyətinin artırılması sahəsində əməli işlər görülməsi günün reallığıdır və bunların həlli ilə rayon üzrə adambaşına əldə olinan gəlirlərin həcminin ölkə üzrə olan göstərici arasındakı ciddi fərqləri azaltmaq istiqamətində nəticələr əldə olunmasına nail olmaq olar. Yaranmış vəziyyət xərclərin də bütün səviyyələrdə, o cümlədən əhali tərəfindən də idarə olunmasının yaxşılaşdırılmasını, səmərəliliyinə diqqətin artırılmasını zərurətə çevirir.

2004-cü il iyun aynın 15-də Azərbaycan Respublikasının Prezidenti cənab İlham Əliyev Ağstafa rayonunda olarkən Qıraq Kəsəmən kənd sakinləri ilə görüşmüş, onların istəkləri ilə maraqlanmışdır. El ağsaqqalı Əcəm Yaqubəliyev Prezidentimizə müraciət edərək söyləmişdir ki, ulu öndərimiz torpağımızı özümüzə vermişdir, suyumuz da var, toxum da tapırıq, əkib becəririk, dolanacağıq, heç kəs ac qalmayacaqdır. Bir şərtlə ki, cənab Prezident, ulu öndərin müdrikliyi, zəhməti, mübarizliyi, qətiyyəti, həyatı hesabına bizə, Azərbaycan xalqına əmanət etdiyi sabitliyi qoruyasınız. İşığımız pisdir, qazımız yoxdur, dözəcəyik, onların olacağına da inanırıq. Mənfur düşməni də məğlub edəcəyik. Bir şərtlə ki, sabitlik qoruna bilsin. Belə olsa, hər şey yaxşı olacaqdır.

Ölkədə yaradılmış sabitlik, gələcəyə inam hissinin güclənməsi, insanların Heydər Əliyev strategiyasına inamının daha da artması, Azərbaycan Respublikasının Prezidenti cənab İlham Əliyevə etimadın daha da güclənməsi, vətən və dövlət anlayışı hisslərinin insanların şüurunda, həmçinin əməlində də üstün mövqeyə keçməsinin, ölkə rəhbərliyinin qətiyyəti və müdrik siyasəti nəticəsində, Azərbaycanın birinci xanımı, Heydər Əliyev Fondunun Prezidenti Mehriban xanım Əliyevanın ölkə daxilində və xaricində humanitar fəaliyyətinin nəhəngliyi və xalqımız üçün əhəmiyyətli layihələri uğurla gercəkləşdirməsi özünə hörmət edən hər bir Azərbaycan vətəndaşında azərbaycançılıq hissinin təşəkkülünə ciddi təkan vermişdir və bunu biz gerçəklik kimi qəbul edirik. Dünyada, hətta bizə yaxın olan ölkələrdə baş verən hadisələr, müharibə və qarşıdurmaların olduğu ölkələrdəki vəziyyət bizi daim düşündürməli, etiraf edək ki, çoxumuza xas olan unutqanlıq hisslərindən, nəhayət ki, xilas olmağa çalışmalıyıq. Hər birimiz yaradılmış sabitliyin saxlanılması, ölkəmizin ən yaxın 20-25 ilinin tarixini, öz gördüklərimizi, dünənimizi, şahidi və iştirakçısı olduğumuz hadisələri, bu günümüzü, nailiyyətlərimizin miqyasını, mənfur düşmənlə və onun havadarları ilə qarşı-qarşıya olduğumuzu unutmamalıyıq, sabahımızın daha işıqlı, güclü, etibarlı, təhlükəsiz olmasına, sosial-iqtisadi vəziyyətin ahəngdar inkişafının və ölkənin təhlükəsizliyinin təmin edilməsinə çalışan dövlətimizin, Prezidentimizin yanında olmalıyıq.

Cümşüd MUSAYEV,

Ağstafa Rayon Statistika İdarəsinin rəisi.

Respublika.-2014.- 3 oktyabr.- S.11.