Morşinin təbiəti də möcüzədir, suyu da

Yüz minlərlə azərbaycanlı yaşayan, Avropanın böyük dövlətlərindən olan dost Ukraynanın hər bir guşəsi, bərəkətli çölləri, sıx meşəlikləri, nəğməli çayları, flora və faunası, dağ və yamacları insanlarda xoş ovqat yaradır. Bir sözlə, bu yurdun, şair Taras Şevçenkonun vətəni olan bu elin hər qarış torpağı bərəkətlidir, möcüzədir. Təbiət bu yerlərdən heç nəyini əsirgəməyib. Qərbi Ukraynanın ərazisində yerləşən Morşin sanatoriyası, Morşin adlı suyu bütün dünyada məşhurdur. Bu yerlər mahir bir rəssam fırçasından çıxmış tablonu xatırladır. Sanatoriyanın bir guşəsində yerləşən, romantik mənzərəsi ilə insanları heyran qoyan göl, nadir quşlar, sıx meşəliklər, aram-aram gəzən marallar, Afrikadan gətirilmiş dəvəquşları, bənzərsiz gül-çiçək kolları, fəvvarələr bu yerlərə gəlib-gedən turistlərin uzun illər xatirəsində yaşayır. Bütün insanlar, şəfa tapmaq istəyənlər yaxın-uzaq ölkələrdən qəlblərinin hökmü ilə Morşinə gəlir, bir sözlə, çoxlarının ömrünə ömür calanır...

Bir çox illərdir ki, dünyanın müxtəlif ölkələrindən bu şəfa ocağına çoxsaylı insanlar gəlir, sanatoriyada müalicə olunur, bu füsunkar bölgədən xoş təəssüratla ayrılırlar.

Morşində ən yaxşı terapevt müalicəsi aparılır. Kurortda çoxları cərrahiyyə əməliyyatından yaxa qurtarır, hərtərəfli müalicədən, saf havadan şəfa tapır və ailələrinə sağlam, şən əhval-ruhiyyə ilə qayıdır, Karpat dağlarının ətəklərindən ayrılmaq istəmirlər.

Morşin sanatoriyası başdan-başa nadir ağaclar, əlvan xalını andıran çöl-çəmənliklə əhatə olunmuş bir vadidə yerləşir. Dnestr çayına tökülən Striya çayı, bu çayın qolu olan Beryoztinsa ilin yaz və yay fəsillərində daha romantik olur, istirahətə gələnləri valeh edir, ofsunlayır. Müalicəyə gələnlər arasında Polşa, Rumıniya, Almaniyadan olan insanlar daha çox üstünlük təşkil edir.

Morşinin düzənlik zonası parklarla əhatə olunmuşdur. Müalicə və mədəni-məişət müəssisələri kurort zonasına xüsusi gözəllik verir. Demək olar ki, ilin bütün fəsillərində insanlar bu yerlərdə müalicə olunur, mənalı istirahət edirlər. Müalicələrin səmərəsini böyrək, öd kisəsi, qaraciyər, şəkər və digər xəstəliklərdən əziyyət çəkən insanlar daha yaxşı hiss edirlər.

Böyük Vətən müharibəsinin odlu-alovlu illərində alman faşistləri Morşin sanatoriyasının yerləşdiyi ərazini dağıtmış, müalicə ocaqları zülm və işgəncədən “göz yaşları axıtmışdır”. Ukrayna torpaqları düşməndən azad olunduqdan sonra çox qısa bir zamanda burada geniş bərpa işləri aparılmış, hər şey qaydasına düşmüş, yenidən bu şəfa ocağına insan axını davam etmişdir.

“Beskid”, “Ukrayna”, “Kaştan”, “Leqenda” restoranları, “Latra”, “Kosyak”, “Djerolo”, “Dziqa” adlanan barlar həmişə istirahətə gələnlərin üzünə açıqdır. Buradakı xidmətə isə söz ola bilməz.

Biz müalicə ocağında olarkən “Lavanda” sanatoriyasının baş həkimi Furmanyuk Nikolay Fyodroviçlə görüşüb söhbət etdik. O. qürur hissi ilə vurğuladı ki, son illər bizim sanatoriyaya dost Azərbaycandan axın daha çoxdur. Mədəniyyət evində axşamlar maraqlı konsertlər təşkil olunur, çox vaxt diskdə Azərbaycan mahnı və rəqsləri də səsləndirilir. Bütün millərtlərdən olan insanlar yüksək əhval-ruhiyyə ilə rəqs edirlər. Bu isə əsl sağlamlıq, əsl istirahətdir.

Baş həkimin tövsiyəsi ilə ilk öncə “Lavanda” sanatoriyasında olduq. Burada Ukraynanın müxtəlif şəhər və vilayətlərindən, İsraildən, Orta Asiyadan, Belarusdan, Azərbaycandan istirahətə gəlmiş insanlarla dostlaşdıq.

Sanatoriyanın əməkdaşları Azərbaycandan gəlmiş bir jurnalist kimi bizi çox mehribanlıqla qarşıladı. Onlara son illərdə Cənubi Qafqazda lider dövlətə çevrilən Azərbaycan haqqında ətraflı məlumat verdik. Bildirdik ki, Azərbaycanda çoxlu ukraynalılar yaşayır və onlar da dövlət qayğısı ilə əhatə olunmuşlar.

Ümumiyyətlə, Azərbaycan-Ukrayna dostluğu yüksələn xətlə inkişaf edir. Bir neçə il öncə Bakının Nəsimi rayonunun ərazisində dahi Ukrayna şairi Taras Şevçenkonun əzəmətli abidəsinin ucaldılması bu dostluğun bariz nümunəsidir.

Sanatoriya əməkdaşlarının bir neçəsinə Azərbaycanın mənzərəsini əks etdirən buklet bağışladıq.

“Lavanda” sanatoriyasının 3 hektar ərazisi vardır. 7 mərtəbəli bu şəfa ocağına ilboyu insan axını müşahidə olunur.

Morşinin mineral suyu bu gün insanlara nələr bəxş etmir? Müalicə dövründə xəstələr bu su vasitəsilə sağlamlıqlarını bərpa edir, ağrılardan yaxa qurtarır, kompleks müalicələrlə özlərini gümrah hiss edirlər.

İl ərzində Morşin sanatoriyasında təxminən 55 min nəfər istirahət edir. 1878-ci ildən fəaliyyətə başlayan bu müalicə ocağında insanlar düçar olduqları bir çox xəstəliklərdən xilas olurlar.

“Dnestr”, “Çeromoş”, “Pertina Prikarpatiya”, “Rassvet”, “Prilosok”, “Niva”, “Geoloq Prikarpatiya” sanatoriyalarında, “Dinamo”, “Svyazist” adlı pansionatlarda istirahətə gələn insanlara hər bir şərait yaradılıb. Müxtəlif yerlərə ekskursiyalar təşkil olunur, mütəmadi olaraq incəsənət ustaları mədəniyyət evində və açıq havada maraqlı proqramla çıxış edirlər. Xüsusilə ekoloji tarazlığın qorunub saxlanılmasına maksimum səy göstərilir.

Biz bir axşamçağı parkda istirahət edən bir qrup müxtəlif millətlərdən olan insanlarla söhbət edib, onların ürək sözlərini qələmə aldıq.

Qalina Maksimovna (Lvov şəhərindən iş adamı):

—Artıq beşinci ildir ki, məzuniyyətimi Morşində keçirirəm. Mədə-bağırsaq sistemimdə problemlərim var idi. Artıq düçar olduğum xəstəliyə vida demişəm. Səhər saat 5:30-dan sıx meşəliyə, təbiətin qoynuna çıxıram. Quşların nəğmələrini dinləyə-dinləyə asta addımlarla xeyli məsafə qət edir, sonra qrafikə uyğun olaraq Morşin suyu içir, daha sonra səhər yeməyini yeyib müalicələrə yollanıram...

Saşa Antonoviç (Belarus Respublikası, Minsk şəhəri):

—Bir vaxtlar qaraciyər xəstəliyindən əziyyət çəkirdim. Bu gün təbiəti və suyu möcüzə olan Morşin, Karpat dağlarının atlas geyimli yamacları mənim üçün ən müqəddəs bir məkana çevrilmişdir. Bir sözlə, Morşinin mineral suyunun hər damlası insan həyatı üçün faydalıdır, hər şeydən qiymətlidir. Şübhəsiz ki, ailəmizə sağlam ruhla, xoş təəssüratla qayıdacağam.

Elfaq Allahverdiyev (Azərbaycanın Tovuz rayon sakini):

—On ilə yaxındır ki, Nizami, Becan və digər dostlarımla qızıl payız günlərində istirahətimizi Morşində keçiririk. Müayinə və müalicəyə söz ola bilməz. Hər şey öz qaydasındadır. Yalnız onu deyə bilərəm ki, Ukrayna və Azərbaycan xalqlarının dostluğu əbədidir. Bunu istirahət dövründə hər an hiss edirik...

Qədir ASLAN.

Bakı-Morşin-Bakı.

Respublika.-2014.- 6 sentyabr.- S.6.