İlin yekunları nikbin proqnozlara əsas verir

Neft sənayesi

“Azneft” İB-nin qocaman neft və qazçıxarma idarəlrindən biri olan Ə. C. Əmirov adına NQÇİ üzrə 2014-cü ilin yekunları uğurludur. NQÇİ üzrə neft hasilatı tapşırığı 104,5 faiz yerinə yetirilmişdir. Əvvəlki illə müqayisədə neft hasilatı xeyli çox olmuşdur. Hesabat ilində neft təhvili tapşırığı 104,6 faiz yerinə yetirilmişdir. Keçən illə müqayisədə neft təhvili +8,5 faiz çox olmuşdur.

2014-cü ilin yekunlarına görə qaz hasilatı tapşırığı 104,0 faiz yerinə yetirilmişdir. Əvvəlki illə müqayisədə qaz hasilatı xeyli artmışdır. Hesabat ilində qaz təhvili tapşırığı artıqlaması ilə yerinə yetirilmişdir.

Ötən il qazımadan (521 saylı) quyu istismara daxil etmiş və bu quyudan 660,0 ton neft hasil edilmişdir.

Ötən il həmçinin ikinci yan lülə ilə qazımadan Atəşgah və Lökbatan sahəsində qeyri-işlək fondda olan quyulardan 3 quyu istismara daxil olmuşdur və bu quyulardan 509,0 ton neft hasil edilmişdir. Lökbatan sahəsində 1 quyu ikinci yan lülə ilə qazılmış və artıq mənimsəmədədir.

Onu da qeyd edim ki, 2013-cü ildə fəaliyyətsiz quyu fondundan 3 quyu istismara daxil edilmiş və bu quyulardan 377,0 ton neft və 3039 min kubmetr qaz hasil edilmişdir.

İstismar quyularının yüksək məhsuldarlıqla və optimal rejimdə işləmələrinin təmin edilməsində geoloji-texniki tədbirlərin rolu yüksəkdir. Belə ki 2014-cü il ərzində planla 131 geoloji tədbir həyata keçirməklə, 14170,0 ton neft (+670,0 ton çox) və 3420,0 min kubmetr qaz (+3420,0 min kubmetr çox) hasil edilmişdir. 2014-cü il ərzində planla 204 texniki tədbir həyata keçirməklə, 2652,0 ton neft hasil edilməsi nəzərdə tutulduğu halda, faktiki 221 texniki tədbir həyata keçirməklə, 3597,9 ton neft (+945,9 ton çox) hasil edilmişdir.

Ötən il 168 əsaslı təmir işi aparmış, 14066,0 ton neft hasil edilmişdir.

4198 yeraltı təmir işi görən neftçilər neft və qaz hasilatını artırmaq üçün səylərini davam etdirirlər.

2014-ci il ərzində NQÇİ-nin elektrik enerjisi sərfi 17243,957 min kVt- saat təşkil etmişdir. NQÇİ-nin sərf etdiyi elektrik enerjisi 2013-cü ilə nisbətən 740,704 min kVt- saat az olmuşdur.

2014-cü il ərzində elektrik təchizatının etibarlılığını artırmaq məqsədi ilə 2,5 km uzunluğunda xətlər təmir edilmişdir.

4 saylı sexin yeni tikilmiş məntəqəsində elektrik təchizatı quraşdırılıb başa çatdırılmışdır. Qalmaz sahəsində 2,5 km uzunluğunda hava xətti quraşdırılıb istismara verilmişdir. 1 km. uzunluğunda hava xəttinin qəzalı vəziyyətdə olan hissəsi əsaslı təmir edilərək, yenidən qurulmuş və digər yerlərdə güc avadanlıqları quraşdırılıb istifadəyə verilmişdir.

“2kV-luq elektrik şəbəkəsindən 6 kV-luq elektrik şəbəkəsinə keçid” obyekti layihəsi üzrə 9 ədəd y/stansiyada tikinti-quraşdırma işləri başa çatdırılmış, 4 ədəd yarımstansiyada avadanlıqlar quraşdırılmış, 70 km uzunluğunda kabel xətləri çəkilmişdir.

Ötən il ərzində yerinə yetirilən təmir-tikinti, yenidənqurma və sosialyönümlü işlər davam etdirilir.

Belə ki, NQÇİ-nin bir neçə sexinin inzibati binaları tikilib istifadəyə verilmişdir. Həmçinin 1 saylı neft və qazçıxarma sexində və 4 saylı NQÇS-də operatorlar üçün inzibati bina tikilib istifadəyə verilmişdir. Yeni tikilmiş və təmir edilmiş inzibati binalar mebel və məişət avadanlığı ilə təmin edilmişdir.

1 və 3 saylı sexlərin xidmət sahələrinin neft-yığım-nəql sistemi yenidən qurulmuş, atqı xətləri və kollektor dəyişdirilmişdir.

Əmtəə çənlərində abadlaşdırma, bəndlənmə və hasarlanma işləri, 4 saylı NQÇS-nin inzibati binaları ətrafında abadlıq, hamarlama işləri aparılmış, asfalt örtüyü salınmış və ağaclar əkilmişdir.

Ötən il ərzində ətraf mühitin mühafizəsi üzrə görülmüş işlər də ürəkaçandır. Yola saldığımız il ərzində 6,835 min metr neft kollektoru, 2,278 min metr qaz xətti, 2,495 min metr mədən su kollektorları, 4,3 min metr yol təmir edilmiş, 1,336 min metr mədəndaxili kanallar, 9,44 ha mədən ərazisi tör-töküntüdən təmizlənmiş, neft yığma məntəqələrində 30 ədəd neftvuran, 22 ədəd suvuran nasoslar təmir edilmişdir. 75 ədəd torpaq-anbar ləğv edilmiş, 334 ədəddən artıq yerüstü avadanlıqlar (quyuağzı avadanlıq, çənlər, nasoslar, siyirtmələr, fontan armaturları, neft xətləri və s.) rənglənmiş, sahələrdə 1800 ədəd ağac əkilmişdir. 1483 saylı quyu vakkum qaz xəttinə qoşulmuş, 125 ədəd quyu boruarxası hermetik bağlanmış, 7750 metr atqı xətti torpaq altına basdırılmışdır.

2014-cü il ərzində 608953 kubmetr lay suyu çıxarılmış, suvurma və suyun utilizasiyası sahəsi genişləndirilmiş, 211808,0 kubmetr lay suyu utilizasiya edilmiş, 397145,0 kubmetr isə texniki məqsədlər üçün istifadə edilmişdir.

Ötən il ərzində quyuların ətrafına, mədəndaxili yollara, NYM-in ərazisinə, bəndvurma işlərinə və s. çirklənmiş sahələrə 8263,0 kubmetr torpaq, 444,0 kubmetr ştib daşınaraq, 0,364 ha sahə abadlaşdırılmışdır.

Əmək şəraitinin yaxşılaşdırılması və sağlamlaşdırılmasına yönəlmiş tədbirlərin yerinə yetirilməsi, təmir-tikinti, yenidənqurma, ətraf mühitin mühafizəsi sahəsində və sosialyönümlü işlərin görülməsi nəticəsində Ə.C.Əmirov adına NQÇİ-nin əmək kollektivi 2014-cü ili hər hansı istehsalat bədbəxt hadisəsi və peşə xəstəliyi olmadan başa vurmuşdur.

Əldə edilən bu uğurların 2015-ci ildə davam etməsi üçün neftçilərimiz səylərini birləşdirərək daha böyük uğurlara imza atmaq, neft və qaz hasilatını artırmaq əzmilə işləyirlər.

Ramin QULİYEV,

Ə.C.Əmirov adına NQÇİ-nin rəisi

Respublika. - 2015.- 9 yanvar.- S.4.