Multikultural dəyərlər diqqət mərkəzində

Son dövrün diqqətçəkən başlıca məqamları mədəniyyətlərarası münasibətlərin, bu il isə İslam həmrəyliyi kimi fundamental ideyanın ön plana çəkilməsi barədə Azərbaycan Respublikası Prezidenti cənab İlham Əliyevin sərəncamları ilə bağlıdır. Bu sərəncamlar dini, mədəniyyətlərarası məsələlərə xüsusi yanaşma tələb etməklə dövlət qurumları ilə eyni zamanda hər bir vətəndaşın qarşısına bir sıra mühüm vəzifələr qoyur.

2016-cı ildə rayon icra hakimiyyəti başçısı aparatlarının ictimai-siyasi və humanitar məsələlər şöbəsi müdirinin müavini - dini qurumlarla işin təşkilatçısı ştat vahidinin təsis olunması ölkə rəhbərliyinin yerlərdə də dini məsələlərlə əlaqədar aparılan işlərə önəm verdiyini göstərir və bu sahədə işin daha səviyyəli təşkilinə xidmət edir. Sərəncamların tələblərindən irəli gələn məsələlərin icrasının mütəşəkkil, vahid ideoloji konsepsiya ilə təmin olunması məqsədi ilə ötən ilin fevral ayında Azərbaycan Respublikasının Prezidenti yanında Dövlət İdarəçilik Akademiyasında seminar-müşavirə keçirildi. Azərbaycan Respublikası Prezidentinin ictimai-siyasi məsələlər üzrə köməkçisi, İctimai-siyasi məsələlər şöbəsinin müdiri Əli Həsənov, Azərbaycan Respublikasının millətlərarası, multikulturalizm və dini məsələlər üzrə dövlət müşaviri Kamal Abdullayev, Prezident Administrasiyası rəhbərinin müavini, Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev, Hüquq-mühafizə orqanları ilə iş şöbəsinin müdiri Fuad Ələsgərov, Qanunvericilik və hüquq ekspertizası məsələləri şöbəsinin müdiri Şahin Əliyev, Dövlət Təhlükəsizliyi Xidməti Əks-kəşfiyyat Baş İdarəsinin rəisi İsmayıl Bağırov, Dini Qurumlarla İş üzrə Dövlət Komitəsinin sədri Mübariz Qurbanlı və Bakı Dövlət Universiteti ilahiyyat fakültəsinin dekanı, akademik Vasim Məmmədəliyev kimi mötəbər simaların seminar-müşavirədə məruzələrlə çıxış etmələri ölkə rəhbərliyinin yerli icra hakimiyyətlərində dini məsələlərlə bağlı fəaliyyətin konseptual əsaslarla qurulmasına xidmət edir.

Seminar-müşavirədə “Azərbaycan Respublikasında dövlət-din münasibətləri və əsas istiqamətlər”, “Milli-mənəvi dəyərlərin təbliği və tolerantlıq mühitinin formalaşmasında vətəndaş cəmiyyəti təsisatlarının rolu”, “Azərbaycanda dövlət-din münasibətlərinin qanunvericilik bazası”, “Azərbaycan multikulturalizminin inkişaf perspektivləri”, “Dini radikalizmə qarşı mübarizədə hüquq-mühafizə orqanlarının rolu və fəaliyyətinin əlaqələndirilməsi”, “Dövlət-din məsələlərinə milli təhlükəsizlik kontekstindən baxış”, “Azərbaycanda İslam: tarixçilik və müasirlik” mövzularında məruzələrdə respublikamızda dini proseslər dərindən təhlil olundu, mərkəzi və yerli icra hakimiyyəti orqanları qarşısında duran vəzifələr müəyyən edildi. Ötən il respublikamızın demək olar ki, bütün idarəetmə orqanlarında Dini Qurumlarla İş üzrə Dövlət Komitəsi ilə “Dini ekstremizmə qarşı mübarizə”, rayon İdman və Gənclər idarələri ilə “İslam dini tolerantlıq və dözümlülük nümunəsi”, Heydər Əliyev mərkəzlərində “Multikulturalizm həyat tərzidir”, “16 noyabr — Beynəlxalq Tolerantlıq Günü” mövzularında, tam orta məktəblərdə silsilə tədbirlər keçirmişdir.

Müəyyən qüvvələr dini radikal qruplardan istifadə etməklə öz siyasi məqsədlərini həyata keçirməyə cəhd göstərirlər. Xüsusilə xaricdə dini təhsil alan müəyyən şəxslər “Qurani-Kərim”dən olan ayələri yanlış yozaraq, özlərinə uyğun şəkildə təqdim etməyə çalışırlar. Yerli icra hakimiyyətlərinin, təhsil orqanlarının, Qeyri-Hökumət təşkilatlarının, Həmkarlar İttifaqı komitələrinin, kütləvi informasiya vasitələrinin fəaliyyəti isə dini radikalizmin səbəblərinin araşdırılması, təhlil edilməsi, müəyyən nəticələr əldə olunması və aradan qaldırılmasına yönəlməlidir. Xüsusilə radikal dini təriqətlərə meyilli gənclərin müəyyən olunması, onların təhsilə marağının artırılması, peşə və təhsil kurslarına cəlb olunması üçün təşəbbüs göstərmək çox vacibdir. Əfsuslar olsun ki, bir çox hallarda müxtəlif təsirlər altına düşmüş şəxslər barədə aidiyyəti qurumlara, hətta onların valideynlərinə, yaxınlarına onların çalışdıqları və ya oxuduqları kollektivlərin, xüsusilə təhsil müəssisələrinin rəhbərləri tərəfindən məlumat verilməsi əvəzinə əksinə olur. Ona görə də təhsil müəssisələrinin rəhbərləri, psixoloqları, tələbə gənclər təşkilatları, tələbə həmkarlar ittifaqı komitələri gənclərdə dinə, millətlərarası münasibətlərə olan meyillərə mütəmadi diqqət ayırmalı, özlərinin gündəlik fəaliyyətində ön plana çəkməlidirlər.

Qüdrət CƏfƏrov

Respublika.- 2017.- 16 dekabr.- S.11.