“Bakı-2017” IV İslam Həmrəyliyi Oyunları idman tariximizə yeni səhifələr yazacaq.

Artıq Azərbaycan dünyada idman dövləti kimi tanınır. Bu imic elə-belə qazanılmayıb. Müstəqil respublikamız son illər həm bölgədə, həm də dünyada sürətlə inkişaf edən ölkələr sırasına daxil olmuş, beynəlxalq aləmdə böyük nüfuz qazanmışdır. Ölkəmizin iqtisadi qüdrətinin artması digər sahələrlə yanaşı, idmanın inkişafını da təmin etmişdir. İdmanın maddi-texniki bazası möhkəmləndirilmiş, idmançılarımız dünya, Avropa, olimpiya oyunlarında, digər mötəbər yarışlarda yüksək nəticələr qazanmış, himnimiz səsləndirilmiş, üçrəngli bayrağımız dalğalandırılmışdır. Artıq Azərbaycanın mötəbər beynəlxalq tədbirlərin və yarışların təşkili sahəsində zəngin təcrübəsi var. Belə ki, respublikamızda Avropa və dünya çempoinatları, “Eurovision 2012” beynəlxalq mahnı müsabiqəsi, “Bakı-2015” ilk Avropa Oyunları, şahmat üzrə dünya kuboku, “Formula-1” üzrə Avropa qran-prisi, Şahmat Olimpiadası və digər turnilər yüksək səviyyədə təşkil olunub.

Bu il ölkəmiz mayın 12-22-də Bakıda keçiriləcək və 300-dən artıq oyun təşkilatçısını bir araya gətirəcək IV İslam Həmrəyliyi Oyunlarına ev sahibliyi edəcək. Xatırladaq ki, Azərbaycan Prezidenti İlham Əliyev “IV İslam Həmrəyliyi Oyunlarının 2017-ci ildə Bakı şəhərində keçirilməsi üzrə Təşkilat Komitəsinin yaradılması haqqında” 18 sentyabr 2015-ci il tarixli sərəncam imzalamışdır. Həmin sərəncama əsasən Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Olimpiya Komitəsi İcraiyyə Komitəsinin üzvü Mehriban xanım Əliyeva sədr olmaqla Təşkilat Komitəsinin üzvlərindən ibarət tərkibi təsdiq edilmişdir. Vurğulayaq ki, yüksək səviyyədə keçirilmiş “Bakı-2015” ilk Avropa Oyunlarının da Təşkilat Komitəsinin sədri olmuş ölkənin birinci xanımının bu sahədə böyük təcrübəsi vardır. Onu da nəzərə çatdıraq ki, hələ 2013-cü il iyulun 24-də Səudiyyə Ərəbistanının Ciddə şəhərində İslam Həmrəyliyi İdman Federasiyasının VIII Baş Assambleyasında səsvermə zamanı Azərbaycanın 2017-ci ildə IV İslam Həmrəyliyi Oyunlarına ev sahibliyi etməsi haqqında qərar qəbul edilmişdir. Səsvermədə iştirak edən İslam ölkələrinin 57 üzvü yekdilliklə Azərbaycana səs vermişlər.

“Bakı-2017” IV İslam Həmrəyliyi Oyunlarının başlanmasına 40 gündən çox vaxt qalıb. Hazırlıq işləri plana uyğun olaraq davam edir və əsas işlər yüksək səviyyədə başa çatdırılmışdır. Prosesə xarici mütəxəssislərlə yanaşı yerli kadrlar da cəlb olunub. Yarış ilk Avropa Oyunları zamanı istifadədə olan arenalarda - 16 idman qurğusunda keçiriləcək. İlk Avropa Oyunlarında olduğu kimi, Atletlər kəndi “Bakı-2017”də də idmançıları qəbul edəcək. Artıq 49 ölkə bu yarışda iştirakını təsdiq edib.

İlk Avropa Oyunlarına hazırlıq işlərinin yüksək səviyyədə aparılması və mütəşəkkil qaydada başa çatması onu sübut etmişdir ki, böyük idman tədbirlərinin təşkilini könüllülərin köməyi olmadan təsəvvür etmək mümkün deyil. Ölkəmizin aparıcı ali təhsil müəssisələrindən və gənclər təşkilatlarından olan 12 min 500-dən artıq namizədin İslam Həmrəylik Oyunlarına dəstək göstərmək məqsədilə qeydiyyatdan keçməsi bunun əyani təzahürüdür.

IV İslam Həmrəyliyi Oyunlarına biletlər martın 19-dan satışa çıxarılmışdır. Ümumiyyətlə, idmanın 20 növü üzrə 500 mindən artıq biletin satışı nəzərdə tutulmuşdur. Paytaxtın hər bir yerində bilet satışının təşkili vətəndaşlarımızın bu mötəbər idman yarışına marağının artmasına və sevdikləri idman növünü rahat şəkildə seyr etməsinə şərait yaradacaq.

Həmçinin “Bakı-2017” İslam Həmrəyliyi Oyunları “Xəzərdən başlayan su səyahəti” proqramının marşrutu da məlumdur. Aprelin 5-də Dağ Salnamə Muzeyində start veriləcək marşrut Azərbaycanın 15 bölgəsini əhatə edəcək. İslam aləmində həyat mənbəyi, şəffaflıq və təmizlik rəmzi olan su Xəzərdən başlayan səyahət turunun əsas mövzusudur. Proqram çərçivəsində Azərbaycanın su bölgələrini təmsil edən 16 uşağın hər biri “Bakı-2017” su səhəngi ilə Xəzər dənizindən su götürəcək və öz doğma şəhərlərinə, evlərinə aparacaq. Bununla da “Bakı-2017” Oyunları Xəzərin gözəlliyindən, sevgisindən və paklığından hər evə pay verəcək. Otuz yeddi gün ərzində 300 kilometrdən artıq məsafənin qət olunacağı səyahət turu Xəzər dənizindən başlayaraq Azərbaycan ərazisində mövcud olan 15 su hövzəsini əhatə edəcək. Səyahət zamanı bu hövzələrdən toplanan su mayın 12-də “Bakı-2017”nin açılış mərasiminin bir hissəsi olacaq. Başlanğıcını Xəzər dənizindən götürərək bütün Azərbaycanı əhatə edəcək marşrut ölkəmizin tarixini, mədəniyyətini, adət və ənənələrini nümayiş etdirmək üçün əvəzsiz rol oynayacaq.

Mayın 12-22-də ölkəmizdə keçiriləcək IV İslam Həmrəyliyi Oyunlarına təşrif buyuracaq hər bir qonaq Azərbaycandan ən xoş arzularla ayrılacaq. Xalqımızın qonaqpərvərliyi, öz tarixinə və mədəniyyətinə sevgisi hər kəsə yaxşı bəllidir. Məhz Oyunlardan əvvəl regionlarımızı əhatə edəcək səyahət, bölgələrimizin xüsusiyyətlərini, adətlərini, tarixini, bir sözlə Azərbaycanın gözəlliyini bütün dünyaya nümayiş etdirəcək.

Beləliklə, “Xəzərdən başlayan səyahət” aprelin 5-də Bakıdan, 7-də Naxçıvandan, 9-da Astaradan, 11-də Şirvandan, 13-də Sabirabaddan, 15-də Ağcabədidən, 17-də Horadizdən (Füzuli), 19-da Gəncədən, 21-də Şəmkirdən, 23-də Mingəçevirdən, 25-də Qaxdan, 27-də Qəbələdən, 29-da Qusardan, mayın 1-də Qubadan, mayın 3-də Qaradağdan, mayın 5-də isə Sumqayıtdan keçəcək.

“Bakı-2017” IV İslam Həmrəylik Oyunlarına yüksək önəm verən dövlətimizin başçısı cənab İlham Əliyev hazırlıq prosesini daim diqqət mərkəzində saxlayır. Təsadüfi deyildir ki, möhtərəm Prezident tərəfindən 2017-ci ilin “İslam Həmrəyliyi İli” elan edilməsi dünyanın 50-dən çox ölkəsindən Bakıya təşrif buyuracaq gənc fəalları bir araya gətirməklə yanaşı, bu mötəbər tədbir haqda ictimaiyyətin geniş məlumatlandırılması baxımından mühüm əhəmiyyət kəsb edir. Bu tarixi hadisə İslam ölkələrinin gənclərinə təkcə idman sahəsində deyil, digər istiqamətlərdə də bir-biri ilə əməkdaşlıq üçün böyük perspektivlər vəd edir. Mötəbər tədbirlərə yüksək səviyyədə ev sahibliyi etməsi ilə dünyada yaxşı tanınan Azərbaycan IV İslam Həmrəyliyi Oyunlarına qatılacaq ölkələrə növbəti dəfə bu mühüm yarışları təqdim etməklə yanaşı, həm də özünün turizm potensialını nümayiş etdirəcək.

Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasdakı nitqində Prezident İlham Əliyev qarşıdakı Oyunların əhəmiyyəti barədə demişdir: “Bu il Azərbaycanda IV İslam Həmrəyliyi Oyunları keçiriləcək. Bu da çox önəmli beynəlxalq tədbirdir, bütün müsəlman aləminin həmrəylik oyunlarına biz ev sahibliyi edəcəyik. Azərbaycan 2015-ci ildə ilk Avropa Oyunlarını keçirmişdir. Yəni, bir ölkədə, bir şəhərdə iki il ərzində həm Avropa Oyunları keçirilib, həm də İslam Həmrəyliyi Oyunları keçiriləcək. Bu, təkcə idman tədbiri deyil. Əgər kimsə hesab edir ki, İslam Həmrəyliyi Oyunları idman tədbiridir, səhv edir. Bu, böyük siyasi tədbirdir, bu, böyük mədəni tədbirdir, bu, böyük ictimai hadisədir”.

Bəli, bu bir faktdır ki, Azərbaycan ilk Avropa Oyunlarını uğurla keçirməklə ölkəmizin dinamik tərəqqisini, dostluq və əməkdaşlıq məkanı olduğunu bütün dünyaya bir daha sübut etdi. Ölkəmiz qarşıdakı “Bakı-2017” IV İslam Həmrəyliyi Oyunlarını da yüksək səviyyədə keçirməklə idman tarixində yeni səhifələr yazacaq, idmançılarımız isə yeni qələbələrlə xalqımızı sevindirəcək.

Ramiz YUSİFLİ.

Respublika.- 2017.- 12 may.- S.10.