Mahmudlu kənd uşaq musiqi məktəbi

Qubadlı rayonunun Mahmudlu kənd uşaq musiqi məktəbi 1980-ci ildə yaradılmışdır. Məktəb, rayonun Mahmudlu kəndində fəaliyyətə başamışdır və bu dövrdə 5 şöbədən ibarət olmuşdur. Həmin dövrdə burada 40 şagirdə 12 müəllim dərs demişdir. Qeyd etmək lazımdır ki, rayon 31 avqust 1993-cü ildə erməni faşistləri tərəfindən işğalla əlaqədar rayonun 802 kvadratkilometr ərazisi, 98 yaşayış məntəqəsi ermənilərin əlinə keçmişdir. Rayon əhalisinin 234 nəfəri şəhid, yüzlərlə insan isə əlil olmuşdur. 10 nəfər Milli Qəhrəman adına layiq görülmüşdür.

İşğalla əlaqədar məktəb Sumqayıt şəhərindəki Səid Rüstəmov adına 3 saylı incəsənət məktəbinin 2-ci binasında fəaliyyətə başlamışdır. 1997-ci ildə rayon icra hakimiyyətinin qərarı ilə bu məktəbə mərhum xanəndə, Əməkdar Mədəniyyət işçisi, həmyerli Fəxrəddin Hüseynovun adı verilmişdir. Sonrakı illərdə məktəb inkişaf etmiş və burada əlavə 2 şöbədə də açılmışdır. Beləliklə, indi burada 161 şagirdə 48 müəllim fortepiano, skripka, tar, kamança, qarmon, nağara, xanəndəlik fənlərindən dərs deyir. Məktəbin bina şəraitini yaxşılaşdırmaq, maddi-texniki bazasını möhkəmləndirmək üçün Qubadlı Rayon İcra Hakimiyyətinin təşəbbüsü ilə 28 may mədəniyyət evinin binasına köçürülmüşdür.

Məktəbin fəaliyyətini yüksəltmək üçün yeni təyin olunmuş direktor Samir İsmayılov bir çox islahatlar edərək nailiyyətlərə imza atmağa başlamışdır. İndi məktəbdə uşaqların estetik tərbiyəsinin formalaşması üçün təkcə dərslərin keyfiyyətli təşkili deyil, eyni zamanda yeni kollektivlərin yaradılmasına da diqqət artırılmışdır. Belə ki, Samir İsmayılovla söhbət edərkən o, bildirdi ki, indi məktəbdə dərslərin yüksək səviyyədə keçilməsi ilə yanaşı, məktəb özfəaliyyət kollektivlərinin də yaradılmasına diqqət artırılmışdır. Belə ki, indi burada xalq çalğı alətləri orkestri, uşaqlardan ibarət xor kollektivi, nağaraçalanlar ansamblı kollektivləri vardır. Qeyd etmək lazımdır ki, bu kollektivlər dəfələrlə dövlət tədbirlərində, milli bayramlarda, hərbi hissələrdə uğurla çıxışlar etmişlər. 2009-cu ildə gənc pianoçuların respublika müsabiqəsində, Mingəçevir şəhərində keçirilən xalq çalğı alətlərinin I Respublika müsabiqəsində, Yevlax şəhərində keçirilən milli musiqi alətlərinin IV Respublika müsabiqəsində, 2010-cu ildə Astara rayonunda keçirilən V Respublika müsabiqəsində, 2011-ci ildə Ümumrespublika müsabiqəsində “İstedadlı uşaqlar” müsabiqəsində, “Xan Şuşinski adına muğam festivalı”nda, 2013-cü ildə Azərbaycan xalqının ümummilli lideri Heydər Əliyevin anadan olmasının 90 illik yubileyinə həsr olunmuş uşaq xor kollektivinin 7-ci respublika müsabiqəsində müvəffəqiyyətli çıxışına görə məktəbin müəllim və şagirdləri diploma, fəxri fərmanlara layiq görülmüşlər.

Gürcüstan və Azərbaycanın birgə keçirdiyi IV Beynəlxalq Dostluq festivalında məktəbin fortepiano şöbəsinin şagirdi Əzzət Məmmədli diploma layiq görülmüşdür.

2017-ci ildə nazirliyin dəstəyi, Avropa müsabiqə komitəsi, İtaliyanın Beynəlxalq Mədəniyyət Assosiasiyası “Testene art” və Cövdət Hacıyev adına 3 nömrəli 11 illik musiqi məktəbinin birgə təşkilatçılığı ilə keçirilmiş festivalda məktəbin I sinif şagirdi Fatimə Mənsumzadə “II dərəcəli” diploma, müəllimə İradə Abdullayeva isə təşəkkürnamə ilə təltif olunmuşlar. Bütün bu və ya digər göstəricilərin nəticəsidir ki, məktəbdə bu sahəyə maraq günü-gündən artır. Məktəbin bir çox məzunlarının, o cümlədən Nazim Cəfərquliyevin, Afiq Bayramovun bu məktəbdə çalışması buna aydın sübutdur.

Nailiyyətlərin əldə olunmasında məktəbin müəllimlərindən Firuzə Nağıyeva, Əli Mənsurov, Səbinə Fərmanova, Ceyhun Yaqubov, Qönçə Kazımova, Mənzər Həsənova, İradə Abdullayeva və başqalarının əməyi böyükdür.

Zabit CAVADOV.

Respublika.- 2017.- 23 may.- S.11.