Aktyor Abbas Mirzə Şərifzadənin 125 illiyinə həsr olunmuş tədbir

Bakı Şəhər Mədəniyyət Baş İdarəsi, Yasamal Rayon MKS-nin əməkdaşları və fəal oxucuların təşkil etdiyi Yasamal rayon A.M.Şərifzadə adına Mədəniyyət Mərkəzində tanınmış aktyor Abbas Mirzə Şərifzadənin 125 illiyinə həsr olunmuş tədbir keçirildi.

Tədbirdə tanınmış ziyalılar, mədəniyyət və incəsənət xadimləri, professor İlham Rəhimli, Xalq artisti Azər Paşa Nemətov, görkəmli ədəbi tənqidçi, filologiya üzrə fəlsəfə doktoru Əsəd Cahangir, Xalq artisti, Gənc Tamaşaçılar Teatrının sabiq baş rejissoru Ağakişi Kazımov, Xalq artisti Hacı İsmayılov, Xalq artisti, Dövlət Pantomima Teatrının direktoru Bəxtiyar Xanızadə və başqaları iştirak etdilər.

Tədbiri giriş sözü ilə Yasamal Rayon İcra Hakimiyyəti başçısının müavini Təravət Muradova açaraq bildirdi ki, Yasamal rayonunda böyük quruculuq işləri aparılır, rayon günü-gündən abadlaşır. Rayonun ərazisində çoxlu ali məktəblər, Milli Elmlər Akademiyasının bir çox institutları fəaliyyət göstərir. O, A.M.Şərifzadə haqqında qısa məlumat verərək bildirdi ki, rayonun ərazisində aktyorun adını daşıyan küçə və Mədəniyyət Mərkəzi vardır.

Əməkdar incəsənət xadimi, professor İlham Rəhimli elmi araşdırmalarından danışaraq qeyd etdi ki, A.M.Şərifzadə novator-aktyor olub. Onun təklifi ilə istedadlı insanlar Xarkov və Moskva şəhərlərinə oxumağa göndərilib. İ.Rəhimli vurğuladı ki, Həştərxanda teatrın əsasını azərbaycanlılar qoyub. Simferopol, Oş, Buxara, Səmərqənd, Aşqabad teatrlarının yaranması da azərbaycanlılarla bağlıdır. Professor bildirdi ki, 1921-1937-ci illərdə A.M.Şərifzadə dəfələrlə H.Cavidin “Şeyx Sənan” tamaşasında baş rolu ifa edib. Onun bir çox uğurlu rollarından danışaraq, “İblis”, “Topal Teymur”, “Aydın”, “Od gəlini” və başqa tamaşaları da qeyd etdi və A.M.Şərifzadəni həm də “böyük rejissor” adlandırdı.

Xalq artisti, professor Ağakişi Kazımov bildirdi ki, A.M.Şərifzadə 1938-ci ildə güllələnib. O, tanınmış aktyoru bənzərsiz bir insan kimi tədbir iştirakçılarına təqdim etdi və qeyd etdi ki, o, bütün aktyorların müəllimi olub, aktyor, rejissor, tərcüməçi, pyeslərin müəllifi və kino rejissoru kimi də tanınmışdı.

Xalq artisti, Azərbaycan Teatr Xadimləri İttifaqının sədri Azər Paşa Nemətov professor İlham Rəhimlinin yorulmaz əməyini qeyd edərək bildirdi ki, o, A.M.Şərifzadə haqqında bir çox sənədləri araşdırıb üzə çıxara bilmişdir.

Xalq artisti, aktyor Hacı İsmayılov A.M.Şərifzadəni teatrımızın işığı adlandırdı və “Yaşıl eynəkli adam” tamaşasından maraqlı fraqment söylədi.

Ədəbi tənqidçi Əsəd Cahangir bildirdi ki, A.M.Şərifzadə çox çətin və təhlükəli bir dövrdə yaşayıb yaratmışdır.

Xalq artisti Bəxtiyar Xanızadə çıxışında bildirdi ki, A.M.Şərifzadə böyük aktyor olmaqla yanaşı, həm də böyük insan idi.

Sonda tədbir iştirakçıları A.M.Şərifzadə haqqında videoçarxı, “Molla Mirza Abdulraqim“ və “Cavid ömrü” filmlərindən fraqmentləri izlədilər.

Kamil İSMAYILOV

Respublika.- 2018.- 8 dekabr.- S.5.