Atatürk Mərkəzində tədbir

Bu bir həqiqətdir ki, sözügedən kitab (“Bu dünya sənin yerindi...”) ədəbi fakt və ədəbi hadisə kimi çağdaş Azərbaycan poeziyası tarixində öz dəyərli yerini tutdu - bunu heç kim inkar edə bilməz. Vətən dərdindən, dünya qayğılarından biçilmiş Qiymət Məhərrəmlinin söz aləmi onu sevənlərə, ümumiyyətlə ədəbiyyatşünaslığa gözəllik görkünün təcəssümüdür. Hərdən “kəndçiliyi tutmuş”, üzü-gözü boz şəhərdə belə mənliyini qoruyub saxlamış gözəl Şəkinin gözəl övladının bu uğuru əlbəttə ki, danılmazdır. Poeziyasevərləri daima “İşığa sarı” aparan bu nurlu söz ustası poetikası, insansevərliyi ilə ədəbiyyat mülkündə özünə layiqli yer tutub, desək, yanılmarıq... İnamla deyə bilərik ki, bu cür kitabların olması ədəbiyyatımızın, xüsusən də şeirimizin hələ də yaşadığının təsdiqidir. Yaradıcılığı ilə “5”lərin fövqündə dayanan Qiymət Məhərrəmli dostlarını hələ çox sevindirəcəkdir. Sözə və onun yaradıcılarına eşq olsun!

Yuxarıda yazılanların təsdiqi kimi dekabr ayının 17-də Bakıdakı Atatürk Mərkəzində AMEA Folklor İnstitutunun əməkdaşı, filologiya üzrə fəlsəfə doktoru, şair-publisist Qiymət Məhərrəmlinin 55 illik yubiley tədbiri keçirildi. Mərasimdə şairin “Bu dünya sənin yerindi...” şeir kitabının, yubilyara həsr olunmuş “Qiymət Məhərrəmli - 55” Xüsusi Buraxılışın, eləcə də Xalq artisti Eldost Bayramın ifasında şairin şeirlərindən ibarət “Allaha dair oluram” audio-diskinin təqdimatı oldu.

Mərasimin aparıcısı, kitabın redaktoru və Ön sözün müəllifi, professor Rüstəm Kamal səmimiliyi ilə seçilən, oxucuların sevdiyi şair Qiymət Məhərrəmlinin yaradıcılıq yoluna ekskurs edərək, Azərbaycan poeziya gülşənindəki özünəməxsus yerindən danışdı. İlk şeir kitabını 1996-cı ildə oxuyub-bəyəndiyi şairin aradan keçən illər ərzində oxuculara daha bir neçə şeir kitabını ərməğan etdiyindən söz açdı. O, Qiymət Məhərrəmlini səmimi, ləyaqətli, öz sözü, öz izi olan şair kimi xarakterizə etdi. Aparıcı vurğuladı ki, Məhsətidən üzü bəri bütün qadınların şair taleləri o qədər də hamar olmayıb. Çünki bir çoxları şair-şairə münasibətlərində doğma-ögeylik səddi yaradaraq, ədəbiyyatı cinsi prinsipə tabe etməkdə bulunurdular. Qiymət Məhərrəmlinin şeirləri təsdiqlədi ki, ədəbiyyat heç bir cinsi fərqlənməyə məruz qalmadığına görə bütöv bir yaradıcılıq sahəsidir... Natiq fikrini müəyyən ədəbi paralellər gətirərək iştirakçılara aydın şəkildə çatdırdı.

Sonra söz ədəbiyyat bilicilərinə - şair və alimlərə verildi. Gürcüstan Aşıqlar Birliyinin sədri, şair Dərviş Osman Əhmədoğlu, AMEA Tarix İnstitutunun şöbə müdiri, professor, şair Şahin Fazil, Memarlıq və İnşaat Universitetinin kafedra müdiri, professor Nurməmməd Məmmədov, “Borçalı Cəmiyyəti” İctimai Birliyinin sədri, həkim-politoloq Zəlimxan Məmmədli Qiymət Məhərrəmlinin poeziyasından, ziyalı xanım olmasından danışdılar, onu təbrik etdilər, daha böyük uğurlar arzuladılar.

Cümhuriyyətimizin qurucusu böyük Məhəmməd Əmin Rəsulzadənin nəvəsi, Əməkdar rəssam, eyni zamanda “Bu dünya sənin yerindi...” kitabının rəssamı Rais bəy Rəsulzadə Qiymət xanımın ünvanına xoş sözlər söylədikdən sonra, kitabın üz qabığında əks olunmuş şəklin orijinalı olan gözəl əsəri yubilyara hədiyyə etdi.

Şairin poeziyasından ibarət diskdəki şeirlərin qiraətçisi, sevilən diktorumuz, Xalq artisti Eldost Bayram şairi onun “Mən qəribəm” şeirini söyləməklə təbrik etdi.

Azərbaycan, Gürcüstan və Rusiya Yazıçılar Birliklərinin üzvü, tanınmış şair-tərcüməçi Givi Qiymət xanım üçün dostları tərəfindən hazırlanmış sürprizlərin - “Xüsusi Buraxılış”ın və “Allaha dair oluram” diskinin yubilyarın halal haqqı olduğunu vurğuladı. O, orijinal fikrləri ilə iştirakçıları özünə cəlb etdi. Belə ki, Givi: “Çoxları Qiymətin yaradıcılıq xüsusiyyətləri və poeziyasından danışdılar. Mən isə Qiymətin bacarmadıqlarını dilə gətirmək istərdim - o, yaltaqlanmağı, yararlanmağı, özünü gözə soxmağı bacarmır. Mən Qiymət Məhərrəmlini bu “bacarıqsızlığına” görə çox sevirəm” - deyə gurultulu alqışlar qazandı.

Givinin həyat yoldaşı Xatirə xanım şairin Qiymət xanıma ünvanlanmış “Şəkidə” şeirini böyük məmnuniyyətlə səsləndirdi.

AMEA Folklor İnstitutu “Cənubi Azərbaycan folkloru” şöbəsinin müdiri, Filologiya elmləri doktoru Mətanət xanım Abbasova Qiymət xanımın istedadlı şair, jurnalist, elm adamı olmaqla yanaşı, ləyaqətli Azərbaycan xanımı kimi də örnək olduğunu vurğuladı, ona, sədaqətli rəfiqəsinə daha böyük yaradıcılıq uğurları dilədi.

“Dərkənar” qəzetinin təsisçisi və baş redaktoru, “Qiymət Məhərrəmli - 55” Xüsusi Buraxılışının müəlliflərindən olan Pünhan Şükür və kitabın texniki redaktoru, mahir dizayner Oqtay Oruc da öz səmimi təbrikləri ilə Qiymət Məhərrəmli şəxsiyyətinə və yaradıcılığına yüksək dəyər verərək, ona yeni zirvələr fəth etməyi arzuladılar.

Folklor İnstitutu “Aşıq yaradıcılığı” şöbəsinin müdiri, folklorşünas-alim Elxan Məmmədli, “Xarici əlaqələr” şöbəsinin müdiri, tədqiqatçı-alim Əli Şamil, akademik Telman Əliyev, şair-jurnalist Mədəd Coşqun, Memarlıq və İnşaat Universitetinin dosenti, arxitektor Hüseyn Artıkoğlu, AMEA Əlyazmalar İnstitutunun laboratoriya müdiri, ağac üzərində oyma sənətkarı Seyfəddin Mənsimoğlu, tanınmış şairlərdən Mübariz Məsimoğlu, İlham Qəhrəman, Elbəyi Cəlaloğlu, Akəm Xaqan (o, Şəki ədəbi mühiti nümayəndələrinin yubilyara ünvanlanmış təbrik məktubunu səsləndirdi), Raifə Sərxanqızı, Arzu Nehrəmli, İlham Qazaxlı, Səbinə Yusif, Eldar Həsrət, Xatirə Rəhimli, Qubadan gəlmiş şair Qüdrət Minhacoğlu Azərbaycan poeziyasının tanınmış simalarından olan Qiymət Məhərrəmlini təbrik edərək, ona yeni yaradıcılıq uğurları dilədilər.

AMEA-nın əməkdaşı Sarvan Kərimov, H.Əliyev adına Azərbaycan Ali Hərbi Məktəbinin müəllimi, ehtiyatda olan polkovnik-leytenant Novruz Bəkirov, jurnalist Şahin Abbas və başqaları da öz çıxışlarında gözəl şeirlər müəllifi, istedadlı jurnalist, yorulmaz elm adamı, səmimi dost Qiymət xanım barədə arzularını bölüşdülər.

Sonda söz yubilyara verildi. Qiymət Məhərrəmli “Səni oxşamaz bu şəhər” şeirini poeziyasevərlərə ərməğan edərək, bu möhtəşəm tədbirin keçirilməsində əməyi olan, eləcə də yubiley günü ilə əlaqədar sürprizlər hazırlayan bütün dostlara öz minnətdarlığını bildirdi. Ənənəvi olaraq xatirə şəkilləri çəkildi və səbəbkara gül dəstələri və hədiyyələr təqdim olundu.

Giya PAÇXATAŞVİLİ

Respublika.- 2018.- 20 dekabr.- S.7.