Vaqif Sultanlının “Ölüm yuxusu” kitabı Moskvada nəşr olunub

Bu günlərdə yazıçı-ədəbiyyatşünas Vaqif Sultanlının “Ölüm yuxusu” (“Son zabveniə”) adlı kitabı Moskvada nəşr olunmuşdur. Nəfis şəkildə “Mısl” nəşriyyatında yayınlanan kitaba müəllifin eyniadlı povesti, son dövrlərdə qələmə aldığı iki hekayəsi daxil edilmişdir. Povest və hekayələri rus dilinə Cavid Abbaslı çevirmişdir.

Qeyd edək ki, bu, müəllifin rusdilli oxucularına təqdim olunan ilk kitabıdır. Bundan öncə, yazıçının “İnsan dənizi” romanı, ayrı-ayrı hekayələri Rusiya, Ukrayna və Belorusiyanın müxtəlif ədəbi dərgilərində, habelə Avropa və Amerikanın rusdilli mühacirət mətbuatında dərc olunmuşdur.

Yazıçının şərti- metaforik üslubda qələmə alınmış “Ölüm yuxusu” povestində kənd qəbiristanlığının köçürülməsi fonunda cəmiyyət həyatında baş verən mənəvi-əxlaqi problemlər bədii mənzərəsini tapmışdır. Kitaba daxil edilmiş “Külq qəfəs” və “Zolaqlı yuva” hekayələri isə özünəməxsus yazı tərzi ilə seçilməkdədir.

Azərbaycan mühacirət irsi ilə bağlı bir çox dəyərli araşdırmaların müəllifi professor Salavat İshakov kitaba yazdığı ön sözdə povest və hekayələrlə bağlı düşüncələrini belə ümumiləşdirmişdir: “Faciəvi və kədərli hadisələrlə müşayiət olunan personajların taleyi cəmiyyəti narahat edən ciddi sosial və mənəvi-əxlaqi problemlər kontekstində aşkarlanır. Bədii mətnin mürəkkəb strukturu, fəlsəfi mahiyyəti, təsvir və təhkiyə özəllikləri yazıçının bənzərsiz yaradııcılıq üslubunu şərtləndirir”.

Respublika.- 2 oktyabr.- S.5.