Güclü dövlətin müasir ordusu

.

Bakı Dövlət Universitetini və Azərbaycan Respublikası Prezidenti yanında Dövlət İdarəçilik Akademiyasını bitirən M.Süleymanov 1979-1983-cü illərdə Əfqanıstanda hərbi xidmətdə olub, 1992-2015-ci illərdə isə Azərbaycan Silahlı Qüvvələri sıralarında xidmət keçib. 10 il ərzində hərbi attaşe kimi ordumuzu ölkə xaricində təmsil edib.

1996-cı ildə Azərbaycan Ordusu sıralarında ilk dəfə elmlər namizədi, 2004-cü ildə isə yenə Azərbaycan Ordusu sıralarında ilk dəfə elmlər doktoru elmi dərəcəsi almış tarixçi alimdir.

“Azərbaycan Ordusu - 1918-1920”, “Qafqaz İslam Ordusu və Azərbaycan”, “Azərbaycan Xalq Cümhuriyyətinin hərb tarixi” (1-ci, 2-ci cildlər), “Azərbaycan hərb tarixi. Sovet dövrü” (1-ci, 2-ci cildlər), “Gülüstan müqaviləsi” (1-ci, 2-ci cildlər), “Türkmənçay müqaviləsi”, “Azərbaycanda Ali Baş Komandanlıq institutunun Heydər Əliyev mərhələsi”, “Ali Baş Komandanın institutu”, “Nadir Şah”, “Şah İsmayıl Səfəvi” kitablarının müəllifidir.

2018-ci ildə onun Azərbaycan ordusunun 100 illik dövrünü əhatə edən fundamental araşdırması - “Azərbaycan Ordusunun tarixi” (5 cilddə) kitabı çapdan çıxıb.

Mehman Süleymanovdan aldığımız müsahibəni oxuculara təqdim edirik.

- Mehman müəllim, istərdim söhbətimizə ötən ay 101-ci ildönümünü qeyd etdiyimiz Azərbaycan Silahlı Qüvvələrinin yaranması, təşkilatlanması və tarixi əhəmiyyəti barədə fikirlərinizlə başlayaq...

- Əvvəlcə qeyd edim ki, ötən əsrin ikinci onilliyinin sonlarında, imperialist qüvvələrin dünyanı yenidən bölüşdürmək uğrunda apardıqları mübarizə nəticəsində yaranmış son dərəcə gərgin beynəlxalq şəraitdə Azərbaycan Xalq Cümhuriyyəti kimi Şərq aləmində ilk demokratik dövlətin qurulması bütövlükdə xalqımızın şanlı tarixinin parlaq bir səhifəsini təşkil edir. Heç şübhəsiz ki, Azərbaycan Xalq Cümhuriyyətinin mövcud olduğu 23 ay ərzində dövlət quruculuğu sahəsində əldə edilmiş çox mühüm və tarixi nəticələrdən biri məhz Cümhuriyyət ordusunun yaradılması olmuşdur. Müasir ordumuzun sələfi kimi qəbul etdiyimiz bu ordunun formalaşdırılması, təşkilatlandırılması Azərbaycan xalqının dövlətçilik tarixində, Azərbaycanın hərb tarixində yeni bir mərhələnin başlanğıcını təşkil edir. Hər şeydən əvvəl ona görə ki, təxminən yüz illik fasilədən sonra xalqımız özünə məxsus ərazilərin bir hissəsində müstəqil dövlətçiliyini bərpa etdi və onun mühüm atributu kimi milli ordu quruculuğunun əsası qoyuldu. Cümhuriyyət ordusunun yaradılması həm də Azərbaycanda müstəqil nizami ordu quruculuğunun başlanğıcını qoydu. Ən başlıcası isə, Azərbaycan xalqının müstəqillik və qəhrəmanlıq tarixinə son dərəcə şərəfli, bugünkü və gələcək nəsillərin hər zaman qürurla xatırlayacağı və istinad edə biləcəyi bir səhifə yazıldı. Azərbaycan xalqı bir daha sübut etdi ki, dünya tarixində dərin izlər buraxmış qəhrəmanlıq ənənələrini davam etdirməyə layiq və qadirdir. Odur ki, qısa müddət ərzində, özü də zəruri bazanın olmadığı çox mürəkkəb hərbi-siyasi-iqtisadi şəraitdə döyüşkən bir ordunu formalaşdırmaq mümkün oldu. Cümhuriyyət ordusu quruculuğunun təcrübəsi və ənənələri bu gün də öz dəyərini itirməmiş və heç zaman da itirməyəcəkdir. Məhz buna görə də bir əsr əvvəl əsası qoyulmuş ordunun Azərbaycanın dövlətçilik və hərb tarixində xüsusi yeri və əhəmiyyəti vardır.

- Azərbaycan Xalq Cümhuriyyəti dövründə ordu quruculuğu prosesi zamanı ilk növbədə hansı prinsiplərə, amillərə və şərtlərə üstünlük verildiyini qeyd etmək olar?

- Hər şeydən əvvəl, milli ordu quruculuğu milli dövlət quruculuğunun tərkib hissəsi idi. Bu məqsədlə əsaslandırılmış Dövlət Proqramı qəbul edilmişdi. Ordu quruculuğu dövlətin rəhbəliyi, himayəsi və qayğısı altında aparılırdı. Bu mənada ordu-dövlət münasibətləri dəqiqliklə müəyyənləşdirilmişdi və ordu siyasətdən tam kənar saxlanılırdı.

İkincisi, Azərbaycan dövlətinə, onun müstəqilliyinə sədaqətli, hazırlıqlı milli zabit kadrları korpusunun formalaşdırılması ordu quruculuğunun hərəkətverici qüvvəsi sayılırdı. Bu mənada ilk növbədə, sözsüz ki, tam artilleriya generalı Səməd bəy Mehmandarovla tam artilleriya generalı Əliağa Şıxlinskinin tarixi fəaliyyəti hər zaman xalqımız tərəfindən minnətdarlıqla xatırlanacaqdır. Onlar ordunun təşkilatlanması və döyüşkən bir qüvvəyə çevrilməsi məqsədilə öz ətraflarına bu yolda əsl fədakarlıqlar göstərmiş bir çox milli zabit və generalları toplaya bilmişdirlər: Məmməd bəy Sulkeviç, Həbib bəy Səlimov, Həmid bəy Qaytabaşı, Cavad bəy Şıxlinski, Teymur bəy Novruzov, Xosrov Mirzə Qacar, Davud bəy Yadigarov, İbrahim ağa Usubov və başqaları...

Hökümət orqanları ilə Hərbi Nazirlik arasındakı qarşılıqlı əlaqələrin səmərəli qurulması da mühüm amillərdən idi. Müvafiq nazirliklər və qurumlar çağırış işinin təşkilində, fərariliyə qarşı mübarizədə, təchizat məsələlərinin həllində səmərəli fəaliyyət göstərirdilər.

Çox mühüm amillərdən biri kimi, ordunun milli-mənəvi dəyərlər əsasında qurulmasını qeyd etmək olar. Xidmətə gələn hər bir zabit və əsgər bilirdi ki, o, Cümhuriyyətin müstəqilliyinin müdafiəsinə xidmət edir. Bu isə həm də müstəqilliyin qurucusu olan Azərbaycan xalqının milli dəyərlərinə ehtiram göstərilməsini tələb edirdi. Rəsmi dil kimi Azərbaycan dili qəbul edilmişdi. Hər bir qeyri-azərbaycanlı zabit qarşısında qısa müddət ərzində milli dilin öyrənilməsi və əsgərlərlə yalnız Azərbaycan dilində ünsiyyət qurulması tələbi qoyulmuşdu. Qoşunların şəxsi heyəti arasında Azərbaycan xalqının qəhrəmanlıq tarixi təbliğ edilir, əsgərlər hər gün milli dildə yazılmış marşları səsləndirirdilər. Savadsızlığın ləğvi üçün Azərbaycan dili dərsləri təşkil edilmişdi. Ordunun hərbi geyimlərinin milli nümunələri yaradılmışdı və bu nümunələrin mühüm göstəricilərindən biri də poqonlar üzərində “Azərbaycan” sözünün yazılması idi. Qoşunların məişət həyatı xalqın məişət həyatına yaxınlaşdırılmışdı. Belə ki, orduda əsasən milli yeməklərin hazırlanmasına üstünlük verilirdi.

Nəhayət, qeyd etmək lazımdır ki, ordu quruculuğu prosesində dünya təcrübəsinə əsaslanılsa da, bu məqsədlə milli qanunvericilik bazası yaradılmışdı. Parlamentin mövcud olduğu 15 ay ərzində 10-dan artıq qanun və qərar qəbul edilmiş və respublikadakı mövcud hərbi şərait vaxtaşırı parlamentin müzakirəsinə çıxarılmışdı. Bu istiqamətdə fəaliyyətin səmərəli təşkili üçün parlamentin Hərbi komissiyası yaradılmışdı və qanunlar bu komissiya tərəfindən müzakirələrə hazırlanırdı.

- Çox qısa bir müddət ərzində formalaşmış Cümhuriyyət ordusu dövlətimizin müdafiəsi, torpaqlarımızın bütövlüyü uğrunda hansı nailiyyətlərə nail ola bildi?

- Xalq Cümhuriyyətinin elan olunduğu gündən onun silahlı müdafiəsinə tarixi zərurət yaranmışdı. Lakin həm müstəqilliyimiz, həm də xalqımızın mövcudluğuna yönəlmiş təhlükənin qarşısının alınması üçün kifayət qədər yetərli müdafiə qüvvələri hələ yox idi. Odur ki, hökümət qardaş Osmanlı dövlətindən hərbi yardım istəmək məcburiyyətində qaldı. Hər iki ölkənin hərbi qüvvələrinin bazasında yaradılan Qafqaz İslam Ordusu 1918-ci ilin iyun-sentyabr ayları ərzində uğurlu döyüş əməliyyatları nəticəsində Qarabağı, Azərbaycanın digər işğal olunmuş ərazilərini və Bakı şəhərini erməni-daşnak qüvvələrindən azad etdi, bu bölgələrdə hökümətin nəzarətini bərqərar etdi.

Məlum tarixi səbəblərə görə, Qafqaz İslam Ordusu ləğv edildikdən sonra müstəqilliyimizin və ərazi bütövlüyümüzün müdafiəsi bütünlüklə milli qüvvələrin üzərinə düşdü. 1919-cu ilin yazından həmin ilin sonuna qədər Denikin qoşunlarının hücum təhlükəsinin qarşısının alınması üçün Cümhuriyyət ordusu çox ciddi sınaqlarla qarşılaşmalı oldu. Ölkənin şimal sərhədlərində hərbi qüvvələr cəmləşdirildi, Bakı və Abşeron yarımadasının müdafiə sistemi yaradıldı. Eyni zamanda, erməni-daşnak təcavüzkarlığına qarşı lazımi tədbirlər həyata keçirildi. 1919-cu ilin avqustunda ordu qüvvələri Lənkəran istiqamətində hərbi yürüş edərək bu bölgəni müstəqilliyə yad qüvvələrdən təmizlədi, həmin ilin noyabr ayında isə Zəngəzurda erməni-daşnak qüvvələrinə qarşı uğurlu döyüş əməliyyatı keçirildi.

Nəhayət, 1920-ci ilin Novruz bayramı günləri Qarabağa kütləvi hücum təşkil etmiş düşmən qüvvələrinin təcavüzünün qarşısının alınması... Səməd bəy Mehmandarovun və onun həmkarlarının fədakarlığı nəticəsində bu bölgə bütünlüklə erməni-daşnak qüvvələrindən təmizləndi və Qarabağın Azərbaycandan qoparılmasına imkan verilmədi. Amma çox təəssüf ki, Cümhuriyyətin əsas hərbi qüvvələrinin Qarabağ cəbhəsinə cəlb edilməsi, buradakı döyüşlərdə verilən itkilərin bərpasına vaxt qalmaması şimaldan başlanan bolşevik işğalının qarşısının alınmasını mümkünsüz etdi. 1920-ci ilin aprelində Azərbaycan Xalq Cümhuriyyəti süqut etdiyi kimi, onun ordusunun təşkilatlanmasına da son qoyuldu...

- Nəhayət, tale Azərbaycan xalqının üzünə bir də yetmiş il sonra güldü...

- Bəli, imperiya siyasəti uzun onilliklər ərzində xalqımızın qəlbində yaşayan suverenlik arzusunu söndürə bilmədi. Ötən əsrin 80-ci illərinin sonlarında başlanan milli azadlıq hərəkatı müstəqilliyimizin bərpası ilə başa çatdı. Milli dövlət quruculuğu işlərinə başlanıldı. Bu sırada Azərbaycan Silahlı Qüvvələrinin yaradılması da önəmli yer tuturdu. Lakin təəssüf ki, o dövrkü hakimiyyətin səriştəsizliyi üzündən bu sahədə səmərəli işlərin görülməsi mümkün olmadı. Bir tərəfdən qonşu Ermənistanın ölkəmizə qarşı apardığı işğalçılıq siyasəti, digər tərəfdən isə ölkədə yaranmış hakimiyyət boşluğu, anarxiya, hərc-mərclik, özbaşınalığın hökm sürməsi və s...

Azərbaycanda əsl ordu quruculuğu prosesinin başlanması ulu öndər Heydər Əliyevin adı ilə bağlıdır. 1993-cü ilin iyun ayında xalqın təkidli tələbi ilə onun hakimiyyətə qayıdışı həm Azərbaycan dövlətçiliyini, həm də Azərbaycan ordusunu süqutdan xilas etdi. Həmin il noyabrın 2-də ümummilli liderin radio və televiziya ilə xalqa müraciəti ictimaiyyət arasında geniş rezonans doğurdu. Daha sonra Əfqanıstan veteranları, müxtəlif ictimai birliklərin, xalqın müxtəlif təbəqələrinin nümayəndələri ilə görüşlər bu işdə böyük bir canlanmaya səbəb oldu. Beləliklə, Rusiyadan, digər MDB ölkələrindən milli zabit kadrları respublikamıza qayıtdı. Yüzlərlə, minlərlə vətənpərvər oğul könüllü olaraq ordu sıralarına yazıldı.

Bu dövrdə ümummilli lider Heydər Əliyev tərəfindən ordu quruculuğunun əsaslandırılmış siyasəti hazırlandı. Orduya vahid və mərkəzləşdirilmiş rəhbərlik təmin edildi, bu proses dövlət rəhbərliyinin ciddi nəzarəti altına götürüldü, ordudakı yararsız idarəetmə strukturları, o cümlədən siyasi qüvvələrin nəzarəti altında olan hərbi strukturlar ləğv edildi, xalqın potensial gücü orduya istiqamətləndirildi. Ordunun sağlamlaşdırılması siyasəti bütün xalq tərəfindən dəstəkləndi və bu siyasətin nəticəsi dərhal özünü göstərməyə başladı. Belə ki, 1994-cü il yanvar ayının əvvəllərində Azərbaycan Ordusunun yenidən formalaşdırılan qüvvələri Füzuli rayonu ərazisində hücuma keçərək 42 km-lik məsafədə torpaqlarımızı və Horadiz qəsəbəsi də daxil olmaqla 22 yaşayış məntəqəsini düşmən tapdağından azad etdi.

Atəşkəsin əldə edilməsi ordu quruculuğunun ahəngdarlığına zəmin yaratdı və bu prosesin səmərəliliyini daha da artırdı. Ordunun möhkəmləndirilməsi üçün lazımi tədbirlər görüldü. Bu siyasətin həyata keçirilməsinin əməli işləri də məhz Heydər Əliyevin adı ilə bağlıdır. Ordunun maddi-texniki təminatına diqqət artırıldı, onun beynəlxalq əlaqələri gücləndirildi, kadr hazırlığı dünya standartları səviyyəsinə qaldırıldı. Ulu öndər tərəfindən Azərbaycanda milli hərbi təhsilin mükəmməl sistemi yaradıldı, ordu daxilindəki islahatlar dərinləşdirildi. Əslində Heydər Əliyev yeni, müasir ordu quruculuğu prosesinin əsasını qoydu, onun istiqamətlərini müəyyənləşdirdi. Bu siyasətin dövlət tərəfindən fəaliyyət proqramına çevrilməsi və xalqın dəstəyi ilə qarşılanması Azərbaycanda yeni və güclü bir ordunun təməlini qoydu.

Əsası ulu öndər Heydər Əliyev tərəfindən qoyulmuş ordu quruculuğu siyasətinin onun layiqli davamçısı, Azərbaycan Prezidenti, Ali Baş Komandan İlham Əliyev tərəfindən yaradıcı şəkildə davam etdirilməsi bugünkü güclü Azərbaycan Ordusunun yaradılmasına gətirib çıxardı...

- Azərbaycan Silahlı Qüvvələrinin beynəlxalq əlaqələri barədə nə demək olar?

- Bu əlaqələrin yaranma tarixi 1990-cı illərin ortalarına gedib çıxır. Belə ki, 1994-cü il may ayının 4-də ulu öndər Heydər Əliyevin “Sülh Naminə Tərəfdaşlıq” Çərçivə sənədini imzalaması ilə Azərbaycanla NATO arasında əməkdaşlığın əsası qoyulmuşdur. Bu əməkdaşlığın davamı olaraq 1996-cı ildə “Planlaşdırma və analiz prosesi Proqramı”na, 2001-ci ildə isə “Fərdi Tərəfdaşlıq üzrə Əməliyyat Planı”na qoşulmağımız ölkəmizdə ordu quruculuğu prosesinin sürətlə təkmilləşdirilməsinə, Silahlı Qüvvələrimizin modernləşdiril- məsinə, müasir beynəlxalq standartlara uyğunlaşdırılmasına təkan vermişdir. Minlərlə hərbçimiz adıçəkilən və digər proqramlar çərçivəsində keçirilən əməkdaşlıq tədbirlərində yaxından iştirak etmiş, ən son hərbi yenilikləri və döyüş texnikalarından istifadə qaydalarını mənimsəmişlər. Yeri gəlmişkən, 1997-ci ildən etibarən ölkəmizin hərbi təhsil müəssisələri NATO standartlarına uyğunlaşdırılmışdır.

Azərbaycan Silahlı Qüvvələrinin bölmələri çoxmillətli qüvvələrin tərkibində Kosovo vilayətində, İraqda və Əfqanıstanda keçirilən beynəlxalq sülhyaratma əməliyyatlarında iştirak etmişdir. Öz missiyasını lazımi səviyyədə yerinə yetirən hərbçilərimizin xidməti NATO rəhbərliyi tərəfindən yüksək qiymətləndirilmişdir.

Son illər ərzində Silahlı Qüvvələrimizin beynəlxalq əlaqələri kifayət qədər genişlənmişdir. Müdafiə Nazirliyi Avro-Atlantik strukturları ilə, ikitərəfli və çoxtərəfləri formatda region və regiondankənar ölkələrlə, beynəlxalq hərbi-siyasi təşkilatlar və xarici dövlətlərin müdafiə-sənaye kompleksləri ilə davamlı şəkildə əməkdaşlıq edir. 30-dan artıq ölkə ilə hərbi əməkdaşlıq sahəsində hökümətlərarası və qurumlararası yeni hüquq-müqavilə sənədləri imzalanmış, bəzi ölkələrlə isə oxşar müqavilə sənədlərinin imzalanmasına dair müzakirələr aparılır. Bir sıra xarici ölkələrlə uğurlu ikitərəfli əməkdaşlıq qurulmuşdur. Onların arasında Türkiyə Cümhuriyyət xüsusi yet tutur.

- Təqdirəlayiq bir hal kimi, Silahlı Qüvvələrimizin yerli istehsal olan döyüş silahları ilə təmin edilməsi istiqamətində görülən işlərdən danışmaq da yerinə düşərdi...

- Müharibə şəraitində yaşayan ölkənin öz müdafiə potensialını gücləndirməsi təbii və zəruri bir prosesdir. Bu məsələ daim dövlətimizin diqqət mərkəzindədir. Ordumuzun xaricdən alınan müasir, modern silah və texnika ilə təmin olunması nə qədər vacibdirsə, bu istiqamətdə yerli istehsalın təşkili də o qədər əhəmiyyətlidir. Fəxrlə deyə bilərik ki, bu gün silah arsenalımız həm də ölkə istehsalı olan ən müasir silah və texnikalarla zənginləşdirilməkdədir. Bu məqsədlə hələ 2006-cı ilin sonlarında yaradılan müdafiə sənayesi qısa müddət ərzində sürətli inkişaf yolu keçmiş, silah və texnika istehsalı sahəsində ən son texnologiyalar mənimsənilmişdir. Hazırda Müdafiə Sənayesi Nazirliyinin 20-dən artıq müəssisəsində 1200-dən çox hərbi təyinatlı məhsul istehsal edilir. Ordumuzun ehtiyacının mühüm bir qismi məhz bu məhsullar hesabına ödənilir.

Sevindirici haldır ki, Azərbaycan hazırda həm də silah və hərbi təyinatlı məhsul ixrac edən ölkəyə çevrilmişdir. Müdafiə sənayemizin məhsulları respublikamızda keçirilən ADEX-2014, ADEX-2016, ADEX-2018 sərgilərində müntəzəm nümayiş etdirilmişdir. Eyni zamanda, bu silahlara xarici ölkələrdə keçirilmiş sərgi-yarmarkalarda da geniş maraq göstərilir.

Yeri gəlmişkən qeyd edək ki, Silahlı Qüvvələrimizin ildönümü ərəfəsində Müdafiə Sənayesi Nazirliyi Moskvada RF Müdafiə Nazirliyinin təşkilatçılığı ilə keçirilən “ARMY-2019” Beynəlxalq Hərbi-Texniki Forumunda iştirak etdi. Dünyanın ən böyük silah və hərbi texnika sərgilərindən birinə çevrilən bu forumda ölkəmiz ilk dəfə stendlə təmsil olunaraq hərbi məhsullarını nümayiş etdirdi. Bu məhsullar əsasən ixracyönümlü məhsullardır. Onu da nəzərə çatdıraq ki, “ARMY-2019” sərgisi Müdafiə Sənayesi Nazirliyinin son iki ayda stendlə təmsil olunduğu üçüncü beynəlxalq sərgi idi. Bu ilin aprel-may aylarında Müdafiə Sənayesi Nazirliyi Türkiyədə “İDEF-2019” və Belarusda “MİLFX-2019” sərgisində hərbi təyinatlı məhsullarını nümayiş etdirib.

- Mehman müəllim, Silahlı Qüvvələrimizin bugünkü döyüş hazırlığı səviyyəsini necə qiymətləndirərdiniz?

- Tam əminlikə demək olar ki, bu gün Azərbaycan Ordusu özünün şərəfli tarixini, əsl yüksəliş dövrünü yaşayır. Ölkəmiz hərtərəfli inkişaf etmiş güclü dövlət olduğu kimi, güclü də ordu yarada bilmişdir. Silahli Qüvvələrimizin maddi-texniki bazası tamamilə yenilənmiş, ən müasir silah və texnika ilə təchiz olunmuş və bu proses hazırda da davam etməkdədir. Müdafiə Nazirliyinin döyüş hazırlığı planına uyğun olaraq keçirilən hərbi təlimlər ordunun şəxsi heyətinin müasir döyüşlərin ən mürəkkəb tapşırıqlarını yüksək səviyyədə yerinə yetirməyə qadir olduğunu nümayiş etdirir, ordunun döyüş qabiliyyətini və peşəkarlığını artırır, yeni silah sistemlərindən və döyüş texnikasından istifadə bacarığını daha da təkmilləşdirir.

Azərbaycan Prezidenti İlham Əliyevin rəhbərliyi altında ulu öndər Heydər Əliyev tərəfindən əsası qoyulmuş ordu quruculuğu siyasətinə yaradıcı yanaşılmasının və bu prosesin dövlətin iqtisadi imkanları ilə düzgün uzlaşdırılmasının nəticəsidir ki, hazırda Azərbaycan Ordusu dünyanın ən güclü orduları sırasındadır. Bunu beynəlxalq ekspertlər də təsdiq edirlər. Cənab İlham Əliyevin prezidentliyi dövründə hərbi büdcəmiz 15 dəfədən çox artmışdır. Milli ənənələrə dayanmaqla dünya təcrübəsinin öyrənilməsi, NATO kimi hərbi-siyasi qurumla, eləcə də bir sıra digər ölkələrlə hərbi sahədə əməkdaşlığın uğurla davam etdirilməsi ordumuzun gücünü və təcrübəsini daha da artırmışdır. Heç də təsadüfi deyil ki, 2016-cı ilin aprelində erməni hərbi qüvvələrinin təxribatlarına cavab verərkən Azərbaycan Ordusunun hissə və bölmələri çox mühüm qələbə əldə etdilər. 2018-ci ilin mayında bu uğurlar davam etdirilərək Naxçıvan Muxtar Respublikasının düşmən nəzarətində olan 11 min hektar torpaq sahəsi işğaldan təmizləndi.

Bu uğurlar əslində, Azərbaycan Ordusunun böyük uğurlarının başlanğıcıdır. İndi kimsədə şübhə yoxdur ki, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında inkişafının zirvəsində olan Azərbaycan Ordusu ölkəmizin işğal altında olan bütün ərazilərini azad etməyə qadirdir.

- Hazırda islahatlar dövrünü yaşayan ölkəmizdə həyatın bütün sahələrində mühüm dəyişikliklər baş verməkdədir. Bu islahatlar yəqin ki, Silahlı Qüvvələrimizdən də yan keçmir...

- Bəli, ordumuzda davam edən islahatlar artıq yekunlaşmaq üzrədir. Əldə edilən nəticələr həm Azərbaycan xalqı, həm də Prezident, Silahlı Qüvvələrin Ali Baş Komandanı İlham Əliyev tərəfindən yüksək qiymətləndirilir. Müdafiə naziri, general-polkovnik Zakir Həsənovun bəyan etdiyi kimi, Azərbaycan ordusu yeni, müasir silahlarla artıq tam şəkildə təmin edilib. 2019-cu ildə aparılan islahatların əsas istiqamətlərindən biri, ordunun idarə olunmasının təkmilləşdirilməsidir. Bu sahədə qarşıya qoyulan mühüm vəzifə bütün hissə və birləşmələrin fasiləsiz, məxfi, operativ şəkildə idarə olunmasını təmin etməkdir. Məqsədə nail olunması üçün ən müasir texnika bu işlərə cəlb edilir, müasir komanda-idarəetmə sistemi qurulur. İndi ordunun hərbi hissələri “onlayn” qaydada idarə edilir. Artıq tabor səviyyəsinə qədər olan bölmələrdə “onlayn” idarəetmə tətbiqinə nail olunmuşdur. Azərbaycan Ordusu aparıcı dövlətlərin təcrübəsindən və texnikasından istifadə edərək bu məsələnin böyük ölçüdə həllini təmin edib.

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev dəfələrlə bəyan etmişdir ki, biz ordunun inkişafı üçün lazım olan işləri bundan sonra da davam etdirəcəyik.

Müsahibəni apardı:

Səfər MAHMUDZADƏ,

Respublika2019.- 28 iyul.- S.6