Mənalı və şərəfli alim ömrü

Yaşadıqları ömür payında elm adamları dünyaya saçdıqları işığın nuruyla bəşəriyyəti həqiqətin, ədalətin və xoşbəxtliyin yolunda aydınlığa çıxarırlar. Bu günlərdə cəmiyyətimizin belə işıqlı ziyalılarından biri – ömrünü, illərini elmə, təhsilə, təlim-tərbiyəyə həsr etmiş kamil insan Azərbaycan Dövlət Aqrar Universitetinin Epizootologiya, Mikrobiologiya və Parazitologiya kafedrasının müdiri, baytarlıq üzrə fəlsəfə doktoru, dosent Zahir Ələsgərovun anadan olmasının 60, elmi-pedaqoji fəaliyyətinin isə 35 ili tamam olur. Bu elm fədaisinin fəaliyyətində və nailiyyətlərində, uğur qazanmasının kökündə gərgin zəhməti, yorulmaz axtarışları, böyük istedadı və qabiliyyəti əsas amillərdən olmuşdur. Geniş erudisiyaya malik Zahir müəllimin bu yazıda əmək fəaliyyətindən, mənalı həyat yolundan söhbət açacağıq.

Zahir Ələsgərov Qərbi Azərbaycanın Basarkeçər rayonunun Kiçik Məzrə kəndində sayılıb-seçilən ziyalı ailəsində dünyaya göz açıb. Rayonun ən nümunəvi məktəbi olan, hər il məzunlarının 95 faizdən çoxu nüfuzlu ali məktəblərə daxil olan Molla Pənah Vaqif adına Kiçik Məzrə kənd tam orta məktəbini əla qiymətlərlə bitirən Zahir, 1979-cu ildə Səməd Ağamalıoğlu adına Az. KTİ-nin (indiki ADAU) baytarlıq fakültəsinə daxil olmuş, 1984-cü ildə Baytarlıq ixtisası üzrə tam kursu fərqlənmə diplomu ilə bitirmişdir. Gecə-gündüz çalışmağının, hazırlaşmağının mükafatı olaraq, elə həmin il, institutun Epizootologiya, Mikrobiologiya və Virusologiya kafedrasının nəzdində, əyani təhsil üzrə məqsədli aspiranturaya daxil olmuş və elmi axtarışlarını davam etdirmişdir. Alimin aktual elmi problemin həlli yollarında apardığı səmərəli işlər tezliklə öz bəhrəsini vermiş, 1988-ci ildə namizədlik dissertasiyasını müvəffəqiyyətlə müdafiə edərək, baytarlıq üzrə fəlsəfə doktoru alimlik dərəcəsinə layiq görülmüşdür. Fitri istedadı ilə fərqlənən gənc alim rəhbərliyin və kollektivin diqqətini cəlb etmiş, Epizootologiya, Mikrobiologiya və Parazitologiya kafedrasına assistent vəzifəsinə seçilmişdir. Qısa müddət ərzində gənc alimin səmərəli elmi-pedaqoji fəaliyyəti yüksək qiymətləndirilərək 1993-cü ildə dosent elmi vəzifəsi verildi. Zahir müəllim pedaqoji fəaliyyətə başladığı vaxtdan etibarən “Baytarlıq Mikrobiologiyası”, “Baytarlıq İmmunologiyası” və “Epizootologiya və infeksion xəstəliklər” fənlərini tələbələrə sevə-sevə tədris edir, tələbələrin peşəkar kadr kimi yetişməsində var qüvvəsi ilə çalışır.Yüksək təşkilatçı imici, müasir düşüncə tərzi və yorulmaz tədqiqatçı əzmi ilə diqqəti çəkən Zahir Ələsgərov 1996-2000-ci illər ərzində Baytarlıq təbabəti və zoomühəndislik fakültəsinin dekan müavini vəzifəsinə seçilir. İşlədiyi dövrdə müəllim və tələbələrin dərin hörmətini qazanmış, tələbələrin elmi, pedaqoji fəaliyyətlərində və müstəqil işlərində həmişə yardımçı olmuş, tələbələrin sevimlisinə çevrilmişdir. Zahir Ələsgərova böyük etimad göstərilərək, 2000-ci ildə Epizootologiya, Mikrobiologiya və Parazitologiya kafedrasının müdiri vəzifəsinə təyin edilmiş və bu gün də həmin vəzifədə uğurla fəaliyyət göstərir. Tanınmış alim baytarlıq elminin aktual problemlərinə həsr olunmuş beynəlxalq elmi konfransların, simpozium və seminarların, həmçinin konqreslərin işində maraqlı elmi məruzələrlə çıxış etmiş və müvafiq sertifikatlar almışdır. Belə ki, Z.Ələsgərov 2009-cu ildə Türkiyə Cümhuriyyətinin İstanbul şəhərində, Ümumdünya Heyvan Sağlamlığı Təşkilatının təşkil etdiyi Beynəlxalq Konqresdə, Fransanın Paris şəhərində Ümumdünya Baytarlıq Konqresində, Gürcüstan Respublikasının Tbilisi şəhərində “Mühüm Təhlükəli İnfeksion xəstəliklərin diaqnostikası” mövzusuna həsr olunmuş Beynəlxalq Regional Elmi seminarda elmi məruzə ilə çıxış edərək, müvafiq sertifikatlarla təltif olunmuşdur. O, 26 aprel-11 may 2011-ci ildə, Norveçin Oslo şəhərində, Norveç Təbiət Elmləri Universitetində təqdim etdiyi “Heyvanların Brusellyozunun öyrənilməsi” layihəsinin təqdimatı ilə əlaqədar, elmi ezamiyyədə olmuş, Avrasiya bankı tərəfindən maliyyələşdirilən, həmin layihəyə 2011-2014-cü illərdə rəhbərlik etmişdir.

Tanınmış alim 2014-cü ildə Türkiyənin İstanbul şəhərində Beynəlxalq VET İstanbul Konqresində elmi məruzə ilə çıxış etmiş, 2015-ci ildə Türkiyənin Konya şəhərinə, Selçuk Universitetinə, Mövlana proqramı çərçivəsində dəvət alaraq mühazirələr oxumuş, “Təşəkkürnamə” ilə təltif edilmişdir. 20 may 2010-cu ildə ölkə Prezidentinin müvafiq sərəncamı ilə fəaliyyəti yüksək mükafatlandırılaraq “Azərbaycan Respublikasının qabaqcıl təhsil işçisi” döş nişanı ilə təltif edilmişdir.

Zahir müəllim, respublikamızın ictimai-siyasi həyatında, həmişə fəal rol oynamış və əsl vətəndaşlıq mövqeyi nümayiş etdirmişdir.O, Prezident seçkilərində məntəqə seçki komissiyasının sədri kimi, eyni zamanda seçkilərdə Yeni Azərbaycan Partiyasının nümayəndəsi olaraq nümunəvi fəaliyyət göstərmişdir.

O, 120-dən çox elmi əsərin müəllifidir. Sanballı kitab və monoqrafiyaları Azərbaycan Respublikası Təhsil Nazirliyi tərəfindən ali məktəb tələbələri üçün dərslik və dərs vəsaiti kimi təsdiq edilmişdir.

Onun “Epizootologiya” (dərslik) - Bakı, 1998 (278 səhifə), “Kənd təsərrüfatı heyvanlarının infeksion xəstəliklərinin diaqnostikası və profilaktikasında işlədilən bioloji preparatlar” (dərs vəsaiti) - Gəncə, 2002 (180 səhifə), “İnsanlar üçün təhlükəli heyvan xəstəlikləri” (dərslik)- Bakı, 2006 (295 səh.), “Baytarlıq virusologiyası” (dərslik) - Bakı, 2009 (415 səhifə), “Antropozoonoz xəstəliklər” (dərslik) - Bakı, 2016 (520 səhifə), “Kənd təsərrüfatı heyvanlarında immunitetin əsasları” - Bakı, 1992 (225 s.), “Qoyunların infeksion xəstəlikləri” - Bakı, 1995 (275 səhifə) kitabları tələbələrin istifadəsindədir. Qeyd edilənlərlə yanaşı, ali təhsilin bakalavr və magistratura səviyyəsində tədris olunan müvafiq fənlər üzrə 16 fənn proqramının, 4 metodik göstərişin müəllifidir. Eyni zamanda “Kənd təsərrüfatı heyvanları və quşlarının infeksion xəstəliklərinin diaqnostikası, profilaktikası və müalicəsinə dair” elmi-texniki şura tərəfindən təsdiq edilmiş müvafiq təlimat və elmi tövsiyələrin müəllifidir.

Elmi əsərlərinin bir qismi Türkiyə, Rusiya, Belarus, Ukrayna, Gürcüstan, Hindistan və s. ölkələrdə nəşr olunmuşdur.

Baytarlıq üzrə fəlsəfə doktoru, dosent Zahir Ələsgərov bu gün səmərəli elmi-tədqiqat işi ilə məşğul olur. Baytarlıq sahəsində milli kadrların hazırlanması işinə layiqli töhfələr vermiş, çoxsaylı magistr dissertasiyaları işinin elmi rəhbəri olmuşdur. Bir çox doktorantların yerinə yetirdikləri dissertasiya işlərinə, aparıcı təşkilat qismində kafedrada müzakirə edərək rəy vermiş və eyni zamanda rəsmi opponent olmuşdur. Alimin apardığı elmi-tədqiqat işinin əsas istiqaməti “Qoyunların Salmonellyozuna qarşı baytarlıq-sanitariya tədbirləri kompleksinin işlənməsi” probleminə yönəlmişdir.

Zahir müəllimin, insanlarla ünsiyyət mədəniyyəti, təmkini, tələbkarlığı, iradəsi, nikbinliyi, gələcəyə inam hissi çoxları üçün örnək sayıla bilər. Bu keyfiyyətlər onun yüksək təvazökarlığı ilə tamamlanır. Zahir müəllim nümunəvi ailə başçısıdır. Onun şərəfli yolunu davam etdirən iki övladı var. Görkəmli alim sanballı elmi yaradıcılığı, vətənpərvər fəaliyyəti ilə örnək olan yubilyarımıza möhkəm cansağlığı, müqəddəs peşə sahibi kimi bundan sonrakı fəaliyyətində də yeni-yeni uğurlar arzulayırıq.

Zabit XƏLİLOV

Respublika.- 2020.- 8 avqust.- S.7.